1 E dua na ivola i Momani na tamaqu ka vola vei au, ko Moronai, ni’u sa qai kacivi oti ga ki na cakacaka vakalotu. A vaka mai oqo na nona ivola vei au:

2 I Moronai na luvequ lomani, au sa marau vakalevu dina ni sa nanumi iko na nomu Turaga ko Jisu Karisito, ka sa kacivi iko ki na nona cakacaka vakalotu, kei na nona cakacaka tabu.

3 Au sa daunanumi iko wasoma ena noqu masu vua na Kalou na Tamada ena yaca ni Luvena Tabu ko Jisu, me taqomaki iko ki na ivakataotioti ena vuku ni vakabauta ena yacana, ena nona vinaka tawayalani kei na loloma soli wale.

4 Ia na luvequ, au na tukuna mada vei iko na ka au rarawataka tiko; raica au sa rarawa dina vakalevu ni sa tubu tiko na veileti ena kemudou maliwa.

5 Ni kevaka e dina na ka au sa rogoca, dou sa veiletitaka tiko na nodra papitaiso na gone lalai.

6 Ia oqo, na luvequ, au gadreva mo cakacaka vagumatua me kau tani kina na cala levu oqo; ni sai koya oqori na inaki au sa vola kina na ivola oqo.

7 Ni ena gauna ga au rogoca kina na veika oqo dou sa veiletitaka, au a taroga sara vua na Turaga. A sa lako ma vei au na vosa ni Turaga ena kaukauwa ni Yalo Tabu ka kaya:

8 Vakarorogo ki na vosa i Karisito na nomu Dauveivueti, na nomu Turaga ka nomu Kalou. Raica, au sa sega ni lako mai ki vuravura me’u kacivi ira sa ivalavala dodonu, ko ira ga na ivalavala ca me ra veivutuni; sa sega ni yaga na vuniwai vei ira sa bula vinaka, vei ira ga sa tauvimate; ia era sa savasava ko ira na gone lalai ni ra sa sega ni rawa ni ivalavala ca; ia sa sega ni tau vei ira na cudru vei Atama ena vukuqu, ka ra sa galala mai kina; ka sa mudu ena vukuqu na lawa ni veicilivi.

9 Raica sa vakaoqo na vosa ni Kalou sa vakatakila vei au na Yalo Tabu; o koya oqo na luvequ lomani, au kila ni sa ka ni veivakaisini bibi sara vua na Kalou ni dou sa papitaisotaki ira na gone lalai.

10 Raica au sa kaya vei iko, mo vakatavuvulitaka na veika oqo—na veivutuni kei na papitaiso ki vei ira era sa rawa ni saumi taro ka kitaka na ivalavala ca; io, mo vakatavulici ira na itubutubu ni sa dodonu me ra veivutuni ka papitaiso, ka vakayalomalumalumutaki ira me vakataki ira na luvedra lalai, ka ra na qai vakabulai vata kei ira na luvedra lalai.

11 Ka sa sega ni gadrevi me ra veivutuni se papitaiso ko ira na luvedra lalai. Raica sa yaga ga na papitaiso vei ira sa veivutuni me muri kina na ivunau me bokoci kina na ivalavala ca.

12 Ia era sa bula vei Karisito ko ira na gone lalai mai na tauyavutaki ni vuravura; kevaka e sega, sa Kalou dau veitovaki na noda Kalou, ka sa Kalou dauveivukiyaki ka dau vakarorogo ki na tamata; ni ra sa lewe vica mada na gone lalai era sa mate ka ra se sega ni papitaiso!

13 Ia kevaka sa sega ni rawa me ra vakabulai na gone lalai kevaka era sega ni papitaiso, ke ra sa lako yani ko ira oqo ki na dua na eli tawacava.

14 Raica au sa kaya vei iko, ko koya sa kaya ni sa kilikili me ra papitaiso na gone lalai, sa tiko ena loma ni ka gaga sara kei na ivesu ni caka cala; ni sa sega vua na vakabauta, na inuinui kei na loloma uasivi; ia kevaka sa mate ni sa tiko e lomana na vakasama oqori, ena lako sobu vakaidina ki eli.

15 Ni sa caka ca rerevaki me dua e nanuma ni na vakabula na Kalou e dua na gone lailai ena vuku ni papitaiso, ka rusa o koya ka dua baleta ni a sega ni papitaiso.

