1 Ja’ jech, ti vu’un Moroniune, ta jts’iba jutuc ya’yejtac jtot Mormón ti bu lo’ilaj ta sventa xch’unolajel o’ntonal xchi’uc ta patub o’ntonal xchi’uc ti ta c’uxubinvaneje, yu’un ja’ jech x-elan la sc’opan ti jteclum c’alal ja’o te ta xchanubtasvan ti te ta snail stsovunbailic te bu la spasic ta sventa xu’ xich’ic ta muc’ Rioxe.

2 Ja’ jech ti vu’un Moroniune, ta jc’opanoxuc ti vo’xuc quermanotacoxuc lec jc’anojoxuque, yu’un ja’ ta sventa slequilal Riox totil, xchi’uc Cajvaltic Jesucristo, xchi’uc jech chac c’u cha’al chch’ul c’ane, xchi’uc jech chac c’u cha’al stsatsal yabtel tal ta jtojolal ti jech chi ac’bat jch’inoxuc ta lo’il li’ ta orae.

3 Ja’ jech ta jc’an cha jch’inoxuc ta lo’il vo’xuc ti ja’oxuc ta sventa ch’ulnae, xchi’uc ti ja’oxuc yajchanc’opoxuc Cristoe, xchi’uc ti a taojic spatubil a vo’ntonic ti c’uxi xu’ xa ochic bu ta xcux yo’nton Cajvaltique, jech chac c’u cha’al li’ ta ora xchi’uc c’alalto ta sc’ac’alil me a taic xcuxubil a vo’ntonic a xchi’uquic te ta vinajele.

4 Ja’ jech ta xcal ta atojolalic, ti vo’xuc quermanotacoxuque, ja’ ta sventa c’u x-elan xu’ cha pas abaic ta stojolalic xnich’nab viniquetic.

5 Yu’un jna’oj ti ya’yejtac Riox jech ta xale: Ta yabtelic ta xcotquinan, yu’un ti me lec yabtelique; jech lequic ec xtoc ti stuquique.

6 Yu’un ja’ jech Riox yaloj, ti me jun vinic chopole, mu stac’ spas ti c’usi ja’ leque, yu’un ti me tsc’an ta xac’ c’usi muyuc slajes c’alal la jyicta ixime, o me ja’ tsc’opan Rioxe, ti me muyuc ta spas ta scotol yo’ntone, muyuc c’usi tstao.

7 Yu’un ti va’aye muyuc ta xich’ atael ta lequilal.

8 Yu’un ja’ jech ti me jun vinic, me chopole, xchi’uc me ta xac’ ta xch’ibal yo’nton ti c’usi muyuc la slajes c’alal la jyicta ixime, ja’ jech ta xich’ ich’el jech chac c’u cha’al ma’uc yu’un, xchi’uc ja’ jech, chopol chc’ot ti ta stojolal Rioxe.

9 Ja’ jech ta xich’ atael ta chopolil ti jun vinic me mu ta scotoluc yo’nton ta sc’opan Rioxe, jech muyuc c’usi tsta stu, yu’un ti Rioxe mu sc’an junucal ti c’usitic va’aye.

10 Ja’ jech, ti me jun vinic muyuc leque, mu stac’ spas ti c’usi leque, xchi’uc me ja’uc xu’ ja’ lec ti c’alal ta xac’ c’usi muyuc slajes c’alal la jyicta ixime.

11 Yu’un ja’ jech, ti me jun sloq’uem ch’ail vo’e, mu xu’ sloq’ues lequil vo’, xchi’uc me ja’uc sloq’uem lequil vo’ xu’ xac’ ch’ail vo’, ja’ jech xtoc ti me jun vinic ja’ yaj abtel pucuje, mu xu’ ja’ sts’aclin batel Cristo, ti me ja’ ta sts’aclin batel Cristoe, mu stac’ spas ta yaj abtel pucuj.

