1 Met ngehi, Moronai, ntingih ekis mehkot me I medewe me kesempwal; oh I ntingwehng riei kan, Mehn Leimen kan; oh I men irail en ese me sounparehr epwiki rieisek dauliher ahnsou me kilel en ketidohng Kraiso wiawi.

2 Oh I pahn katengepene poadoapoad pwukat, mwurin ei pahn kangoangehkin kumwail ekei kisin koasoia kan.

3 Kilang, I pahn kangoangehki kumwail me ahnsou me kumwail pahn wadek mepwukat, ma iei eripit en Koht me kumwail pahn wadengki, me kumwail pahn tamataman ia uwen kupwurkalahngan en Kauno ong aramas akan, sangete ni kepikipikdahn Adam kohdo lao lel ahnsou me kumwail alehier mepwukat, oh medemedewe nan amwail mohngiong kan.

4 Oh ahnsou me kumwail pahn alehdi mepwukat, I pahn kangoangehkin kumwail en peki rehn Koht, Sahm Soutuk, ni mwaren Krais, ma mepwukat sohte mehlel; oh ma kumwail pahn peki sang nan mohngiong mehlel, ineng mehlel, pwoson Krais, e pahn ketin kasalehiong kumwail mehlelo, sang ni manaman en Ngehn Sarawi.

5 Oh sang ni manaman en Ngehn Sarawi kumwail pahn esehla mehlel en soahng kaoros.

6 Oh soahng koaros me mwahu e pwung oh mehlel; eri, sohte mehkot mwahu kin kahmahmki Krais, ahpw e kin pohnese me e ketin ieias.

7 Oh kumwail en ese sang ni manaman en Ngehn Sarawi me e ketin ieias; eri I pahn kangoangehkin kumwail en dehr kahmahmki manaman en Koht; pwe e kin ketin doadoahk sang ni manaman, nin duwen ehn aramas akan pwoson, iei ihte mwomwe rahn wet oh lakapw, oh kohkohlahte.

8 Oh I pil kangoangehkin kumwail, riei ko, me kumwail en dehr kahmahmki sapwellimen Koht kisakis kan, pwe kisakis kan me tohto; oh e kohsang rehn Kohtohte. Oh soangen wiepe tohto me kisakis pwukat kin kohda; ahpw ihte Kohto me kin ketikihda nan mehkoaros ong aramas koaros; oh Ngehn en Koht me kin ketikihong kisakis pwukat ong aramas akan, pween wia kamwahuparail.

9 Pwe kilang, Ngehn en Koht ketikihong emen kisakis en kak padahngki mahsen en eripit;

10 Oh ong emen, Ngehnohte ketikihong en kak padahngki mahsen en kupwurokong;

11 Oh ong emen, Ngehnohte ketikihong pwoson kehlail mehlel; oh ong emen, kisakis kan en kamwahuiala;

12 Oh pil, ong emen, en kak wia doadoahk manaman kapwuriamwei kan;

13 Oh pil, ong emen, en kak kohpada duwen soahng koaros;

14 Oh pil, ong emen, en kilangada tohnleng kan oh ngehn en papah kan;

15 Oh pil, ong emen, en kak lokaiahki soangsoangen lokaia kan;

16 Oh pil, ong emen, en kak kawehwehda mahsen kan oh soangsoangen lokaia kan.

17 Oh kisakis pwukat koaros kohdo sang rehn Ngehn en Krais; oh e kin kohdo ong emen emen aramas, nin duwen me e kin ketin kupwuriki.

18 Oh I pahn kangoangehkin kumwail, riei kesempwal akan, me kumwail en tamataman me kisakis mwahu koaros kohdo sang rehn Krais.

19 Oh I pahn kangoangehkin kumwail, riei kesempwal oko, me kumwail en tamataman me en kin ketin duduwehte aio, rahnwet, oh kohkohlahte, oh kisakis pwukat koaros me I koasoiahier, me sang palingehn, sohte pahn uhdi, iei erein sampah eh pahn mihmihte, ihte ma aramas akan soupwoson.

20 Eri, pwoson udahn anahnepe; oh ma pwoson anahnepe mie eri koapworopwor pahn anahnepe mie; oh ma koapworopwor pahn anahnepe mie eri limpoak unsek pahn pil anahnepe mie.

