1 Kunantaj ñoqa, Moroni, escribini imatachus allinta rijch’awan; escribinitaj hermanosniyman, lamanitasman. Yachanankuta munayman tawa pachaj iskay chunkayoj wataña pasasqanta Cristoj jamunan señalmanta.

2 Uj, iskay palabrata kamachiy jina qankunaman parlaytawan, kay escribisqasta wisq’asaj.

3 Uyariychis, maypachachus kaykunata leenkichis, Dios leenaykichista munajtenqa, chaypacha willaykichis yuyarinaykichista imaynatachus Señor runaspa wawasninkuta khuyasqanta, Adanta ruwasqanmantapacha, kaykunata jap’inaykihiskama; willaykihistaj kaykunamanta sonqoykihispi t’ukunaykichista.

4 Kaykunata jap’isqaykichistawan, ñoqa niykichisman Dios, Wiñay Tatamanta mañakunaykichista Cristoj sutimpi, kaykuna cheqachus manachus kasqankuta yachanaykchispaj. Qankunachus cheqa sonqoyoj kankichis, mañakunkichistaj yachayta munaspa, Cristopi feniyoj kaspataj chayqa, pay cheqa kasqankuta willasonqachis Santo Espiritoj atiyninnejta.

5 Santo Espiritoj atiyninnejtataj tukuy ima cheqachus kasqanta yachawajchis.

6 Imapis allin kanman, chayqa kallantaj justo, cheqataj; chayrayku imapis allin mana Cristota neganchu, astawanqa willan Cristo kawsasqanta.

7 Qankunataj Cristoj kawsasqanta yachayta atiwajchis Santo Espiritoj atiyninnejta; chayrayku willaykichis mana Diospa atiyninta neganaykichista. Imaraykuchus payqa atiynejta llank’an, runaspa wawasninkoj feninkuman jina. Kikillanta ruwan kunan p’unchaypi, q’ayapi, wiñaypaj wiñayninkama.

8 Watejmanta willaykichis, hermanosníy, ama Diospa qoyninkunata neganaykihista, ashkha kasqankurayku; kikin Diosmanta rikhurimunkutaj. Ashkha ruwaykunapi kay qoyninkunata jaywan; jina kajtimpis kikin Diosllapuni tukuy impai ruwan; tukuyninkutaj qosqa kanku Diospa Espiritun runasman rikhurimusqannejta, runasta yanapanampaj.

9 Qhawariychis, Diospa Espiritunnejta ujman qosqa yachachinampaj yachayniyoj palabrata.

10 Ujmantaj kikin Espirituwan yachachinampaj yachaysapa palabrata.

11 Wajmantaj jatun fe qosqa; wajmantaj kikin Espirituwan onqosqasta thañichina atiyta;

12 Ujnin kajman jatuchas milagrosta ruwanampaj;

13 Wajmantaj tukuy imamanta sut’inchanampaj;

14 Ujnin kajman angelesta, yachachina espiritustawan rikunampaj;

15 Wajmantaj tukuy imaymana parlaykunapi parlanampaj;

16 Ujnin kajman waj parlaykunasta sut’inchanampaj, ashkha parlaykunastapis;

17 Tukuy kay qosqasnin chayamunku Cristoj Espiritunnejta; tukuy runamantaj ashkhapi chayamunku munayninman jina.

18 Willaykichismantaj munasqa hermanosníy, yuyarinaykichista sapa allin qoyqa Cristomanta jamusqanta.

19 Niykichistaj, munasqa hermanosníy, yuyarinaykichista kikin kasqanta qayna p’unchaypi, kunan p’unchaypi, q’aya p’unchaypitaj. Yuyarinaykichista munani, tukuy kay qoyninkuna, mayqenkunamantachus parlaniña, chaykuna espiritumanta kanku, chaykunataj mana jayk’ajpis, kay pacha sayashajtin tukuchisqachu kanqanku. Tukuchisqa kanqanku runaspa wawasninku mana creesqankuraykulla.

20 Chayrayku fe kanan tiyan; fetaj kan chayqa, suyay kanan tiyan; suyaytaj kan chayqa, munakuy kanan tiyallantaj.

21 Mana munakuyniyoj kawajchis chayqa, manapuni Diospa reinompi salvakuyta atiwajchischu; chayrí mana salvakuyta atiwajchischu mana feniyoj kaspaqa, mana suyayniyoj kaspataj.

