1 Kunantaj ñoqa, Moroni, wakin tatay, Mormompa, nisqasninta escribini, mayqenkunatachus pay parlarqa femanta, suyaymanta, khuyaymantawan. Imaraykuchus ajinata runasman parlarqa, sinagogapi yachachispa, mayqen sinagogatachus sayaricherqanku yupaychanankupaj.

2 Kunantaj ñoqa, Mormon, parlaykichis munasqa hermanosníy. Dios Tataj gracianrayku, Señorninchis Jesucristoj gracianrayku, llimphuchasqa munayninrayku, ñoqaman qosqa wajyawasqanraykutaj qankunaman parlanaypaj saqesqa kani.

3 Chayrayku qankunaman parlaykichisman, qankuna iglesiapi kajkuna, sonqo samakuyniyoj Jesucristota qhatejkuna, pikunachus ña suyakuyta jap’inkichis, mayqennejtachus Señorpa samarikuyninman yaykuyta atiwajchis, kunanmantapacha paywan kuska janaj pachapi samarikunaykichiskama.

4 Kunantaj hermanosníy, kaykunata niykichis runaspa wawasninkuwan sonqo tiyaywan purisqaykihisrayku.

5 Imaraykuchus ñoqaqa yuyarini Diospa nisqanta, mayqenchus nin ruwasqasninkurayku paykunata rejsinkichis. Allin ruwasqasniyoj kanku chayqa, paykunaqa allin sonqoyoj kanku.

6 Imaraykuchus Dios nerqa: Sajra sonqoyoj runaqa mana allintachus ruwanman. Imaraykuchus qoyninta jaywanman, chayrí diosmanta mañakunman mana cheqa sonqoyoj kaspa chayqa, llanqhalla chayta ruwan.

7 Chayqa mana allin ruway jinachu paypaj yupasqa.

8 Qhawaychis, sajra sonqoyoj runaqa qoyninta qonman chayqa, mana munaspa chayta ruwan. Chayrayku manapis qoyninta qonmanchu karqa, ajinata paypaj yupasqa. Chayrayku payqa sajrapaj qhawasqa Diospa ñawpaqempi.

9 Jinallataj runaman sajrapaj yupasqa, Diosmanta mañakojtin mana cheqa sonqoyoj kaspa chayqa. Arí, mana imatapis payman qosqachu, Dios chay laya runata mana jap’isqanrayku.

10 Chayrayku sajra sonqoyoj runaqa manapuni allinta ruwayta atinchu; nitaj allin qoyninta qonqachu.

11 Qhawariychis, k’allku pujyoqa mana misk’i yakuta qoyta atinchu; manataj allin pujyoqa k’allku yakuta qoyta atinchu. Kikillantaj supaypa kamachin mana Cristota qhatinmanchu; Cristotachus qhatinman chayqa, manapuni supaypa kamachin kanmanchu.

12 Chayrayku tukuy allin cosaspis Diosmanta rikhurimunku; tukuy sajra sosastaj supaymanta rikhurimunku. Imaraykuchus supayqa Diospaj enemigon, paytaj Diospa contranta maqanakuspalla, runasta wajyan juchaman urmachinampaj, munallantaj runas wiñaypaj sajrata ruwanankuta.

13 Chaywampis imachus Diosmanta, chayqa wajyan, munantaj allinta ruwananta. Chayrayku imachus wajyan, munantaj allinta ruwananta, Diosta munakunanta, payta sirvinantataj, chayqa Diosmanta jamun.

14 Cuidakuychis, munasqa hermanosníy, sajrakuna Diosmanta rikhurimusqanta ama yuyaychischu; amataj yuyaychischu Diosmanta jamusqa allinkuna supaymanta rikhurimusqankuta.

15 Imaraykuchus, hermanosníy, qankuna juzgayta atinkichis, sumaj kajkunata rejsinaykichispaj sajra kajkunamanta. Imaynatachus k’anchayniyoj p’unchayqa laqha tutamanta uj jina, kikillantaj qankuna cabalta yachawajchis allin kajkuna sajra kajkunamanta waj jina kasqanta, chayrayku imaynatachus juzganaykichis tiyan, chay ancha sut’i.

16 Imaraykuchus Cristoj Espiritun tukuy runasman qosqa, allin kajkunata rejsinampaj sajra kajkunamanta. Chayrayku rikuchiykichis imaynatachus juzganaykichista; imaraykuchus tukuy imachus allinta ruwayta wajyan, Cristopi creeyta munachintaj, chayta Cristoj atiynin, qoynintaj kachamunku; chayrayku qankuna cabalta yachayta atinkichis Diosmanta kasqanta.

17 Chaywampis, imachus runasta sajrata ruwayta munachin, mana Cristopi creeyta munachintaj, payta negaytataj, mana Diosta sirviytataj, chayta cabalta yachayta atinkichis supaymanta kasqanta. Imaraykuchus kay jinata supayqa llank’an, imaraykuchus mana uj runatapis umajta ruwayta munachinchu; manataj angelesnimpis; nitaj payman presochakojkunapis.

