1 Ao ngkai, I taetae naba ni kaineti ma ake a aki kakoaua Kristo.

2 Nooria, kam na kakoaua n te bong are kam na kawaraki iai—nooria, ngkana e na roko te Uea, eng, n te bong are e korakora arei are e na rukurukumaki iai te aonaba n aron te ninira ni boki, ao a na ran bwain karawa n te kabuebue ae korakora, eng, n te bong are e korakora arei ngkana kam kairaki bwa kam na tei imatan ana Tiibu te Teei te Atua—ao ngkanne kam na kangai bwa akea te Atua?

3 Ao ngkanne kam na aki kona ni kaakea Kristo, ke kam kona n taraa ana Tiibu te Teei te Atua? Kam kantaningaia bwa kam kona ni maeka ma ngaia ma n namakinna n ami iango bwa kam kairua? Kam kantaningaia bwa kam kona ni kukurei ni maeka ma Teuare e tabu, ngkana tamneimi a kammarakaki n namakinan te bure n ami iango bwa kam a tia n urui ana tua?

4 Nooria, I taku nakoimi bwa kam na bon rangin aki kukurei ni maeka ma te Atua ae tabu ao e momotiraoi, ma n namakina kammairami imatana, nakon ae kam na maeka ma tamneia ake a kabuakakaaki i moone.

5 Bwa nooria, ngkana kam kairaki bwa kam na noora aromi n akea karabakimi imatan te Atua, ma mimitongin naba te Atua, ao tabun Iesu Kristo, e na bon kauraa uran te ai ae e aki kona n tiringaki i aomi.

6 O ngkanne, ngkami aika kam kakewekewe, rairaki nakon te Uea; tang ni kakorakorai ngkami nakon te Tama n aran Iesu, bwa tao kam na bon kona ni kuneaki n aki bareka, n itiaki, n tamaroa, ma ni mainaina, bwa kam a tia ni kaitiakaki n raraan te Tiibu te Teei, n te kabanea ni bong are e korakora.

7 Ao riki I taetae nakoimi aika kam kakewei ana kaotioti te Atua, ma n taku bwa a toki, bwa akea riki kaotioti, ke taeka ni burabeti, ke bwai n tangira, ke te katoki aoraki, ke te taetae n neewe, ke rairan neewe;

8 Nooria, I kangai nakoimi, ane e kakewei bwaai aikai e aki ataa ana euangkerio Kristo; eng, e bon tuai ni wareki koroboki aika tabu; ngkana e a tia ao e bon aki oota iai.

9 Bwa tiaki bwa ti warekia bwa te Atua titebo ngkoananoa, ngkai, ao n aki toki, ao akea te kakaokoroaki ke te bibitaki irouna?

10 Ao ngkai, ngkana kam a tia n iangoa atuami ae kakaokoro, are iai te bibitaki irouna, ao ngkanne kam a tia n iangoa atuami ae tiaki Atuan te kakai.

11 Ma nooria, N na kaota nakoimi Atuan te kakai, are bon Atuan Aberaam, ao Atuan Itaaka, ao Atuan Iakobwa; ao bon te Atua naba anne are e karaoa karawa ma aonaba, ao bwaai ni kabane ake iai.

12 Nooria, e karika Atam ao mai iroun Atam ao e roko te bwaka nakon te aomata. Ao ibukin bwakan te aomata ao e roko Iesu Kristo, ao te Tama ao te Nati; ao ibukin Iesu Kristo ao e roko kaboan te aomata.

13 Ao ibukin kaboan te aomata are e reke mai iroun Iesu Kristo, ao a kaokaki nako matan te Uea; eng, aio are a kaboaki iai aomata ni kabane, ibukin maten Kristo are e kakoroa bukin te mangauti, are e kakoroa bukin te kaboaki man te matu ae aki totoki, are te matu are a na kautaki mai iai aomata ni mwaakan te Atua ngkana e tang te bu; ao a na bane n roko aika a uarereke ao aika a korakora, ao a na bane n tei imatan ana kai ni motikitaeka, n tia ni kabooaki ma ni kabwaraki man a na kabaebae te mate ae akea tokina, are bon te mate n rabwata.

14 Ao ngkanne e na roko ana motikitaeka Teuare e tabu i aoia; ao ngkanne e na roko te tai are ane e kammaira e na bon tiku ni kammaira; ao ane e raoiroi e na bon tiku n raoiroi; ao ane e kukurei e na bon tiku ni kukurei; ao ane e aki kukurei e na bon tiku n aki kukurei.

15 Ao ngkai, O ngkami ni kabane ake kam iangoia i nanomi bwa iai atuami ae e aki kona ni karaoi kakai, N na titirakiningkami, a tia ni koro bukin bwaai ake I a tia n taekin? E a roko te toki? Nooria, I taku nakoimi, E tuai; ao te Atua e tuai n toki arona are Atuan te kakai.

16 Nooria, tiaki bwa a kamiimi bwaai ake e a karaoi te Atua imatara? Eng, ao antai ae kona n oota n ana mwakuri te Atua ae kamimi?

17 Antai ae e na taku bwa tiaki man te kakai ao man ana taeka are a riki iai karawa ao te aonaba; ao man mwaakan ana taeka ao e karikaki te aomata mani bubun aontano; ao man mwaakan ana taeka ao a karaoaki kakai aika a mwaiti?

18 Ao antai ae e na taku bwa Iesu Kristo e bon aki karaoi kakai aika a korakora? Ao a bon mwaiti kakai aika a korakora ake a karaoaki ni baia abotoro.

