1 Oh met ngehi, Moronai, ntingih ekei kaweid kan en ei pahpa Mormon, me e koasoia duwen pwoson, koapworopwor, oh limpoak unsek; pwe ni mwohmw wet me e koasoiong aramas akan, ni e padahkih irail nan sinokoke me irail wiahda ong wasahn kaudok.

2 Oh met, ngehi, Mormon, koasoieng kumwail, riei kesempwal oko; oh iei pwehki kalahngan en Koht Sahm, oh atail Kaun Sises Krais, oh sapwellime kupwur sarawi, pwehki kisakis en sapwellime malipipil ong ie, me elehda ei kak mweimweida en koasoi ong kumwail ahnsou wet.

3 Eri, I pahn koasoi ong kumwail me towe mwomwohdiso, me kin wie ideidawehn Krais nan popohl, oh me alehdier koapworopwor me itar me kumwail kak pidekihlong nan wasahn komoal en Kauno, sang ahnsou wet kohla lao lel amwail pahn komoaldi reh nanleng.

4 Oh met riei ko, I tenekih mepwukat ong kumwail pwehki amwail kin ieiang aramas akan nan popohl.

5 Pwe I taman mahsen en Koht me ketin mahsanih sang ni arail doadoahk kan kumwail pahn ese irail; pwe ma arail doadoahk kan mwahu, eri re pahn pil mwahu.

6 Pwe kilang, Koht ketin mahsanih me aramas suwed men sohte kak wia me mwahu; pwe ma e pahn kihla kisakis ehu, de kapakap ong Koht ma e sohte pahn wia ni ineng mehlel e sohte pahn mie katepe.

7 Pwe kilang, e sohte pahn wadiki mour pwung ong ih.

8 Pwe kilang, ma aramas men loalsuwed ahpw kihla kisakis ehu, e pahn wia ni eh sohte inangih; eri e pahn wadiki me duwehte ma e koledihte kisakiso; eri e pahn wadiki suwed mwohn Koht.

9 Oh pil duwehte aramas men pahn wadiki suwed, ma e pahn kapakap oh sohte inangih mehlel sang nan mohngiongi; ei, oh e sohte pahn mie katepe ong ih, pwe Koht sohte kin alehda soahng wet.

10 Eri, aramas suwed me sohte kak wia me mwahu; de pil kihla kisakis mwahu.

11 Pwe kilang, utuhnpihl sakanakan sohte kak kihdo pihl mwahu; de pil utuhnpihl mwahu sohte kak kihdo pihl sakanakan; eri, aramas me kin papah tepilo sohte kak idawehn Krais; oh ma e pahn idawehn Krais e sohte pahn kak papah tepilo.

12 Eri, soang koaros me mwahu kohsang rehn Koht; oh me suwed kin kohsang tepilo; pwe tepilo iei imwintihti ong Koht, oh kin wie pepeiong ih ahnsou koaros, oh lukluke oh pahpahne aramas en wia dihp, oh wia me suwed ahnsou koaros.

13 Ahpw kilang, me kin sang rehn Koht kin lukluke oh pahpahne aramas en wia me mwahu ahnsou koaros; eri, soang koaros me kin lukluke oh pahpahne en wia me mwahu, oh poakehng Koht, oh papah ih, iei kamarain en Koht.

14 Eri, kanaiehng mwahu, riei kesempwal oko, pwe kumwail dehr tenekih oh medewehki me mehkot suwed kohsang rehn Koht, de medewehki mehkot mwahu oh sang rehn Koht kohsang rehn tepilo.

15 Pwe kilang, riei ko, e mweimweiong kumwail en tenekih, pwe kumwail en ese mwahu sang me suwed; oh wiepen teneko e mengei, pwe kumwail en kak ese sang ni marain unsek, duwehte marain en rahn sang rotorot en pwohn.

16 Pwe kilang, Ngehn en Krais kohiengehr rehn aramas koaros, pwe en kak ese mwahu sang me suwed; eri, I kasalehiong kumwail wiepen teneko; pwe soahng koaros me kin lukluke en wia mwahu, oh kangonge en kamehlele Krais, e kohsang ni manaman oh kisakis en Krais; eri kumwail en ese sang ni marain unsek me e sang rehn Koht.

17 Ahpw soahng kan me kin kangongehki aramas akan en wia me suwed, oh sohte kamehlele Krais, oh kahmahmkihla ih, oh sohte papah Koht, kumwail en ese sang ni marain unsek me e sang rehn tepilo; pwe iei soangen wiepe wet me tepilo kin doadoahk, pwe sohte aramas me e kin kangongehki en wia me mwahu, soh, sohte emen; pil iangahki nah tohnleng kan; oh pil irail akan me mih pahn eh manaman.

