1. Ano, ke olelo iki nei owau, o Nepai, no na olelo aʻu i kakau ai i olelo ia ai e ka waha o Isaia. No ka mea, he nui wale na mea a Isaia i olelo mai ai i paakiki i kekahi poe o koʻu poe kanaka i ke hoomaopopo ana; no ka mea, aole lakou i ike i ke ano o ka wanana ana mawaena o ka poe Iudaio.

2. No ka mea, aole wau, o Nepai, i ao aku ia lakou i na mea he nui e pili ana i ke ano o ka poe Iudaio; no ka mea, o ka lakou mau hana he mau hana ia o ka pouli, a o ka lakou hana ana hoi o ka hana ana ia i na mea hoopailua.

3. Nolaila, ke palapala nei au i koʻu poe kanaka, i ka poe a pau e loaa ana ia lakou na mea aʻu e kakau nei, i ike ai lakou i na hoopai o ke Akua, e hiki mai ana auanei maluna o na lahuikanaka a pau, e like me ka olelo ana i olelo mai ai.

4. Nolaila, e hoolohe mai, e koʻu poe kanaka, o ko ka hale o Iseraela, a e haliu mai i ka pepeiao i kaʻu olelo; no ka moakaka ole o na olelo a Isaia ia oukou, aka hoi, ua moakaka ia mau mea i ka poe a pau i hoopiha ia me ka Uhane o ka wanana. Aka ke haawi aku nei au i wanana ia oukou, e like me ka uhane iloko oʻu; nolaila, e wanana no au e like me ka moakaka pu me au, mai ka manawa aʻu i puka mai ai mai Ierusalema mai me koʻu makuakane; no ka mea, aia hoi, ke olioli nei kuu uhane ma ka olelo moakaka i koʻu poe kanaka, i ao ai lakou:

5. He oiaio, a ke olioli nei koʻu uhane ma na olelo a Isaia, no ka mea, hele mai la au noloko mai o Ierusalema, a ua ike koʻu mau maka i na mea o ka poe Iudaio, a ua ike au ua hoomaopopo ka poe Iudaio i na mea a na kaula, aole i hoomaopopo kekahi lahuikanaka e i na mea i olelo ia i ka poe Iudaio, e like me lakou, eia wale no ua ao ia lakou mamuli o ke ano o na mea o ka poe Iudaio.

6. Aka hoi, aole owau, o Nepai, i ao aku i kaʻu poe keiki mamuli o ke ano o ka poe Iudaio; aka hoi, ua noho wau ma Ierusalema, nolaila, ua ike au no ka aina a puni; a ua hai aku la au i kaʻu poe keiki no na hoopai o ke Akua, i hiki mai iwaena o ka poe Iudaio, e like me na mea a pau a Isaia i olelo mai ai, a, aole au e kakau ia mau mea.

7. Aka hoi, ke hoomaka nei au me kaʻu wanana ponoi iho, e like me ka maopopo iaʻu; ma ia mea, ua ike au ua hiki ole i kekahi kanaka ke kuhihewa; aka hoi, ma na la e ko ai na wanana a Isaia, e ike pakana kanaka, ma na manawa o ia mau mea e hiki mai ai;

8. Nolaila, he pomaikai ia mau mea i na keiki a kanaka, a o ka mea e manao ana aole pela, ia lakou au e olelo pololei ai, a e kakau i na olelo i koʻu poe kanaka ponoi; no ka mea, ua ike au ua nui loa ka pomaikai o ia mau mea ia lakou ma na la mahope; no ka mea, ma ia la e ike maopopo ai lakou i ua mau mea la; nolaila, no ko lakou pomaikai ua palapala au i ua mau mea la.

9. A e like me kekahi hanauna i luku ia mawaena o ka poe Iudaio, no ka lakou hana ino, pela no lakou i luku ia ai, ia hanauna aku ia hanauna aku, e like me ka lakou hana ino; aole hoi i luku ia kekahi o lakou, ke ole i hai e ia ae ia lakou e na kaula a ka Haku.

10. Nolaila, ua hai ia aku ia lakou no ka luku ia ana e hiki koke mai ana maluna o lakou, mahope koke iho o ka haalele ana o koʻu makuakane ia Ierusalema; aka hoi, hoopaakiki iho la lakou i ko lakou mau naau; a e like me kaʻu wanana, ua luku ia lakou, koe wale no ka poe i lawe pio ia i Babulona.

