1 Vun sts’ibaoj jtot Mormón, ts’ibabil ta jventa vu’un, Moroniun, la sts’iba ta tsacal jutuc c’alal la quich’ ac’bel cabtel ta ajvalilal; ja’ jech x-elan ti la sts’ibae, jech ta xal:

2 Jnich’on Moroni ti tu jlec jc’anojote, tu xcuxet co’nton ti jech te oy ta a tojolal ti Cajvaltic Jesucristoe, xchi’uc ti jech la jyic’ot ta yabtele xchi’uc ti ta xch’ul abtele.

3 Jech ti vu’uene te ta xcalot o ti c’alal ta jc’opan Rioxe, jech ech’em ta jc’anbe Riox ti ja’ jtotic ta sbi xch’ul nich’on, Jesús, jech ta sbats’i slequil yo’nton xchi’uc ta slequilal ti ac’o sq’uelot o ti jech oyuc xch’unolajel a vo’nton ta sbi c’alalto ta slajebal c’ac’ale.

4 Ja’ jech tana jnich’on vu’un, ta jc’opanot ta sventa ti c’usi tu j-ech’em ta xcat co’nton yu’une, yu’un ta xcat co’nton yu’un ti me jech chtal sa’ c’op ta atojolalique.

5 Yu’un jech jna’oj ta bats’imelel, yu’un oy c’op avu’nic ta sventa ti ta xich’ vo’ a vic’tal xnich’navique.

6 Jnich’on vu’un, ta jc’an ti ac’o xa abtej ta c’unc’un ti jech ac’o xa lajes o ta atojolalic ti c’usi tu jchopole, yu’un ja’ ta sventa ti la jts’iba li’ cartae.

7 Yu’un ti c’alal la jca’ay ti c’usitic va’ay ta a stojolalique, ta anil la jac’be Cajvaltic ta sventa ti c’usi va’aye. Ti ya’yej Cajvaltique tal ta jtojolal ta stsatsal Ch’ul Espíritu, jech la jyal:

8 A’ybo ti ya’yejtac Cristoe, ti ja’ jpojvanej avu’une, ti ja’ a Vajval xchi’uc ti ja’ a Rioxe, ja’ jech, ti li tal ta banamile, ma’uc tal quic’ ta sutesub o’ntonal ti boch’otic lec tuc’ yo’ntonique, yu’un ja’ tal quic’ ti jmulaviletique, yu’un ti boch’otic tsotsique muyuc chtun yu’nic jpoxtavanej, yu’un ja’ chtun yu’nic ti boch’otic ipique, ja’ jech ti vic’tal ololetique lec tsotsic, yu’un mu sna’ic spasic mulil, ja’ jech ti c’u x-elan la jyich’ ac’bel vocolil Adane ja’ te la jyich’ic loq’uesbel ta jtojolal, ta sventa ti c’uxi muyucuc stsatsal ta stojolalique, ti mantalil sventa circuncisione ta xa chlaj sc’oplal ta jtojolal.

9 Ja’ jech x-elan ti la jyac’bun ca’ay Ch’ul Espíritu ya’yej Rioxe, ja’ jech, jnich’on vu’un ti tu jlec’ jc’anojote, jna’oj ti ja’ no’ox ta xich’ labanel ta sat Riox ti me la jyich’ic vo’ ti vic’tal ololetique.

10 Ja’ jech, ta xcalbot ti ja’uc xa chanubtas ta sventa sutesub o’ntonal xchi’uc ta ich’ vo’ ti boch’otic ta spasic mulile, jech, chanubtaso totiletic ti tsc’an ac’o sutes yo’ntonique xchi’uc ti ta sc’an ta xich’ic vo’e, xchi’uc ti ac’o sbic’tajes sbaic jech chac c’u cha’al sbic’tal xnich’nabique.