18 Kunantaj, hermanosíy, ña rejsispaña chay k’anchayta, mayqennejtachus juzgawajchis, mayqenchus Cristoj k’anchaynin, ama pantaspa juzgaychischu; imaraykuchus chay kikin juzgayniykichiswan juzgasqas kankichis.

19 Chayrayku, hermanosníy, tukuy osnqowan mañakuykichis, allinta mask’anaykichista Cristoj k’anchaynimpi allin kajkunata sajra kajkunamanta rejsinaykichispaj. Qankunachus sapa allin kajta jap’inkichis, chayta mana juchachaspa chayqa, qankuna Cristoj wawasnin kankichis.

20 Kunantaj, hermanosníy, ¿Imaynatataj sapa allin kajkunata jap’iyta atiwajchisri?

21 Kunantaj femanta parlani, imamantachus parlanayta nerqaniña. Willasqaykichistaj imaynamanta sapa allin kajta jap’iyta atinkichis.

22 Imaraykuchus Dios tukuy imata yachaspa, wiñaymanta wiñaypaj wiñayninkama kasqanrayku, payqa kacharqa angelesta runaspa wawasninkuman yachachejta, Cristoj jamuyninta sut’inchajtataj. Cristopitaj tukuy allin kaj jamun.

23 Diospis profestasninman, kikin siminwan, willarqa Cristoj jamunanmanta.

24 Qhawariychistaj, imaymana ruwaykunapi runaspa wawasninkuman kaykunata willarqa, mayqenkunachus allin karqanku. Tukuy allin cosastaj Cristomanta rikhurimunku; mana jina kajtenqa runasqa urmasqas kankuman karqa, manataj ima allin kajpis paykunaman chayanmanchu karqa.

25 Chayrayku, angeles yachachisqanrayku, sapa Diospa siminmanta parlasqanraykutaj, runasqa feninkuta churayta qallarerqanku Cristopi. Jinataj fenejta, tukuy allin kajta jap’erqanku; jinataj karqa Cristoj jamusqankama.

26 Jamusqanmantapis runas salvasqas karqanku sutimpi feniyoj kasqankurayku; ferayku Diospa wawasninman tukorqanku. Cristoj cheqapuni kawsasqanman jinataj kaykunata tatasninchisman parlarqa nispa: Ima allin kajtachus Tatamanta mañakunkichis ñoqaj sutiypi, feniyoj chayta jap’inaykchista creespa, qankunapaj ruwasqa kanqa.

27 Chayrayku munasqa hermanosníy, ¿Milagros tukukunkuchus Cristo janaj pachaman wicharisqanrayku, Diospa paña makinnejpi tiyasqanraykutaj, Tatamanta mañakunampaj khuyay atiyninkunata, mayqenkunachus kapun runaspa wawasninkupaj?

28 Imaraykuchus tukuy leyta junt’an, tukuy paypi feniyojkunata jap’intaj. Pikunachus paypi feniyoj kanku, paykuna chimpanqanku tukuy allin kajkunaman; chayrayku runaspa wawasninkupaj kawsayninkumanta allinyachin; wiñaypaj janaj pachapi tiyakuntaj.

29 Munasqa hermanosníy, kayta ruwasqanrayku ¿Milagros tukukunkuchu? Uyariychis, qankunaman niykichis, Mana; manataj angeles tukunkuchu runaspa wawasninkuman yachachiyta.

30 Imaraykuchus payta sirvinku, kamachisqanman jina yachachinankupaj, rikuchikuspa pikunawanchus allin feniyoj kanku, pikunawanchus mana iskayrayankuchu Diospa tukuy laya imasnimpipis.

31 Wajyasqataj kanku runasta Diosman kutiriyta willanankupaj, Tataj tratochasqanta ruwanankupaj, junt’anankupajtaj, mayqen tratotachus runaspa wawasninkuwan ruwarqa, runaspa wawasninku ukhupi ñanta wakichinankupaj, Cristoj nisqanta willanankupaj Señorpa ajllasqasninman, paymanta testimoniota willanankupajtaj.

32 Jinaspataj, Señor Dios ñanta wakichin runaspa puchun Cristopi feniyoj kanankupaj, Santo Espiritu paykunaj sonqosninkupi lugarniyoj kanampaj, atiyninman jina. Chayman jinataj Tataqa runaspa wawasninkuwan tratochasqanta junt’an.

33 Cristotaj nin: Ñoqapi feniyoj kankichis chayqa, atiyniyoj kankichis ruwanaykichispaj imatachus kamachiyman, chayta.

34 Nillantaj: Tukuy kay pachaj kantusnin Diosman kutiriychis, ñoqaman jamuychistaj, bautizakuychistaj ñoqaj sutiypi, ñoqapi feniyoj kaychistaj, salvasqa kanaykichispaj.

