1. Eia kekahi, i ke au ia Ahaza ke keiki a Iotama, ke keiki a Uzia, ke alii o ka Iuda, hele mai o Rezina, ke alii o Suria, a me Peka ke keiki a Remalia, ke alii o ka Iseraela, e kaua ku e ia Ierusalema, aole nae i hiki ke lanakila maluna o ia wahi.

2. A ua hai ia mai la i ko ka hale o Davida, i ka i ana, Ua kuikahi o ko Suria me ko Eperaima. Alaila haalulu kona naau, a me na naau o kona poe kanaka, e like me ka haalulu ana o na laau o ka ululaau imua o ka makani.

3. Alaila, i mai la o ka Haku ia Isaia, O hele aku, ano, e halawai me Ahaza, ooe, a me Seariasuba kau keiki, ma ka welau o ka auwai o ka waipuna ma ke alanui o ke kula kopa lole;

4. A e i aku oe ia ia, E ao oe, a e noho malie; mai makau, mai maule kou naau no na welowelo alua o keia mau momoku ahi, no ka huhu o Rezina me ko Suria, a me ke keiki a Remalia.

5. No ka mea, ua kukakuka ino o ko Suria, ko Eperaima, a me ke keiki a Remalia, e ku e ia oe, i ka i ana ae,

6. E pii ku e kakou ia Iuda, a e hoopilikia aku ia wahi, a e mahele ia wahi no kakou a e hoonoho i alii iwaena olaila, oiaio, ke keiki a Tabeala;

7. Penei wahi a ka Haku ke Akua, aole e ku keia, aole hoi ia e hana ia.

8. No ka mea, o ke poo o Suria, o Dameseko ia, a o ke poo o Dameseko, o Rezina no; a maloko o na makahiki he kanaonokumamalima, e wawahi ia o Eperaima, i aupuni ole ia.

9. A o ke poo o Eperaima o Samaria ia, a o ke poo o Samaria, oia ka Remalia keiki. I ole ai oukou e manaoio i keia, oiaio, aole oukou e hookupaa ia.

10. Olelo hou mai la ka Haku ia Ahaza, i ka i ana:

11. E nonoi oe i hoailona nou, mai ka Haku kou Akua mai; e nonoi ma ka hohonu, a ma kahi kiekie paha.

12. Aka, i aku la o Ahaza, Aole au e noi, aole hoi au e aa aku i ka Haku.

13. A i mai la ia, E hoolohe oukou, e ko ka hale o Davida; he mea uuku anei ia oukou ke hoopaupauaho i kanaka, aka e hoopaupauaho pu hoi anei oukou i koʻu Akua?

14. Nolaila, na ka Haku ponoi e haawi mai ia oukou i hoailona: Aia hoi, e hapai auanei kekahi wahine puupaa, a e hanau mai ia i keiki, a e kapa aku i kona inoa o Imanuela.

15. O ka waiu bata a me ka meli kana e ai ai, i ike oia e hoole i ka hewa, a e koho i ka pono.

16. No ka mea, mamua o ka ike ana o ke keiki e hoole i ka hewa a e koho i ka pono, e neoneo e ka aina aʻu i hoowahawaha ai i kona mau alii elua.

17. Na ka Haku no e hoopuka mai maluna ou, a maluna hoi o kou poe kanaka, a maluna o ko ka hale o kou makuakane, i na la i hiki ole mai ai mamua, mai ka la mai o ko Eperaima haalele ana i ka Iuda, ke alii i o Asuria.

18. A e hiki mai ma kela la, na ka Haku no e kahea aku i na nalo e noho ana ma na welau loa o Aigupita, a no ka nalo hopeeha ma ka aina o Asuria.

19. A e hele mai hoi lakou, a e kau mai lakou a pau ma na awawa olohelohe, a ma na lua o na pohaku, a maluna o ka nahele ooi, a maluna o na laau haahaa a pau.

20. Ia la la hookahi no na ka Haku no e kahi me ka pahi umiumi i hoolimalima ia, me ka poe ma kela aoao o ka muliwai, me ke alii o Asuria, i ke poo, a me ka huluhulu o na wawae; a e hoopau auanei ia i ka umiumi.

21. A e hiki mai i kela la, e hanai ke kanaka i ka bipi ohi, a me na hipa elua;

22. A e hiki mai keia, no ka nui loa mai o ka waiu a lakou e haawi mai ai, e ai oia i ka waiu bata; no ka mea, e ai io no kela mea keia mea i koe ma ka aina, i ka waiu bata a me ka meli.

23. A e hiki mai ma ia la, o kela wahi keia wahi, o kahi i ulu ai na kumuwaina he tausani ma na kala he tausani, e lilo ai ia wahi i ka nahele ooi a me ka laau kalakala.

24. Me na pua a me na kakaka e hele ai na kanaka ilaila; no ka mea, e nahelehele ana ka aina a pau i ka laaukalakala a me ka nahele ooi.

25. A o na puu a pau i olaolao ia i ka oo, aohe e hiki ilaila ka makau i na laaukalakala a me na nahele ooi; aka, he wahi ia no ka hoouna ana aku i na bipi, a no ka hahi ana hoi o na holoholona uuku ae.