11 Yu’un ti abic’tal xnich’nabique mu persauc ta sutes yo’ntonic, xchi’uc mu persauc ta xich’ic vo’, ja’ jech, ti ich’ vo’e ja’ sventa sutesub o’ntonal ta sventa c’uxi c’otuc ta pasel ti mantaletic ta sventa ta xich’ ch’ayel mulile.

12 Jech ti bic’tal ololetique ja’ te xchi’uquic ti Cristoe, ja’ o no’ox ti c’alal pas banamile; yu’un ti me mu jechuque, ti Rioxe, ja’ Riox muyuc ts’acal, xchi’uc ja’ jun Riox ti mu sna’ c’usi spas xchi’uc ti mu sc’ananan scotol quirisianoetic, yu’un, ¡jayib no’ox ti ololetic chamenic muyuc yich’ojic vo’e!

13 Yu’nuc mu stac’uc xcolic ti bic’tal ololetic ti jech muyuc ta xich’ic vo’e, ti jechuque ja’ te batic ta c’atinvac bu muyuc slajeb ti jechuque.

14 Ja’ jech cha calbot, ti boch’o ta snop ti yu’un persa ta xich’ vo’ ti bic’tal ololetique, ja’ xa me teoy te ta chopolil xchi’uc ta scarenail bolililetic, yu’un muyuc xch’unolajel yo’nton, me ja’uc spatubil yo’nton, xchi’uc yutsil yo’nton, ja’ jech, ti me cham c’alal ja’o jech ta snope, ta xbat ta c’atinvac.

15 Yu’un tsots ti bolilil ti c’alal me ta jnoptic ti Riox ta scolta jun olol ta sventa ich’um vo’ale, ti c’alal jech stac’ xcham ta yan c’alal muyuc yich’oj vo’e.

16 ¡Abul sbaic ti boch’otic ta soquesbeic sbe Cajvaltic jech chac c’u cha’al va’aye,! yu’un ta xchamic, ja’ xa no’ox ti me la sutes yo’ntonique. Ja’ jech, tsots cha jc’opanoxuc, yu’un oy jtsatsal yu’un Riox, xchi’uc mu xi xi’ yu’un ti c’usi stac’ spas vinique, yu’un ti sc’anulajel co’nton ta bats’imelele ta sloq’ues scotol xi’el.

17 Xchi’uc nojemuc chca’ay ta c’uxul o’ntonal, ti ja’ lequil o’ntonal ta sbatel osile, ja’’ jech, scotolic ti ololetique co’ol sbaic ta jtojolal, ja’ jech, ta jc’ananan ti bic’tal ololetic ta slequil sc’anulajel co’ntone, xchi’uc co’ol sbaic scotolic xchi’uc ja’ te oyic te bu oy coltael.

18 Yu’un jna’oj ti Rioxe ma’uc Riox ti ma’uc ts’acale, xchi’uc me ja’ mu sna’ buoy, yu’un ja’ mu sna’ bu xbat ta sbatel osil ta sbatel osil.

19 Ti bic’tal ololetique mu stac’ sutes yo’ntonic; yu’un ti me mu jechuque, ja’ tsatsal bolilil ti me jech muyuc ta xcaltic slequil lequilal Rioxe, yu’un scotolic te xchi’uquic ta sventa slequilal.

20 Ti boch’otic ta xal ta persa ta xich’ vo’ ti ololetic xchi’uc ti me muyuc ta xac’be ti slequilal Cristoe xchi’uc me mu sc’an ti c’u x-elan coltael xchi’uc ti stsatsal c’u x-elan coltaele.

21 ¡Abul sba ti va’aye, yu’un xa me ja’ te oy o ta lajel, ta xibal sba c’atinvac muyuc slajeb! muyuc ta xi xi’ ta xcal, yu’un Riox la spasun ta mantal. A’yic ti li’ lo’iletique xchi’uc ch’unic, ti me mo’oje ta me xalic ta jamal ta stojolal Cristo ta acontraic.