11. Ano, ke olelo nei au i keia mamuli o ka uhane iloko oʻu. A oiai nae ua lawe ia aku la lakou, e hoi hou lakou, a e noho hou ma ka aina o Ierusalema; nolaila, e hoihoi hou ia lakou i ko lakou aina hooilina.

12. Aka hoi, e loaa no ia lakou na kaua, a me na lono o na kaua; a hiki mai ka la e hoike mai ai ke Keiki Hanau-kahi o ka Makua, he oiaio, o ka Makua o ka lani a me ka honua, ia ia iho ia lakou ma ke kino, aia hoi, e hoole aku lakou ia ia, no ko lakou mau hewa, a me ka paakiki o ko lakou mau naau, a me ke oolea o ko lakou mau ai.

13. Aia hoi, e kau aku lakou ia ia ma ke kea, a mahope iho o kona waiho ia ana ma ka lua he mau la ekolu, e ala hou mai oia mai ka make mai, me ke ola ma kona mau eheu, a o ka poe a pau e manaoio ana i kona inoa, e hoola ia lakou ma ke aupuni o ke Akua; nolaila, ke hauoli nei koʻu uhane e wanana aku nona, no ka mea, ua ike au i kona la, a ke hoonani nei koʻu uhane i kona inoa hoano.

14. Aia hoi, e hiki mai keia, mahope iho o ke alahouana o ka Mesia mai ka make mai, a i hoike aku ia ia iho i kona poe kanaka, i ka poe a pau i manaoio i kona inoa, aia hoi, e luku hou ia o Ierusalema; no ka mea, auwe ka poe e kaua ku e aku ana i ke Akua a me na kanaka o kona ekalesia.

15. Nolaila, e hoopuehu ia aku ka poe Iudaio mawaena o ko na aina a pau; he oiaio, a e anai ia no hoi o Babulona; nolaila, e hoopuehu ia ka poe Iudaio e na lahuikanaka e;

16. A mahope iho o ko lakou hoopuehu ia ana, a ua hahau aku ka Haku ke Akua ia lakou ma o na lahuikanaka e la, no na hanauna he nui wale, oiaio, mai ia hanauna aku ia hanauna aku, a hiki i ka wa e hoohuli ia ai lakou e manaoio ia Kristo, ke Keiki a ke Akua, a i ke kalahala mana loa no ko ke ao nei a pau; a hiki mai ia la a lakou e manaoio ai ia Kristo, a e hoomana i ka Makua ma kona inoa, me na naau maemae a me na lima lepo ole, a e nana hou ole aku no kekahi Mesia e ae, alaila, ma ia manawa, e hiki mai ka la no lakou e manaoio i keia mau mea e pono ai.

17. A e hohola hou ka Haku i kona lima i ka lua o ka manawa, e hoihoi i kona poe kanaka mai ko lakou wahi mai, i poino ai a i haule ai. Nolaila, e hana oia i kekahi hana kupanaha, a he mea e kahaha ai hoi iwaena o na keiki a kanaka.

18. Nolaila, e hoopuka aku oia i kana mau olelo ia lakou, a ma ua mau olelo nei e hookolokolo ia lakou ma ka la hope, no ka mea, e haawi ia no ia mau mea me ka manao e hoohuli ia lakou i ka Mesia oiaio, ka mea i hoolei ia aku e lakou; a i ka hoomaopopo ana ia lakou he mea e pono ole ai no lakou e nana hou aku no kekahi Mesia e hele mai, no ka mea, aole e hele mai kekahi, ke ole ia he Mesia wahahee, e hoopunipuni ana i kanaka; no ka mea, hookahi Mesia wale no i olelo ia e ka poe kaula, a o ua Mesia nei oia ka mea e hoolei ia aku ai e ka poe Iudaio.

19. No ka mea, e like me na olelo a na kaula, e hele mai ana ka Mesia, ma ka makahiki eono haneri mai ka wa a koʻu makuakane i haalele ai ia Ierusalema; a e like me na olelo a na kaula, a me ka olelo hoi a ka anela o ke Akua, o Iesu Kristo kona inoa, ke Keiki a ke Akua.