18 Oh met, riei ko, pwehki amwail ese maraino me kumwail pahn kadeingki, maraino me iei marain en Krais, kumwail kanaiehng pwe kumwail de kadeik sapwung; pwe kadeikohte me kumwail pahn kadeingki ih me pahn pil pakadeingki.

19 Eri, I peki rehmwail, riei ko, me kumwail en loaloapwoatieng rapahki nan marain en Krais pwe kumwail en kak esehla mwahu sang me suwed; oh ma kumwail pahn koledi soahng me mwahu koaros, oh sohte kesehla, kumwail udahn pahn wia seri en Krais.

20 Oh met, riei ko, ia mwomwen amwail pahn kak koledi soahng koaros me mwahu?

21 Oh met I pahn koasoi pwosono, me I nda me I pahn koasoia; oh I pahn ndaiong kumwail wiepen amwail pahn koledi soahng koaros me mwahu.

22 Pwe kilang, Koht ketin mwahngih mehkoaros, pwehki iei ih me poatoapoat kohkohlahte, kilang, e ketin kadaredo tohnleng kan pwe re en papah aramas akan, en kasalehda duwen ketidohn Krais; oh sang Krais mehkot mwahu koaros pahn kohdo.

23 Oh Koht pil ketin mahsanihongehr soukohp akan, sang pein dauwase, me Krais pahn ketido.

24 Oh kilang, mie soangen wiepe tohto me e ketin kasalehiong soang kan rehn aramas akan, me mwahu; oh soahng kaoros me mwahu kohdo sang rehn Krais; ma soh aramas pwupwilahr, oh sohte mehkot mwahu kak kohsang irail.

25 Eri, sang ni doadoahk en tohnleng kan, oh sang ni mahsen kaoros me ketin pwilido sang nan dauwasen Koht, aramas akan tepida mwekidki arail pwoson Krais; oh met sang ni pwoson, irail koledier soahng koaros me mwahu; oh met iei lao lel ketidohn Krais.

26 Oh mwurin eh ketido, aramas akan pil komourla sang ni ar pwoson mwarehu; oh sang ni pwoson, irail wiahla sapwellimen Koht pwutak akan. Oh ni mehlel nin duwen Krais eh ketin ieias, e ketin mahsaniher mahsen pwukat ong aht pahpa kahlapoko, ketihtihki: Ma kumwail pahn peki rehn Sahmo ni mwarei sohte lipilip mehkot me mwahu, sang ni pwoson oh kamkamehlel me kumwail pahn alehdi, kilang, e pahn udahn pweida ong kumwil.

27 Eri, riei kesempwal oko, dah, manaman kapwuriamwei kan uhdier pwehki Krais eh ketidalahr nanleng, oh ketidier ni palimaun en Koht, pwe en alehdi sang rehn Sahmwo sapwellime pwuhng en kupwur kalahngan me e ketin kupwurehki aramas akan?

28 Pwe e ketin kapwaiadahr kaimwseklahn kosonnedo, oh e ketin sapwellimankilahr koaros me pwoson ih; oh irail kan me pwoson ih pahn koledi soahng koaros me mwahu; eri e ketin weliandi aramas akan; oh e ketiket nanleng kohkohlahte.

29 Oh pwehki e ketin wiahier met, riei kesempwal oko, manaman kapwuriamwei kan uhdier? Kilang I ndaiong kumwail, Soh; pil duwehte tohnleng kan sohte uhdisang pwarohng aramas akan.

30 Pwe kilang, re mih pahn eh manaman, ong papah nin duwen sapwellime mahsen me e pahn ketin pahngok, kaskasalehiong irail ong irail kan me pwoson kehlail oh ahneki madamadau kehlail nan mour en Koht.

31 Oh pwukoahn ohpis en arail doadoahk iei en ekerehng aramas akan re en koluhla, oh kapwaiada inou kan oh wia doadoahk en inou kan en Sahmo, me e ketin wiahiongehr aramas akan, en kaunopada ahlo rehn aramas akan, sang ni kalikalohngki mahsen en Krais ong sapwellimen Kauno aramas pilipilda kan, pwe re en kak kadehdehdi ih.

32 Oh sang ni wiewia pwukat, Kauno Koht pahn ketin kaunopada ahl me aramas teikan pahn kak pwoson Krais, pwe en kak mie dowen Ngehn Sarawi nan mohngiongarail kan, nin duwen sapwellime manaman; oh ni wiepe wet me Sahmo pahn ketikihdo, inou kan me e ketin wiahiongehr aramas akan.

33 Oh Krais ketin mahsanih: Ma kumwail pahn pwoson ie kumwail pahn ahneki manaman en wia soahng koaros me kesempwal ong ie.