22 Yu’un ja’ jech ti bic’tal ololetique, ja’ te ch’iemic xchi’uquic Cristo, xchi’uc xtoc scotolic ti boch’otic muyuc yich’ojic mantale, yu’un ti stsatsal coltaele ja’ te ta xtal ta stojolalic boch’otic muyuc yich’ojic mantal; ja’ jech ti boch’o muyuc yich’oj aq’uel ta ch’ayele, o boch’o muyuc ta xich’ aq’uel ta ch’ayele, mu stac’ sutes yo’nton, xchi’uc xtoc ti ich’ vo’e muyuc stu yu’nic.

23 Ti va’aye ja’ laval sba ta sat Riox, ti c’alal me muyuc xich’ alel ti slequilal Cristoe xchi’uc ti stsatsal Xch’ul Espíritue, yu’un ja’ ta spat yo’ntonic yu’un ti c’usitic abtelal mu cuxulicuque.

24 Ja’ jech jnich’on vu’un, ti va’aye mu jechuc ta pasel, yu’un ti sutesub o’ntonale ja’ ta sventaic ti boch’otic ta xich’ic aq’uel ta ch’ayele xchi’uc ti ta xich’ic ac’bel vocolil ta sventa yu’un muyuc la xch’unic mantale.

25 Ti c’u x-elan ba’yuc svinajeb ti sutesub o’ntonale, ja’ ti ich’ vo’e, ti ich’um vo’ale ja’ te ta xtal ta xch’unolajel co’ntontic ta spasel mantaletic; ti me la jch’untic ti mantaletique ja’ ta xic’tal ti coltael sventa muliletique.

26 Ti coltael sventa muliletique ja’ ta xic’tal manchuilil xchi’uc slequil o’ntonal xchi’uc ja’ ta sventa manchuilil xchi’uc ta sventa lequil o’ntonal ta xtal svu’lanutic ti Ch’ul Espíritue, ti ja’ ta spat co’ntontic nojem ta patub o’ntonal xchi’uc ti ta xc’anvan leque, ti jech ta xc’anvan o ta c’unc’un c’alal ta jc’opantic Rioxe, ja’to c’alal me tal ti slajebal c’ac’al ti c’alal scotol ch’ul viniquetic ta xchi’nic ta naclej Rioxe.

27 Ja’ jech, jnich’on vu’un, ta jts’ibabot yanvelta xtoc, ja’ no’ox venta ti me mu li loc’ ta ora ta scontrainel jlamanitaetique. Ja’ jech, ti stoyub bailic li’ jteclum, ti ja’ steclumal nefitaetique, ja’ ta sventa ti ta xich’ic vuq’uesel me muyuc sutes yo’ntonique.

28 C’opano Riox ta stojolalic, jnich’on vu’un, ta sventa ti c’uxi ac’o taluc ta stojolalic ti sutesub o’ntonale, xchi’uc ja’ jech xtoc, ti vu’une ta xal co’nton yu’nic ti me jech loc’ xa ta stojolalic ti Espíritue, yu’un ti q’ue smuc’ul li’ banamile ta sc’an ta svuq’uesic ti scotol tsatsalil xchi’uc ti scotol vu’elil ti ja’ te talem ta stojolal Rioxe; yu’un mu jamaluc ta xalic ti Ch’ul Espíritue.

29 Ta ts’acal ti muyuc la sc’anic ti c’usi muc’ no’ox na’bile, jnich’on vu’un, xu’ ta xchamic ta ora, ti c’uxi c’otuc ta pasel ti c’usi la jyalbeic smelolal lequil viniquetique, xchi’uc jech chac c’u cha’al ya’yejtac stuc Jcoltavanej cu’untique.

30 Ta xibat jnich’on vu’un, ja’to me la jc’opanot ta cartae, o ja’ to me quilot yanveltae. Jechuc.