1 Kunanqa, tukunin qelqayta, nephita llaqtaypa chinkachisqa kasqankumanta. Hinataq lamanitakunaq ñawpaqenta purirqayku.

2 Noqa Mormontaq, lamanitakunaq inkankuman huk qelqata qelqarqani, paymantataq munarqani Kumorah hallp’api, Kumorah nispa waqyasqa moqopi llaqtaykuta huñunaykupaq kachariwanankupaq; chaypi paykunawan awqanakunaykupaq.

3 Hinataq, lamanitakunaq inkan munasqayta qowarqan.

4 Kumorah hallp’amantaq purirqayku, Kumorah moqoq muyuriqninpitaq karpaykuta hatarichirqayku; kaytaq karqan askha unukunayoq, mayukunayoq, pukyukunayoq ima hallp’api; kaypitaq suyakuyniyoq karqayku lamanitakuna atipanaykupaq.

5 Kinsa pachak pusaq chunka tawayoq wata tukukuqtintaq, llaqtaykuq llapan puchunta huñurqayku Kumorah hallp’api.

6 Hinataq, hukllapi llapan runaykuta Kumorah hallp’api huñuqtiyku, noqa Mormon machuyayta qallarirqani. Llaqtaypa qhepa kaq awqanakuyninku kasqanta yachaspa, taytanchiskunaq haywasqa kasqan qollanan qelqakunata lamanitakunaq makinkupi urmananmanta hark’anaypaq (lamanitakunaqa chinkachinkumanmi kay qelqakunataqa) Wiraqochaq kamachisqan kaspataqmi, Nephiq raphinkunamanta kay qelqata ruwarqani, Kumorah moqopitaq pakarqani Wiraqochaq makinpa konfiyawasqan llapan qelqakunata, kay chikan raphikunallatataq mana, churiy Moronimantaq kaykunata qorqani.

7 Hinataq llaqtayqa, warminkuwan wawankunapiwan kunanqa, lamanitakunaq awqasuyunkunata paykuna kontra hamusqankuta rikurqanku; llapa millay ruwaqkunaq sonqonku hunt’aq wañuypa ancha millay manchakuywantaq paykuna chaskiyta suyarqanku.

8 Hinataq noqayku kontra maqanakuq hamurqanku, sapanka nunataq manchakuywan hunt’a karqanku, ancha askhapuni paykuna kasqankurayku.

9 Llaqtay kontrataq q’anchinawan, peqtawan, wach’iwan, hachawan, awqanakunapaq imaymana laya maqanakunapiwan urmamurqanku.

10 Hinataq, runaykuna wit’usqa karqanku, ari, noqawan kaq chunka waranqa, chawpipitaq k’irisqa urmarqani; sispaytataq rirqanku manataq kawsayniyta tukuchirqankuchu.

11 Noqayku chawpinta rispanku, llapan llaqtayta wañuchiqtinkutaq—ishkay chunka tawayoqllataq mana, churiy Moronitaq kaykunaq hukninkaq karqan—llaqtaykuq wañuyninmanta qespispaykutaq, lamanitakuna karpankuman kutipuqtinku, tutamantanpi Kumorah moqo patamanta rikurqayku, ñawpaq pusasqay chunka waranqa runaykuna wañuchisqa kasqankuta.

12 Rikurqallaykutaqmi llaqtaymanta churiy Moroniq pusasqan chunka waranqata.

13 Gidgiddonahq chunka waranqanpas urmasqan karqan, paytaq paykunaq chawpinpi.

14 Lamahpas chunka waranqanwan urmasqa karqan. Gilgalpas urmasqan karqan chunka waranqanwan. Limhapas urmasqan karqan chunka waranqanwan. Joneampas chunka waranqanwan usmasqa karqan; Kamenihahpas, Moronihahpas, Antionumpas, Shiblompas, Shempas, Joshpas, sapankanku chunka waranqankunawan urmasqaku karqan.

15 Chunka runakunapiwanmi karqan, sapankankutaq chunka waranqankunawan q’anchinawan wañurqanku; ari, llapan llaqtaymi urmarqan, noqawan kaq ishkay chunka tawayoqllataq mana, qheparina llaqtakunaman ayqekuq huk chikan runakuna, lamanitakunaman huñunakuq huk chikan runakunallapiwanmi mana. Aychanku, tullunkuna, yawarninkupiwantaq hallp’a patapi chutarayan, hallp’a patapi ismunankupaq, ñut’ukuspa mamapachankuman kutiripunankupaq, paykuna wañuchiqkunaq makinpa saqesqan.

16 Nunaytaq llakikuywan p’akisqa karqan, llaqtay wañuchisqa kasqanrayku, hinataq qaparirqani:

17 Ancha sumaqkuna, imaynatan t’aqakuyta atiwaqchis karqan Wiraqochaq ñanninkunamanta! Ancha sumaqkuna, imaynataq pisichawaqchis karqan qankuna chaskinanpaq kicharisqa makinkunawan sayariq Jesusta!

18 Kayta mana ruwawaqchischu karqan chayqa, manan urmawaqchischu karqan. Ichaqa, urmasqan kankichis, waqanitaq chinkasqaykichismanta.

19 Ancha sumaq churikuna, ususikuna, taytakuna, mamakuna, qosakuna, warmikuna, ancha sumaqkuna, imaynatan urmarqankichis!

20 Ichaqa, ripunkichisñan, manataqmi llakikuyniykuna kutichimusunkichismanchu.

21 Asllamantaqmi p’unchaw hamushan, wañuqniykichis mana wañuqwan churakunankupaq; ismuypi waqlliq kay runa-kurkukunataq asllaman mana waqlliq runa-kurkuman wakinqaku; hinamantaq Cristoq taripanan tiyananpa ñawpaqenpi sayanaykichis, ruwayniykichiskunaman hina taripasqa kanaykichispaq. Chanin kankichis chaytaq, ñawpaqeykichista ripuq taytaykichiskunawan saminchasqa kankichis.

22 Qankunaman kay ancha hatun wañuchiy manaraq hamushaqtin yuyayniykichisman kutirimuwaqchis karqan. Ichaqa ripunkichisñan, Taytataq, ari, hanaqpachaq Wiñay Taytantaq imayna kanaykichista yachan, Paytaq qankunawan ruwan chaninchayninman, khuyapakuyninmanwan hina.