16 Ena ca ko ira sa vukica vakaoqo na sala ni Turaga, ni ra na rusa kevaka era sa sega ni veivutuni. Raica au sa vosa doudou ni sa tu vei au na kaukauwa mai vua na Kalou; ka’u sa sega ni rerevaka na ka e rawa ni cakava na tamata, ni sa kauta tani na rere na loloma e taucoko.

17 Ia au sa vakasinaiti ena loloma uasivi sai koya na loloma tawa vakaiyalayala; o koya era sa tautauvata kecega kina vei au ko ira na gone; ka’u sa lomani ira na gone lalai ena loloma e taucoko; ia era sa tautauvata kecega ka ra sa vakaivotavota kece ena veivakabulai.

18 Ni’u kila ni sa sega ni Kalou dau veitovaki na Kalou ka sega ni ka bula dauveivukiyaki; ia sa sega ni dauveivukiyaki tiko ga mai na gauna tawamudu ki na gauna tawamudu.

19 Era sa sega ni rawa ni veivutuni ko ira na gone lalai; o koya sa rui caka ca vakarerevaki kina me da vakuwai ira mai na nona loloma cecere savasava na Kalou, ni ra sa bula kecega vua ena vuku ni nona loloma cecere.

20 Ia ko koya sa kaya ni sa kilikili me ra papitaiso na gone lalai, sa cakitaka na yalo loloma i Karisito ka okata me ka wale na nona veisorovaki kei na kaukauwa ni nona veisereki.

21 Ia ena ca vei ira sa vakaoqo ni sa rawa ni ra sotava na mate, ko eli kei na vakararawataki tawacava. Au sa vosataka vakadoudou sara; ni sa vakaroti au kina na Kalou. Mo rogoca na veivosa oqo ka muria, kevaka e sega, era na beitaki iko ena itikotiko ni veilewai i Karisito.

22 Raica era sa bula vei Karisito ko ira kecega na gone lalai, kei ira kece tale ga sa sega vei ira na lewa. Ni sa takavi ira kecega sa sega vei ira na lawa na kaukauwa ni veisereki; sa sega kina ni rawa ni veivutuni o koya sa sega ni cudruvi, se o koya sa sega ni lewai me cudruvi; ka sa sega ni dua na yaga ni papitaiso vei ira sa vakaoqo—

23 Ia sa ka vakalialia ena mata ni Kalou ka cakitaka na yalo loloma i Karisito kei na kaukauwa ni nona Yalo Tabu, ka sa vakararavi ki na veicakacaka mate.

24 Raica, i na luvequ, sa sega ni dodonu me vakayacori na ka oqo; ni sa yaga ga na veivutuni vei ira sa lewai me cudruvi ka ra sa voroka na lawa.

25 Ka sa ivua taumada ni veivutuni na papitaiso; ka sa yaco na papitaiso ena vuku ni vakabauta me vakayacori kina na ivakaro; ka sa kauta mai na vakabokoci ni ivalavala ca na vakayacori ni ivakaro;

26 Ka sa kauta mai na yalomalua kei na yalo lokumi, na vakabokoci ni ivalavala ca; ia ena vuku ni yalomalua kei na yalo lokomi, sa veisiko mai kina na Yalo Tabu, na Dauveivakacegui a sa veivakasinaiti ena inuinui kei na loloma e taucoko, na loloma ena tiko ga kei keda kevaka eda sa gumatua ena masu me yacova na ivakataotioti, na gauna era na tiko vata kina kei na Kalou ko ira kecega na yalododonu.

27 Raica, i na luvequ, au na volavola tale yani vei iko kevaka e berabera na neimami vala kei ira na Leimanaiti. Raica, na viavialevu ni matanitu oqo se ko ira na Nifaiti, kevaka era na sega ni veivutuni, era na vakarusai.

28 Mo masulaki ira na luvequ, me na yaco vei ira na veivutuni. Ia raica, au ririko de sa mudu na nona dau vakauqeti ira tiko na Yalo; ka ra sa beca na kaukauwa kei na lewa mai vua na Kalou; ka cakitaka na Yalo Tabu, ena iwase ni vanua oqo.

29 Ia i na luvequ, ni ra sa kila tu ka ra qai beca, era na mate vakaidina ka na vakayacori kina na parofisai era a vosataka na parofita kei na nona vosa sara ga na noda iVakabula.

30 Ia me yacova ni’u qai volavola tale yani vei iko, se ni daru sa sota tale, sa moce mada na luvequ. Emeni.