1 Me yibi buch ni ku lan e re duw nem me tabab ba mael u thilin fapi Nephites nge fapi Lamanites. Ma yug aram rogon ni gub bitir, ma gub gaaʼ ni gidiiʼ; ere fapi gidiiʼ ku Nephi e ra dugiliyed gag ni nggu mang gaaʼ roraed, ara gaaʼ ko pi salthaw roraed.

2 Ere yibi buch nu lan e bin ragag nge nelʼ e duw rog mu guwaen ni gube gafaliy ba ulung i salthaw ko Nephites, ngar cham gaed fapi Lamanites; ma arame ke yaeni mʼay dalip miriʼay nge riliwʼ nge nelʼ e duw.

3 Me yibi buch nu lan e bin dalip miriʼay nge riliwʼ nge medilip e duw me yib fapi Lamanites ra oggaed ngomaed ni rib almarin, ni arame ra kʼaringed e murus ngakʼ e pi salthaw rog; ma arame dakur chamgaed, mar tabab gaed ko miil ni yaed ba sor iyaen ko pi binaw nib kan nga leluʼoch.

4 Me yibi buch ni gubaed ko fare binaw nu Angola, ma gamaed paer ko binem e binaw, ma gamaed falfalʼeg rogmaed ni nggu yororiyed gamaed rokʼ pi toʼogor romaed ni fapi Lamanties. Me yibi buch nug noemow niged fare binaw u poloʼ i gelingmaed; machane ni yug aram rogon oren u gubin e pi yoror romaed, me yib fapi Lamanites ra oggaed ngomaed ngar tulufed gamaed nga wuruʼ fare binaw.

5 Ma kur tulufed gamaed nga wuruʼ fare binaw ku David.

6 Ma arame guwaroed iyaen, nggu taw gaed ko fare binaw ku Joshua, ni bay nga mathil ko ngael u charen e dappʼelʼay.

7 Me yibi buch ni gu kunuyed e gidiiʼ romaed ni payngin ni rayog, ni gomanga yog ni ngug kunuyed raed nga taʼabang nga lan taʼab ulung.

8 Machane musap gaed, fare binaw e basug ko moroʼroʼ nge fapi Lamanites; ma yug aram rogon e gafgow ni ke aw nga dakean e gidiiʼ rog, ma dar kalgaed ngaenʼraed ko pi ngongol roraed nib kireb; ere bay e rachaʼ nge puʼoeg rachaʼ ni garar u dakean gaʼangin yang fare nam, ni mapʼ ko baʼarokʼ fapi Nephites ma ku aram rogon ko baʼarokʼ fapi Lamanites; me yaeni aw nreb e togopluw ko am nib poloʼ u dakean gaʼangin yang fare nam.

9 Ere chiney, e fapi Lamanites e bay beeʼ nib pilung roraed, ni fithingan e Aaron; me yibi ognag ba ulung i salthaw ngomaed ni yaed aningeg i ragag nge aningeg e biyuʼ u gubin. Ma musap gaed, gu togopluw gaed ngakʼ ni gamaed aningeg i ragag nge lʼagruw e biyuʼ. Me yibi buch nug gelgaed e salthaw rog ngakʼ me miil rog. Ere musap gaed, gubin e pinnʼey nrinʼ me yaeni mʼay dalip miriʼay nge guyey e duw.

10 Me yibi buch ni fapi Nephites e ra tabab gaed ko kalngaenʼ ko denen roraed, mar tabab gaed ko yoer ni woed ni prophesy nag Samuel ni fare profet; ya musap gaed dariy beeʼ ni rayog ni nge chaʼariy e tirokʼ banʼen, ni bachan e pi talingeg, nge pi moroʼroʼ, nge pi tamathang pogofan, nge pig nib machmach, nge motokan ni immoy u lan fare nam.

11 Aray rogon ni tabab e daloloeyʼ nge mayoer u lan gaʼangin yang fare nam ni bachan e pinnʼey, nib gaaʼ nib almarin u fithikʼ fapi gidiiʼ ku Nephi.

12 Me yibi buch u napʼan ni gag, Mormon, e gguy e mayoer roraed nge daloloeyʼ roraed nge kirbaenʼ roraed u mit Somoel, me tabab gumʼirchaʼeg ko falfalaenʼ, ni bachan e gumnang e pi wurengaenʼ nge gumʼaenʼ rokʼ fare Somoel, ere gu lemnag ni ra wurengaenʼ ngoraed ni nge yog bayay ni ngar manged bogi gidiiʼ nib matʼaw.

13 Machane musap gaed re falfalaen rog ney e rib mʼay fan, ya kirbaenʼ roraed e dewaliy raed ko kalngaenʼ, ni bachan falʼngin Got; ya kirbaenʼ roraed e kirbaenʼ ko gafgow ni ke aw ngoraed, ya bachan fare Somoel e dabi gubin e ngiyalʼ me pagraed nga ur falfalaenʼ gaed u fithikʼ e denen.

14 Ma darbaed ngakʼ Yesus u fithikʼ e mʼingaenʼ nge kalngaenʼ, ya ri gerniged Got, mar athapeged ni ngar mʼaed. Ma yaed be cham ko sayden ni fan ko yafos roraed.