12 Xchi’uc ja’ jech, yu’un scotol ti c’usitic leque ja’ te liquemtal ta stojolal Riox, xchi’uc ti c’usi chopole ja’ te liquemtal ta pucuj; yu’un ti pucuje ja’ scontra sbaic xchi’uc ti Rioxe, xchi’uc ta spasic c’op tajmec, xchi’uc ta sc’an ta suj ti ac’o spas mulile xchi’uc ti ac’o spas c’usi chopol muyuc slajebe.

13 Ja’ jech ti c’usi ja’ yu’un Rioxe, ja’ ta xal xchi’uc ja’ ta sujvan ta spasel c’usitic ja’ lec, scotol ti c’usitic ja’ ta xal xchi’uc ti ta sujvan ta spasel c’usi leque, xchi’uc ti ac’o la jc’antic ti Rioxe, xchi’uc ti ja’uc ac’o la jpastic ti c’usi tsc’ane, yu’un ja’ chchanubtasvan ti Rioxe.

14 Q’uelo me abaic, quermanotac ti vu’un lec jc’anojoxuque, mu me xa valic me ja’ yu’un Riox ti c’usi chopole, o me ja’ c’usi ja’ lec yu’un jtotic ti ja’ cha cuyic ta yu’un pucuje.

15 Ja’ jech quermanotac, ac’biloxuc ti ac’o xa q’uelique, ta sventa ti c’uxi xu’ xa na’ic ti c’usi leque xchi’uc ti c’usi chopole, xchi’uc ti c’u x-elan xu’ cha q’uelique, lec stac’ q’uelel, ta sventa ti c’uxi xu’ xa na’ ta bats’imelel jech chac c’u cha’al saquil c’ac’altic chac c’u cha’al ic’al osil ta ac’ubaltique.

16 Ja’ jech ta scotol viniquetic ta xich’ aq’uel S-espíritu Cristo ti c’uxi xu’ xana’ic ti c’usi lec xchi’uc ti c’usi chopole, ja’ jech cha cac’boxuc avilic ti c’u x-elan ta q’uelele; yu’un scotol ti c’usitic ja’ ta xal ta sventa ac’o jpastic c’usi leque, xchi’uc ti ta sujvan ta xch’unel Cristoe, ja’ tacbiltal ta stsatsal xchi’uc ta svu’el Cristo, ti c’uxi xu’ xa na’ ta bats’imelel ti yu’un ja’ yu’un Rioxe.

17 Ti me c’usiuc no’ox ta sujvan ac’o spas vinic c’usi chopole, xchi’uc ti ac’o mu xch’un Cristoe, xchi’uc ti ac’o mu jamaluc xale, xchi’uc ti ac’o mu spas ti c’usi tsc’an Rioxe, yu’un ja’ jech x-elan ti ta x-abtej pucuje, yu’un ti stuque muyuc bu ta suj junuc vinic ti ac’o ja’uc spas c’usi leque, xchi’uc me ja’uc stuc; xchi’uc me ja’uc yabattac xchi’uc me ja’uc boch’otic ja’ ta xch’unbe smantal.

18 Lec tana quermanotac vu’un, jech ti xa votquinic xa ti saquil osil c’uxi xu’ xa q’uelique, ti ja’ saquil Cristoe, q’uelo me abaic mu me chopoluc xa q’uelic, yu’un ja’ me jech cha vich’ic q’uelbel a talelic jech chac c’u cha’al cha q’uel talelil eq’ue.

19 Ja’ jech, tsots cha calboxuc quermanotac, ti ac’o xa t’unic ta c’unc’un ta saquil Cristo ti c’uxi xu’ xavilic ti c’usi lec xchi’uc ti c’usi chopole; xchi’uc ti me la tsob scotol c’usitic leque, xchi’uc ti me muyuc xa bac’ ta ch’ayele, ta bats’imelel ja’ xnich’onoxuc Cristo.

20 Ja’ jech tana, quermanotac vu’un, ¿c’uxi van xu’ xa tsob scotol ti c’usitic leque?

21 Ja’ jech chi jc’ot xa ti ta va’ay ch’unolajel o’ntonal bu la jcal cha calboxuque, xchi’uc cha calboxuc ti c’u x-elan xu’ cha tstsobic scotol ti c’usitic ja’ leque.

