1 Baʼaray bbabyor rokʼ e chitamag i Mormon, ni ke yoloey nge yib ngog, gag Moroni; ma ni yoloey nge yib ngog u buchʼuw nga tomuren ni kan piningeg ni nggu pigpig. Ere baʼaray rogon ni yol ngog, nibe gaʼar:

2 Moroni, ni fakag nib tʼuf rog, ka rug falfalaenʼ nib gel ni fare Somoel rom i Yesus Kristus e kam paer ni gabay u waenʼ, ma ke piningem ko machib rokʼ, nge muruwel rokʼ nib thothup.

3 Gabay u wunʼug ni gubin e ngiyalʼ u lan e pi meybil rog, gube meybil ni gubin e ngiyalʼ ngakʼ Got ni fachaʼ ni Chitamangiy u fithingan fare Tir rokʼ nib Thothup, i Yesus, ni nge yog nu dakean e yulʼyulʼ nge murnguy rokʼ, me tayem u fithikʼ e athamgil ko mich rom nga fithingan nge madaʼ ko tomur.

4 Ere chiney, o fakag, e nggu weliy ngom morngaʼagen e tin nibe kireb anʼug ngay nib gel; ya be kireb anʼug ngay ni nge sum e togopluw nga fithikʼmed.

5 Ya, faʼanra riyulʼ e tin ni kug nang, me ere ke sum e togopluw nga fithikʼmed ni morngaʼagen e tawfe ko pi bitir romed nib achichig.

6 Ere chiney, o fakag, gu baʼadag ni ngam muruwel nib gel, ni nge yog ni chuw e re oloboch ney ni ubchiyaʼ u fithikʼmed; ya, ya arayfan ni kug yoloey e re babyor ney.

7 Ya ku chingiyalʼ nem u tomuren ni kug nang e pinnʼey rom mug meybil ngakʼ Somoel nggu fithʼ u morngaʼagen. Ere thin rokʼ Somoel ni yib ngog u gelingin fare Kan ni Thothup, e gaʼar:

8 Mmotoyil ko thin rokʼ Kristus, niʼir e Tabiyul rom, ma Somoel rom nge Got rom. Musap, Kugub nga fayleng ni gathi nggu pining e piʼin nib matʼaw ya piʼin tadenen ni nge kalngaenʼ; piʼin nib poloʼ e de tʼuf e togta roraed, ya piʼin nib mʼar; ere, bitir nib achichig e yaed ba poloʼ, ya dabiyog ni ngar rinʼed e denen; ere fare gechig rokʼ Adam e ni chuweg roraed ni bachag, ma dakuriy gelingin nga dakeanraed; ma fare motochiyel ko madʼad e ke mʼay ni bachag.

9 Ere aray rogon ni dag fare Kan ni Thothup e thin rokʼ Got ngog; ere, fakag nib tʼuf rog, gumnang ni banʼen nib kuʼ u mit Got ni ngam tawfe niged e pi bitir nib achichig.

10 Musap gube yoeg ngom ni baʼaray e nʼen ni ngam machib nag—kalngaenʼ nge tawfe ngakʼ e piʼin nib bung rogon i pufthin nagraed nge ma rayog ni ngar denen gaed; arragon, mu fil ngakʼ e gallabthir ni thingar kalgaed ngaenʼraed min tawfe nagraed, mar sobutʼ niged yaed ni boed e piʼin nib bitir nib achichig, ma rayog ni ngar thap gaed ni yaed e pi bitir roraed nib achichig.

11 Ere pi bitir roraed nib achichig e de tʼuf e kalngaenʼ roraed, ara tawfe. Musap, tawfe u dakean e kalngaenʼ e be muguʼuliy e pi motochiyel ni nge yog ni ngan nʼaegfan e denen.

12 Machane bitir nib achichig e yaed bafos rokʼ Kristus, ni aram u napʼan nni sunmiy e fayleng; ya faʼanra dangay, ma Got e ba Got ni dematʼaw, ma kub Got ni ma thilyeg laniyaenʼ, ma de taʼareb e gidiiʼ u waenʼ; ya uw urngin e bitir nib achichig ni kar mʼaed ni dan tawfe nagraed!

