1. Ano, aia hoi, e oʻu poe hoahanau i aloha ia, ke makemake nei au e olelo ia oukou; no ka mea, aole owau, o Nepai, e ae aku ia oukou e manao ua oi aku ko oukou pono i ko ka poe Genetile. No ka mea, aia hoi, ke ole oukou e malama pono i na kauoha a ke Akua, e pau like ai oukou i ka make; a no na olelo i olelo ia, he mea pono ole ia oukou ke manao e hoopau loa ia ana ka poe Genetile.

2. No ka mea, ke i aku nei au ia oukou, o ka poe Genetile i mihi, o lakou no ka poe kanaka berita o ka Haku; a o ka poe Iudaio i mihi ole, e hoolei ia aku auanei lakou; no ka mea, aole e hana berita ka Haku me kekahi mea koe wale no ka poe i mihi a manaoio i kana Keiki, oia no ka Mea Hemolele o ka Iseraela.

3. Ano, ke makemake nei au e wanana aku i kekahi mau mea e ae no ka poe Iudaio a me ka poe Genetile. No ka mea, mahope iho o ka puka ana aku o ua buke la aʻu i olelo ai, a i palapala ia i ka poe Genetile, a i sila hou ia i ka Haku, e manaoio kekahi poe he nui loa i na olelo i palapala ia; a e halihali aku lakou ia mau mea i ke koena o ka kakou poe hua.

4. Alaila, e ike ke koena o ka kakou hua i na mea no kakou, no ka puka ana mai o kakou mai Ierusalema mai, a he poe mamo lakou na ka poe Iudaio.

5. A e hai ia aku ka euanelio o Iesu Kristo iwaena o lakou; nolaila, e hoihoi hou ia auanei lakou i ka ike no na kupuna o lakou, a i ka ike hoi no Iesu Kristo a na kupuna o lakou i loaa ai.

6. Alaila, e hauoli lakou; no ka mea, e ike lakou he pomaikai ia no lakou mai ka lima mai o ke Akua; a e hoomaka ko lakou mau unahi o ka pouli e haule mai ko lakou mau maka aku; aole he nui na hanauna e hala mai iwaena aku o lakou, a e pau lakou i ka lilo i lahuikanaka keokeo a oluolu.

7. Eia kekahi, o ka poe Iudaio i hoopuehu ia, e hoomaka no lakou e manaoio ia Kristo; a e hoomaka lakou e houluulu maluna o ka ili o ka aina; a o ka poe e manaoio ia Kristo, e lilo no hoi lakou i lahuikanaka e olioli ai.

8. Eia kekahi, e hoomaka no ka Haku ke Akua i kana hana, iwaena o na lahuikanaka a pau, na ohana, na olelo, a me na kanaka, e hooko mai i ka hoihoi hou ia ana o kona poe kanaka ma ka honua.

9. A me ka pono e hookolokolo ai ka Haku i ka poe ilihune, a e hoohewa me ka pololei no ka poe akahai o ka honua; a e hahau no ia i ka honua me ka laau o kona waha; a e luku no ia i ka poe hewa, me ka ha ana o kona mau lehelehe;

10. No ka mea, e wikiwiki mai ana ka manawa, e hana ai ka Haku ke Akua i mahele nui iwaena o na kanaka; a e luku no oia i ka poe hewa; a e hoopakele oia i kona poe kanaka, oiaio, ina ma o ke ahi la kona luku ana aku i ka poe hewa.

11. A o ka pono no ke kaei o kona puhaka, a o ka oiaio hoi ke kakoo o kona kikala.

12. Alaila, e noho pu ka iliohae me ke keikihipa, a e moe pu ka leopadi me ke keikikao; a o ke keikibipi a me ka liona hou, a me ka mea kupalu ia, ma kahi hookahi; a na ke keiki uuku lakou e alakai.

13. A e ai pu ka bipi wahine a me ka bea; a e moe pu ka laua mau keiki; a e ai ka liona i ka mauu maloo me he bipi la.

14. A e paani no ke keiki omo waiu ma ka lua o ka moomake, a e kau no ke keiki i ukuhi ia i kona lima, ma ka lua o ka moopepeiaohao.

15. Aole lakou e hoeha, aole hoi e luku ma koʻu mauna hoano a pau; no ka mea, e piha auanei ka honua i ka ike i ka Haku, e like me ka moana i uhi ia i ke kai.

16. Nolaila, e hoike ia auanei na mea o na lahuikanaka a pau; oiaio, e hoike ia mai na mea a pau i na keiki a kanaka.

17. Aohe mea huna i koe e hoike ole ia; aohe hoi kekahi hana o ka pouli i koe e ike ole ia ma ka malamalama; aohe hoi kekahi mea i sila ia maluna o ka honua e hoohemo ole ia auanei.

18. Nolaila, o na mea a pau i hoike ia i na keiki a kanaka e hoike ia ma ia la; aole mana hou o Satana maluna o na naau o na keiki a kanaka, no ka manawa loihi. Ano, e koʻu poe hoahanau i aloha ia, ke hooki nei au i kaʻu olelo.