1 Ere chiney e gag, Moroni, e nggu yoloey buchʼuw e thin ni morngaʼagen e chitamag i Mormon, ni non ni morngaʼagen e mich, nge athap, nge tʼufeg; ya aray rogon ni non ngakʼ fapi gidiiʼ, u napʼan ni machib nagraed u lan tagilʼ e moʼolung ni kar toeyed ni tafen e meybil.

2 Ere chiney e gag, Mormon, e gube non ngomed, pi walageg nib tʼuf rog; u dakean e murnguy rokʼ Got ni Chitamangiy, nge Somoel rodaed i Yesus Kristus, nge laniyaenʼ nib thothup, ni bachan fare tawaʼath ko poeng ni tay ngog, ni kan piiʼ matʼawog riy ni nggu non ngomed ko ngiyalʼ ney.

3 Ere, gubaʼadag ni nggu non ngomed e piʼin ni gidiiʼen e galasia, ni piʼin gapasaenʼ ni gidiiʼen Kristus, ni gimed e piʼin ni ke yog ngomed e athap niʼir e rayog riy ngomed ni ngam maroed nga tafen e toffan rokʼ Somoel, ko ngiyalʼ ney iyaen nga mʼon nge madaʼ nga napʼan ni kam toffan gaed rokʼ u tharmiy.

4 Ere chiney o pi walageg, kug muʼ i dugliy laninʼug ngomed ni bachan e paer romed nib gapas u fithikʼ e gidiiʼ.

5 Ya ke yib nganʼug fare thin rokʼ Got ni yoeg nu dakean e pi muruwel roraed e gara nang raed riy; ya faʼanra pi muruwel roraed e ba mangil, me ere ku yaed ba mangil.

6 Ya musap gaed, Got e yoeg, ni beeʼ nib kireb e dabiyog ni nge rinʼ e tin nib mangil; ya faʼanra ognag beeʼ ba tawaʼath ara meybil ngakʼ Got, ni dabi rinʼ u fithikʼ e yulʼyulʼ ma dariy falʼngin ngakʼ.

7 Ya musap gaed, danur mathaʼeg ngakʼ niʼir e beeʼ nib matʼaw.

8 Ya musap gaed, faʼanra beeʼ nib kireb ni nge piiʼ ba tawaʼath, ma ma rinʼ ni de mʼagaenʼ ngay; ma woed ni de piiʼ fare tawaʼath; ere kan dugliy nib kireb u mit Got.

9 Ere ku aram rogon ngakʼ beeʼ ni kan dugliy nib kireb, ni faʼanra meybil ma dar yulʼyulʼ ngay u lan gumʼirchaʼen; arragon, ma dariy falʼngin ngakʼ, ya Got e dabi mʼagaenʼ ngakʼ beeʼ ni aram rogon.

10 Ere, beeʼ nib kireb e dabiyog ni nge rinʼ e tin nib mangil; ara nge piiʼ ba tawaʼath nib mangil.

11 Ya musap gaed, ba alublub nib moʼoy e dabiyog ni nge piiʼ e raen nib mangil; ara ba alublub nib mangil ni nge piiʼ e raen nib moʼoy; ere, beeʼ nib tapigpig rokʼ moʼoniyanʼ e dabiyog ni nge leak Kristus; ma faʼanra nge leak Kristus ma dabiyog ni nge mang ba tapigpig rokʼ moʼoniyanʼ.

12 Ere, gubin banʼen nib mangil ma yib rokʼ Got; ma tin nib kireb e ma yib rokʼ moʼoniyanʼ; ya fare moʼoniyanʼ e ire toʼogor rokʼ Got, ma be togopluw ngakʼ ni gubin e ngiyalʼ, ma be pining ma be miliy laniyaenʼ e gidiiʼ ko denen, ni ngar rinʼed e tin nib kireb ni gubin e ngiyalʼ.

13 Machane musap gaed, tin ni yib rokʼ Got e be pining ma be miliyaenʼ e gidiiʼ ni ngar rinʼed e tin nib mangil ni gubin e ngiyalʼ; ere, gubin banʼen nibe piningey ma be miliyey ni ngan rinʼ e tin nib mangil, ma ngan tʼufeg Got, min pigpig ngakʼ, e thogthog ni yib rokʼ Got.

14 Ere, mu kolchiyaʼ gaed, pi walageg nib tʼuf rog, ni nga dab mu dugiliyed u wunʼmed ni tin nib kireb e yib rokʼ Got, ara tin nib mangil ni yib rokʼ Got e yib rokʼ fare moʼoniyanʼ.

