1. Aka hoi, ke makemake nei au, o Iakoba, e olelo aku ia oukou, i ka poe i maemae ma ka naau. E nana i ke Akua me ka naueue ole o ka naau, a e pule aku ia ia me ka manaoio ikaika, a e hooluolu mai oia ia oukou ma ko oukou mau pilikia, a e kokua oia i ko oukou aoao, a e hoouna mai ilalo i ka hoopai maluna iho o ka poe e imi ana i ko oukou make.

2. E ka poe a pau i maemae ma ka naau, e hookiekie ae i ko oukou mau poo, a e loaa ka olelo olioli a ke Akua, a e ahaaina ma kona aloha; no ka mea, ua hiki ia oukou no ka wa pau ole, ke naueue ole ko oukou mau naau.

3. Aka, auwe, auwe oukou ka poe i maemae ole ma ka naau; ka poe i pelapela i keia la imua o ke Akua; no ka mea, ke mihi ole oukou, ua hoomainoino ia ka aina no oukou; a na ko Lamana poe, ka poe i pelapela ole e like me oukou nei, (aka ua hoomainoino ia nae lakou me ka poino nui,) e hahau no auanei ia oukou a hiki i ka anai loa ia ana.

4. A e hiki wawe mai ana ka manawa, ina aole oukou e mihi, e loaa ia lakou ko oukou aina hooilina, a e alakai aku no ka Haku ke Akua i ka poe pono iwaho, mai o oukou aku.

5. Aia hoi, o ko Lamana poe, o ko oukou poe hoahanau, a oukou i inaina ai, no ko lakou pelapela a me ka poino i hiki ae maluna o ko lakou ili, ua oi aku ko lakou pono mamua o ko oukou; no ka mea, aole lakou i hoopoina i ke kauoha a ka Haku, i haawi ia mai ai i ko kakou mau makua, i hookahi wale no a lakou wahine; a i haiawahine ole a lakou; a e hana ole ia na moekolohe mawaena o lakou.

6. Ano, o keia kauoha ke hoolohe la lakou e malama; nolaila, no keia hoolohe ana ma ka malama ana i keia kauoha, aole o ka Haku ke Akua e anai aku ia lakou, aka e lokomaikai aku ia lakou; a ma kekahi la e lilo lakou i poe kanaka i hoopomaikai ia mai.

7. Aia hoi, ke aloha la ko lakou poe kane i ka lakou mau wahine, a ke aloha la ko lakou poe wahine i ka lakou mau kane; a ke aloha la ko lakou poe kane a me ko lakou poe wahine i ka lakou mau keiki; a o ko lakou hoomaloka a me ko lakou inaina ia oukou, no ka hewa ia o ko lakou mau makua; nolaila, heaha la ko oukou maikai mamua o ko lakou, ma ka nana mai o ka Mea Nui nana oukou i hana?

8. E oʻu poe hoahanau, ke makau nei au, ina aole oukou e mihi i ko oukou mau hewa e keokeo loa auanei ko lakou mau ili mamua o ko oukou i ka wa a oukou e lawe pu ia mai ai me lakou imua o ka noho alii o ke Akua.

9. Nolaila, he kauoha kaʻu e haawi aku nei ia oukou, o ka olelo a ke Akua no ia, i kuamuamu hou ole ai oukou ia lakou no ka haulaula o ko lakou mau ili; aole hoi oukou e kuamuamu aku ia lakou no ko lakou pelapela; aka e hoomanao oukou i ko oukou pelapela iho, a e hoomanao hoi ua hiki mai ko lakou pelapela no ko lakou mau makua.

10. Nolaila, e hoomanao iho i ka oukou mau keiki, i ko oukou hoeha ana i ko lakou mau naau no ka hana a oukou i hana ai imua o lakou; eia hoi, e hoomanao iho, e lawe mai paha oukou, i ka oukou mau keiki i ka make, no ko oukou pelapela, a e hoahu ia ko lakou mau hala maluna iho o ko oukou mau poo ma ka la hope.

11. E koʻu poe hoahanau, e hoolohe mai i kaʻu olelo; e hoala ae i ka ikaika o ko oukou mau uhane; e lulu ae oukou ia oukou iho, i ala ai oukou mai ka hiamoe o ka make; a e hookuu oukou ia oukou iho mai na eha mai o gehena, i lilo ole ai oukou i poe anela no ke diabolo, e hoolei ia aku iloko o kela loko ahi a me ke kukae pele, oia no ka make lua.

12. Ano, ua olelo aku au, o Iakoba, i na mea e ae he nui i ka poe kanaka o Nepai, e ao ana ia lakou no ka moekolohe, a me ka makaleho, a i kela ano keia ano o ka hewa, e hai ana ia lakou i ka hopena weliweli o ia mau mea;

13. A ua hiki ole ke kakau ia maluna iho o keia mau papa ka hapa haneri o ka hana a keia poe kanaka, i hoomaka i keia wa e mahuahua a lehulehu; aka, ua kakau ia he nui loa o ka lakou mau hana ana maluna iho o na papa nui ae, a me ko lakou mau kaua, a me ko lakou mau paio, a me ka noho alii ana o na alii.

14. Ua kapa ia keia mau papa, o na papa o Iakoba; a ua hana ia lakou e ka lima o Nepai. A ke hooki nei au i kaʻu olelo ana i keia mau olelo.