1. A mahope iho o ke ala ana o Kristo mai ka make mai, e hoike auanei oia ia ia iho ia oukou, e oʻu poe kanaka, a me koʻu poe hoahanau i aloha ia; a o na olelo ana e olelo ai ia oukou, oia ke kanawai a oukou e hana ai auanei.

2. No ka mea, aia, ke i aku nei au ia oukou, ua ike aku la au e make auanei na hanauna he nui, a iwaena o koʻu poe kanaka auanei na kaua a me na paio he nui loa.

3. A mahope iho o ka hiki ana mai o ka Mesia, e haawi ia na hoailona i koʻu poe kanaka no kona hanau ia ana, a no kona make ana a me kona alahouana no hoi; a e nui a e weliweli auanei ia la i ka poe hewa; no ka mea, e make loa no lakou; a e make no lakou no ko lakou hoolei ana aku i ka poe kaula, a me ka poe hoano, a hailuku ana aku ia lakou, a me ka pepehi loa ana ia lakou; no ia mea, e pii auanei ke kahea ana o ke koko o ka poe hoano mai ka honua ae i ke Akua la, e ku e ia lakou.

4. Nolaila, o ka poe i haaheo, a i hana ino, e hoopau no ka la e hiki mai ana ia lakou me ka wela, wahi a ka Haku o na Lehulehu, no ka mea, e like auanei lakou me ka mauu maloo.

5. A o ka poe i pepehi i na kaula, a me ka poe hoano, e ale auanei ka hohonu o ka honua ia lakou, wahi a ka Haku o na Lehulehu; a e uhi auanei na mauna ia lakou, a e lawe aku na puahiohio ia lakou, a e hiolo na hale maluna o lakou, a e pepe ia lakou a mokumoku, a e okaoka ia lakou a makalii;

6. A e hoea mai maluna o lakou i na hekili, a me na uila, a me na olai, a me kela ano keia ano o ka luku ana, no ka mea, e hoa ia auanei ke ahi o ka inaina o ka Haku no lakou, a e like lakou me he mauu la, a e hoopau ka la e hiki mai ana ia lakou, wahi a ka Haku o na Lehulehu.

7. E, ka eha, a me ka kaumaha nui loa o koʻu uhane no ka lilo ana o ka poe i pepehi ia o koʻu poe kanaka! No ka mea, ua ike wau, o Nepai, ia mea, a aneane hoopau mai ia mea iaʻu imua o ke alo o ka Haku; aka, he mea e pono ai noʻu e kahea aku i ke Akua, Ua pololei kou mau aoao.

8. Aka hoi, o ka poe pono, ka poe e hoolohe aku i na olelo a ka poe kaula, a e pepehi ole ia lakou, aka e nana imua ia Kristo me ka naueue ole no na hoailona i haawi ia mai ai, me ka makau ole i na hoomaau ana a pau; aia hoi, o lakou no ka poe e luku ole ia.

9. Aka e hoike ia ke Keiki o ka pono ia lakou; a e hoola oia ia lakou, a e loaa ia lakou ka maluhia me ia, a hiki i ka wa e hala aku ai na hanauna ekolu, a he nui no hoi o ka ha o ka hanauna e hala aku ai iloko o ka pono.

10. A pau ae la keia mau mea, e hiki mai ana ka luku wawe maluna o koʻu poe kanaka; no ka mea, me ka nui o ka eha o koʻu uhane, ua ike nae au ia mea; nolaila, ua ike au e hiki mai ana auanei ia; a e kuai aku ana lakou ia lakou iho no ka mea ole; no ka mea, e ohi auanei lakou i ka make loa ana, i uku no ko lakou haaheo, a me ko lakou naaupo; no ko lakou ae ana aku i ke diabolo, a koho ana aku i na hana o ka pouli mamua o ka malamalama; nolaila, e iho iho lakou i gehena e pono ai.

11. No ka mea, aole e hooikaika mau ka Uhane o ka Haku i kanaka. A i ka wa e oki iho ai ka hooikaika ana o ka Uhane i kanaka, alaila, e hiki mai ana ka luku wawe; a ke hookaumaha nei keia i koʻu uhane.

