1. Ka olelo a Isaia, ke keiki a Amosa, i ike ai, no ka Iuda a me ko Ierusalema:

2. E hiki mai no keia i na la mahope, i ka wa i kukulu paa ia ai ka mauna o ko ka Haku hale maluna o na mauna, a e hookiekie ia maluna o na puu, a e holo no io na la na lahuikanaka a pau.

3. He nui loa na kanaka e hele me ka olelo, E hele mai oukou, a e pii kakou i ka mauna o ka Haku, i ka hale o ke Akua o Iakoba; nana e ao mai ia kakou i kona mau aoao, a e hele no kakou ma kona mau alanui; no ka mea, mai Ziona aku e laha aku ai ke kanawai, a o ka olelo a ka Haku hoi mai Ierusalema aku.

4. Nana no e hooponopono iwaena o ko na aina, a e papa aku i na lahuikanaka he nui loa; a e kui lakou i ko lakou mau pahikaua i mau oo palau, a me ko lakou mau ihe hoi i mau pahi paipai; aole e hapai ko kekahi aina i ka pahi kaua e ku e i ko kekahi aina, aole hoi lakou e ao hou i ke kaua.

5. E ko ka hale o Iakoba, e hele mai, a e hele kakou ma ka malamalama o ka Haku; oia, e hele mai, no ka mea, ua auana aku la oukou a pau, o kela mea keia mea i kona mau aoao hewa.

6. Nolaila, e ka Haku e, ua haalele oe i kou poe kanaka, i ko ka hale o Iakoba, no ka mea, ua piha lakou i na mea mai ka hikina mai, a hoolohe hoi i ka poe nana ao e like me ko Pilisetia, a olioli no lakou i na keiki a na malihini.

7. Ua piha hoi ko lakou aina i ke kala a me ke gula; aole e pau i ka helu ia ko lakou waiwai; ua piha hoi ko lakou aina i na lio, aole a pau i ka helu ia na kaakaua o lakou;

8. Ua piha hoi ko lakou aina i na akua kii; ke hoomana nei lakou i ka hana a ko lakou mau lima iho—i ka mea a ko lakou mau manamana lima i hana ai;

9. Aole e kulou ana ilalo ke kanaka uuku, aole hoi ke kanaka nui e hoohaahaa ana ia ia iho: nolaila, e kala ole mai oe ia ia.

10. E ka poe hewa, e komo oe iloko o ka pohaku, a e pee oe i ka lepo, no ka makau i ka Haku, a e hahau no ka nani o kona hanohano ia oe.

11. A e hiki io mai keia, e hoohaahaa ia na maka kiekie o kanaka, a e hookulou ia ko ke kanaka lanahaakei, a o ka Haku wale no ke hookiekie ia i kela la.

12. No ka mea, e hiki koke mai ana ka la o ka Haku o na Lehulehu maluna o ko na aina a pau; oia, maluna o kela mea keia mea; oia, maluna o na mea hanohano a kehakeha, a maluna hoi o kela mea keia mea i hookiekie ia; a e hoohaahaa ia no ia;

13. Oia, a e hiki mai ka la o ka Haku maluna o na laau kedera a pau o Lebanona, no ka mea, ua loloa a kiekie iluna; a maluna hoi o na oka a pau o Basana.

14. A maluna hoi o na kuahiwi kiekie a pau, a maluna o na puu a pau, a maluna o na lahuikanaka a pau i hookiekie ia iluna, a maluna o ko ia aina aku, ko ia aina aku,

15. A maluna o na hale kiai kiekie a pau, a maluna o na pa kaua kiekie a pau,

16. A maluna o na moku a pau o ke kai, a maluna o na moku a pau o Taresisa, a maluna o na mea milimili oluolu a pau.

17. E hookulou ia ilalo ko ke kanaka haaheo, a e hoohaahaa ia hoi ka manao kiekie o ke kanaka; o ka Haku wale no ke hookiekie ia i kela la.

18. A e hoopau loa oia i na akua kii.

19. E komo no na kanaka iloko o na ana o na pohaku, a iloko o na lua o ka honua, no ka mea, e haule no ka makau i ka Haku maluna o lakou, a e hahau no ka nani o kona hanohano ia lakou, ia ia e ku ai iluna e hoonaueue ai i ka honua.

20. Ia la la e kiola aku ai ke kanaka i kona mau akua kala, a me kona mau akua gula, ana i hana ai i mea hoomana, e lilo i na iole a me na opeapea;

21. E hele no lakou iloko o na ana pohaku, maluna o na piko o na pali paa, no ka mea, e haule no ka makau i ka Haku maluna o lakou, a e hahau no ka nani o kona hanohano ia lakou ia ia e ku ai iluna e hoonaueue ai i ka honua.

22. Mai hilinai oukou i ke kanaka, nona ka hanu ma kona pukaihu; no ka mea, heaha ia i manao ia ai oia?