1 Musap gaed, gag, Moroni, e bay gumuʼ nag fare chep rokʼ e chitamag, i Mormon. Musap gaed, kemus ni buchʼuw e bay ni nggu yoloey, ni bogi banʼen ni ke chiyliy e chitamag ngog.

2 Ere chiney e yibi buch u tomuren fare mael ni gaaʼ ni tinowey u Cumorah, ma musap gaed, fapi Nephites nra miil gaed nga lan e nam ko yimuch e gayraed fapi Lamanites, nge madaʼ ko ngiyalʼ ni kan liiʼraed ngar mʼaed ni yaed gubin.

3 Nge chitamag e kur liiʼed ngemʼ, me gag e guwaen gu magaey ni yigoʼ gag ni nggu yoloey e gin kirbaenʼ u yatan e gafgow ko gidiiʼ rog. Machane musap gaed, kar chuwdaed, ere nggu muguʼuliy fare motochiyel rokʼ e chitamag. Ma dagnang ko yaedra liiʼeg nggumʼ fa dangay.

4 Ere nggu yoloey mug mithaeg fapi chep nga fithikʼ e butʼ; ma gin ni nggu sor ngay e demutrug.

5 Musap gaed, chitamag e ke falʼeg e re chep ney, me ke yoloey fan ngay. Ere musap gaed, kug baʼadag ni gura yoloey boech ni faʼanra bay tagilʼ u dakean fayungi plate, machane musap gaed dariy gilʼ, ma kudariy e ore rog, ya kugmus ni yigoʼgag. Chitamag e kan liiʼ u fithikʼ e mael, nge gubin e gidiiʼ rog, ma dariy e fager rog ara bang ni ngguwon ngay; ma nʼumngin i napʼan ni nge tayeg Somoel ni nggu paer ni gub fos e dagnang.

6 Musap gaed, aningeg miriʼay e duw ni ke yaen u napʼan fare wub ni tay fare Somoel ma Tathapeg rodaed.

7 Ere musap gaed, fapi Lamanites e kar gayed mar liiʼed e gidiiʼ rog, ni fapi Nephites, ni ka ranoed u rebo binaw ngo reb ngu bang e tagilʼ ngo bang, nge yaeni madaʼ ko ngiyalʼ ni kar mʼay gaed; ere rib almarin e gafgow roraed; arragon, rib almarin ma baʼang e gafgow ni tay e gidiiʼ rog, ni fapi Nephites.

8 Ere musap gaed, paʼ Somoel e ire ke rinʼ. Ere kum sap gaed, fapi Lamanites e kur chelgaed ngar mael gaed ngoraed; ere dakean fare nam ni poloʼ e ke ʼulʼul ni dar tal e mathang pogofan nge puʼoeg rachaʼ riy; ma dariy beeʼ ni manang e ngiyalʼ ni nge tal e mael.

9 Ere chiney, musap gaed, igag e dakuriy banʼen ni nggu weliy u morngaʼagraed, ya dakuriy beeʼ ma kemus ni fapi Lamanites nge fapi moroʼroʼ e kuyaed bay u dakean e nam.

10 Ma dakuriy beeʼ ni manang fare Got nriyulʼ ma kemus ni fapi gachalpen Yesus, ni yaed e ra pired u lan fare nam nge madaʼ ko ngiyalʼ ni ke almarin e kireb ko gidiiʼ ma arame daki pagraed Somoel ni ngar pired u fithikʼ fapi gidiiʼ; ma dariy beeʼ ni manang ko kuyaed bay u dakean e nam fa dakur moyed.

11 Machane musap gaed, chitamag nge gag e kug guyew raed, ma kar machib gaed ngomow.

12 Ma enra thap e re chep ney ngakʼ, ma dabi gathibthib nag ni bachan e pi de machalbog ni bay riy, e ireram e chaʼ nra nang boech banʼen nib yoʼor ko tiney. Musap gaed, igag Moroni; faʼan gomanga rayog, ma gura guy rogon ngam nanged gubin banʼen.

13 Musap gaed, nggu museg u roey i weliy morngaʼagen e pi gidiiʼ ney. I gag fare pagael ni fak Mormon, ma chitamag e gidiiʼ ku Nephi.

14 Ma gag faʼanem nug mithaeg e re chep ney nga paʼ fare Somoel; fapi plate riy e dariy gamʼingin, ni bachan e motochiyel rokʼ Somoel. Ya rriyulʼ ni ke yoeg ni dariy beeʼ ni nge fek ni nge felʼ rogon riy; machane fare chep riy e rib gaaʼ falʼngin; ma enra fek nga tamilang, e irechaʼ nra tawaʼath nag Somoel.

15 Ya dariy beeʼ ni bay gelingin ni nge fek nga tamilang ma kemus ni faʼanra piiʼ Got ngakʼ; ya fiti laniyaenʼ Got ni ngan rinʼ u fithikʼ e lʼagaenʼ ko rir rokʼ, ara ayuw ko fapi gidiiʼ rokʼ Somoel ni mʼag ngoraed ni ke nʼuw napʼan.

