1 Hinataq, kinsa pachak soqta chunka kinsayoq watapi, nephitakuna awqasuyunkunawan Ch’in hallp’amanta rirqanku lamanitakuna kontra maqanakunankupaq.

2 Nephitakunaq awqasuyunkunataq, yapamanta Ch’in hallp’aman kutichimusqa karqanku. Sayk’usqaraq kashaqtinkutaq, paykuna pataman lamanitakunamanta mana sayk’usqa awqasuyu hamurqan; ancha millay awqanakuytaq karqan, hinataq lamanitakuna Ch’in llaqtata hap’ikurqanku, askhata nephitakunata wañuchirqanku, askha piñaschasqa runakunatawantaq hap’ikurqanku.

3 Puchuq nephitakunataq ayqekurqanku, Teankum llaqtaq runankunawantaq huñunakurqanku. Teankum llaqtaqa mamaqocha patapin karqan, Ch’in llaqtaq sispayuyninpi imataq karqan.

4 Lamanitakunaman nephitakunaq awqasuyunkuna risqankuraykun atipachikuyta qallarirqanku; mana chay hinachu kanman karqan chayqa, manan lamanitakunaqa paykunapi atiyniyoqchu kankuman karqan.

5 Ichaqa, Yayaq taripayninkunan millay ruwaqkunata atipanqa; millay ruwaqwantaqmi millay ruwaq muchuchisqa. Millay ruwaqkunan yawar sut’uchiyman runakunaq wawankuq sonqonkuta phiñarichinku.

6 Hinataq, Teankum llaqta kontra hamunankupaq lamanitakuna alistakurqanku.

7 Kinsa pachak soqta chunka tawayoq watapi Teankum llaqta kontra, lamanitakuna hamurqanku, Teankum llaqtatapas hap’ikunankupaq.

8 Nephitakunaq qarqosqan kutichisqantaq lamanitakuna karqanku. Lamanitakunata qarqosqankuta rikuspankutaq kallpankumanta nephitakuna alabakurqanku; paykuna kikinkuq tukuy kallpankuwan rispataq, yapamata Ch’in llaqtata hap’ikapurqanku.

9 Kaykunataq ruwasqa karqan, waranqa-waranqakunataq ishkaynin qayllapi wañuchisqa karqanku, nephitakuna purapipas, lamanitakuna purapipas.

10 Hinataq, kinsa pachak soqta chunka soqtayoq wata pasarqan, lamanitakunataq yapamanta nephitakuna kontra maqanakuq hamurqanku; chaypiwanpas, manan millay ruwasqankumanta nephitakuna kutirimurqankuchu, ichaqa, pasaqllan millay ruwaykuna ruwaypi atipakurqanku.

11 Manataqmi simi willayta atinmanchu, ni runapas hunt’atapuni qelqayta, yawar sut’uchiymanta, wañuchinakuymantawan imayna millaypuni runakuna purapi kasqanta, nephitakuna purapipas, lamanitakuna purapipas. Sapanka sonqon rumiyasqa karqan, hinataq pasaqlla kusikurqanku yawar sut’uchiypi.

12 Manataqmi Wiraqochaq rimayninman hina, Lehiq llapan wawankuna chawpipi chay hina hatun millay ruwaykuna karqanchu, manan Israelpa llapan wasin purapipas karqanchu kay runakuna purapi hinaqa.

13 Hinataq, Ch’in llaqtata lamanitakuna hap’ikurqanku, kaytaq karqan, nephitakunamanta aswan askha kasqankurayku.

14 Teankum llaqta kontrapas rirqankun, runakunatataq chaymanta qarqorqanku, askhatataq piñaschasqa runata hap’irqanku, warmitapas erqekunatapas; yaya rikch’ayninkumantaq paykunata arpayta hina munachirqanku.

15 Hinataq, kinsa pachak soqta chunka qanchisniyoq watapi, warminkuta wawankunatawan lamanitakuna munachisqankurayku nephitakuna phiñarikuspanku, ancha hatun phiñarikuywan lamanitakuna kontra rirqanku, hinaspataq lamanitakunata yapamanta atiparqanku, hallp’ankunamantataq qarqorqanku.

16 Kinsa pachak qanchis chunka pishqayoq watakamataq lamanitakunaqa mana yapamanta nephitakuna kontra hamurqankuchu.

17 Kay watapitaq nephitakuna kontra llapan kallpankuwan urayamurqanku; manataqmi yupasqachu karqanku, sinchi askhapuni kasqankurayku.

18 Kay pachamantapachataq nephitakunaqa mana lamanitakunata atiparqankuñachu; ichaqa, paykunaq pichasqan kaytan qallarirqanku, intiq ñawpaqenpi shulla hina.

19 Hinataq, Ch’in llaqta kontra lamanitakuna urayamurqanku; ancha millay maqanakuytaq karqan Ch’in hallp’api, chaypitaq nephitakunata atiparqanku.

20 Ñawpaqenkuta yapamanta ayqekuspankutaq Boaz llaqtaman hamurqanku; chaypitaq lamanitakuna kontra qharillaña sayapakurqanku; chhaynataq, lamanitakunaqa mana nephitakunata atiparqankuchu, ichaqa, ishkay kuti hamuqtinkuña.

21 Ishkay kuti hamuqtinkutaq nephitakunaqa qarqosqa, ancha hatun wañuchiywan sipisqapiwan karqanku. Warminku, wawankunapiwantaq yapamanta rikch’aykunaman apasqa karqanku.

22 Hinataq, ñawpaqenkumanta nephitakuna ayqekurqanku, hatun llaqtakunapi, huch’uy llaqtakunapipas kaq llapan runakunata paykunawan apayukuspanku.

23 Kunantaq noqa Mormon, hallp’ata hap’ikunankupaq hinaña lamanitakuna kasqankuta rikuspa, Shim orqoman rirqani; Wiraqochapaq Ammaronpa pakasqan llapan qelqakunatataq horqorqani.