15 Me yibi buch ni sul e kirbaenʼ rog ngog bayay, mug guy ni fare rran ko murnguy e ke thimur roraed, ni ruw yang, tinu fayleng nge tin nib thothup; ya kug guy yu biyuʼ iyaed ni kan thʼaeb raed nga butʼ ya rib magagyel ni yaed be togopluw ko Got roraed, min ufung raed ngalang ni boed tʼay e gamanman ni yima fanay ko yongoʼol u dakean fare nam. Ere aray rogon ni mʼay e bin dalip miriʼay nge aningeg i ragag nge aningeg e duw.

16 Me yibi buch nu lan e bin dalip miriʼay nge aningeg i ragag nge lal e duw e tabab fapi Nephites ko miil rokʼ fapi Lamanites; min tuluf raed nge madaʼ ko ngiyalʼ ni kar taw gaed ko fare binaw nu Jashon, u mʼon nra yog ni ngan koelraed u napʼan ni yaed be miil.

17 Ma chiney e, fare binaw nu Jashon e ba chugur ko fare binaw niʼir e mithaeg Ammaron fapi chep riy ngakʼ Somoel. Ere musap gaed kug rinʼ ni boed rogon e thin ni yoeg Ammaron, ere kug fek fapi plates ku Nephi, nggu falʼeg ba chep ni boed rogon e thin ni yoeg Ammaron.

18 Ma dakean fapi plates ku Nephi e gufalʼeg riy bbabyor nib sug morngaʼagen gubin e pi ngongol nib kireb nge pi fananikan riy, machane tiney e plates e gutileg ni nga dab gusuguy nga morngaʼagen e pi ngongol ni kireb nge pi fananikan roraed, ya musap gaed, kaʼaram ni ʼulʼul iyib ni pi ngongol ni kireb nge pi fananikan e yibe dag nga pʼoewcheg u napʼan ni ke yog ni ngug guy mug nangfan rogon e pi wokon e gidiiʼ.

19 Ma kug gafgow riy ni bachan e pi ngongol roraed ni kireb; ya gumʼirchaʼeg e ke sug ko kirbaenʼ ni bachan e pi ngongol roraed nib kireb, ni gubin e pi rran rog; machane, gumnang ni yira chibiyeg ngalang ko bin tomur e rran.

20 Me yibi buch ni ku lan e re duw ney bayay e kun gay ma yibe tuluf fapi gidiiʼ ku Nephi. Me yibi buch nni tulufmaed iyaen nge madaʼ ko ngiyalʼ ni kug taw gaed nga leluʼoch ko fare binaw ni kanoeg ni Shem.

21 Me yibi buch nug noemow niged fare binaw nu Shem, ma gamaed kunuy nga taʼabang e gidiiʼ romaed nrogon ni rayog, ni gomanga yog nug chuweg raed ko gafgow.

22 Me yibi buch nu lan e bin dalip miriʼay nge aningeg nge nelʼ e duw mar tabab niged e cham ngomaed bayay.

23 Me yibi buch ni gunon ngakʼ e gidiiʼ rog, mug tawasar ngoraed nib gel, ni ngar sakʼiy gaed nib tagyet u pʼoewchen fapi Lamanites mar cham gaed ni fan ngakʼ pi leʼengiraed nge pi bitir roraed, nge pi naʼun roraed, nge tabinaew roraed.

24 Ere thin rog e kʼaring raed nge gel laniyaenʼraed, ni arame dakur miil gaed rokʼ fapi Lamanites, ya ra sakʼiy gaed nib tagyet ngar cham gaed.

25 Me yibi buch ni gamaed guyey i biyuʼ i salthaw ni gucham gaed ba wugem i biyuʼ i salthaw. Me yibi buch nug sakʼiy gaed u pʼoewchraed nib miyuluy ma arame ra miil gaed romaed.

26 Me yibi buch u napʼan ni ra miil gaed mug tulufed raed ko salthaw romaed, ma ka gamaed madaʼ bayay, ma gamaed liiʼraed; machane fare gelingin Somoel e dariy romaed; arragon, kan pagmaed ni yigoʼ gamaed romaed, ma arame fare Kan ni Thothup rokʼ Somoel e daki paer romaed; ere gu moʼowaer gaed ni boed pi walagmaed.

27 Ere ri kireb anʼug ni bachan e biney e gafgow ni ke tay e gidiiʼ rog, ni bachan e pi denen roraed nge pi fananikan roraed. Machane musap gaed, gu waroed iyaen ni cham ngakʼ fapi Lamanites nge fapi Gadianton ni moroʼroʼ, nge yaeni madaʼ ko ngiyalʼ ni kug feked bayay fapi binaw ni tafen maed.

28 Me mʼay e bin dalip miriʼay nge aningeg i ragag nge mereb e duw. Ma lan e bin dalip miriʼay nge wugem e duw ma gamaed falʼeg ba mʼag u thilmaed fapi Lamanites nge fapi Gadianton ni moroʼroʼ, ni arame gubaed gu kukweged e pi binaw ni tafen maed u thilmaed.

29 Ere fapi Lamanites e ra piiʼed ngomaed e binaw nib kan nga leluʼoch, arragon, ko fachiyang i binaw nib achig radan nib sor iyaen nga lan fare binaw ni bay nga yimuch. Ma gamaed piiʼ ngakʼ fapi Lamanites gubin yang e binaw ni bay nga yimuch.