15 Ya musap gaed, pi walageg, kan piiʼ ngomed ni ngam kiiʼeged u wunʼmed, ni nge yog ni ngam nanged e tin nib mangil ko tin nib kireb; ma rogon ni ngan kiiʼeg e rib tamilang, ni nge yog ni ngam nanged u fithikʼ e machalbog u wunʼmed, ni boed e rran nib tamilang ko nepʼ nib lumor.

16 Ya musap gaed, fare Kan ni Thothup rokʼ Kristus e ma piiʼ ngakʼ gubin e gidiiʼ, ni nge yog ni ngar nanged e felʼ ko kireb; ere, nggu dag ngomed rogon ni kiiʼeg u wunʼmed; ya gubin banʼen ni ma piningey ni ngan rinʼ e tin nib mangil, ma ma miliyey nge michanʼuy ngakʼ Kristus, e yib u dakean fare gelingin nge tawaʼath rokʼ Kristus; ere ngam nanged u fithikʼ e machalbog u wunʼmed ni bogi banʼen ni yib rokʼ Got.

17 Machane demutrug e renʼen nra miliyaenʼ e gidiiʼ ngar rinʼed e kireb, ma dabi michaenʼraed ngakʼ Kristus, mar feked yathin, ma dabra pigpig gaed ngakʼ Got, ma arame ngam nanged u fithikʼ e machalbog u wunʼmed ni yib rokʼ fare moʼoniyanʼ; ya aray yalen ni ma muruwel fare moʼoniyanʼ, ya darma miliyaenʼ e gidiiʼ ngar rinʼed e tin nib mangil, mus nga taʼabee ma dabi rinʼ ngakʼ; ara rinʼ e pi angel rokʼ; ara rinʼ e piʼin ni kar mʼing gaed ngakʼ.

18 Ere chiney, pi walageg, ni kug guy ni gimed manang fare tamilang niʼir e gimed ra kiiʼeg banʼen ngay u wunʼmed, niʼir fare tamilang rokʼ Kristus, e ngam guyed rogon ni nga dab mu kiiʼeged u wunʼmed ni dematʼaw; ya rogon ni kam yiglʼiyed banʼen e aram rogon ni yira yiglʼiy ngomed.

19 Ere, gube wenig ngomed, pi walageg, ni thingar mu gow gaed u fithikʼ fare tamilang rokʼ Kristus ni nge yog ni ngam nanged i kiiʼeg e felʼ ko kireb; ma faʼan gimed ra lʼeag paʼmed ko gubin banʼen nib mangil, ma dab mu gathibthib niged, ma arame gimed ra mang bitir rokʼ Kristus.

20 Ere chiney, o pi walageg, buʼuw rogon me yog ni ngam lʼeged paʼmed ko gubin banʼen nib mangil?

21 Ere chiney e kug taw ko fare mich, niʼir e gog ni gura weliy morngaʼagen; ere nggog ngomed woʼen me yog ni ngam lʼeged paʼmed ko gubin banʼen nib mangil.

22 Ya musap gaed, Got e manang gubin banʼen, ya ire dabimus biʼid, musap gaed, ke lʼoeg e pi angel ni ngar machib niged e gidiiʼ, ni ngar daged morngaʼagen fare wub rokʼ Kristus; ma ngar daged nu dakean Kristus e ra yib gubin banʼen nib mangil riy.

23 Ma Got e ki weliy ngakʼ e pi profet, u lʼugun, ni Kristus e ra yib.

24 Ere musap gaed, boʼor woʼen ni dag riy banʼen ngakʼ e gidiiʼ, nib mangil; ma gubin banʼen nib mangil ni be yib rokʼ Kristus; ara dangay ma ke mul e gidiiʼ, ma dariy banʼen nib mangil ni ra yib ngoraed.

25 Ere, u dakean e pigpig ko pi angel, ngo dakean gubin e thin ni yib nga butʼ u lʼugun Got, me tabab e gidiiʼ i gagyeg nag e michaenʼ ngakʼ Kristus; ere dakean e mich, mar lʼeged paʼaraed ko tin nib mangil banʼen; ma aray rogon nge yaeni madaʼ ko fare wub rokʼ Kristus.

