1 Jech tana, chi c’opoj ta sventa c’u x-elan ich’ vo’, ja’ jech ta xich’ic vo’ yu’un elderetic, presbiteroetic xchi’uc maestroetic; mu xu’ ta xich’ic ac’bel vo’ ti me muyuc bu yac’ojic lec ta ilel slequil talelique.

2 Xchi’uc mu xu’ xiq’uic ta sventa boch’o ta xac’beic vo’, ti me muyuc yalojbe yo’nton xchi’uc ti me muyuc xch’unoj Espíritue, xchi’uc ti me muyuc ta xal ta jamal ta sventa ch’ulna ti me yu’un muyuc sutesoj yo’nton ta bats’imelel ta scotol smule.

3 Yu’un muyuc boch’o ta xiq’uic ta sventa ich’ vo’ ja’ xa no’ox ti me ta stsac ta jech no’ox ta sventa stuquic ti sbi Cristoe, xchi’uc ti me yalojbe yo’nton ta xch’un mantal c’alal to ta slajebal c’ac’ale.

4 Ta ts’acal ti c’alal me la jyich’ic iq’uel ta sventa ich’ vo’e, ti stsatsal Ch’ul Espíritue te xa abtej ta stojolalic xchi’uc la jyich’ic sacubtasel xchi’uc la jyich’ic atael xchi’uquic boch’otic ja’ic steclumal xch’ulna Cristo, xchi’uc la stsac sbiic ti c’uxi xu’ xich’ic tael ta na’ele xchi’uc la jyich’ic lecubtasel ta sventa slequil a’yej Riox, ti c’uxi ja’uc te xich’ic q’uelel ta tuq’uil bee, xchi’uc ti ja’uc te oyicuc o ta sc’opanel Rioxe, xchi’uc ti ja’uc no’ox o te oyicuc ta smantaltac Cristo ti yu’un ja’ banquilal xchi’uc ja’ ta sventa ti xch’unolajel yo’ntone.

5 Ti boch’otic ja’ic ta sventa ch’ulnae ta stsob sbaic ta jujuliquel ta sventa ta xicta yiximic xchi’uc ta sventa tsc’opanic Riox, xchi’uc ti c’uxi sc’opan sbaic ta jujuntal ta sventa slequilal xch’ulelique.

6 Xchi’uc ta stsob sbaic ta jujuliquel ta sventa tsve’ic pan xchi’uc ta xuch’ic ya’lel ts’usub, ti c’uxi tstaic ta na’el ti Cajvaltic Jesuse.

7 Xchi’uc te la xch’abi sbaic ta c’unc’un ti c’uxi muyucuc bolilil ta stojolalique, ti c’alal me oy boch’o ta spas bolilil staique, ta xich’ic vocolil yu’un elderetic xchi’uc oxib textico ta ch’ulna, ti me muyuc ta sutes yo’ntonic xchi’uc ti me muyuc la jyalic ta jamal ti smulique, ti sbiique ta xich’ic tubel, xchi’uc muyuc ta xich’ic atael xchi’uquic steclumal Cristo.

8 Ti me epta velta ta sutes yo’ntonic xchi’uc ti me tsc’anic pertonal ta scotol yo’ntonique, ta xich’ic pasbel pertonal.

9 Ti boch’otic ja’ic ta sventa ch’ulnae ja’ jech ta spasic stsobajelic jech chac c’u cha’al ta xac’ ta na’el Espíritue, xchi’uc ta stsatsal Ch’ul Espíritu, yu’un jech chac c’u cha’al ta xac’ ta na’el Ch’ul Espíritue, ja’ jech stac’ jcholtic c’op, xchi’uc xcaltic mantal, xchi’uc ta jc’opantic Riox, xchi’uc ta jc’antic xchi’uc ta xi jq’uejinutic, yu’un ja’ jech ta xich’ o no’ox pasel.