22 Yu’un ja’ jech, sna’oj Riox scotol ti c’usitic oy ti jech la jyich’ aq’uel ta sbatel osil oe, xchi’uc ja’ la stactalel abatetic ti c’uxi ac’o xich’ic o q’uelel xnich’nab viniquetic, ta sventa ti yu’un ta xich’ic ac’bel sna’ic c’u x-elan ta xtal Cristoe, xchi’uc ti ja’ ta sventa Cristo ta xtal scotol ti c’usitic lequique.

23 Xchi’uc ja’ Riox la jyalbe lequil viniquetic ta ye stuc, ti ta xtal Cristoe.

24 Xchi’uc ja’ jech, ep ta chop la jyac’ ta ilel ti c’usitic ja’ lec ta stojolal xnich’nab viniquetique, xchi’uc scotol ti c’usitic lequique ja’ te liquemtal ta stojolal Cristo, ti me mu jechuque, yu’un xa me yalemic ta mulil ti viniquetique, xchi’uc muyuc xa c’usi lec chc’ot ta pasel ta stojolalic.

25 Ja’ jech ta sventa yabtelic abatetic xchi’uc ta scotol ya’yej bu loq’uem ta ye Riox, ti sjapoic spasel ti xch’unolajel yo’ntonic ta sventa Cristoe, xchi’uc ja’ jech, ja’ ta sventa xch’unolajel yo’ntonic ta stsobic scotol ti c’usitic ja’ lequique; ja’ jech c’ot ta pasel ja’ to ti c’uxi tal Cristoe.

26 Ta ts’acal ti c’alal tale, ti viniquetique la jyich’ic coltael ta sventa xch’unolajel yo’ntonic ta sbi; xchi’uc ta sventa xch’unolajel yo’ntonic c’otic ta xnich’nab Riox, xchi’uc ta bats’imelel ti jech cuxul Cristoe ti jech la sc’opan ta va’ay lo’iletic jtotic, ti jech la jyal: Scotol ti c’usitic cha c’anbeic jtotic ta jbie, ja’ no’ox venta me leque, xchi’uc ti me a na’ojic ta xch’unolajel a vo’ntonic ti cha taique, ja’ jech cha vich’ic ac’bel.

27 Ja’ jech, quermanotac vu’un ti lec jc’anojoxuque, ¿me lajem xa o ti sq’uelubil tsatsalil ti jech muy ta vinajel Cristoe, xchi’uc ti jech chotiem xa ta sbats’i c’ob Rioxe, xchi’uc ti jech ta xalbe Riox ta sventa xc’uxul ta yo’nton xnich’nab viniquetic oy ta stojolale?.

28 Yu’un ti stuque la xch’un ti c’usi ja’ ta sventa mantale, xchi’uc ta xalbe scotolic boch’otic oy xch’unolajel yo’ntonic ta stojolale, xchi’uc ti boch’otic oy xch’unolajel yo’ntonic ta stojolale, ta xc’ot ta stojolalic scotol c’usitic ja’ lec, xchi’uc ja’ ta scoltaanan xnich’nab viniquetic, xchi’uc ja’ te oy o sbatel osil ta vinajel.

29 Jech ti va’ay c’usi la spase, ¿me lajem xa o ti sq’uelubil tsatsalile quermanotac ti vu’un lec jc’anojoxuque? ja’ jech ta xcal ti mo’oje, yu’un muyuc lajem yo’ntonic ta abtel ti abatetic ta sventa xnich’nab viniquetique.

30 Yu’un ja’ ta yu’un ti c’uxi xu’ spas yabtelic jech chac c’u cha’al ya’yejtac smantale, ti jech ta xaq’uic ta ilel ta boch’otic oy tsots xch’unolajel yo’ntonique, xchi’uc ti lec tuc’ xch’ulelic ta scotol ta chop coltaele.