26 Ma tomuren ni yib, me thap e gidiiʼ u dakean e mich u fithingan; ma dakean e mich, e ra manged pifak Got riy. Ma boed fini riyulʼ nib fos Kristus e aram rogon ni weliy e pi thin ney ngakʼ e pi chitamangdaed, ni gaʼar: Demutrug e renʼen ni gimed ra ning ngakʼ e en Chitamangiy u fithingag, nib mangil, u fithikʼ e mich nib michaenʼmed ngay ni rayog ngomed, musap gaed, yira piiʼ ngomed.

27 Ere, pi walageg nib tʼuf rog, ke tal e maʼangʼang ni bachan e ke yaen Kristus nga tharmiy, ma ke paer nga baʼani matʼaw i paʼ Got, nge fek rokʼ e en Chitamangiy matʼawon ko murnguy ni ke tay ngakʼ e gidiiʼ?

28 Ya ke muguʼuliy fare motochiyel, ere bay matʼawon ngakʼ e piʼin nib michaenʼraed ngakʼ; ma piʼin nib michaenʼ ngakʼ e bay ra lʼeged paʼaraed ko tin nib mangil banʼen; ere be non ni paʼ e gidiiʼ; ma be paer nib manechubog u lan e tharmiy.

29 Ere bachan e biney ni ke rinʼ, o pi walageg nib tʼuf rog, ke tal e maʼangʼang? Musap gaed gube gaʼar ngomed, Dawor; ara pi angel ni kar talgaed i machib nag e gidiiʼ.

30 Ya musap gaed, yaed ba mʼing ngakʼ, ni ngar machib gaed u rogon ni ke chiyliy, ni ngar mʼug gaed ngakʼ e piʼin ni bay e mich roraed nib gel mab miyuluy e tafnaey roraed ko urngin e pinʼen nib yalen rokʼ Got.

31 Ma fare liw ko machib roraed e ngar pininged e gidiiʼ riy nga dakean e kalngaenʼ, mar muguʼuliyed mar rinʼed fare muruwel nib lʼeag rogon ko pi mʼag rokʼ e en Chitamangiy, ni tay ngakʼ e gidiiʼ, ni ngar falʼeg woʼen u fithikʼ e gidiiʼ, u dakean e machib ko thin rokʼ Kristus ngakʼ fapi mʼuw nib melʼeg rokʼ Somoel, ni nge yog nra micheged niʼir.

32 Ere dakean gubin e pinnʼey ni kan rinʼ, e fare Somoel ni Got e ke falʼeg rogon woʼen e tin kubay e gidiiʼ ni nge yog ni michaenʼraed ngakʼ Kristus, me yog ni yib tagilʼ fare Kan ni Thothup u lan gumʼirchaʼraed, u rogon fare gelingin ni bay rokʼ; ere aray rogon ni fachaʼ ni Chitamangiy, e yibi muguʼuliy e pi mʼag ni tay ngakʼ e gidiiʼ.

33 Ere Kristus e ke gaʼar: Faʼanra bay e mich romed ngog ma ra yib gelingmed ni ngam rinʼed ni demutrug e miti nʼen nib gamog u wunʼug.

34 Ma ke gaʼar: Mu kalgaed ngaenʼmed ni gimed gubin e piʼin ni gimed bay ko tin tomur e rran u fayleng, magmed yib ngog, ngan tawfe nagmed u fithingag, ma nge michaenʼmed ngog, ni nge yog ni ngam thap gaed.

35 Ere chiney, pi walageg nib tʼuf rog, faʼanra aray rogon ni pinnʼey e ba riyulʼ niʼir e kug weliy ngomed, ma bayi dag Got ngomed, u gelingin nge rir ko bin tomur e rran, ni bogi banʼen nib riyulʼ, ma faʼanra ba riyulʼ make tal fare rran ko maʼangʼang?

36 Ara ke tal e pi angel ko mʼug ngakʼ e gidiiʼ? Ara ke chuweg fare gelingin e Kan ni Thothup roraed? Ara faʼanra rinʼ, u nʼumngin i napʼan ni bay e tayim, ara bayi paer e fayleng, ara nʼumngin i napʼan ni bay beeʼ u dakean ni ngan thapeg?

37 Musap gaed gube gaʼar ngomed, Dangay; ya dakean e mich e yibe gagyeg nag e pi maʼangʼang riy; ma dakean e mich e be mʼug e pi angel riy ngar machib niged e gidiiʼ; ere, faʼanra ke tal e pinnʼey, mar gafgow ngakʼ e gidiiʼ, ya ke tal ni bachan e mich ni dariy, ma gubin banʼen ma ke yaeni aw nib mʼay fan.

