1 Ere chiney, e kug be non ni morngaʼagen e piʼin ni dar michaenʼraed ngakʼ Kristus.

2 Musap gaed, ra michaenʼmed u lan fare rran ko gechig romed—musap gaed, u napʼan ni ra yib fare Somoel, arragon, ni fare rran ni thʼabi gaaʼ u napʼan nra yabochboch e fayleng nga taʼabang ni boed bangi babyor, nge pi bangbangen e ra ranraen u gowelngin e gowel, arragon, u lan fare rran ni thʼabi gaaʼ u napʼan ni bay ni fekmed ngam sakʼiy gaed nga pʼoewchen fare Saaf ku Got—ma arame gimed ra yoeg ni dariy e Got?

3 Ma aram magmed ʼulʼul ngay i fek yathin Kristus, ara rayog ni ngam guyed fare Saaf ku Got? Gimed be lemnag ma rayog ni ngam pired rokʼ u fithikʼ e nangaenʼ ko kireb romed? Gimed be lemnag ni rayog ni ngam falfalaenʼ gaed ni ngam pired rokʼ e Chaʼanem nib thothup, u napʼan nibe gafgow nagmed e nangaenʼ romed ko kireb romed ni gubin e ngiyalʼ ma gimed be thʼaeb e pi motochiyel rokʼ?

4 Musap gaed, gube yoeg ngomed nib gel e gafgow riy ni ngam pired rokʼ ba Got nib thothup mab matʼaw, u fithikʼ e nangaenʼ ko kireb romed u pʼoewchen, ko bin ni ngam pired ni poloʼ u fithikʼ e gafgow nu infierno.

5 Ya musap gaed, napʼan ni yira fekmed ni ngan guy e kireb romed u pʼoewchen Got, nge fare rir rokʼ Got, nge thothup rokʼ Yesus Kristus, ma ra awnag ba dramrom ko nifiy ni dabi math nga dakeanmed.

6 O ere gimed e piʼin ni dar michaenʼmed, muchel gaed ngakʼ Somoel; mmeybil gaed nib almarin ngakʼ e en Chitamangiy u fithingan Yesus, ni gomanga yog ni ngan pirʼegmed ni dariy thibngimed, ma gimed ba machalbog, nge matʼaw, nge wechwech, ni kam beʼech gaed nga rachaʼen fare Saaf, ko fare rran nib gaaʼ ni tomur.

7 Ere bayay gube non ngomed e piʼin ni gimed be fek yathin fapi yiʼiy rokʼ Got, ma gimed be yoeg ni ke tal, ni dakuriy e yiʼiy, ara prophecy, ara tawaʼath, ara golnag e mʼar, ara tawaʼath ko thin ni ma yib u bolowthey, ara tawaʼath ni nga noeg fan e pi thin;

8 Musap gaed gube yoeg ngomed, ni chaʼ ni ma fek yathin e pinnʼey e denang fare Gospel rokʼ Kristus; arragon, ire chaʼ ni dawoʼ i poey fapi chep nib thothup; ma faʼanra ke rinʼ ma darnang fan.

9 Ya gathi gadaed ma poey ni Got e taʼareb rogon fowap, nge daʼir, nge gubinfen, ma ire dar mathil ara mus nga nochi banʼen nib achichig madar mathil rokʼ?

10 Ere chiney, e faʼanra kam sunmiyed rebe got ngomed ni mathil, niʼir e mathilthil nochi banʼen rokʼ, ma arame kam sunmiyed ngomed ba got ni gathi ba Got ko maʼangʼang.

11 Machane musap gaed, nggu dag ngomed e Got ko maʼangʼang, niʼir fare Got ku Abraham, niʼir fare Got ku Isaac, niʼir fare Got ku Jacob; niʼir fare Got ni dawori thil ni sunmiy e tharmiy nge fayleng, nge gubin banʼen ni bay riy.

12 Musap gaed, ire sunmiy Adam, ma bachan e Adam me yib fare mul ni tay e gidiiʼ. Ma bachan e fare mul ni tay e gidiiʼ me yib Yesus Kristus, niʼir fare Chitamangiy nge fare Fak; ma bachan e Yesus Kristus me yib e bayul ko gubin e gidiiʼ.

13 Ma bachan e bayul ko gubin e gidiiʼ, ni yib u dakean Yesus Kristus, min sulwegraed nga pʼoewchen Somoel; arragon, ireray woʼen e bayul ko gubin e gidiiʼ, ya bachan e yamʼ ni tay Kristus me yib e foskoyamʼ, niʼir e bayul nigey u ba mol ni dariy napʼan, ni ba mol ni gubin e gidiiʼ ni ra od riy u gelingin Got u napʼan ni kan thoey e yabul; ma bay rabaed nga wean, ni gubin e gidiiʼ nib sobutʼ nge tolang, ma gubin ni nge sakʼiy nga mʼon u gilʼ e pufthin rokʼ, ni kan bayul nagraed ma kan pithig roraed gafan luben e yamʼ, ni ba yamʼ ni yamʼ ko dagur.

