1 Fakag nib tʼuf rog, kug yol ngom bayay ni nge yog ni ngam nang ni kugub fos; machane kug yoloey boech banʼen ni morngaʼagen e tin nib kirbaenʼ.

2 Ya musap, bay e mael romaed ngakʼ fapi Lamanites nib ubchiyaʼ, niʼir e deyog nug gelgaed riy; ma Archeantus e kan liiʼ ko sayden ke aw nga butʼ, ma ku aram rogon ngakʼ Luram nge Emron; arragon, rib yoʼor e gidiiʼ romaed nib salap ni kar mʼaed.

3 Ere chiney e musap, o fakag, kug rus ya fapi Lamanites e ngar gatheayed e pi gidiiʼ ney; ya darur kalgaed ngaenʼraed, ere Moʼoniyanʼ e be kʼaring raed ngar ululiyed e damomuw ngoraed.

4 Musap, gube un ngoraed ko muruwel ni gubin e ngiyalʼ; ma napʼan ni gura weliy e thin rokʼ Got nibe kaen ngoraed mar tʼon gaed ma yaed be damomuw ngog; ma napʼan ni dab gog e thin nib kaen ngoraed mar ʼelʼel niged gumʼirchaʼraed; ere, rug be rus ya fare Kan ni Thothup rokʼ Somoel e ke chuw roraed.

5 Ya kari gel e damomuw roraed ni be yibi mʼug ngog ni dakurur tamdag gaed ko yamʼ; ma ke chuw e adag roraed, ngoraed; ma yaed be araʼareg e rachaʼ nge falbiy ni gubin e ngiyalʼ.

6 Ere chiney, o fakag nib tʼuf rog, ni yug aram rogon fini ʼelʼel gumʼirchaʼraed, mman ngad muruwel gow nib gel; ya faʼanra ngad tal gow ko muruwel, ma yira fekdow nga tan luben e gafgow; ya bay ba muruwel ni ngad rinʼew u napʼan ni gadow bay u lan e biney e dowef, ni nge yog ni ngad gel gow ko fare toʼogor rokʼ gubin e tin nib mataw banʼen, magdow toffan u lan gilʼilungun Got.

7 Ere chiney e gube yoloey boech banʼen ni morngaʼagen e pi gafgow rokʼ e pi gidiiʼ ney. Ya rogon e tin ni kug nang ni ke thap ngog rokʼ Amoron, e musap, fapi Lamanites e ke yoʼor e gidiiʼ ni kalbus roraed, ni kar feked ko fare wulyang nu Sherrizah; ni bogi pumoʼon, nge ppin, nge bitir.

8 Ma pi figirngin nge chitamangin e pi ppin nem nge pi bitir nem e kan liiʼraed kar mʼaed; mar duruwʼiyed e pi ppin nem ko ufin u doew e pi figirngiraed, ma fapi bitir e ni duruwʼiy raed ko ufin u doew e pi chitamangraed; ma raen, e kemus ni buchʼuw e yibe piiʼ ngoraed.

9 Ma yug aram rogon e biney e ngongol ni rib kireb ko fapi Lamanites, machane dar taw nga rogon e tirokʼ e gidiiʼ rodow u lan yu Moriantum. Ya musap, boʼor e pi ppin ni fak fapi Lamanites ni kar feked ni kalbus; ma tomuren ni kar chuweged roraed e renʼen ni thʼabi felʼ mab tawaʼath u fithikʼ gubin banʼen, ni arame fal nge machalbog—

10 Ere tomuren ni kar rinʼed e biney, mar thanged e fan roraed u ba yalen ni thʼabi kireb, ni yibe gafgow nag e dagur roraed nge madaʼ ko ngiyalʼ ni kar mʼaed; ma tomuren ni kar rinʼed e biney, mar piiʼed ufin u doewraed ko gamanman ni malboch, ni bachan e ʼelʼel ko gumʼirchaʼ roraed; ma yaed be rinʼ ni ngar daged e soerokʼ.

11 O fakag nib tʼuf rog, buʼuw rogon e gidiiʼ ni aray rogon, ni defelʼ pangiraed—

12 (Ma kemus ni buchʼuw e duw ni ke yaen, ma ur moyed ni bogi gidiiʼ nib felʼ pangiraed ma yib adag dakeanraed)

13 Machane, O fakag, buʼuw rogon e gidiiʼ ni aray rogon, nib falaenʼ i rinʼ e tin nib kireb e ngongol—

14 Buʼuw rogon ni ngad lemniged ni Got e dabi gechig nagdaed?

15 Musap, gumʼirchaʼ rog e be yoer: Gafgow ngakʼ e pi gidiiʼ ney. Moy ngam gechig, O Got, mag mithaeg e pi denen roraed, nge pi kireb roraed, nge pi ngongol roraed ni kireb nge chuw u pʼoewchem.

