1 Kunantaq kay llaqtamanta mana wañuchisqa puchuman huk chikanta rimayta munayman, paykunaman rimayniykunata Yaya qonman chayqa, taytankuq imaymanankunamanta yachanankupaq; ari, qankunamanmi rimarini Israelpa wasinpa puchun; kaytaqmi rimasqay simikuna:

2 Yachaychis Israelpa wasinmanta kasqaykichista.

3 Yachaychistaq yuyayman kutirimuyman hamunaykichista, mana chayqa, manan qespichisqa kayta atiwaqchischu.

4 Yachaychis awqanakunapaq maqanaykichiskunata panpaman churanaykichista, manaña yawar sut’uchiypi astawan kusikunaykichista, manañataq yapamanta chaykunata hap’inaykichistawan, ichaqa Yaya kamachisoqtillaykichis.

5 Yachaychis taytaykichis reqsiyman hamunaykichista, llapan huchaykichiskunamanta, millay ruwayniykichiskunamantawan kutirimunaykichista, Yayaq Churin Jesucristo kasqanta kreyinaykichista; judiokunaq wañuchisqan kasqanta, Taytaq atiyninwantaq yapamanta hatarisqanta; chaywantaq ayapanpapi atipayniyoq karqan, Paypitaqmi wañuypa qepun millp’usqa kapun.

6 Paymi wañuqkunaq kawsariyninta wakichin; chaywantaq runakuna hatarichisqa kananku taripay tiyananpa ñawpaqenpi sayanankupaq.

7 Runakunamanmi qespiyta Pay apamurqan, chaywantaq, taripana p’unchawpi mana huchayoq ñawpaqenpi tarisqa kaqman, Yayaq ñawpaqenpi suyunpi tiyananpaq qosqa kanqa; hanaqpi takiqkunawan mana tukukuq takikunata Taytaman, Churiman, Qollanan Nunamanwan (paykunataq huk Yayalla kanku) mana tukukuyniyoq kusikuypi takinankupaq.

8 Chhaynaqa, yuyayman kutiriychis Jesuspa sutinpitaq unuchasqa kaychis; Cristoq yachachiynintataq hap’iychis, chaytaq ñawpaqeykichispi churasqa kanqa, mana kay qelqallapichu, ichaqa, judiokunamanta hawarunakunaman hamunan qelqapiwan; chay qelqataq hawarunakunamanta qankunaman hamunqa.

9 Chayta kreyinaykichispaqmi kay qelqasqa; chayta kreyiqtiykichistaq kayta kreyinkichis; kayta kreyinkichis chaytaq, taytaykichiskunamanta yachankichis, paykuna purapi ancha sumaq ruwaykunata Yayaq atiyninwan ruwakusqanmantawan.

10 Yachankichistaqmi Jakobpa ch’awchunpa puchun kasqaykichista; chhaynaqa, qallariypi rimanakuypa runankunawan kushkan yupasqa kankichis; Cristopi kreyinkichis, unuchasqataq kankichis chayqa, qallariypi unuwan, hinamantaq ninawan Qollanan Nunapiwan, Qespicheqninchispa qhawachiwasqanchista qatispa, chay kamachiwasqanchisman hina chayqa, allillanmi qankunawan kanqa taripana p’unchawpi. Hinataq kachun.