Mormonpa Qelqan

1 Kunantaq noqa Mormon huk willayta qelqani, rikusqaymanta uyarisqaymantawan, Mormonpa Qelqan nispataq waqyani.

2 Wiraqochapaq qelqakunata pakasqan pachapi hinataq Ammaron noqaman hamurqan (noqataq chunka watayoq hinalla karqani, llaqtaypa yachayninman hinataq huk chikan yachayniyoq kayta qallarirqani), Ammarontaq niwarqan: Rikushanin allin yuyayniyoq kasqaykita, qhawanaykipaq k’uchi erqe kasqaykita.

3 Chhaynaqa, ishkay chunka tawayoq watayoq hina kaqtiyki, kay runakunamanta rikusqayki imaymanakunata yuyarinaykita munayman; chhayna watayoq kaspaykitaq Antum hallp’aman riy, Shim nispa waqyasqa kanqa chay orqoman; chaypin Wiraqochapaq pakarqani kay runakunamanta llapan qollanan qelqakunata.

4 Nephiq raphinkunata horqonki, wakintataq chay kasqallanpi saqenki; Nephiq raphinkunapitaq qelqanki, kay runakunamanta llapan rikusqayki imaymanakunata, nispa.

5 Noqa Mormontaq, Nephiq ch’awchun karqani (taytaypa sutintaq Mormon karqan), yuyarirqanitaq Ammaronpa niwasqan imaymanakunata.

6 Hinataq, chunka hukniyoq kashaqtiy, qheparina hallp’aman taytay apawarqan Zarahemla hallp’amanpuni.

7 Tukuy hallp’antintaq wasikunawan pakasqa karqan, runakunataq yaqaraq mamaqochaq aqonkuna hina karqanku.

8 Hinataq, kay watapi awqanakuy kayta qallarirqan, nephitakuna purapi purapi—paykunataq karqanku nephitakuna, jakobitakuna, josefitakuna, zoramitakunapiwan—chay awqanakuytaq karqan nephitakuna lamanitakunawan, lemuelitakunawan, ismaelitakunapiwan.

9 Lamanitakuna, lemuelitakuna, ismaelitakunapiwanqa lamanitakuna nispan waqyasqa karqanku; ishkaynin t’aqakunataq karqanku nephitakuna lamanitakuna ima.

10 Hinataq, awqanakuyqa paykuna purapi qallarirqan Zarahemla hallp’aq kantunpi, Sidon unukunaniqpi.

11 Nephitakunataq huñusqaku karqan ancha askha runakunata, kinsa chunka waranqamanta aswantaraq; kay kikin watapitaq askha maqanakuykuna karqan, chaypitaq nephitakunaqa lamanitakunata atiparqanku, askhatataq paykunamanta wañuchirqanku.

12 Hinataq, lamanitakunaqa yuyakusqankuta qonqapurqanku, qasi kawsaytaq hallp’api karqan. Qasi kawsaytaq yaqa tawa wata hallp’api karqan, manataqmi yawar sut’uchiy karqanchu.

13 Ichaqa, lliw hallp’antinpin millay ruway karqan, chayraykutaq Wiraqochaqa ancha munasqan yachachisqankunata horqorqan; milagro ruwaykuna, alliyachiykuna imataq tukukapurqan, runakunaq millay-kayninkurayku.

14 Manataq ima qoykunapas Wiraqochamanta karqanchu, manataq pimanpas Qollanan Nuna hamurqanchu, millay ruwayninku, mana kreyiyninkuraykupiwan.

15 Noqataq chunka pishqayoq watayoq karqani, allin yuyayniyoq kaqtiytaq Wiraqochaq watukusqan karqani, Jesuspa sumaq-kayninmantataq mallirqani yacharqani ima.

16 Kay runakunaman yachachinaypaqtaq kallpachakurqani, ichaqa, wishq’asqan simiy karqan, paykunaman yachachinaypaqtaq hark’asqa karqani; munaspankun Yayanku kontra ankallikusqaku karqan; ancha munasqa yachachisqakunataq kay hallp’amanta horqosqa karqanku, runakunaq millay ruwayninkurayku.

17 Ichaqa, paykuna purapin qheparqani, hark’asqataq karqani paykunaman yachachinaymanta, sonqonkuq rumiyayninrayku; rumi sonqonkuraykutaq hallp’a ñakasqa karqan, paykunarayku.

18 Lamanitakuna purapi kaq Gadiantonpa suwankunataq hallp’api hunyarqanku, chayraykutaq qhapaqyayninkunata panpapi pakayta runakuna qallarirqanku, chay qhapaqyaykunataq llushk’ayarqan hallp’ata Wiraqocha ñakasqanrayku; chhaynataq paykunaqa mana qhapaqyayninkuta hap’iyta ni yapamanta qhepachiytapas atirqankuchu.

19 Hinataq, watuykuna, layqakuykuna, wahiykunapiwan karqan; saqraq atiynintaq llapan hallp’antinpi karqan, Abinadiq, Lamanita Samuelpa ima rimayninku hunt’akunanpaq.