1 Ere chiney e nggu weliy morngaʼagen e tawfe. Musap gaed, elder, priest, nge teacher e ni tawfe nagraed; ma dan tawfe nagraed nge madaʼ ko ngiyalʼ ni kar daged ni ke bung rograed ngay.

2 Ma ku aram rogon ni dar tawfe niged beeʼ nge madaʼ ko ngiyalʼ ni kar daged e mʼingaenʼ nge kalngaenʼ, mar micheged ko pi chon e galasia ni riyulʼ ni kar kalgaed ngaenʼraed ko gubin e pi denen roraed.

3 Ma dariy beeʼ ni thapeg e tawfe nge madaʼ ko ngiyalʼ ni kar feked fithingan Kristus nga dakeanraed, ni kar dugiliyed u wunʼraed ni ngar pigpig gaed ngakʼ nge madaʼ nga tungun e yafos roraed.

4 Ma tomuren ni kar thapeged e tawfe, make pigaenʼraed ma kar beʼech gaed u dakean gelingin fare Kan ni Thothup, min uneg raed ko mathaʼeg nga fithikʼ fapi chon e galasia rokʼ Kristus; min fek fithingraed, ni nga un lemnagraed ma yibe duruwʼiy raed ko fare thin nib mangil rokʼ Got, ni ngan tay raed u kanawoʼ nib matʼaw, ni ngan ayuwegraed nga ur yunʼuyed e meybil, ni kemus ni falʼngin Kristus e kar tagaʼ gaed ngay, niʼir e tabolngin nge tungun e mich roraed.

5 Ma pi chon e galasia e ur moʼolung gaed, ni ngar baley niged e abich roraed ma yaed be meybil, ma yaed be fith salapraed ni morngaʼagen rogon e paer roraed.

6 Ma ur moʼolung gaed ngar feked e flowa nge waeyin, ni nge pug uran ngoraed fare Somoel i Yesus.

7 Ma ur kolchiyaʼ gaed ngay ni nga dabiyib e ngongol ni denen nga fithikʼraed; ma piʼin ni yira pirʼeg ni kar denen gaed, ma dalip e pi chon e galasia e yaedra micheg e kireb roraed u pʼoewchen e pi elder, ma faʼanra dabra kalgaed ngaenʼraed, ma dabra pogofay gaed, ma yira thang fithingraed, ma dab kun thiʼeg raed nga fithikʼ fapi gidiiʼ rokʼ Kristus.

8 Machane oren yay ni yaed be kalngaenʼ mar gayed e manʼaegfan, u fithikʼ e yulʼyulʼ, min nʼaegfan roraed.

9 Ma pi moʼolung roraed e i gagyeg nag e pi tiyugangʼ ko galasia u rogon e pi muruwel ko fare Kan ni Thothup; ya fare gelingin e Kan ni Thothup e be powiʼiyraed ko gin ni ngar machib gaed riy, ara fonow, ara meybil, ara wenig, ara tang, ni aram rogon nrinʼ.