1 Chiney e gag, Moroni, e nggu yoloey boech banʼen ni gube guy nib gaʼfan; ma gube yol ngakʼ pi walageg, ni fapi Lamanites; ma gubaʼadag ni ngar nanged ni ke yoʼor ko aningeg miriʼay nge riliwʼ e duw ni yaen u napʼan fare pow nni piiʼ ko fare wub rokʼ Kristus.

2 Ma nggu mithaeg e pi chep ney, u tomuren ni kug weliy buchʼuw e thin nib fonow ngomed.

3 Musap gaed, gubaʼadag u napʼan ni bay mu poeyed e pinnʼey, ni faʼanra ba gonop rokʼ Got ni thingar mu poeyed, ni nge yib ngaenʼmed rogon e wurengaenʼ rokʼ Somoel ngakʼ e gidiiʼ, aram u napʼan nni sunmiy Adam nge yib iyib nga butʼ nge madaʼ ko ngiyalʼ ni ke thap e pinnʼey ngomed, magmed lemnag u lan gumʼirchaʼmed.

4 Ma napʼan ni ke thap e pinnʼey ngomed, ma gubaʼadag ni ngam fithed Got riy, ni fachaʼ ni Chitamangiy ni Manechubog, u fithingan Kristus, ko ba riyulʼ e pinnʼey fa dangay; ma faʼan gimed ra fith u fithikʼ e lʼagaenʼ u gumʼirchaʼey, u fithikʼ e yulʼyulʼ, nib mich anʼuy ngakʼ Kristus, ma ra dag e riyulʼ riy ngomed, u dakean gelingin fare Kan ni Thothup.

5 Ma dakean gelingin fare Kan ni Thothup e rayog ni ngam nanged riy e tin nib riyulʼ ni morngaʼagen gubin banʼen.

6 Ma renʼen nib mangil e ba matʼaw mab riyulʼ; ere dariy banʼen nib mangil ni ma fek yathin Kristus, ya ma micheg niʼir.

7 Ma nge yog ni ngam nanged niʼir, u dakean gelingin fare Kan ni Thothup; ere gubaʼadag ni nggu chiyliy ngomed ni nga dab mu feked yathin gelingin Got; ya ma muruwel u dakean e gelingin, u rogon e mich rokʼ e gidiiʼ, taʼab rogon e dabaʼ, nge gabul, nge gubinfen.

8 Ma bayay, gube chiyliy ngomed, pi walageg, ni nga dab mu feked yathin e pi tawaʼath rokʼ Got; ya rib yoʼor; ni yaed be yib rokʼ taʼab Got. Ba thilthil rogon ni yibe piiʼ e pi tawaʼath ney; machane taʼab Got e ma rinʼ gubin banʼen u fithikʼ gubin e gidiiʼ; ma yima piiʼ u dakean e thogthog ko fare Kan ni Thothup rokʼ Got ngakʼ e gidiiʼ, ni nge felʼ rograed riy.

9 Ya musap gaed, beeʼ ni kan piiʼ ngakʼ u dakean fare Kan ni Thothup rokʼ Got, ni nge machib nag fare thin ko gonop;

10 Ma ku beeʼ, e kan piiʼ ni nge machib nag fare thin ko nangaenʼ ni ku dakean taʼab Kan ni Thothup;

11 Ma ku beeʼ, e kan piiʼ ngakʼ e mich nib gel; ma ku beeʼ, e kan piiʼ ngakʼ e pi tawaʼath ni nge golnag e pi liliy u dakean taʼab Kan ni Thothup;

12 Nge kureb, beeʼ, e kan piiʼ ngakʼ ni nge rinʼ e maʼangʼang;

13 Nge kureb, beeʼ, e kan piiʼ ngakʼ ni nge prophesy nag morngaʼagen gubin banʼen;

14 Nge kureb, beeʼ, e kan piiʼ ngakʼ ni nge guy e pi angel nge pi yaʼel ni be machib;

15 Nge kureb, beeʼ, e kan piiʼ ngakʼ ni nge yog ni yoeg gubin mite sabethin;

16 Nge kureb, beeʼ, e kan piiʼ ngakʼ ni nge piliyeg e thin nge gubin mite sabethin.

17 Ma gubin e pi tawaʼath ney e ma yib u dakean fare Kan ni Thothup rokʼ Kristus; ni ma yib ngakʼ gubin e gidiiʼ ni rabeeʼ, ma rogon ni baʼadag ni nge rinʼ ngakʼ.

18 Ere gubaʼadag ni nggu chiyliy ngomed, pi walageg nib tʼuf rog, ni ngam tayed u wunʼmed ni gubin e tawaʼath nib mangil e ma yib rokʼ Kristus.

19 Ma gubaʼadag ni nggu chiyliy ngomed, pi walageg nib tʼuf rog, ni ngam tayed u wunʼmed niʼir e taʼareb rogon fowap, nge daʼir, nge gubinfen, ma gubin e pi tawaʼath ni kug weliy morngaʼagen, ni gamʼingin e tharmiy, e dabi math mit, u nʼumngin i napʼan ni bayi paer e fayleng, ma kemus ni faʼanra dariy e mich ko gidiiʼ.

20 Ere, thingari yib e mich; ma faʼanra yib e mich ma thingari yib e athap; ma faʼanra yib e athap ma thingari yib e tʼufeg.