31 Ti yabtelic ac’bilique ja’ ti ac’o yiq’uic tal ta sutesub o’ntonal viniquetique, xchi’uc ti ac’o xch’unique xchi’uc ti ac’o spasic ti abtelal bu la jyal jtotic ta stojolal xnich’nab viniquetique, xchi’uc ta smeltsanbe sbeic te ta stojolal xnich’nab viniquetic, xchi’uc la jyalbeic ya’yejtac Cristo ta vasotac bu st’ujojanoj Cajvaltic, ta sventa ti c’uxi xu’ xalic ta jamal ta sventae.

32 Ja’ jech x-elan ti ta x-abtejique, Riox la jyich’ic meltsanbel o sbeic ti c’uxi xu’ oyuc xch’unolajel yo’ntonic ta sventa Cristo ti scomelalic viniquetique, ta sventa ti c’uxi oyuc yabil ta yo’ntonic ti Ch’ul Espíritu jech chac c’u cha’al svu’ele, yu’un ja’ jech xu’ xc’ot ta pasel yu’un ti Riox c’usi yaloj ta stojolalic xnich’nab viniquetique.

33 Ti Cristoe jech yaloj: Ti me oy xch’unolajel a vo’ntonic ta jtojolale, oy atsatsalic ta spasel ti c’usiuc no’ox ta jc’ane.

34 Xchi’uc jech yaloj: Suteso a vo’ntonic a cotolic ti vo’xuc ta sti’iltac banamile, xchi’uc talanic ta jtojolal, xchi’uc ich’ic vo’ ta jbi, xchi’uc oyuc xch’unolajel a vo’ntonic ta jtojolal ti c’uxi xu’ xa vich’ic coltaele.

35 Jech tana quermanotac ti vu’un lec jc’anojoxuque, ti me lec c’ot ta bats’imelel ti c’usi cha calboxuque, ti ta slajebal c’ac’ale Riox ta xac’boxuc ta ilel ta stsatsal xchi’uc ta smuc’ul xojobal ti yu’un ja’ ta bats’imelele, ti me ja’ ta bats’imelele, ¿me lajem xa o ti sc’ac’alil ta xich’ aq’uel ta q’uelel sq’uelubil tsatsalile?

36 ¿Me lajem xa o yo’ntonic ti abatetic ta xac’sbaic ta ilel ta stojolalic xnich’nab viniquetique? ¿me ja’ la sujoxuc stuc ta stsatsal Ch’ul Espíritu? ¿me ja’ no’ox ta spas ti c’u sjalil ta xjalij li’ c’ac’ale, o me ja’ c’u sjalil ta xjalij li’ banamile, o me ja’ c’u sjalil ta xjalij ta banamil ti vinic boch’o ta scoltae?

37 Ja’ jech, ta xcal ti mo’oje, yu’un ja’ ta sventa xch’unolajel o’ntonal ti ta xich’ pasel sq’uelubil tsatsalile; xchi’uc ja’ ta sventa xch’unolajel o’ntonal ti ta xvinaj abatetic ti jech ch-abtejic ta sventaic viniquetique, ja’ jech, ti lajemuc xa o sc’oplal ti c’usitic va’aye, ¡abul sbaic ti xnich’nab viniquetique! yu’un ja’ ta sbolilic, ti muyuc xa stu scotole.

38 Yu’un jech chac c’u cha’al ya’yej Cristo, me junuc vinic xu’ chcol ti me muyuc xch’unolajel yo’nton ta sbie, ja’ jech, ti me lajem xa o ti c’usitic va’aye, ja’ jech chtoc ti xch’unolajel o’ntonale lajem xao, jech tsots xa me svocol o ti vinique, yu’un ja’ teoy jech chac c’u cha’al muyuc bu ac’bil coltael ya’eluc.

39 Ja’ jech xtoc quermanotac vu’un, ta jq’uel a telelic ta sventa c’usitic ja’ lec, yu’un ta xquil ti oy xch’unolajel a vo’ntonic ta Cristo ta sventa a lequilale, yu’un ti me muyuc xch’unolajel a vo’ntonic ta stojolale, mu xu’ xa vich’ic atael ta steclumal xch’ulna.

