1. O na olelo a Iakoba, ke kaikaina o Nepai, ana i olelo aku ai i ko Nepai poe:

2. Aia hoi, e oʻu mau hoahanau i aloha ia, owau o Iakoba, i kahea ia mai e ke Akua, a hoolilo ia mamuli o ke ano o kona aoao hoano, a i hoolaa ia e koʻu kaikuaana o Nepai, ka mea a oukou e nana nei me he mea la he alii a he mea hoomalu, ka mea a oukou e hilinai nei no ka maluhia, aia hoi, ua ike oukou ua olelo aku la au i na mea he nui loa ia oukou;

3. Aka hoi, ke olelo hou aku nei au ia oukou; no ka mea, e iini ana au i ka pomaikai o ko oukou mau uhane. Oiaio, ua nui koʻu pihoihoi no oukou; a ua ike oukou pela mau no koʻu ano. No ka mea, ua hooikaika au ia oukou me ka molowa ole; a ua ao aku la au ia oukou i na olelo a koʻu makuakane; a ua olelo aku la au ia oukou no na mea a pau i palapala ia, mai ka hookumu ia ana mai o ke ao nei.

4. Ano, aia hoi, ke makemake nei au e olelo aku ia oukou no na mea o keia wa, a me na mea e hiki mai ana; nolaila, e heluhelu no au ia oukou i na olelo a Isaia. A oia na olelo a koʻu kaikuaana i makemake mai ai iaʻu e olelo aku ia oukou. A ke olelo aku nei au ia oukou no ko oukou pomaikai, i ao ai oukou a e hoonani i ka inoa o ko oukou Akua.

5. Ano hoi, o na olelo aʻu e heluhelu ai, oia na olelo a Isaia i olelo mai ai no ko ka hale a pau o Iseraela; nolaila, e hiki ke hoohalike ia mau mea ia oukou; no ka mea, no ko ka hale o Iseraela oukou. A he nui na mea i olelo ia mai e Isaia, e hiki ke hoohalike ia oukou, no ka mea, no ko ka hale o Iseraela oukou.

6. Ano, eia na olelo: Penei wahi a ka Haku ke Akua: Aia hoi, e hapai no au i koʻu lima i ka poe Genetile, a e kau ae i koʻu hae i na lahuikanaka; a e lawe mai lakou i kau poe keikikane ma ko lakou mau lima, a e kaikai ia kau poe kaikamahine ma ko lakou mau poohiwi.

7. A e lilo na alii i poe makuakane hanai nou, a o na alii wahine a lakou i poe makuwahine hanai nou; a e kulou no lakou ia oe me na maka o lakou i ka honua, a e palu iho i ka lepo o kou mau wawae; a e ike auanei oe owau no ka Haku; no ka mea, o ka poe e kali iaʻu, aole lakou e hilahila.

8. Ano, ke makemake nei au, o Iakoba, e olelo aku i kahi mea no keia mau olelo; no ka mea, aia hoi, ua hoike mai la ka Haku iaʻu, ua pepehi ia a i lawe pio ia aku la ka poe i noho ma Ierusalema, mai kahi a kakou i hele mai nei;

9. Aka hoi, ua hoike mai la ka Haku iaʻu e hoi hou no lakou. A ua hoike mai la no hoi oia iaʻu, e hoike mai la ka Haku ke Akua, ka Mea Hemolele o ka Iseraela, ia ia iho ia lakou ma ke kino; a mahope iho o kona hoike ana ia ia iho, e hahau no lakou ia ia, a e kau ia ia ma ke kea, e like me na olelo a ka anela nana i hai mai ia mea iaʻu.

10. A mahope iho o ko lakou hoopaakiki ana i ko lakou mau naau, a hooolea ana i ko lakou mau ai e ku e i ka Mea Hemolele o ka Iseraela, aia hoi, e haule mai auanei na mea hoopai o ka Mea Hemolele o ka Iseraela maluna iho o lakou. A e hiki mai ana ka la e hahau ia ai lakou a e hoeha ia ai.

11. Nolaila, mahope iho o ko lakou kipaku ia ana i o a ia nei, no ka mea, penei i olelo ai ka anela, e hoopilikia ia kekahi poe he nui ma ke kino, aole nae e ae ia e make, no na pule a ka poe pono; e hoopuehu ia auanei lakou, a e pepehi ia, a e inaina ia; aka hoi, e aloha no ka Haku ia lakou, a i ka wa e loaa ai ia lakou ka ike no ko lakou Mea Hoolapanai, e houluulu hou ia lakou i ko lakou aina hooilina.

12. A pomaikai ka poe Genetile, ka poe a ke kaula i palapala mai ai; no ka mea, aia hoi, ina e mihi auanei lakou, a e kaua ole ia Ziona, a e hoohui ole ia lakou iho i kela ekalesia nui a ino loa, e hoola ia auanei lakou; no ka mea, e hooko no ka Haku ke Akua i kana mau berita, ana i hana mai ai i kana poe keiki; a no keia kumu i palapala mai ai ke kaula i keia mau mea.

13. Nolaila, o ka poe e kaua aku ia Ziona a me ka lahui berita o ka Haku, e palu iho lakou i ka lepo o ko lakou nei mau wawae; aole e hilahila ka lahuikanaka o ka Haku. No ka mea, o ka lahuikanaka o ka Haku, oia ka poe e kali ana nona; no ka mea, ke kali nei lakou i ka hiki ana mai o ka Mesia.

14. Aia hoi, e like me na olelo a ke kaula, e hoonoho hou ka Mesia ia ia iho i ka lua o ka manawa, e hoola ia lakou; nolaila, e hoike oia ia ia iho ia lakou me ka mana a me ka nani nui, i ka anai ia ana i ko lakou poe enemi, i ka wa i hiki mai ai ka la o lakou e manaoio ai ia ia; aole e anai oia i kekahi mea i manaoio ia ia.

15. A o ka poe i manaoio ole ia ia, e luku ia lakou, e ke ahi, a e ka makani ino, a e na olai, a e ka hookahe ana i ke koko, a e ke ahulau, a e ka wi. A e ike no auanei lakou o ka Haku oia ke Akua, ka Mea Hemolele o ka Iseraela;

16. No ka mea, e kaili ia aku anei ka waiwai pio mai ka poe ikaika aku; e hoopakele ia anei ke pio i lawe pono ia?

17. Aka, penei wahi a ka Haku: E kaili ia aku no na pio o ka poe ikaika, a e hoopakele ia ka waiwai pio o ka mea weliweli; no ka mea, e hoopakele auanei ke Akua mana loa i kona lahui berita. No ka mea, penei wahi a ka Haku: E paio aku au i ka mea e paio pu me oe.

18. A e hanai au i ka poe i hooluhi aku ia oe, i ko lakou io iho; a e ona auanei lakou i ko lakou koko iho, e like me ka waina ono; a e ike no na mea io a pau owau no ka Haku, o kou Mea e Ola ai, a me kou Mea Hoolapanai, ka Mea Mana hoi o Iakoba.