16 Ma nge felʼ waʼathan e enra fek e rennʼey iyib nga tamilang; ya ngar ni fek u fithikʼ e lumor nga tamilang, ni boed ni yoeg Got; arragon, yira fek u fithikʼ e butʼ ngalang, ma bayi gael raʼen u milmor, me tamilngaenʼ e gidiiʼ riy; ma ra buch u dakean fare gelingin rokʼ Got.

17 Ma faʼanra bay e oloboch riy ma oloboch ko gidiiʼ. Machane musap gaed, dariy e oloboch riy ni gamaed manang; machane Got e manang gubin banʼen; ere, enra kireb nag, e thingari kol chiyaʼ ngakʼ ya ra yaen nga mite nifiy u infierno.

18 Ma enra gaʼar: Madag ngog, ara gura liiʼem—e nge kol chiyaʼ ngakʼ ya richey me yoeg ni ngan piiʼ ngakʼ e nʼen nib mathngeluwol rokʼ fare Somoel.

19 Ya musap gaed, enra gur nge dugliy laniyaenʼ ngakʼ beeʼ e kuʼaram rogon ni yira rinʼ ngakʼ; ya rogon e muruwel rokʼ e aram rogon puluwon ni bayi fek; ere, enra gechig nigey e Somoel e ra gechig nag.

20 Musap gaed ngam guyed ko mang e be yoeg e chep nib thothup—gidiiʼ e gathi ire nge gechig, ara nge dugliy rogon e pufthin; ya pufthin e gag e ba milsuwon ngog, nibe yoeg fare Somoel, ma falbiy e kub milsuwon ngog, ma gura piiʼ puluwon.

21 Ma enra non nib damomuw ma be togopluw ko muruwel rokʼ Somoel, nge fapi gidiiʼ rokʼ Somoel ni falʼeg ba mʼag u thilraed ni ire ram fapi gidiiʼ ku Israel, nibe gaʼar: Gamaed ra kireb nag e muruwel rokʼ Somoel, ma dabki yib ngaenʼ fare Somoel e mʼag rokʼ ngakʼ fapi gidiiʼ ku Israel—e ireram e chaʼ ni ke yoyowliy ir ni ngan thʼaeb nga butʼ ma ninʼ nga mite nifiy;

22 Ya nʼen ni manechubog nibe nomeg Somoel e bayi ʼulʼul iyaen, nge yaeni madaʼ ko ngiyalʼ ni ke muguʼul gubin e pi michmich rokʼ.

23 Mu filed fapi prophecy rokʼ Isaiah. Musap gaed, dabiyog ni nggu yoloey. Arragon, musap gaed gube yoeg ngomed, ni fapi saints ni kar mʼaed ni yaed ba mʼon rog, ni yaed e kar tafnayed e biney e nam, e yaedra yoer, arragon, u fithikʼ e fiyath e yaedra yoer riy ngakʼ Somoel; ma nʼumngin i napʼan nib fos Somoel e ra paer u waenʼ fare mʼag ni tay ngoraed.

24 Ma manang e pi meybil roraed, ni fan ngakʼ pi walagraed. Ma manang e mich roraed, ya rayog ni ngar chuweged e burey u daken fithingan; mu fithingan e rayog ni ngar ruruged e fayleng ngay; mu dakean gelingin e thin rokʼ e ra buthuged e pi kalbus ngay nge puth nga butʼ; arragon, ni mus ko nifiy nibe dramrom ma de yog ni urufiy raed, ara kʼaed raed e gamanman ni malboch ara porchoyog ni yub, ni bachan gelingin fare thin rokʼ.

25 Ere musap gaed, pi meybil roraed e ku fan ngakʼ enra pag Somoel nge fek e pinnʼey i yib.

26 Ma dariy gamʼingin beeʼ ni nge yoeg ni dabi yib e pinnʼey, ya rriyulʼ ni ra yib, ya ke yoeg Somoel; ya ra yib u fithikʼ e buutʼ, u paʼ fare Somoel, ma dariy beeʼ ni rayog ni nge tileg; ma ra yib u bingyalʼ i banʼen ni bay noeg ni dakuriy e maʼangʼang; ma ra yib e pinnʼey ni gowa ke non beeʼ u fithikʼ e pi yamʼ.

27 Ma bay yib u ba rran u napʼan ni bay yoer rachaʼen fapi saints ngakʼ Somoel, ni bachan e pi gagyeg ko ulung nib miith nge pi muruwel nu milmor.

28 Arragon, ra yib u ba rran u napʼan ni bay ni fek yathin gelingin Got, nge pi galasia e bay ra kireb gaed mar nʼufed yaed ngalang ko ufanthin u gumʼirchaʼraed; arragon, u ba rran u napʼan ni pi tiyugangʼ ko pi galasia nge pi sensey e bay ra puwgaed ngalang nga fithikʼ e ufanthin u gumʼirchaʼraed, ma bay iyib laniyaenʼraed ngakʼ e piʼin ni kar unʼed ko pi galasia roraed.