38 Ya dariy beeʼ ni rayog ni nge thap, ni boed ni yoeg Kristus, ma kemus ni faʼanra michaenʼraed nga fithingan; ere, faʼanra ke tal e pinnʼey, ma arame ki tal e mich; ma rib gel e gafgow ko rengi dodow ni ke taw e gidiiʼ ngay, ya ri gowa dariy e bayul ni kan falʼeg ni fan ngoraed.

39 Machane musap gaed, pi walageg nib tʼuf rog, kug muʼ i dugliy laninʼug ngomed, ya kug dugliy ni bay e mich romed ngakʼ Kristus ni bachan e sobutʼaenʼ romed; ya faʼanra dariy e mich romed ngakʼ ma arame dabi bung rogmed ni ngan unegmed ko mathaʼeg nga fithikʼ fapi gidiiʼ ko galasia rokʼ.

40 Ere bayay, pi walageg nib tʼuf rog, gubaʼadag ni nggu non ngomed ni morngaʼagen e athap. Buʼuw rogon me yog e mich ngomed, gathi kemus ni faʼanra bay e athap romed?

41 Ma mang e ngam athapeged? Musap gaed gube yoeg ngomed ni ngam athapeged u dakean fare bayul rokʼ Kristus nge fare gelingin e foskoyamʼ ni tay, ni nge yog e yafos ni manechubog ngomed, ma biney e aray rogon ni bachan e mich romed ngakʼ ni boed ni michmicheg ngomed.

42 Ere, faʼanra bay e mich rokʼ beeʼ ma thingar dabisiy ni bay e athap rokʼ; ya faʼanra dariy e mich ma dariy e athap.

43 Ere bayay, musap gaed gube yoeg ngomed ni dabiyog ni nge yog e mich nge athap ngakʼ, ma kemus ni faʼanra ba gumʼaenʼ, mab munguy gumʼirchaʼen.

44 Faʼanra dangay, ma mich nge athap rokʼ e ba mʼay fan, ya dariy beeʼ ni aram rogon nib mʼag u mit Got, ma kemus ni piʼin nib gumʼaenʼ mab munguy gumʼirchaʼen; ma faʼanra bay beeʼ nib gumʼaenʼ mab munguy gumʼirchaʼen, ma be pogofay nag u gelingin fare Kan ni Thothup ni Yesus e ir Kristus, ma thingari dabisiy ni bay e tʼufeg rokʼ; ya faʼanra dariy e tʼufeg rokʼ ma ire dariy rogon; ere thingari dabisiy ni bay e tʼufeg rokʼ.

45 Ere tʼufeg e ba gumʼaenʼ, mab gol, ma darma awaenʼ, ma de ʼufʼuf, ma de tolngaenʼ, ma de falʼngakʼ, ma de papay e damomuw ngakʼ, ma dar lemnag e tin nib kireb, ma dar falfalaenʼ ko tin nib kireb machane ma falfalaenʼ ko tin nib riyulʼ, ma ma athamgiliy gubin banʼen, mab michaenʼ ko gubin banʼen, ma ma athapeg gubin banʼen, ma ma lubeg gubin banʼen.

46 Ere, pi walageg nib tʼuf rog, faʼanra dariy e tʼufeg romed, ma dariy rogmed, ya tʼufeg e darma mathmit. Ere, mu chichiʼiyed gimed ko tʼufeg, niʼir e thʼabi felʼ u fithikʼ e gabin, ya gubin banʼen mar ra mathmit—

47 Machane tʼufeg e fare adag rokʼ Kristus nib machalbog, ni ma kʼadaenʼ ni gubinfen; ma chaʼ ni yira pirʼeg ni bay rokʼ ko bin tomur e rran, ma ire ba felʼ rogon.

48 Ere, pi walageg nib tʼuf rog, mmeybil gaed ngakʼ e en Chitamangiy u poloʼ i gelingin gumʼirchaʼmed, ni nge yog ni ngam sug gaed ko re adag ney, ni ke piiʼ nga dakean gubin e piʼin nib riyulʼ ni ma lek Fak, ni Yesus Kristus; ni nge yog ni ngam manged pifak Got; ni nge yog u napʼan ni nge yibi mʼug ma kad boeded ir, ya gadaed ra guy niʼir e aram rogon; ni nge yog ngodaed e re athap ney; ni nge yog nni machalbog nagdaed ni boed ir nib machalbog. Amen.