1 Noqa Moroni taytay Mormonpa qelqanta tukuni. Huk chikallantaqmi qelqanaypaq kan, chaykunatataq taytay kamachiwarqan.

2 Hinataq, ancha hatunkaray Kumorah awqanakuy pataman, qheparina hallp’aman ayqekuq nephitakuna lamanitakunaq qatikachasqan karqanku, llapanku sipisqa kanankukama.

3 Taytaypas paykunaq wañuchisqanmi karqan, noqataq sapallay qhepani, llaqtaypa qolluyninpa khuyay willayninta qelqanaypaq. Ichaqa, ripunkuñan paykuna, noqataq taytaypa kamachiyninta hunt’ani. Sipiwanqakuchus chaytaqa manan yachanichu.

4 Chhaynaqa qelqasaqmi, hallp’apitaq qelqakunata pakasaq; manataqmi imapas qokuwanchu mayman rinaypas.

5 Taytaymi kay qelqakunata ruwarqan, chaypi kasqantataq pay qelqarqan. Noqapas qelqaymanmi, raphikunapi maypi qelqanapaq kanman chayqa; ichaqa, manan kanchu; manataqmi choqey kanchu, sapallaytaq kashani chayqa. Maqanakuypin taytaypas llapan aylluykunapas wañuchisqa karqanku, manataqmi qochuykuna kanchu ni mayman rinaypaqpas; hayk’a pachata kawsanaypaq Wiraqocha qowanantaqa manan yachanichu.

6 Tawa pachak watañan tukukurqan Qespicheqninchis Wiraqochanchis hamusqan pachamantapacha.

7 Llaqtay nephitakunata lamanitakuna qatikacharqanku llaqta-llaqtanta, hallp’a-hallp’anta, manaña astawan kanankukama; ancha hatuntaqmi urmayninku karqan, ari, ancha hatun ancha utirayaymi llaqtay nephitakunaq qolluyninku.

8 Wiraqochaq makinmi kayta ruwarqan. Lamanitakunapas paykuna purapin maqanakuypi kashanku; kay hallp’aq lliw uyanpitaq pasaqlla wañuchiy, yawar sut’uchiypiwan kashan; manataqmi pipas yachanchu awqanakuypa tukukuyninta.

9 Kunanqa, manañan astawan paykunamanta ninichu; manan pipas kanchu, ichaqa lamanitakuna suwakunallapiwanmi kay hallp’a patapi kanku.

10 Manataqmi pipas kanchu cheqaq Yaya reqsiqqa, ichaqa Jesuspa yachachisqankunalla; paykunataq hallp’api karqanku, runakunaq huchallikuyninku ancha hatunpuni kaqtintaq Wiraqochaqa mana kacharirqanchu runakunawan paykuna qhepanankuta; kay hallp’a patapi kankumanchu chaytaqa manan pipas yachanchu.

11 Ichaqa, taytay noqapiwanqa, rikurqaykun paykunata; paykunataq noqaykuta serviwarqanku.

12 Pipas kay qelqata chaskispa mana kondenanqachu kaypi kaq mana hunt’asqa kaqkunarayku chayqa, chay kikin runan kaykunamanta aswan hatun imaymanakunata reqsinqa. Moronin kani, atikunman chaytaq llapan imaymanakunata reqsichiykichisman.

13 Tukunin kay runakunamanta rimayta. Mormonpa churinmi kani, taytaytaq Nephiq ch’awchun karqan.

14 Noqataqmi kani kay qelqakunata Wiraqochapaq waqaychaq; kay qelqakunaq raphinkunaqa mana ima chaninniyoqmi Wiraqochaq kamachiyninrayku. Cheqaqtapunin Pay nin, manan pipas qhapaqyananpaq chayta hap’inankumanta. Ichaqa, chaypi kaq qelqakunaqa ancha hatun chaninniyoqmi; chayta k’anchayman apamuqtataq Wiraqocha saminchanqa.

15 Manan pipas chayta k’anchayman apamunanpaq atiyniyoqchu kanqa, ichaqa, payman Yayamanta qosqa kaqtillanmi. Yayaqa munan, kusiqellpunman ch’ullalla ñawillayoq chay ruwakunanta, utaq Wiraqochaq rimanakuyninpa ñawpa unay ch’eqerichisqa llaqtanpa allin kayninpaqpas.