40 Xchi’uc xtoc quermanotac ti vu’un lec jc’anojoxuque, ta jc’an cha calboxuc ta sventa ti patubil o’ntonale, ¿c’uxi xu’ cha ta xch’unolajel a vo’nton ti me muyuc apatoj a vo’ntone?

41 Xchi’uc ¿c’usi ti cha malaique? ja’ jech cha calboxuc ti tsc’an oyuc spatubil a vo’ntonic ti yu’un ja’ ta sventa c’u x-elan ta stoj mulil xchi’uc ti c’uxi cha’cuxi Cristo, ti jech cha vich’ic cha’ cuxesel ta sventa sbatel osil cuxlejale, ti va’aye ja’ no’ox ta sventa xch’unolajel a vo’ntonic ta stojolal, jech chac c’u cha’al yaloje.

42 Yu’un ja’ jech, ti me jun vinic oy xch’unolajel yo’ntone, yu’un tsc’an ti ac’o spat yo’nton xtoque, yu’un ti me muyuc xch’unolajel o’ntonale mu c’usi xu’ jpat co’ntontic o.

43 Xchi’uc xtoc, li’ cha calboxuc, ti vinique mu xu’ oyuc xch’unolajel yo’nton xchi’uc tspat yo’nton ti me mu manchuuc xchi’uc ti me muyuc lec yo’ntone.

44 Ti me mo’oje, ti xch’unolajel yo’nton xchi’uc ti c’u x-elan tspat yo’ntone muyuc stu, yu’un muyuc boch’o xu’ x-ic’at yu’un Riox ti me mu manchuuque xchi’uc ti me mu lecuc yo’ntone, ti me jun vinic manchu xchi’uc me lec yo’ntone, xchi’uc ti me chal ta stsatsal Ch’ul Espíritu ti Jesús ja’ Cristoe, ta sc’an ti oyuc yutsil yo’ntone, yu’un ti me muyuc yutsil yo’ntone, muyuc stu, ja’ jech, ja’ tsc’an ti oyuc yutsil yo’ntone.

45 Ti utsil o’ntonale ta jta jvocoltic yu’un xchi’uc ta moton c’usi ta jpastic, xchi’uc muyuc boch’o ta sbaj, muyuc ta stoy sba, muyuc ta sa’ c’usi ja’ no’ox yu’un stuc, muc’ ta aniluc no’ox ta x-ilin, muyuc ta snop c’usi chopol, ma’uc lec cha’ay bolililetic, ja’ no’ox lec cha’ay ta sventa c’usi ja’ ta bats’imelel, ta scotol ta sta svocol, scotol ta xch’un, scotol ta smala, scotol ta xcuch yu’un.

46 Ja’ jech, quermanotac ti vu’un lec jc’anojoxuque, ti me muyuc yutsil a vo’ntonique muyuc a tuic, yu’un ti yutsil o’ntonale muyuc slajeb, ja’ jech, ac’o abaic ta utsil o’ntonal, ti yu’un ja’ muc’ ta scotol c’usitic oye, yu’un ti scotol c’usitic oye ta xlajanan.

47 Ti yutsil o’ntonale ja’ ti c’u x-elan ta jc’anan jbatic ta bats’imelel ta sventa Cristoe, jech te oy o ta sbatel osil, ti boch’o ja’ te oy o c’alalto ta sbatel osile, ta xil lequilal.

48 Xchi’uc ja’ jech xtoc, quermanotac ti vu’un lec jc’anojoxuque, c’anbeic jtotic ta scotol stsatsal a vo’ntonic ti ac’o xa nojic ta sc’anulajel o’ntonal ti ja’ la jyac’ ta scotolic boch’otic ja’ic yaj chan c’optac ta bats’imelel xnich’on ti ja’ Jesucristoe; xchi’uc ti c’uxi xa pasic ta xnich’on Rioxe, ti c’alal baq’uin ta xac’ sba ta ilele, ja’ucutitucuc jech chac c’u cha’al stuque, yu’un ta xquiltic ti c’u x-elan stuque, ac’o oyuc ti spatubil co’ntontique; xchi’uc ac’o sacubtasbiluticuc jech chac c’u cha’al sac stuque. Jechuc.