34 Oh e ketin mahsanih: Koluhla, kumwail koaros me mih nan sampah, oh kohdo rehi, oh papidaisla ni mwarei, oh pwoson ie, pwe kumwail en komourla.

35 Oh met, riei kesempwal oko, ma iei duwehn met, me mepwukat me I ahpwtehn koasoiahiong kumwail mehlel, oh Koht pahn kasalehiong kumwil, sang ni manaman oh lingan lap ni imwin rahno, me re mehlel, oh ma re mehlel, eri dah, rahn en manaman kapwuriamwei uhdier?

36 De dah, tohnleng kan uhdisangehr pwarohng aramas akan? De e ketin kauhdihsangehr manaman en Ngehn Sarawi rehrail? De e pahn ketin wia, erein ahnsou pahn mimiehte, de sampah pahn mimiehte, de aramastemen pohn sampah en komourla?

37 Kilang I ndaiong kumwail, Soh; pwe manaman kapwuriamwei kan kin kohdo sang ni pwoson; oh iei sang ni pwoson me tohnleng kan kin pwarada oh kalohkehng aramas akan; eri, ma mepwukat uhdier meid suwediong aramas akan, pwehki met sang ni peikasal, oh soahng koaros sohte katepe.

38 Pwe sohte aramas men kak komourla, nin duwen mahsen kan en Krais, ihte ma pwoson mwarehu; eri, ma mepwukat uhdier, eri pwoson pil uhdier; oh aramas mihmi nan mour apwal, pwe e duwehte me sohte komourparail wiawi.

39 Ahpw kilang, riei kesempwal oko, medewe mehkot mwahu ong kumwail, pwe I medewe me kumwail pwoson Krais pwehki amwail mpai; pwe ma kumwail sohte pwoson ih eri kumwail sohte kak iang wadawadiong rehn aramas akan en sapwellime mwomwohdiso.

40 Oh pil, riei kesempwal oko, I men koasoiaiong kumwail duwen koapworopwor. Ia mwomwen amwail pahn kak alehdi pwoson, ma kumwail sohte ahneki koapworopwor?

41 Oh dahme kumwail pahn koapworopworki? Kilang I ndaiong kumwail me kumwail pahn koapworopworki tom uwen Krais oh manaman en sapwellime iasadao, en alehdi mour soutuk, oh met pwehki amwail pwoson ih nin duwen inouo.

42 Eri, ma aramas men ahneki pwoson e udahn pahn anahne koapworopwor; pwe ma sohte pwoson e sohte kak en mie koapworopwor.

43 Oh pil, kilang I ndaiong kumwail me ke sohte kak ahneki pwoson oh koapworopwor, ma ke sohte mpai, oh mohngiong karakarahk.

44 Ma soh, eh pwoson oh koapworopworo sohte katepe, pwe Koht sohte pahn kupwure, ihte me mpai oh mohngiong karakarahk; oh ma aramas men pahn mpai oh mohngiong karakarahk, oh wehkada sang ni manaman en Ngehn Sarawi me Sises iei Krais, e pahn anahne ahneki limpoak unsek; pwe ma e sohte ahneki limpoak unsek e sohte mehkot; eri e pahn anahne ahneki limpoak unsek.

45 Oh limpoak unsek kin kanengamah, oh kin kadek, oh sohte kin noarok, oh sohte kin aklemei, sohte kin mehwo, sohte kin mwadang lingeringer, e sohte kin medewe me suwed, oh sohte kin perenikihda me suwed ahpw kin perenikite me mehlelo, kin alehda mehkoaros, kamehlele mehkoaros, koapworopworiki mehkoaros, oh kanengamahiong mehkoaros.

46 Eri, riei kesempwal oko, ma kumwail sohte ahneki limpoak unsek, kumwail sohte mehkot, pwe limpoak unsek me poatoapoat sohte imwi. Eri, koledi limpoak unsek, me keieu lapalapasang koaros, pwe mehkoaros mie imwi—

47 Ahpw limpoak unsek iei limpoak mwakelekel en Krais, oh e poatoapoat sohte imwi; oh mehmen me pahn dierek e ahneki ni imwin rahno, e pahn mwahu ong ih.

48 Eri, riei kesempwal oko, kapakapiong Sahmo sang nan mohngiong kehlail unsek, pwe kumwail en kak audaudikihla limpoak wet, me e ketikihongehr irail koaros me kin idawehn ni mehlel sapwellime Iehros, Sises Krais; pwe kumwail en kak wiahla sapwellimen Koht; pwe ahnsou me kumwail pahn pwarada kumwail pahn duwehte ih, pwe kitail pahn kilang ih ni udahn mwomwe; pwe kitail en ahneki koapworopwor wet; pwe kitail en mwakelekela duwehte ih me ketin mwakelekel. Ahmen.