16 Saminchasqataq kachun, kayta k’anchayman apamuq runa; tutayaqmanta k’anchayman apamusqan kanqa, Yayaq rimayninman hina; ari, hallp’amanta horqomusqan kanqa, tutayaqmantataq k’ancharimunqa, runakunaq yachayninkuman apamusqataq kanqa; Yayaq atiyninwan ruwasqataq kanqa.

17 Pantaykuna kan chayqa, runaq pantayninmi. Ichaqa, manan ima pantaymantapas yachaykuchu; chaypiwanpas, llapan imaymanakunatan Yaya yachan; chhaynaqa, pi kondenaqtapas qhawakunanta saqeychis, supay wasiq ninanpa ch’ikinpi imañataq kankuman.

18 Noqaman qhawachiway, mana chayqa k’irisqan kanki—nispa neqqa, qhawakuchun, Wiraqochaq hark’asqanta imañataq kamachishanman.

19 Sinchi usqhaylla taripaqqa, yapamantan usqhaylla taripasqa kanqa; ruwayninkunaman hinan chaninchaynin kanqa; chhaynaqa, k’iriq runaqa, Wiraqochaq k’irisqanmi yapamanta kanqa.

20 Qhawariychis qelqaq nisqanta: Runaqa manan maqananchu, manataqmi taripanqachu; taripayqa noqaqmi, aynipi kutichiypas noqaqtaqmi, yapamantataq qosaq, nispan Wiraqocha nin.

21 Phiñarikuykunata, churanakuykunatawan Wiraqochaq ruwaynin kontra samariq, Wiraqochaq rimanakusqan Israelpa wasin kontrapiwan samariq: Wiraqochaq ruwayninta thuñisun, Wiraqochataq mana yuyarinqachu Israelpa wasinwan rimanakuy ruwasqanta, nispa niqqa, wit’usqa kaspa ninaman churasqa kananpaq ch’ikipin kashan.

22 Wiraqochaq wiñay-wiñaypaq ima ruwanankunaqa ruwakuytaqa qatillanqan, llapan promesankuna hunt’akunankama.

23 T’aqwiychis Isaiaspa unanchayninkunata. Manan chaykunata qelqayta atiymanchu. Ari, qankunata nisaykichis—ñawpaqeyta riq qollanankuna, kay hallp’ayoq kaqkunaqa qaparinqakun, ari, ñut’u hallp’amantan Wiraqochaman qaparimunqaku; Wiraqochaq kawsasqanman hinataq paykunawan rimanakuy ruwasqanta yuyarinqa.

24 Yachantaqmi Pay, wawqenkunarayku Yayaman rimariyninku kasqanta. Yachantaqmi iñiyninkuta; Paypa sutinpin orqokunata hitirichiyta atiqku, sutinpitaq hallp’ata chhapchiriyta atirqanku; rimayninpa atiyninwantaq watana wasikunata panpaman urmachirqanku; ari, manan ninasapa hornokunapas paykunata k’iriyta atirqanchu, nitaq k’ita uywakunapas, ni miyuyoq mach’aqwaykunapas, rimayninpa atiyninrayku.

25 Kay imaymanakunata horqomunanpaq Wiraqocha kacharinan runaraykupiwantaqmi yayaman-rimarikuyninku karqan.

26 Manataqmi pipas, manan chaykuna hamunqachu, nispa niyta nesitanchu; cheqaqtapunin hamunqa, Wiraqochan chayta rimarqan. Hallp’amantan lloqsimunqa Wiraqochaq makinwan, manataq pipas hark’ayta atinmanchu; manan milagrokunaqa kanñachu nispa nikunan p’unchawpin hamunqa; wañusqakunamanta rimariq hinataq hamunqa.

27 Pakallapi allchanakuykuna, tutayaqpi ruwaykunaraykupiwan chaninkunaq yawarnin Wiraqochaman qaparinan p’unchawpin hamunqa.

28 Ari, Yayaq atiynin mananchakunan p’unchawpi, iñeqkunahuñukuna waqllisqa kaqtinku, sonqonkuq anchayayninpi hoqarikunanku p’unchawpiwanmi hamunqa; ari, iñeqkuna-huñukunaq kamachikuqninkuna, yachacheqkunapiwan sonqonkuq anchayayninkupi hoqarikunanku p’unchawpi, iñeqkuna-huñunkumanta kaq runakunamanta chikikuq kananku p’unchawpi.

