1. Bono inche Moroni, nigo inkorika makeigo buna inche indonche ng’a namaya; na nigo inkorika ase abaminto, abalamani; na nigo inganetie bamanye ng’a goetania emiaka chimia inye na merongo ebere yaetire korwa ebirage birugua igoro y’ogocha gwa Kristo.

2. Na nigo indabeke amang’ana aya omouri, nyuma ekero nakwanire amang’ana makeigo ase enchera y,okoagacha ase more.

3. Rigereria, nigo nkobamanyia ng’a ekero morayasome aya onye more nechisemi ase Nyasae ng’a moyasome, erinde nario morainyore ng’a namabera angana inaki Omonene abeire okoba naro ase abana bamwanyabanto, korwa ogotongwa gwa Adamu goika engaki moranyore amang’ana aya na koyabeka ase chinkoro chiaino.

4. Na ekero morayanyore amang’ana aya, nigo inkobamanyia ing’a momoborie Nyasae, Tata okare na kare ase erieta ria Kristo, onye ebinto ebi mbirie ebiekeene; na onye mogosaba ase okwebeka inse ase chinkoro chiaino, ase okogania gwekeene, more nokwegena ase kristo, nabe okoorokia ekeene kiaye ase more, ase chinguru chi’Omoika Omochenu.

5. Na ase chinguru chi’Omoika Omochenu goika momanye ekeene kia amang’ana onsi.

6. Na kende gionsi kere ekiya na giekeene; naboigo kende gionsi ekiya tikeri komokana Kristo, korende nigo gekomanyia ng’a nareo.

7. nabo moramanye ng’a nareo, ase chinguru chiomoika omochenu; aseigo nigo inkobamanyia ng’a timokana chinguru chia Nyasae; ekiagera nigo chigokoreka ase chinguru koreng’ana n’okwegena kw’abana bamwanyabanto, rero, na mambia na kare na kare.

8. Naende nigo inkobamanyia, inwe abaminto, ng’a timokana ebiegwa bi’Omoika bia Nyasae, ekiagena nigo bire ebinge; na nigo bikorwa ase Nyasae oyomo. Na nchireo chinchera ao ao echio ebiegwa ebi bigokora emeremo; korende Nyasae oria oria oyomo ogokora onsi ase onsi; na nigo bikorugwa ase okororekana kw’Omoika oNyasae ase abanto, ase okobakonya.

9. Rigereria, ase omonto oyommo aegwa n’Omoika oria oNyasae, okworokereria ring’ana riobong’aini.

10. Na ase oyonde, aegwa kworokereria ring’ana riobong’aini n’omoika oria oria;

11. Naende ase oyonde aegwa okwegena okonene, na ase oyonde aegwa ebiegwa biokogwenia n’Omoika oria oria oyomo;

12. Naende ase oyonde, gokora emeremo y’ebikore ebinene;

13. Naende ase oyonde, aegwa okobana koreng’ana nebinto bionsi;

14. Naende ase oyonde aegwa okorora na komanya emeika ao ao;

15. Naende, ase oyonde, chingencho chi’onsi chiemenwa;

16. Naende ase oyonde, ogoonchoria gwechimeme na chingencho chiemenwa ao ao.

17. Na ebiegwa ebi bionsi nigo bigoetera ase Omoika o’kristo; na nigo ogocha ase kera omonto koreng’ana buna oganetie.

18. Na nimbe inkobamanyia, inwe abaminto ng’a kera ekeegwa ekiya nigo gekorwa ase Kristo.

19. Na nigo inkobamanyia, inwe abaminto, ng’a moinyore ng’a ere nere oria igoro rero na kare na kare, naboigo ebiegwa ebi bionsi nabeire ingokwana igoro yaye, ebio bire ebiekemoika, tibigosira nonya ense egotenena, gotatiga ase ogotegena kwa abana bamwanyabanto.

20. Ase ayio goika okwegena kobeo; na onye okwegena gokobao naboigo ogosemeria goika kobeo, na onye ogosemeria koreo naboigo obwanchani goika bobeo.

