१ अनि अब, हेर, म यी जनका अवशेषसामु केही बोल्दछु जसलाई जोगाइएको छ, यदि यस्तो भयो कि परमेश्वरले उनीहरूलाई मेरा वचनहरू दिनुभयो भने, कि उनीहरूले आफ्ना पितापुर्खाहरुका बारेमा कुराहरू जान्न सकून्; हो, म तिमीहरूसामु बोल्दछु, तिमीहरू इस्राएलका घरानाका अवशेषसामु; र यी ती वचनहरू हुन् जुन म बोल्छु:

२ तिमीहरूले चिन कि तिमीहरू इस्राएलका घरानाका हौ।

३ तिमीहरूले जान कि तिमीहरू पश्चात्तापमा आउनु पर्दछ, अन्यथा तिमीहरूलाई बचाउन सकिदैन।

४ तिमीहरूले जान कि तिमीहरूले युद्धका हतियारहरू त्याग्नुपर्दछ र रगत बगाउनमा अरु आनन्दित हुनुहुँदैन र ती फेरि लिन हुँदैन, यीबाहेक जुन परमेश्वरले तिमीहरूलाई आज्ञा दिनुहुनेछ।

५ तिमीहरूले जान कि तिमीहरू आफ्ना पितापुर्खाहरुको ज्ञानमा आउनुपर्दछ र तिमीहरूका सबै पापहरू र दुष्टताहरूको पश्चात्ताप गर्नुपर्दछ र येशू ख्रीष्टमा विश्वास गर्नुपर्दछ, कि उहाँ परमेश्वरका पुत्र हुनुहुन्छ र उहाँलाई यहूदीहरूद्वारा बध गरिएको थियो र पिताको शक्तिद्वारा उहाँ फेरि बौरिनुभएको छ, जसबाट उहाँले चिहानमाथि विजय प्राप्त गर्नुभएको छ; र उहाँमा नै मृत्युको खिल निलिएको छ।

६ अनि उहाँले मृतकहरूको पुनरुत्थान पूरा गर्नुहुन्छ, जुनबाट मानिसलाई उहाँको न्यायको आसनअगाडि खडा हुन उठाइनुपर्दछ।

७ अनि उहाँले संसारको उद्धार ल्याउनुभएको छ, जसबाट जसलाई उहाँअगाडि निर्दोष फेला पारिन्छ उसलाई परमेश्वरको उपस्थितिमा उहाँको अधिराज्यमा बास बस्न, माथिका भजन मण्डलीहरूसँग नरोकीकन, पिताको र पुत्रको र पवित्र आत्माको, जो एक परमेश्वर हुनुहुन्छ जयजयकार गाउन दिइन्छ, एक खुसियालीको अवस्थामा जसको अन्त्य छैन।

८ त्यसकारण पश्चात्ताप गर र येशूको नाउँमा बप्तिस्मा लिय र ख्रीष्टको सुसमाचारलाई स्वीकार, जुन तिमीहरूअगाडि हुनेछ, यी अभिलेखहरू मात्र होइन ती अभिलेख पनि जुन यहूदीबाट गैह्र-यहूदीसम्म आउनेछ, जुन अभिलेख गैह्र-यहूदीहरूबाट तिमीहरूसामु आउनेछ।

९ किनकि हेर, यो त्यो प्रायोजनका निम्ति लेखिएको छ कि तिमीहरूले त्यसमा विश्वास गर्न सक; र यदि तिमीहरूले त्यसमा विश्वास गऱ्यौ भने यसमा पनि विश्वास गर्नेछौ; र यदि तिमीहरूले यसमा विश्वास गऱ्यौ भने तिमीहरूले आफ्ना पितापुर्खाहरुका र ती विस्मयकारी कार्यहरूका बारेमा पनि थाहा पाउनेछौ जुन उनीहरूमाझ परमेश्वरका शक्तिद्वारा ल्याइएको थियो।

१० अनि तिमीहरूले यो पनि थाहापाउनेछौ कि तिमीहरू याकूबका सन्ततिका एक अवशेष हौ; त्यसकारण तिमीहरूलाई प्रथम करारका जनमाझ गणना गरिनेछ; र यदि यस्तो भयो कि तिमीहरूले ख्रीष्टमा विश्वास गऱ्यौ भने र बप्तिस्मा लियौ भने, पहिला पानीले त्यसपछि आगोले र पवित्र आत्माले, हाम्रा मुक्तिदाताको उदाहरणको अनुकरण गर्दै, त्यसअनुसार जुन उहाँले हामीलाई आज्ञा दिनुभएको छ, त्यो न्यायको दिनमा तिमीहरूलाई असल हुनेछ। आमिन।