29 Ari, waq hallp’akunapi ninakunamanta, sallallallaykunamanta, q’osñi phuyukunamantawan uyarikunan p’unchawpin hamunqa.

30 Uyarikullanqataqmi awqanakuykunamanta, awqanakuymanta rimaykunamanta, askha hallp’akunapi pacha chhapchikunamantawan.

31 Hallp’api ancha hatun qhellichaykuna, runa wañuchiykuna, suwakuykuna, llullakuykuna, yukaykuna, map’akuykuna, imaymana laya millay-millanakunapiwan kanan p’unchawpin hamunqa; kayta ruway utaq haqayta ruway, manan imapas kanqachu, chhayna runataqa qhepa p’unchawpin Wiraqocha sayarichinqa, nispa askha ninanku p’unchawpi. Ichaqa, ay chay runakunamanta, p’oshqo hayaqepi, millay ruwaypa wataynin ima paykuna kashanku.

32 Noqaman humuychis, qolqeykiraykutaq huchaykichiskuna panpachasqa kanqa, nispa niq iñeqkuna-huñukuna ruwakunan p’unchawpin hamunqa.

33 Yaw millay waqllisqa k’ullu umayoq runakuna, imaqtinmi iñeqkuna-huñukunata hatarichikurqankichis qhapaqyanaykichispaq? Imaqtinmi Yayaq qollanan rimayninta waqllichirqankichis, nunaykichispaq kondenasionta apamunaykichispaq? Qhawariychis Yayaq qhawachiyninkunata; hamushanmi pacha, chay p’unchawpi kay llapan imaymanakuna hunt’akunanpaq.

34 Ancha hatun ancha sumaq imaymanakunatan Wiraqocha qhawachiwarqan, qankuna purapi kay imaymanakuna hamunan p’unchawpi asllaman hamunan imaymanakunamanta.

35 Kunanpas kashawaqchis hinan qankunaman rimariykichis, chaypiwanpas manan kankichischu. Ichaqa, Jesucriston qankunata rikuchiwarqan, yachanitaqmi ruwayniykichiskunata.

36 Yachanin sonqoykichispa anchayayninpi purisqaykichista; manataqmi pipas kanchu ichaqa huk chikallan, sonqonkuq anchayayninpi mana hoqarikuqkuna, ancha sumaq p’achakunawan p’achakunankupaq, munapakunankupaq, churanakuypi, millay yuyaypi, qatikachaypi, imaymana laya millay ruwaykunapiwan. Iñeqkuna-huñuykichiskunataq, ari, sapankankun qhellichasqa wakinku, sonqoykichispa anchayayninrayku.

37 Qolqeta, kapuqniykichista, ancha sumaq p’achaykichiskunata, iñeqkuna-huñuykichis achalaytawanmi mayta munakunkichis; wakchata, nesitaqta, onqoqta, llakichisqatawan munakusqaykichismanta aswanta.

38 Yaw qhellikuna, ishkay uyakuna, ismuqrayku qhatukuq yachacheqkuna, imaqtinmi qhellicharqankichis Yayaq qollanan iñeqkuna-huñunta? Imanaqtinmi p’enqakunkichis Cristoq sutin churakuyta? Imanaqtinmi mana yuyankichischu mana tukukuyniyoq kusikuypa chaninnin, runakunaq hatunchayninkurayku mana hayk’aq wañuq muchuymanta aswan hatun kasqanta?

39 Imanaqtinmi achalakunkichis mana kawsayniyoq kaqwan, chaykamataq yarqayniyoqkunata, nesitaqkunata, q’alalla kaqkunata, onqoqkunata, muchuqkunatawan ñawpaqeykichista pasachinkichis mana paykunata reparaspa?

40 Ari, imanaqtinmi pakallapi allchanakuyniykichiskunata hatarichinkichis qhapaqyanaykichispaq, ikmakunatataq Wiraqochaq ñawpaqenpi waqachinkichis, mana tayta-mamayoqkunatapas Wiraqochaq ñawpaqenpi waqachinkichis; taytankuq, qosankuq yawarnintapas panpamanta Wiraqochaman qaparichinkichis, umaykichis pataman aynipi kutichiyrayku?

41 Ayni qoq q’anchinaqa qankuna patapin warkurayashan; asllamantaq pacha hamunqa, qankuna patapi chaninkunaq yawarninta aynipi kutirichinanpaq; manan Payqa astawan awantanqachu waqayninkuta.