1. Ano, olelo aku la no o Iakoba i na mea e ae he nui i koʻu poe kanaka ia manawa; aka hoi, o keia mau mea wale no aʻu i kauoha aku ai e kakau ia; no ka mea, o na mea aʻu i palapala ai, ua lawa iaʻu.

2. Ano, ke palapala nei no au, o Nepai, i na olelo hou a Isaia, no ka mea, lealea koʻu uhane i kana mau olelo. No ka mea, e hoohalike no au i kana mau olelo i koʻu poe kanaka; a e hoouna aku no au ia mau mea i kaʻu poe hua a pau; no ka mea, ike io aku la oia i koʻu Mea Hoolapanai, e like me koʻu ike ana ia ia.

3. A ua ike no hoi koʻu kaikaina o Iakoba ia ia e like me koʻu ike ana ia ia; nolaila, e hoouna aku no au i ka laua olelo i kaʻu poe hua, e hooiaio ana i ka oiaio o kaʻu mau olelo ia lakou. Nolaila, ma na olelo o na mea ekolu, i i mai ai ke Akua, e hookupaa no au i kaʻu olelo. Aka hoi, e hoouna aku ana ke Akua i na mea hoike he nui ae; a ke hooiaio mai nei oia i na olelo a pau ana.

4. Aia hoi, ke lealea nei koʻu uhane i ka hooiaio ana i koʻu poe kanaka i ka oiaio o ka hiki ana mai o Kristo; no ka mea, nolaila i haawi ia mai ai ke kanawai o Mose; a o na mea a pau i haawi ia mai e ke Akua mai ka hoomaka ana o ka honua nei, i kanaka, he mau hoailona kela mau mea nona.

5. Eia hoi, ke olioli nei no koʻu uhane i na berita a ka Haku, ana i hana mai ai i ko kakou poe kupuna; oia, e olioli ana koʻu uhane i kona lokomaikai, a i kona hoopono, a mana, a aloha, ma ka hana nui a mau loa o ka hoola ana mai ka make mai.

6. A e hauoli ana koʻu uhane i ka hooiaio ana i koʻu poe kanaka, ke hiki ole mai o Kristo, e make io no na kanaka a pau.

7. No ka mea, ina aole o Kristo, ina aole he Akua; a ina aole he Akua, aole o kakou, no ka mea, aole i hiki ke hana ia kekahi mea. Aka, aia no he Akua, a oia no o Kristo; a e hele mai oia i kona manawa ku pono.

8. Ano, ke kakau nei au i kekahi mau olelo a Isaia, i hiki i ka poe o koʻu poe kanaka e ike ana i keia mau olelo, ke hookiekie aku i ko lakou mau naau, a e hauoli no na kanaka a pau. Ano, eia no na olelo; na oukou e hoohalike ia mau olelo ia oukou, a i na kanaka a pau.