22 Mana suyayniyojtaj kaspaqa, phutiyniyojpuni kankichis; phutiytaj jamun juchallikuyrayku.

23 Cheqamanta Cristoqa tatasninchisman nerqa: Qankunachus feniyoj kankichis chayqa, tukuy ñoqapaj ruwaykunata ruwayta atinkichis.

24 Kunantaj tukuy kay pachaj kantusninman parlani — Diospa tiynin, qoyninkunawan mana tarisqa qankuna ukhupi p’unchay chayamojtin, chay kanqa mana creeyrayku.

25 Ay runaspa wawasninkumanta ajina kanman chayqa; imaraykuchus mana pipis qankuna ukhupi allinkunata ruwanqachu, mana ujllapis. ujllapis qankuna ukhupi allinkunata ruwanman chayqa, payqa chayta ruwanqa Diospa atiyninrayku, qoyninraykutaj.

26 ay pkunachus kaykunata jark’anku, wañunkutaj, imaraykuchus paykuna juchasninkupi wañunku, manataj salvakuyta atinkuchu Diospa reinompi. Ñoqataj kaykunata parlani Cristoj nisqanman jina; manataj llullakunichu.

27 Willaykichis kaykunata yuyarinaykichista; imaraykuchus p’unchayqa usqhayta jamun, mayqempichus yachankichis mana llullakusqayta, imaraykuchus rikuwankichis Diospa ñawpaqempi. señor Diostaj nisonqachis: ¿Manachu palabrasniyta willarqaykichis, mayqenkunatachus kay runa escriberqa, imaynaachus ujnin kaj wañusqakunamanta qhaparimoj jina, arí, ujnin kaj jallp’amanta willaj jina?

28 Kaykunata willani ñawpaj sut’inchasqas junt’akunankupaj. Jamonqankutaj wiñay Diospa siminmanta; palabrantaj silbanqa uj miraymanta waj miraykama.

29 diostaj rikuchisonqachis escribisqay cheqa kasqanta.

30 Watejmanta mañakuykichis Cristoman jamunaykichista, sapa allin qoyninta jap’inaykchistataj. Amataj llankhaychischu sajra qoyta, ch’ichi kajkunatawan.

31 Rijch’arikuy, jallp’amanta jatarikuytaj o Jerusalen; arí, sumaj p’achasniykiwan p’achallikuy o Siompa warmi wawan; kallpachakuytaj estacasniykita, kantusniykita jatunyachiytaj wiñaypaj wiñayninkama, manaña pantachisqa kanaykichispaj, Wiñay Tataj qankunawan tratochasqasnin junt’asqas kanankupaj, o Israelpa wasin.

32 Arí, Cristoman jamuychis, paypitaj llimphuchakuychis, tukuy mana Diosmanta kajkunata saqespa. Qankunachus tukuy mana Diosmanta kajkunata saqenkichis, Diosta munakunkichis tukuy atiyniykichiswan, yuyayniykichiswan, kallpaykichiswan ima chayqa, paypa gracian qankunapaj allin kanqa, gracianrayku Cristopi llimphuchasqa kanaykichispaj. Qankunachus Diospa gracianrayku Cristopi llimphuchasqa kankichis chayqa, mana negayta atinkichischu Diospa atiyninta.

33 Watejmantataj Diospa gracianrayku Cristopi cabal kankichis, mana paypa atiyninta negaspa chayqa, qankuna Diospa gracianrayku Cristopi llimphuchasqa kankichis, Cristo yawarninta jich’asqanrayku, Tataj tratochasqanman jina juchasniykichis pampachasqas kanankupaj, llimphu kanaykichispaj, mana ch’ichiyoj.

34 Kunantaj tukuyniykichismanta kacharparikuni. Apuraytataj Diospa paraisonman ripusaj samakoj, espirituy cuerpoywan juntuchakunankukama. Chaypacha altunejta atipayniypi pusasqa kasaj qanta taripasunaypaj Jehovaj ñawpaqempi, pichus kawsajkunaj, wañusqakunajwan Wiñay Juezninku. Amen.