20. Ano, e oʻu mau hoahanau, ua olelo maopopo aku au, i hiki ole ai ia oukou ke lalau; a ma ke ola ana o ka Haku ke Akua, nana i lawe mai i ka Iseraela noloko mai o ka aina o Aigupita, a i haawi mai la ia Mose i mana e hoola i na lahuikanaka, mahope iho o ko lakou nahu ia ana e na mooawa, ina e leha aku lakou i ko lakou mau maka i ka moo, ana i hooku ae ai imua o lakou, a haawi no hoi ia ia i ka mana i hahau aku oia i ka pohaku, a e puka mai ka wai; aia hoi, ke i aku nei au ia oukou, e like me ka oiaio o keia mau mea, a e like me ke ola ana o ka Haku, aohe inoa e ae i haawi ia mai malalo iho o ka lani, ke ole o ua Iesu Kristo nei aʻu e olelo nei, i mea e ola ai na kanaka.

21. Nolaila, no keia kumu i olelo hoopomaikai mai ai ka Haku ke Akua iaʻu, e malama ia, a e hoopakele ia hoi keia mau mea aʻu e kakau nei, a e haawi ia aku i kaʻu poe hua, ia hanauna aku ia hanauna aku, i ko ai ka olelo hoopomaikai ia Iosepa, i luku ole ia kana hua oiai ka honua nei e ku ana.

22. Nolaila, e hele aku no keia mau mea mai kahi hanauna aku i kahi hanauna aku oiai ka honua nei e ku ana; a e hele aku no lakou e like me ka makemake a me ka mea oluolu i ke Akua; a o na lahuikanaka e loaa ana ia lakou keia mau mea, e hookolokolo ia auanei lakou ma keia mau mea e like me na olelo i palapala ia;

23. No ka mea, ke hooikaika nei makou me ke kakau ana e hoohuli i ka makou poe hua, a me ko makou poe hoahanau hoi, e manaoio ia Kristo, a e hoolaulea ia i ke Akua; no ka mea, ke ike nei makou ma o ka lokomaikai la e ola ai kakou, mahope iho o na mea a pau e hiki ai ia kakou ke hana.

24. A me ko kakou manaoio ia Kristo, ke malama nei nae makou i ke kanawai o Mose, a haka pono imua me ka naueue ole ia Kristo, a, hiki i ka wa e ko ai ke kanawai;

25. No ka mea, no keia mea ua haawi ia mai ke kanawai; nolaila, ua lilo ke kanawai i mea make ia makou nei, a ua hoolilo ia makou i poe ola iloko o Kristo, no ko makou manaoio; aka, ke malama nei makou i ke kanawai no na kauoha;

26. A ke kamailio nei makou no Kristo, ke hauoli nei makou iloko o Kristo, ke hai aku nei makou no Kristo, ke wanana nei makou no Kristo, a ke palapala nei makou e like me na wanana a makou, i ike ai na hua a makou i ke kumu e nana aku ai lakou no ke kala ia ana o ka lakou mau hala.

27. Nolaila, ke olelo nei makou no ke kanawai, i ike na hua a makou i ka make ana o ke kanawai; a e hiki ia lakou, ma ko lakou ike ana i ka make ana o ke kanawai, ke haka pono imua i kela ola aia iloko o Kristo, a e ike i ke kumu o ka haawi ia ana mai o ke kanawai. A mahope iho o ka hooko ia ana o ke kanawai iloko o Kristo, i ole ai lakou e hoopaakiki i ko lakou mau naau e ku e ia ia, i ka manawa e pono ai e hoopau ia ai ke kanawai.

28. Ano, aia hoi, e oʻu poe kanaka, he poe ai oolea no oukou; nolaila, ua olelo maopopo au ia oukou, i hiki ole ai ia oukou ke hoomaopopo ole. A e ku no auanei na olelo aʻu i olelo ai i mea hoike ku e ia oukou; no ka mea, ua ku pono lakou e ao aku i na kanaka i ka aoao pololei; no ka mea, eia no ka aoao pololei, e manaoio aku ia Kristo, aohe hoi e hoole ia ia; no ka mea, i ka hoole ana ia ia, e hoole ana no hoi oukou i na kaula a i ke kanawai.

29. Ano, aia hoi, ke i aku nei au ia oukou, o ka aoao pololei oia ka manaoio aku ia Kristo, aohe hoi hoole ia ia; a o Kristo oia no ka Mea Hemolele o ka Iseraela; nolaila, e kulou no oukou imua ona e pono ai, a e hoomana aku ia ia me ko oukou manao, ka naau, a me ka ikaika a pau, a me ko oukou uhane a pau; a ina e hana oukou i keia, aole loa oukou e hoolei ia aku iwaho.

30. A e like me ka mea pono, na oukou no e malama i na mea e hana ia ai a me na oihana a ke Akua, a hiki i wa e hooko ia ai ke kanawai i haawi ia mai ia Mose.