14 Ma aram meyib fare pufthin rokʼ e Chaʼanem nib Thothup nga dakeanraed; ma arame bayi taw ko fare ngiyalʼ inʼen ni chaʼ nib kireb e bayi paer nib kireb; ma chaʼ nib matʼaw e bayi paer nib matʼaw; ma chaʼ nib falfalaenʼ e bayi paer nib falfalaenʼ; ma chaʼ ni de falfalaenʼ e bayi paer ni de falfalaenʼ.

15 Ere chiney, O gimed gubin e piʼin ni kam sunmiyed ba got ngomed niʼir e dabiyog ni nge rinʼ e maʼangʼang, e gubaʼadag ni nggu fith ngomed, gubin e pinnʼey make buch niʼir e kug weliy morngaʼagen? Ke taw ko tomur? Musap gaed gube gaʼar ngomed, Dawor; ma Got e dawori tal imang ba Got ko maʼangʼang.

16 Musap gaed, gathi pinʼen ni ke gagyeg nag Got e ba maʼangʼang u oewchdaed? Arragon, ma miniiʼ e rayog rokʼ ni nge nangfan e pi muruwel ni maʼangʼang rokʼ Got?

17 Miniiʼ e ra yog ni nge yoeg ni gathib maʼangʼang ni sunmiy e tharmiy nge fayleng u dakean e thin rokʼ; ngo dakean gelingin e thin rokʼ me sum e gidiiʼ ko fiyath nu fayleng; ngo dakean gelingin e thin rokʼ e kan gagyeg nag e pi maʼangʼang riy?

18 Ma miniiʼ e ra yog ni nge yoeg ni Yesus Kristus e derinʼ e pi maʼangʼang ni gaaʼ mab yoʼor? Ma bayoʼor e maʼangʼang nib gaaʼ ni gagyeg nag fapi apostle.

19 Ma faʼanra immoy e maʼangʼang ni un gagyeg nag e ngiyalʼ nem, ma mangfan ni ke tal Got ni nga dabki mang Got ko maʼangʼang, ma kub Got ni darmathil? Ere musap gaed, gube yoeg ngomed ni darmathil; ya faʼanra ma rinʼ, ma dabki mang Got; ere dabital niʼir Got, ere ir ba Got ko maʼangʼang.

20 Ma rogon fan ni nge tal irinʼ e maʼangʼang u fithikʼ e gidiiʼ e bachan e kar malog gaed ko mich, ma kar chuw gaed ko bin nib felʼ e kanawoʼ, ma darur nanged e re Got ni nge pagaenʼraed ngakʼ.

21 Musap gaed, gube yoeg ngomed ni enra michaenʼ ngakʼ Kristus, ni dar maerwaer u waenʼ, ma renʼen ni ra ning ngakʼ e en Chitamangiy u fithingan Kristus e yira piiʼ ngakʼ; ma biney e michmich e fan ngakʼ gubin e gidiiʼ, ni boed e piʼin ni bay ko tin tomur e rran u fayleng.

22 Ya musap gaed, baʼaray e nʼen ni yoeg Yesus Kristus, ni fachaʼ ni Fak Got, ngakʼ pi gachalpen nra magaey gaed, arragon, nge ku aram rogon ngakʼ gubin gachalpen, nibe rungʼag fare ulung i gidiiʼ nibe gaʼar: Mmaroed u gubin yang u fayleng, ngam machib niged fare gospel ngakʼ gubin e gidiiʼ;

23 Ma enra michaenʼ min tawfe nag e ra thap, machane en dabi michaenʼ e ra gafgow;

24 Ma pi pow ney e ra leak e piʼin nib michaenʼraed—ma dakean fithingag e yaedra chuweg e pi moʼoniyanʼ riy; yaedra non ni karoeged boech e thin nib beʼech; yaedra fek e porchoyog ma dabi kʼaed raed; ma faʼanra bay banʼen nib yub ni yaedra unum ma dabra mʼaed ngay; yaedra tay paʼaraed nga dakean e piʼin nib mʼar ma yaedra gol;

25 Ma enra michaenʼ nga fithingag, ni dariy banʼen nibe maerwaer u waenʼ, e irechaʼ ni gura micheg gubin e thin rog ngakʼ, ni ku aram rogon nge madaʼ ko gidiiʼ ko tin tomur e rran.

