1. Ano hoi, e koʻu poe hoahanau i aloha ia, ke manao nei au e noonoo ana oukou ma ko oukou mau naau no na mea e pono ai na oukou e hana, mahope iho o ko oukou komo ana iloko ma ke ala. Aka hoi, no ke aha la oukou e noonoo ai i keia mau mea ma ko oukou mau naau?

2. Aole anei oukou e hoomanao, i ka mea aʻu i i aku ai ia oukou, mahope iho o ko oukou loaa ana ka Uhane Hemolele, e hiki ia oukou ke olelo aku me ka olelo a na anela? Ano, pehea la e hiki ai ia oukou ke olelo aku me ka olelo a na anela, ina aole ma o ka Uhane Hemolele la?

3. Ke olelo la na anela ma ka mana o ka Uhane Hemolele; nolaila, ke olelo la lakou i na olelo a Kristo. Nolaila, i i aku ai au ia oukou, e ahaaina ma na olelo a Kristo; no ka mea, aia hoi, e hai no na olelo a Kristo i na mea a pau ia oukou, e pono ai oukou ke hana.

4. Nolaila, mahope iho o kaʻu olelo ana i keia mau olelo, ina e hiki ole ia oukou ke hoomaopopo ia mau mea, no ko oukou noi ole a no ko oukou kikeke ole ke kumu; no ia mea, aole oukou i lawe ia iloko o ka malamalama, aka e make ana no iloko o ka pouli.

5. No ka mea, aia hoi, ke i hou aku nei au ia oukou, ina oukou e komo iloko ma ke ala, a e loaa ia oukou ka Uhane Hemolele, e hoike no ia ia oukou i na mea a pau e pono ai oukou ke hana.

6. Aka hoi, o keia no ke ao ana a Kristo; aole hoi e haawi ia mai ke ao hou ana, a hiki i ka wa mahope iho o kona hoike ana ia ia iho ia oukou ma ke kino. A ia ia e hoike aku ai ia ia iho ia oukou ma ke kino, o na mea ana e olelo aku ai ia oukou, oia ka oukou e malama ai a e hana aku ai hoi.

7. Ano, ua hiki ole iaʻu, ia Nepai, ke olelo hou; ke hooki mai nei ka Uhane i kaʻu olelo ana, a ua waiho ia au e uwe aku no ka manaoio ole, a me ka hewa, a me ka naaupo, a me ka ai oolea o kanaka; no ka mea, aole lakou e imi i ka ike, aole hoi e hoomaopopo i ka ike nui, i ka wa i haawi ia mai ai ia ia lakou me ke akaka, oiaio, me ke akaka lea o ka olelo e hiki ai.

8. Ano, e koʻu poe hoahanau i aloha ia, ke ike nei au e noonoo ana oukou i keia manawa ma ko oukou mau naau; a ua hookaumaha ia au, oiai, he mea pono iaʻu ke olelo aku i keia mea. No ka mea, ina e hoolohe oukou i ka Uhane nana e ao i ke kanaka e pule, e ike oukou he mea e pono ai no oukou ke pule; no ka mea, aole e ao mai ana ka uhane ino i ke kanaka e pule, aka e ao ana ia ia e pule ole oia.

9. Aka hoi, ke i aku nei au ia oukou, e pule mau oukou, aole e hoonawaliwali, aole he mea pono no oukou e hana i kekahi mea i ka Haku, ke ole oukou e pule e mamua i ka Makua ma ka inoa o Kristo, nana e hoolaa mai i ka oukou hana ana ia oukou, i lilo ka oukou hana ana no ka pomaikai o ko oukou mau uhane.