21. Na onye timokoba nobwanchani timogotoreka ase oborwoti bwa Nyasae; gose onye mokoba timori n’okwegena timogotoreka ase oborwoti bwa Nyasae; naboigo onye timokoba n’ogosemeria.

22. Na onye timori n’ogosemeria nigo moganetie gwatananwa; na ogwatananwa nigo gogocha ase engencho y’ebibe.

23. Na ekeene Kristo nigo akwanete ase abatata: Onye mokoba n’okwegena imonyare gokora ebinto bionsi bigwenerete ase inde.

24. Nabono nigo ngokwana igoro yaria onsi y’omoerio bw’ense ng’a onye rituko rigoika chinguru na ebiegwa bia Nyasae biranyare gokorekana egati yaino, naya nigo arabe ase engencho y’ogotegena.

25. Na okoragererigwa kobe ase abana bamwanyabanto onye aya akoba bo; na ase egati yaino onde takonyorekana okorete amaya. Korende onye oyomo okonyorekana egati yaino okorete amaya nigo arakore emeremo ase chinguru na ebiegwa bia Nyasae.

26. Nare n’okoragererigwa ere oyorakore amang’ana aya nagokwa, naboigo nigo barakwe ase ebibe biabo, na tibagotoreka ase oborwoti bwa Nyasae; na nigo ingokwana koreng’ana n’amang’ana a Kristo; na tindi koria oborimo.

27. Na nigo inkobamanyia ng’a moinyore amang’ana aya; ekiagera engaki neike bwango mokomanya ng’a tindi kong’ainereria, ekiagera ing’a mondore inde ase Nyasae; na Omonene Nyasae natebe ase more ng’a: Nintabatebetie amang’ana ane, ayio arigetwe n’omonto oyo, buna oria okorera korwa ase ogokwa, naboigo buna oria ogokwana korwa ase amaroba?

28. Nigo ngokwana amang’ana aya ase ogoikeranigwa kw’obobani. Na rigereria goika arwe ase omonwa oNyasae okare na kare; na amang’ana aya nabe akobao korwa ekegori goika ebigori bionsi.

29. Na Nyasae naorokie ase more ng’a aria onsi nabeire inkorika nayekeene.

30. Naende nigo nkobamanyia mobe mogocha ase Kristo, na koimokia kera ekeegwa ekiya’na timobwata ebiegwa biobobe, gose kende gionsi ekebe.

31. Naboigo boka na imoka korwa ase amaroba, O Yerusalem; nakobeka chiganchwa chiaino chindabu, O inwe abaiseke ba Zayoni; naboigo kongwa ebinyoro biaino na komenta chimbebe chiaino kare na kare erinde nario motabugwe, erinde nario obobwatoni bwa Tata okare na kare arosetie ase more, O inwe enyomba ya Israel, erinde aya anyare goikerana.

32. Inchwo ase Kristo na koba abachenu ase are na koyakana inwe mweka ayatari ayanyasae; na kamorayakane aya inwe mweka na komwancha Nyasae amo nechiriguru chiaino chionsi, nebirengererio na okobua kwaino, naboigo obuya bwaye nigo boisanegete ase more, na ase obuya obo monyare gokorwa abachenu ase Kristo; naboigo ase obuya obo bwa Nyasae mwabeire abachenu, ime ya Kristo, na timokwanga chinguru chia Nyasae.

33. Naende, goetera ase obuya bwa Nyasae, onye more abekeene ase Kristo, timokana chinguru chiaye, aseigo mwasibigwe ime ase Kristo goetera ase obuya bwa Nyasae, goetera ase ogoiteka kwa amanyinga a Yeso Kristo, obwe bore ase okobwatana gwa Tata ase okwaberwa kwebibe, naboigo koba abachenu motari na kemoa.

34. Na bono nigo nabaakeire okwaeri mwensi, ekiagera bwango nkogendainde gotimoka paradiso ya Nyasae, goika engaki omoika n’omobere one okobwatanigwa naende, na koretwa nobobui ase embeo, koumerana nainwe nyuma y’ogoikaransa kw’obonene bwa Yehova, oyore omonachi ebina okare na kare ase abare moyo na abakwete. Amina.