26 Ere chiney, e musap gaed, miniiʼ e rayog rokʼ ni nge sakʼiy nge togopluw ko pi muruwel rokʼ Somoel? Miniiʼ e rayog rokʼ ni nge fek yathin e pinʼen ni ke yoeg? Miniiʼ e rapuw ngalang nge togopluw ko fare gelingin rokʼ Somoel? Miniiʼ e ra dariy fan nag e pi muruwel rokʼ Somoel? Miniiʼ e ra dariy fan nag e pi bitir rokʼ Kristus? Musap gaed, gimed gubin e piʼin ni ma dariy fan nag e pi muruwel rokʼ Somoel, ma bayi balyangaenʼmed ngam mʼaed.

27 O ere dab kum dariy fan niged, ma dabki balyangaenʼmed, ya ngam motoyil gaed ko fapi thin rokʼ Somoel, magmed ning ngakʼ e en Chitamangiy u fithingan Yesus e pinʼen ni gomanga batʼuf romed. Dabi maerwaer u wunʼmed, ya nge mich u wunʼmed, magmed tabab ni woed rogon e pi kakrom, magmed yib ngakʼ Somoel u poloʼ i gumʼirchaʼmed, magmed muruwliy woʼen e thap romed ni bay madguwan u wunʼmed ma gimed be tʼon u pʼoewchen.

28 Mu gonop gaed u lan e pi rran ko sikeng romed; mu chuweged gimed ko gubin e pinʼen nib alit; dab mu ninged banʼen, ni ngam adbeyed nga dakean e pi dirngal romed, ya ngam ninged u fithikʼ e miyuluy, ni dab mu paged gimed ko lumel, ya ngam pigpig gaed ngakʼ e bin riyulʼ mab fos e Got.

29 Muguyed rogon ni nge siy ni tawfe nagmed ni dam matʼaw gaed; muguyed rogon nge siy mu feked fare sacrament rokʼ Kristus ni dam matʼaw gaed; ya ngam guyed rogon ni ngam matʼaw gaed i rinʼ gubin banʼen, ma ngam rinʼed u fithingan Yesus Kristus, ni fachaʼ ni Fak fare Got nib fos; ma faʼan gimed rarinʼ ni aray rogon, magmed athamgil nge madaʼ ko tomur, ma dariy liyiben min chuwegmed.

30 Musap gaed, gube non ngomed ni gowa gube non u fithikʼ fapi yamʼ; ya gumnang ni rathap e thin rog ngomed.

31 Dab mu gathibthib niged gag ko moʼowaer rog, ara chitamag, ni bachan e moʼowaer rokʼ, ara piʼin ni kar yol gaed nib mʼon rokʼ; ya ngam oged e magaer ngakʼ Got ni ke dag ngomed e pi moʼowaer romaed, ni nge yog ni ngam gonop gaed boech romaed.

32 Ere chiney, e musap gaed, kug yoloeyed e re chep ney u rogon e llowaenʼ romaed, u yalen e yol ni kugoged ni fare thin ni Egyptian nib thil, ni ke afiyib nga butʼ ma kug thilyeged, nge yalʼuw nga rogon yalen e thin romaed.

33 Ma faʼan gomanga pi yungi plates romaed e bagaʼ yang ma kug yol gaed nga dakean ni thin nu Hebrew; machane fare thin nu Hebrew e ku aram rogon ni kug thilyeged; ma faʼan gomanga guyoel gaed ni thin nu Hebrew, ma musap gaed, dabiyog ni ngam nanged e pi moʼowaer u lan e chep romaed.

34 Machane fare Somoel e manang e pinʼen ni kug yoloeyed, nge ku arragon ni dariy boech e gidiiʼ ni manang e biromaed e thin, ere ke falʼeg rogon woʼen ni ngan piliyeg e thin riy.

35 Ma pinnʼey e kan yoloey ni gomanga yog nug chuweged e mad romaed u rachaʼen pi walagmaed, ni kar malog gaed ko mich.

36 Ere musap gaed, pinnʼey ni kuʼug athapeged ni morngaʼagen pi walagmaed, arragon, ni woed ni yaedra pirʼeg fare sulyarmen ko tamilang rokʼ Kristus, e be yaen u rogon e pi meybil rokʼ gubin e pi saints ni kuʼur pired u lan fare nam.

37 Ere gomanga yigi piiʼ fare Somoel i Yesus Kristus e fulweg ko meybil roraed ni boed rogon e mich roraed; ma gomanga yigi paer u waenʼ Got ni Chitamangiy fare michmich ni tay ngakʼ fapi gidiiʼ ku Israel; nge gomanga yigi tawaʼath nagraed ni gubinfen, u fithikʼ e mich roraed nga fithingan Yesus Kristus. Amen.