12. A e like me kaʻu olelo e ana no ka hoohuli ia ana o ka poe Iudaio, e ike ia Iesu oia ke Kristo io, he mea e pono ai hoi, e ike ka poe Genetile, o Iesu o ke Kristo no ia, ke Akua mau loa;

13. A e hoike ana oia ia ia iho i ka poe a pau i manaoio ia ia, ma ka mana o ka Uhane Hemolele; oiaio, i na lahuikanaka a pau, i na ohana, i na olelo, a me na kanaka, e hana ana i na hana mana nui, i na hoailona a me na mea kupaianaha, iwaena o na keiki a kanaka, e like me ko lakou manaoio.

14. Aka hoi, ke wanana aku nei au ia oukou no na la hope; no na la a ka Haku e hoopuka mai ai i keia mau mea i na keiki a kanaka.

15. Mahope iho o ka emi ana o kaʻu poe hua a me na hua a koʻu poe hoahanau iloko o ka hoomaloka, a i hahau ia e ka poe Genetile; he oiaio, mahope iho o ka hoomana ku e ana a puni o ka Haku ke Akua ia lakou, a i hoopuni ia lakou me ka puu, a i hana ia na pakaua e ku e ia lakou; a mahope iho o ko lakou hoohaahaa ia ana ilalo i ka lepo, i lilo lakou i ole, aka hoi e kakau ia nae na olelo a ka poe pono, a e hoolohe ia na pule o ka poe oiaio, aole e hoopoina ia lakou a pau, ka poe i emi iloko o ka hoomaloka;

16. No ka mea, e kamailio mai auanei ka poe e luku ia ia lakou mailoko mai o ka honua, a o ka lakou olelo ana he hamumumu ia noloko mai o ka lepo, a e like auanei ko lakou leo me ko ka mea nona kekahi uhane hoolauna; no ka mea, e haawi mai no ka Haku ke Akua i mana ia ia, i hawanawana mai oia no lakou, oia, me he mea la mailoko mai o ka honua; o ka lakou olelo hoi e hawanawana auanei ia noloko mai o ka lepo.

17. No ka mea, penei wahi a ka Haku ke Akua: E kakau no lakou i na mea e hana ia ai iwaena o lakou, a e palapala ia ia mau mea a e hoopaa ia iloko o kahi buke, a, aole e loaa i ka poe i emi iloko o ka hoomaloka keia mau mea, no ka mea, e imi ana lakou e hoopau i na mea o ke Akua;

18. Nolaila, e like me ka poe i luku ia, ua luku koke ia lakou; a o ka lehulehu o ko lakou poe weliweli, e like auanei lakou me ka opala lele. Oiaio, penei wahi a ka Haku ke Akua; E hiki wawe ia, ma ke sekona.

19. Eia kekahi, e hahau ia ka poe i emi iho iloko o ka hoomaloka e ka lima o ka poe Genetile.

20. A ua hookiekie ia iluna ka poe Genetile i ka haaheo o ko lakou mau maka, a ua hina, no ka nui o ko lakou mea e hina ai, a ua kukulu iho lakou i na ekalesia he nui wale; aka hoi, e hoole ana lakou i ka mana a me na hana mana a ke Akua, a hai aku ia lakou iho, i ko lakou ike, a me ko lakou naauao, i mea e loaa ai ia lakou ka waiwai, a kui a wale i na maka o ka poe hune;

21. A he nui na ekalesia i kukulu ia e hookumu ana i na paonioni, a me na paio, a me na manao lokoino;

22. A, aia no hoi na mea huipumalu ana, e like me ka wa kahiko, e like me na huipu ana o ke diabolo, no ka mea, oia no ke kumu o keia mau mea a pau; he oiaio, o ke kumu o ka pepehi kanaka, a me na hana o ka pouli; oiaio, a e alakai ana oia ia lakou ma ka ai me kahi kaula olona, a hiki ia ia ke nakinaki ia lakou a paa, me kona mau kaula ikaika, no ka wa pau ole.