16 Ma bayay, o fakag, rib yoʼor e piʼin ni ke yimʼ figirngiraed nge pi ppin ni fakraed ni kar magaey gaed u lan yu Sherrizah; ma tin baʼaram e ggan ni defek fapi Lamanites, e musap, fare ulung i salthaw rokʼ Zenephi e yaed e kar feked, ma kan pagraed nga i balyangaenʼraed ko gin ni ngar feked e ggan riy; ere boʼor e ppin ni ke pilibthir nra awgaed nga butʼ u kanawoʼ ngar mʼaed.

17 Ma salthaw ni bay rog e ke mʼay gelingraed; ma fapi salthaw ko Lamanites e yaed bay u thil mow yu Sherrizah; ma oren e piʼin nra miil gaed nga ranoed ko salthaw rokʼ Aaron e kar manged e ldow nga paʼ e pi maʼangech ko kireb.

18 O pi ngongol ni kireb ko gidiiʼ rog! Dariy e yaram e murnguy roraed. Musap, gag e kugmus ni gub gidiiʼ, ma kemus ni gelingin e gidiiʼ e bay rog, ere dabki yog rog ni ngug gafaliy e salthaw.

19 Ma kar gelgaed nga fithikʼ e tiroraed e pangin ni kireb; ma taʼareb faraed kireb, ni dariy beeʼ nra paged nib fos, nibe pilibthir ara kab bitir; ma gubin banʼen ma yaed baʼadag ma kemus ni yigoʼ tin nib mangil banʼen; nge gafgow nibe tay e pi ppin romaed nge pi bitir romaed u dakean gaʼangin yang e nam e ke thang gubin banʼen; arragon, dabiyog i weliy, ara rayog ni ngan yoloey.

20 Ere chiney, o fakag, dab kug paer nggu weliy morngaʼagen e biney e gagyeg nib kireb. Musap, gur e gamnang e ngongol nib kireb ko pi gidiiʼ ney; gur e gamnang ni dakuriy e kenggin e yalen roraed, ma dakuriy e thamthaem roraed ko lem; ma pi ngongol roraed ni kireb e ke pag rogon ko tirokʼ e Lamanites.

21 Musap, o fakag, dabiyog ni nggog ngakʼ Got nib felʼ e roraed ya gube digow ngay nra gechig nigeg.

22 Machane musap, o fakag, gube yoeg ngakʼ Got nib felʼ e rom, ma be paganʼug ngakʼ Kristus ni gur e gara thap; ma gube meybil ngakʼ Got ni nge tayem ni dab mumʼ, ni ngam guy e gidiiʼ rokʼ ni kar suloed ngakʼ, ara gafgow roraed ni poloʼ; ya gumnang ni thingar ra mʼaed ma kemus ni faʼan yaedra kalngaenʼ mar suloed ngakʼ.

23 Ma faʼan yaedra yimʼ ma boed rogon fapi Jaredites, ni bachan e ʼarʼar u gumʼirchaʼraed, ni yaed be nomeg e puʼoeg rachaʼ nge tay falbiyen banʼen.

24 Ma faʼanra ngar mʼaed, ma gadaed manang ni boʼor e piʼin walagdaed ni kar manged ko fapi Lamanites, ma kub yoʼor boech ni kubay ra manged ngoraed; ere, mu yoloey buchʼuw banʼen, ma faʼanra kag bay, ma kugumʼ ni dab kug guyem; machane ba paganʼug ngay ni ke chugur ni bay kug guyem; ya bay rog e chep nib thothup ni gubaʼadag ni nggu piiʼ ngom.

25 Fakag, mu yulʼyulʼ ko ngongol rom ngakʼ Kristus; ma gubaʼadag ni pinʼen ni kug yoloey e dabi kireb anʼum ngay, ni nge chuchuyem nga butʼ nge liiʼem nga mumʼ; machane nge chibiyem Kristus ngalang, ma gomanga yog ni pi gafgow nge yamʼ ni tay, nge mʼug ni tay ngakʼ e pi chitamangdaed, nge murnguy nge gumʼaenʼ rokʼ, nge athap ko rir nge yafos ni manechubog rokʼ, e paer u laninʼum ni gubinfen.

26 Ma fare murnguy rokʼ Got ni fachaʼ ni Chitamangiy, ni gilʼilungun e ba tolang u lan e tharmiy, nge Somoel ni Yesus Kristus rodaed, ni bay u baʼani matʼaw rokʼ Got, nge yaeni madaʼ ko ngiyalʼ ni gubin banʼen ma kan gagyeg nag u tanpaʼ, e gomanga yog ngom me paer rom ni gubinfen. Amen.