21 Ma faʼanra dariy e tʼufeg romed ma dabiyog ni ngam thap gaed nga lan gilʼilungun Got; ara ngam thap gaed nga lan gilʼilungun Got ni faʼanra dariy e mich romed; ara ngam thap gaed ni faʼanra dariy e athap romed.

22 Ma faʼanra dariy e athap romed ma dabisiy nib mulmulaenʼmed; ma mulmulanʼuy ni bachan e denen.

23 Ma Kristus e rriyulʼ ni gaʼar ngakʼ e pi chitamangdaed: Faʼanra bay e mich romed ma rayog ni ngam rinʼed gubin banʼen nib gamog u wunʼug.

24 Ere chiney e gube non ngakʼ gubin e gidiiʼ ko tin tomur e rran u fayleng—faʼanra yaeni taw nga ba rran ni fare gelingin nge pi tawaʼath rokʼ Got e ke math mit u fithikʼmed, ma arame ke yaeni aw ni bachan e dariy e mich romed.

25 Ere gafgow ngakʼ e gidiiʼ ni faʼanra aray rogon ni nge yaeni aw; ya dariy beeʼ nibe rinʼ e tin nib mangil u fithikʼmed, dangay dariy beeʼ. Ya faʼanra bay beeʼ u fithikʼmed ni ma rinʼ e tin nib mangil, ma ra muruwel u dakean fare gelingin nge pi tawaʼath rokʼ Got.

26 Ma gafgow ngakʼ e piʼin yaedra furuy e pinnʼey nga orel mar mʼaed, ya kar mʼaed nga fithikʼ e pi denen roraed, ere dabiyog ni ngar thap gaed nga langgin gilʼilungun Got; ma gube weliy e pinnʼey ni boed ni ke yoeg Kristus; ma dagur baen.

27 Ere gubaʼadag ni ngam tayed u wunʼmed e pinnʼey; ya fare ngiyalʼ innʼem e be yib nib papay ni bay mu nanged ni dagur baen, ya gimed ra guyeg u tagilʼ e pufthin rokʼ Got; ma fare Somoel ni Got e ra gaʼar ngomed: Gathi guweliy e pi thin rog ngomed, ni yoloey e re moʼon ney, ni gowa boed beeʼ ni ke yimʼ nibe yoer, arragon, ni gowa boed beeʼ nibe non u fithikʼ e fiyath?

28 Gu weliy e pinnʼey ni fan e nge muguʼul e pi prophecy. Ere musap gaed, ra yib nga butʼ u lʼugun fare Got ni dabimus biʼid; ma thin rokʼ ere af u rebo mfen ngo rebo mfen.

29 Ma Got e ra dag ngomed, ni pinʼen ni kug yoloey e ba riyulʼ.

30 Ere bayay, gubaʼadag ni nggu chiyliy ngomed ni ngam baed ngakʼ Kristus, magmed lʼeag paʼmed ko gubin e tawaʼath nib mangil, ma dab mmath gaed ko tawaʼath nib kireb, ara banʼen nib alit.

31 Ere mu odgaed, ngam chuw gaed u fithikʼ e fiyath, O gimed e gidiiʼ nu Jerusalem; arragon, magmed chuw nga mad romed nib felʼ yaʼan, O gimed e gidiiʼ nu Zion; magmed noemow nag e pi stakes romed magmed gaʼnag radan e mathil romed ni gubinfen, ni nge yog ni siyi minaenʼ med, ni nge yaeni aw ni pi mʼag rokʼ fachaʼ ni Chitamangiy ni Manechubog ni ke tay ngomed, e nge muguʼul.

32 Arragon, mired ngakʼ Kristus, ngam machalbog gaed rokʼ, mangam chuweged gimed ko gubin banʼen ni gathi ngongol rokʼ Got; ma faʼan gimed ra chuw ko gubin banʼen ni gathi ngongol rokʼ Got, magmed tʼufeg Got u poloʼ fanmed pasig, nge laniyaenʼmed, nge gelingmed, ma arame gimed ba gaman ko murnguy rokʼ, ni nge yog nu dakean e murnguy rokʼ e ngam machalbog gaed riy rokʼ Kristus; ma faʼanra dakean e murnguy rokʼ Got e gimed ra machalbog riy rokʼ Kristus, ma dabiyog ni ngam feked yathin gelingin Got.

33 Ma bayay, ma faʼanra dakean e murnguy rokʼ Got e gimed ra machalbog riy rokʼ Kristus, ma dab mu feked yathin gelingin, ma arame kam machalbog gaed rokʼ Kristus u dakean e murnguy rokʼ Got, u dakean i rachaʼen Kristus ni mapʼ, ni bay u lan fare mʼag rokʼ e en Chitamangiy ni ra nʼaeg machaan e pi denen romed, ni ngam thothup gaed, magmed paer ni dariy thibngimed.

34 Ere chiney e gube fingichiymed ni gimed gubin. Dab ki nʼuw napʼan ma ku guwaen nga paraedis rokʼ Got, nge yaeni madaʼ ko ngiyalʼ ni ke gak e yaʼel rog nge dagur rog bayay nga taʼabang, nge ngiyalʼ ni kan fekeg iyib u fithikʼ e nifeng, ni nggu madaʼ nagmed u mit tagilʼ e pufthin rokʼ faʼanem i Jehovah ni gaaʼ, ni fare Tapufthin ni Manechubog ko piʼin nib fos nge piʼin nib yamʼ. Amen.