29 Arragon, ra yib u lan ba rran u napʼan ni bay ni rungʼag riy morngaʼagen e nifiy, yokoʼ, nge yu chuwoʼ i ath u lan e pi nam ni gathi taferaed.

30 Ma bay ni rungʼag morngaʼagen e mael, nge thiin e mael, nge durruʼ ni bayi aw u lan yuyang e nam.

31 Arragon, ra yib u lan ba rran u napʼan ni dakuriy banʼen nib machalbog u dakean e fayleng; ma bay e mathang pogofan, nge moroʼroʼ, nge baen, nge sasaliyeb, nge gathar, nge gubin mite kireb; u napʼan ni bayi yoʼor e piʼin ni bay ra gaʼar gaed, Murinʼ e biney, ara murinʼ e bin baʼaram, ma dariy fan, ya fare Somoel e ra mʼaguwaenʼ ko bin tomur e rran. Machane rigafgow ngakʼ e piʼin ni aray rogon, ya kar awgaed nga luben e amith ma kar mʼaged yaed ko denen.

32 Arragon, ra yib u ba rran u napʼan ni bay e galasia ni kan toey ni yaed be gaʼar: Mired ngog, ma bachan e pi salpiy romed ma bay ni nʼaegfan e pi denen romed.

33 O gimed e piʼin nib kireb nge gelyuwan nge ʼelʼel laniyaenʼ, mangfan ni kam toeyed e galasia ni fan ngomed riy? Mangfan ni kam thilyeged fare thin rokʼ Got nib thothup, ni ngam feked e gafgow nga dakeanmed? Musap gaed, ngam tagaʼ gaed ko fapi yiʼiy rokʼ Got; ya musap gaed, be yib fare ngiyalʼ innʼem ko fare rran ni gubin e pinnʼey ma thingari muguʼul.

34 Musap gaed, fare Somoel e kedag ngog bogi banʼen nib gaaʼ mab maʼangʼang ni morngaʼagen e pinʼen ni dabki nʼuw napʼan make yib, ko re rran ni baʼaram ni bay yib e pinnʼey nga fithikʼmed.

35 Musap gaed, gube non ngomed ni gowa susun e gimed bay e chiney, machane dam moyed. Machane musap gaed, Yesus Kristus e ke dag med ngog, ma gumnang e pinʼen ni gimed be rinʼ.

36 Ma gumnang ni gimed be yaen u fithikʼ e ufʼuf u lan gumʼirchaʼmed; ma dariy beeʼ ma kemus ni buchʼuw e piʼin ni darur ufʼuf gaed u lan gumʼirchaʼraed, ni yaed be chuw nga mad ni fafalelʼ yaʼan, nibe awaenʼ raed, ma yaed be togopluw, nge fananikan, nge gafgow nag e gidiiʼ, nge gubin mite denen; nge pi galasia romed, arragon, gubin make kireb ni bachan e ufʼuf ko gumʼirchaʼ romed.

37 Ya musap gaed, ba tʼuf romed e salpiy, nge chugum romed, nge mad romed ni fafalelʼ, nge nunuw nag e pi galasia romed, nga rogon nib tʼuf romed e piʼin gafgow nge piʼin nib tʼuf banʼen rokʼ, nge piʼin nib mʼar nge piʼin nibe gafgow ko amith.

38 O gimed e piʼin nib kireb, gimed e tadumʼthin, gimed e pi sensey, gimed e piʼin ni gimed be piiʼmed ni chuwaeyʼ ko pinʼen nra tʼay, mangfan ni kam kireb niged fare galasia rokʼ Got? Mangfan ni gimed be tamraʼ ni ngam feked nga dakeanmed fithingan Kristus? Mangfan ni damur lemniged ni falfalaenʼ ni dabimus biʼid e ba gaʼfan ko kirbaenʼ ni dabi mʼay—ya bachan e soerokʼ nu fayleng?

39 Mangfan ni kam nunuw niged gimed ko pinʼen ni dariy e yafos riy, ma kam paged e piʼin nibe yimʼ ko bilig, nge piʼin nib tʼuf banʼen rokʼ, nge piʼin dariy madan, nge piʼin nib mʼar nge piʼin nibe gafgow ko amith nga ranoed u taʼabmed, ma damur guyed raed?

40 Arragon, mangfan ni gimed be sunmiy e pi kireb romed nib miith ni nge felʼ rogmed riy, magmed pag e piʼin ni kanimʼ roraed nga ur yoer gaed u pʼoewchen Somoel, nge bitir ni ke yimʼ e gallabthir roraed ni ngar yoer gaed u pʼoewchen Somoel, nge ku aram rogon nga rachaʼen e pi chitamangraed nge pi figirngiraed nibe yoer ngakʼ Somoel u fithikʼ e butʼ, nge aw ni gechig nga dakean loelugmed?

41 Musap gaed, fare sayden ko gechig e kan tining nga dakeanmed; ma fare ngiyalʼ innʼem e be chugur iyib ni bayi tay puluwon i rachaʼen e gidiiʼ rokʼ nga dakeanmed, ya dabkiyog ni nge pagraed ngar yoer gaed nge nʼuw napʼan.