21 Oh ma kumwail sohte pahn ahneki limpoak unsek kumwail sohte kak komourla nan wehin Koht; pil kumwail sohte kak komourla nan wehin Koht ma kumwail sohte ahneki pwoson; de pil kumwail sohte ahneki koapworopwor.

22 Oh ma kumwail sohte ahneki koapworopwor eri kumwail udahn pahn mih nan irair en soukoapworopwor; soukoapworopwor kin kohdo sang ni wiewia suwed.

23 Oh ni mehlel Krais ketin mahsanihong atail pahpah ko: Ma kumwail pahn ahneki pwoson kumwail pahn kak wia soahng koaros me kesempwal ong ie.

24 Oh met I koasoi ong sampah pwon—ma rahn pahn kohdo me sapwellimen Koht manaman oh kisakis kan uhdi sang kumwail, e pahn sang pwehki sohpwoson.

25 Oh meid suwediong aramas akan ma iei met pahn wiawi; pwe sohte emen rehmwail me pahn wia mwahu, sohte emente. Pwe ma e pahn mie emen rehmwail me wia mwahu, e pahn wia doadoahk sang ni sapwellimen Koht manaman oh kisakis kan.

26 Oh meid suwediong irail me pahn wia mepwukat oh mehla, pwe irail mehla nan diparail, oh irail sohte kak komourla nan wehin Koht; oh I koasoia nin duwen mahsen en Krais; oh I sohte likamw.

27 Oh I kangoangehkin kumwail en tamataman mepwukat; pwe ahnsou pahn mwadangete kohdo me kumwail pahn ese me I sohte likamw, pwe kumwail pahn kilang ie ni mwohn mwoalen kopwung en Koht; Oh Kauno Koht pahn ketin mahsanihong kumwail: Dah, I sou kalohkihong kumwail ei mahsen kan, me ntingidi sang rehn ohl menet, rasohng emen me lukulukuwer sang rehn me melahr akan, iei, duwehte emen me koaskoasoi sang nan pwehl?

28 I kalohngki mepwukat pwe en kapwaiada kokohp akan. Oh kilang, e pahn kohwei sang nan dauwasen Koht poatoapoato; oh sapwellime mahsen pahn kohwei sang ehu dih kohlahng ehu.

29 Oh Koht pahn ketin kasalehiong kumwail, me dahme I ntingihdi e mehlel.

30 Oh pil I pahn kangoangehkin kumwail en kohdo rehn Krais, koledi kisakis mwahu koaros, oh dehr doahke kisakis suwed, de mehkot samin.

31 Oh pirida, oh pwourda sang nan pwehl, kowe Serusalem; ei, oh pwurieng nan ahmw likou kaselel kan, kowe serepein en Saion; oh kakehlakahla amwail lepin tuhkehn kateng kan oh katehlapahla irepeh kan kohkohlahte, pwe kumwail en sohla pwurehng namenekla, pwe inou me Sahm Soutuk ketin wiahiong kumwail, peneinei en Israel, en kak pweida.

32 Ei, kohdo rehn Krais, oh unsekla reh, oh soikasang kumwail soahng koaros me sohte wia mour en Koht; oh ma kumwail pahn soikasang kumwail soahng koaros me sohte wia mour en Koht, oh poakehng Koht sang ni amwail kehl unsek, madamadau unsek oh roson unsek, eri sapwellime kalahngan ahpw pahn itarehng uhk, me kahrehda sang ni sapwellime kalahngan kumwail pahn kak unsekla rehn Krais; oh ma sang ni kalahngan en Koht kumwail pahn unsekla rehn Krais, kumwail sohte pahn kak soikala manaman en Koht.

33 Oh pil, ma sang ni kalahngan en Koht kumwail unsekla rehn Krais, oh sohte soikala sapwellime manaman, eri kumwail pahn sarawihkihla Krais sang ni kalahngan en Koht, sang ni kakerehdi en ntahn Krais, me mih nan inou en Sahmo ong kamwakelpen dihparail kan, pwe kumwail en kak sarawihla, oh sohte samin en mwahi.

34 Oh met I rahnmwahuiala kumwail koaros. I kereniongehr pahn kohla komoaldi nan paradais en Koht, lao lel ahnsou me palingeniet oh paliwereiet pahn pwurehng pwurpene, oh ngehn kohdo pereperen nan wehwe, pwe I en tuhwong kumwail mwohn wasahn kopwung mwahu en Siowa lapo, Sounkopwung Soutuko ong me momour oh mehla kan. Ahmen.