1 Ere chiney, e musap gaed, gu baʼadag ni ngu weliy boech banʼen ngakʼ e tin ni ke magaey ko pi gidiiʼ ney ni dar mʼaed, ni faʼanra piiʼ Got e pi thin rog ngoraed, ni nge yog ni ngar nanged e pinʼen ko pi chitamangraed; arragon, gube non ngomed, gimed e piʼin ni kam magaey gaed ko gidiiʼ ku Israel; ere baʼaray e pi thin ni nggu weliy:

2 Gubaʼadag ni ngam nanged ni gimed e gidiiʼ ko gidiiʼ ku Israel.

3 Gubaʼadag ni ngam nanged ni thingar mu kalgaed ngaenʼmed, ara dabiyog ni ngam thap gaed.

4 Gubaʼadag ni ngam nanged ni thingar mu tayed nga butʼ e pi talin e mael romed, ma dabki lʼagaenʼmed ko puʼoeg rachaʼ, ma dab kum feked bayay, ma kemus ni faʼanra yoeg Got ngomed.

5 Gubaʼadag ni ngam nanged ni thingar mu nanged e llowaenʼ rokʼ e pi chitamangmed, magmed kalngaenʼ ko gubin e pi denen nge ngongol romed nib kireb, me michaenʼmed ngakʼ Yesus Kristus, niʼir fachaʼ ni Fak Got, ma ire yimʼ nga paʼ fapi Jews, ma dakean gelingin e en Chitamangiy me fos bayay, ma aram rogon ni thang wolbuwan e loew; ma ku ire chuweg e gafgow ni yamʼ.

6 Me yognag e foskoyamʼ ko yamʼ, ni ireram e gin ni rafos e gidiiʼ riy ni ngar sakʼiy gaed nga mʼon u gilʼ e pufthin rokʼ.

7 Ma ke yognag e bayul ko gidiiʼ nu fayleng, niʼir e faʼanra bay beeʼ ni yira pirʼeg riy ni dariy thibngin u pʼoewchen ko fare rran ni pufthin e yira piiʼ ngakʼ ni nge paer ko gin bay Got riy u lan gilʼilungun, ni ngar tang gaed ni dariy napʼan ni yaed e choir nu tharmiy ni yaed be oge magaer, ngakʼ e en Chitamangiy, nge fare Fak, nge fare Kan ni Thothup, ni yaed taʼab Got, u lan ba dodow ko falfalaenʼ ni dariy tungun.

8 Ere mu kalgaed ngaenʼmed, min tawfe nagmed u fithingan Yesus, magmed fek fare gospel rokʼ Kristus, ni bayi mab woʼen ngomed, ni gathi kemus nu lan e biney e babyor ya ku bay u lan e fare babyor ni bay yib ngakʼ fapi Gentiles rokʼ fapi Jews, niʼir e re babyor ni ra yib rokʼ fapi Gentiles ngomed.

9 Ya musap gaed, pinnʼey e kan yoloey ni fan ko nge mich u wunʼmed e pinnʼem; ma faʼanra mich u wunʼmed e pinnʼem ma kura mich u wunʼmed e tiney; ma faʼanra mich u wunʼmed e tiney ma gimed ranang morngaʼagen e pi chitamangmed, nge fare muruwel ni maʼangʼang nni gagyeg nag u gelinginʼ Got u fithikʼraed.

10 Ma kagmed ranang ni gimed e tin ni kam magaey gaed u pifak Jacob; ere gimed ba mathaʼeg nga fithikʼ fapi gidiiʼ ko bin sommʼon e mʼag; ma faʼanra michaenʼmed ngakʼ Kristus, min tawfe nagmed, ko raen ni sommʼon, nge migid ma nifiy nge fare Kan ni Thothup, magmed leak wokon e Tathapeg rodaed, u rogon e nʼen ni ke chiyliy ngodaed, ma ra felʼ waʼathmed u lan fare rran ko pufthin. Amen.