19 Ao ngkana iai kakai aika a karaoaki, ao e aera bwa te Atua e na toki bwa te Atua ni kakai ao e na aki bibitaki? Ao nooria, I taku nakoimi bwa e tuai ni bitaki; bwa ngkanne e na aki riki bwa te Atua; ao e aki toki bwa te Atua, ao te Atua ni kakai.

20 Ao e toki ni kakaraoi kakai i buakoia natiia aomata ibukina bwa a kerikaaki n aia aki onimaki, ao a kitana te kawai ae e eti, ma n aki ataa te Atua are a riai n onimakinna.

21 Nooria, I taku nakoimi, bwa ane e kakoaua Kristo, ma n akea te bwai ae e nanououa iai, ao te bwai are e na butiia te Tama n aran Kristo e na bon anganaki; ao aio te berita nakoia aomata ni kabane, ni karokoa tokin te aonaba.

22 Bwa nooria, e bon taku Iesu Kristo, are Natin te Atua, nakoia ana reirei ake a na tataninga, eng, nakoia naba ni kabane ana reirei, are a ongo aomata aika a uanao: Naako kabuta te aonaba, ma n tataekina te euangkerio nakoia aomata ni kabane;

23 Ao ane e kakoaua ma ni bwabetitoaki ao e na bon kamaiuaki, ma ane e aki kakoaua e na bon kabuakakaaki;

24 Ao a na iririia ake a kakoauai kanikina aikai—n arau ao a na kanakoia riaboro; ao a na taetae n neewe aika a boou; a na tauiia naeta; ao ngkana a mooi n te bwai ae kamamate ao a na bon aki ikoaki iai; ao a na katokai baia i aoia aika a aoraki ao a na marurung;

25 Ao ane e kakoaua arau, n aki nanououa, ao N na kamatoai au taeka ni kabane nakoina, ni karokoa tokin aonaba.

26 Ao ngkai, nooria, antai ae kona n tei ni kaaitarai ana mwakuri te Uea? Antai ae kona ni kakewei ana taeka? Antai ae e na teirake ni kaitara mwaakan te Uea ae korakora? Antai ae e na ribai ana mwakuri te Uea? Antai ae e na ribaia natin Kristo? Nooria, ngkami ni kabane ake a ribaa ana mwakuri te Uea, bwa kam na miimi ao kam na mate.

27 O ngkanne, tai riribai, ao tai mimi, ma ongo n ana taeka te Uea, ma ni bubutia te Tama n aran Iesu ibukin bwaai ake ko kainnanoi. Tai nanououa, ma kakoaua, ao waaki n aron are ni kawai, ma ni kawara te Uea ma nanom ni kabane, ma ni mwakuria oin kamaiuam ma te maaku ao te ruru imatana.

28 Kawanawanako i nanon am bong ni kataaki; kanakoa mai iroumi te baareka; tai bubuti, n te aro are ko na kona ni katoka nanom ni kaibwabwaru, ma bubuti ma te matoatoa ae e aki kona ni kamwaingaki, bwa kam na aki bwaka n te kaririaki, ma kam na beku iroun te Atua ae koaua ao e maiu.

29 Taraia bwa kam na aki bwabetitoaki ngkana kam aki tau; taraia bwa kam na itiaki ngkana kam taua ana toa Kristo; ao taraia bwa kam na karaoi bwaai ni kabane n te itiaki, ma ni karaoia n aran Iesu Kristo, Natin te Atua ae maiu; ao ngkana kam karaoa aio, ma n teimatoa nua te toki, ao kam na bon aki tewenakoaki.

30 Nooria, I taetae nakoimi n aiaron ae I taetae nakoimi man te mate; bwa I ataia bwa a na reke au taeka iroumi.

31 Tai kabuakakai ibukin au aki kororaoi, ao tamau naba ibukin ana aki kororaoi, ao teuare e koroboki naba ma i mwaaina; ma karabwarabwa nakon te Atua bwa e a tia ni kaota ami aki kororaoi nakoimi, bwa kam aonga n reireinaki riki bwa kam na wanawana nakoira.

32 Ao ngkai, nooria, ti a tia ni korea te reekoti aio n aron ara atatai, n taian man ni koroboki are a aranaki bwa te taetae n Aikubita ae e a tia ni bitaki, are ti anganaki ao ti bitia, n aron ara taetae.

33 Ao ngke arona bwa e tau buuburan ara bwaatua ti na bon tia ni koroboki n taetae n Ebera; ao te taetae n Ebera e bon bitaki naba iroura; ao ngke arona bwa ti kona ni koroboki n te taetae n Ebera, nooria, e na bon akea aki kororaoin ara reekoti.

34 Ma te Uea e atai bwaai ni kabane ake ti a tia ni karaoi, ao bwa akea riki te botanaomata ae e ataa ara taetae ni kawai ao ibukina bwa akea riki te botanaomata ae e ataa ara taetae, ngaia are e a tia ni katauraoa te anga are e na rairaki iai.

35 Ao bwaai aikai a koreaki bwa a aonga n itiaki kunnikaira man raraaia tarira, ake a tia ni kerikaaki n aia aki onimaki.

36 Bwaai ake ti tangiri ake a kaineti ma tarira, eng, are bon kaokakia nakon ataakin Kristo, ai bon ake a kaineti naba ma aia tataro aomata aika itiaki ni kabane ake a maeka iaon te aba.

37 Ao ke te Uea are Iesu Kristo e anganiia kaekakin aia tataro n aron aia onimaki; ao ke te Atua te Tama e uringa te berita are e tabu are e a tia ni karaoia ma te bata are Iteraera; ao ke e kakabwaiaia n aki toki, rinanon onimakinan aran Iesu Kristo. Amen.