23. No ka mea, aia, e oʻu poe hoahanau i aloha ia, ke i aku nei au ia oukou, aole ka Haku ke Akua i hana ma ka pouli.

24. Aole ia i hana i kekahi mea, ke ole ia no ka pomaikai o ko ke ao nei; no ka mea, ke aloha nei oia i ko ke ao nei, a e waiho ana oia i kona ola ponoi, i kauo oia i na kanaka a pau io na la. Nolaila, aole oia e kauoha mai i kekahi e loaa ole ia lakou kona hoola ana.

25. Aia hoi, ke kahea nei anei oia i kekahi, i ka i ana, E hele aku, mai oʻu aku nei? Aia hoi, ke i aku nei au ia oukou, aole; aka, ke i mai nei oia, E hele mai ioʻu nei, e ko na kihi a pau o ka honua, e kuai i ka waiu a me ka meli, me ke kala ole a me ke kumukuai ole.

26. Aia hoi, ua kauoha mai la anei oia i kekahi e hele aku lakou iwaho o na halepule, iwaho hoi o na hale halawai? Aia hoi, ke i aku nei au ia oukou, aole.

27. Ua kauoha mai la anei oia i kekahi i loaa ole ai ia lakou kona hoola ana? Aia hoi, ke i aku nei au ia oukou, aole; aka ua haawi mai la oia ia mea, me ke kumukuai ole, no na kanaka a pau; a ua kauoha mai la oia i kona poe kanaka e hoohuli mai i na kanaka a pau i ka mihi.

28. Aia hoi, ua kauoha anei ka Haku i kekahi e loaa ole ia lakou kona lokomaikai? Aia hoi, ke i aku nei au ia ouokou, aole; aka ua like ko kela kanaka ko keia kanaka pomaikai, aole i papa ia kekahi.

29. Ke kauoha mai nei oia aole loa e hana ia ka hana hoopunipuni a na kahuna pule; no ka mea, ea, eia hoi ke ano o ka hana hoopunipuni a na kahuna pule, e hai ana na kanaka, a e hoonoho ana ia lakou iho iluna i malamalama i ko ke ao nei, i loaa ai ia lakou ka waiwai, a me ka mahalo ia mai o ko ke ao nei; aka, aole lakou i imi i ka pomaikai o Ziona.

30. Aia hoi, ua papa mai la ka Haku i keia mea; nolaila, ua haawi mai la ka Haku i kauoha, i aloha na kanaka a pau, a o ke aloha o ka lokomaikai no ia. A i ole ia lakou ke aloha, he mau mea ole lakou; nolaila, ina ia lakou ke aloha, ina aole lakou e ae aku i ka paahana ma Ziona e make.

31. Aka o ka paahana ma Ziona, e hana no ia no Ziona; no ka mea, ina e hana lakou no ke kala, e make no auanei lakou.

32. A, eia hoi, ua kauoha mai la ka Haku ke Akua aole na kanaka e pepehikanaka; aole hoi lakou e wahahee; aole lakou e aihue; aole hoi lakou e hoopuka aku i ka inoa o ka Haku o ko lakou Akua me ke kumu ole; aole lakou e paonioni; aole lakou e lokoino; aole lakou e paio kekahi i kekahi; aole lakou e moekolohe; aole lakou e hana aku i kekahi o keia mau mea; no ka mea, o ka mea nana i hana i keia mau mea, e make no ia;

33. No ka mea, aole hookahi o keia mau hana ino mai ka Haku mai; no ka mea, ke hana mai la oia i ka mea pono iwaena o na keiki a kanaka; aole oia e hana mai ana i kekahi mea, ke maopopo ole ia i na keiki a kanaka; a ke kono mai la oia ia lakou a pau e hele mai io na la, a e loaa kona lokomaikai; a aole oia e hoole ana i kekahi mea e hele ana io na la, o na mea eleele a me na mea keokeo, o ka poe i paa a me ka poe i paa ole, o na kane a me na wahine; a ke hoomanao mai la oia i ka poe ike ole ia ia, a ua like na mea a pau i ke Akua, o ka Iudaio a me ke Genetile hoi.