35 Kunantaj munasqa hermanosníy, cheqachus kanman imatachus nerqaykichis, qhepa p’unchaypi, atiywan, jatun k’anchaywan ima Diosqa qhawachisonqaykichis kaykuna cheqa kasqankuta, cheqachus kanman chayqa, ¿Milagro p’unchay tukukunñachu?

36 Mana chayqa, ¿Manañachu angeles runaswan rikuchikunku? Mana chayqa, ¿Santo Espiritoj atiyninta paykunamanta jark’anchu? Mana chayqa, ¿Chayta ruwanqachu pay tiempo kashajtinraj, kay pacha sayashajtinraj, uj runallapis salvanapaj jallp’a patapi kawsashajtinrajtaj?

37 Niykichis, mana; imaraykuchus ferayku milagros ruwasqas kanku; feraykutaj angles runaswan rikuchiskunku runasta yachachinankupaj; chayrayku kaykunaqa tukukunkuña chayqa, ay runaspa wawasninkumanta, imaraykuchus chay jina mana creesqankurayku, tukuy imataj llanqhalla.

38 Imaraykuchus Cristoj nisqanman jina mana pipis salvakuyta atinmanchu, mana sutimpi feniyoj kaspa. Kaykuna tukukunkuña chayqa, fepis tukukullantaj; runataj millay kawsayniyoj, imaraykuchus paykuna manapis kacharichiy ruwana ruwasqachu kanman jina kanku.

39 Chaywampis munasqa hermanosníy, aswan allin ruwanaykichista yuyani, llamp’u sonqoyoj kasqaykichisrayku ñoqa yuyani Cristopi feniyoj kasqaykichista; imaraykuchus mana paypi feniyoj kankichis chayqa, mana paypa iglesiampi runasqan yupasqas jinapajchu kankichis.

40 Ujtawan munasqa hermanosníy, suyaymanta parlaykichisman. ¿Imaynamanta feniyoj kawajchis mana suyayniyoj kaspa?

41 ¿Imatataj suyankichisri? Niykichis, suyayniyoj kankichis Cristoj allinyachisqannejta, paypa kawsarichiynin atiynejtataj, wiñay kawsayman oqharisqas kanaykihispaj, kaytaj paypi feniykichisrayku, qosaj nispa nisqanman jina.

42 Chayrayku runachus feniyoj chayqa, suyayniyoj kanan tiyan; imaraykuchus mana fe kanmanchu chayqa, manallataj suyay kanmanchu.

43 Watejmanta niykchis mana feniyoj, mana suyayniyojtaj kayta atinchu, mana llamp’u sonqoyoj kaspa, manataj k’umuykusqa sonqoyoj kaspa chayqa.

44 Jina kajtenqa, qhasi feniyoj, suyayniyojtaj kanman, imaraykuchus Dios mana imatapis jap’inchu, mana llamp’usonqoyoj kajtin, k’umuykusqa sonqoyojtaj. Jinataj runachus llamp’u sonqoyoj, k’umuykusqa sonqoyojtaj, willantaj Jesus, Cristo kasqanta Santo Espiritoj atiyninnejta chayqa, munakuyniyoj kanan tiyan; imaraykuchus mana munakuyniyoj kanman chayqa, mana ni ima kanmanchu pay; chayrayku munakuyniyoj kanan tiyan.

45 Munakuytaj unayta muchun, k’achataj, manataj envidiayojchu; munakoyqa mana qhawarakunchu, manataj payllapajchu imatapis mask’an, manataj qhasimanta phiñakunchu; munakoyqa mana ima sajratapis yuyanchu; manataj kusikunchu llulla kajmanta, astawanqa cheqa kajmanta kusikun. Tukuy imata muchun, tukuy imata creen, tukuy imata suyan, tukuy imapitaj sinchita sayan.

46 Chayrayku munasqa hermanosníy, manachus munakuyniyoj kankichis chayqa, mana ni ima kankichis, imaraykuchus munakoyqa mana jayk’ajpis tukukunchu. Chayrayku munakuyta jap’ikuychis. Munakuy tukuy imamanta aswan allin, imaraykuchus tukuy ima urmanan tiyan —

47 Munakoyqa, Cristoj allin munakuynin, wiñaypaj wiñayninkama sayan; pichus qhepa p’unchaypi munakuyniyoj tarisqa, payta allin renqa.

48 Chayrayku, munasqa hermanosníy, Tatamanta mañakuychis tukuy sonqo kallpawan, kay munakuywan junt’asqas kanaykichispaj, mayqen munakuytachus payqa Wawan, Jesucristota, cheqanta qhatejkunaman qon: Diospa wawasninman tukunaykichispaj; rikhurimushajtin pay jina kananchispaj; kay suyakuyniyoj kananchispaj; llimphuchasqa kananchispajtaj paypa llimphu kasqanman jina. Amen.