13 Ere, faʼanra piʼin nib bitir nib achichig e dabiyog ni ngar thap gaed ni dariy e tawfe, me ere tin ni kar mʼaed e ka ranoed nga infierno ni dariy nʼumngin i napʼan.

14 Musap gube yoeg ngom, ni enra lemnag ni piʼin nib bitir nib achichig e ba tʼuf roraed e tawfe e keʼaw nga luben e amith nge paʼ e kireb; ya dariy rokʼ e mich, nge athap, ara tʼufeg; ere, faʼanra nge yimʼ e chaʼanem u napʼan nibe lem ni aram rogon, ma thingari yaen nga infierno.

15 Ya rib gel e kireb riy ni ngan lemnag ni Got e ra thapeg reb e bitir ni bachan e tawfe, ma reb e nge gafgow ni bachan e de thapeg e tawfe.

16 Gafgow ngakʼ e piʼin ra thilyeg e pi yalen rokʼ Somoel ni aray rogon, ya yaedra gafgow ma kemus ni faʼan yaedra kalngaenʼ. Musap, gube non nib tamilang, ni bachan e ke yib matʼawog rokʼ Got; ma dagur rus ko mang e rayog ni nge rinʼ e gidiiʼ; ya tʼufeg nib machalbog e be chuweg urngin e murus.

17 Ma kug sug ko tʼufeg, ni arame ba adag ni dabimus biʼid, ere gubin e bitir ma taʼareb rogon u wunʼug; ere gubaʼadag e piʼin nib bitir nib achichig u dakean ba adag nib machalbog; ma yaed gubin ma taʼareb rogon ma yaedra thap.

18 Ya gumnang ni Got e gathib Got ni dematʼaw, ara beeʼ ni ma thilyeg laniyaenʼ; ya darma thilyeg laniyaenʼ u gubinechuboeg ko gubinechuboeg.

19 Piʼin nib bitir nib achichig e dabiyog ni ngar kalgaed ngaenʼraed; ere, rib gel e kireb riy ni ngan siyeg raed ko murnguy rokʼ Got, ya yaed gubin ni yaed bafos rokʼ ni bachan e murnguy rokʼ.

20 Ma enra yoeg ni piʼin nib bitir nib achichig e ba tʼuf e tawfe roraed e be fek yathin e murnguy rokʼ Kristus, ma ke nʼaegfan fare bayul rokʼ nge gelingin e bayul rokʼ.

21 Gafgow ngakʼ e piʼin aram rogon, ya kar awgaed nga tiyoyowol ko yamʼ, nge infierno, nge ba gafgow ni dariy nʼumngin i napʼan. Gube yoeg nib tamilang; ya Got e ke chiyliy ngog. Mmotoyil gaed ngay magmed fol riy, ara yira togopluw nag ngomed u gilʼ e pufthin rokʼ Kristus.

22 Ya musap gubin e piʼin nib bitir nib achichig ma bafos rokʼ Kristus, nge gubin e piʼin ni denang e motochiyel. Ya fare gelingin e bayul e bay angin ngakʼ gubin e piʼin ni denang e motochiyel; ere, enra dawori rinʼ e kireb, ara en demoy u tan luben e kireb, e dabiyog ni nge kalngaenʼ; ere tawfe ni aram rogon e dariy angin—

23 Ya rib kireb u mit Got, ni ngan fek yathin e murnguy rokʼ Kristus, nge fare gelingin e Kan ni Thothup rokʼ, min tay e pagaenʼ nga dakean bogi muruwel nib yamʼ.

24 Musap, o fakag, rennʼey e thingar dabi buch; ya kalngaenʼ e fan ngakʼ e piʼin ni bay u tan luben e kireb ma bay u tan gechigan ba motochiyel ni kan thʼaeb.

25 Ere tin nib mʼon i waʼamngin e kalngaenʼ e tawfe; ma tawfe e ma yib u dakean e mich ni nge muguʼuliy e pi motochiyel; ma pi motochiyel ni yibe muguʼuliy e ma yib nag e manʼaegfan ko pi denen;

26 Ma manʼaegfan ko pi denen e ma yib nag e gumʼaenʼ, nge sobutʼaenʼ; ere bachan e gumʼaenʼ nge sobutʼaenʼ me yog ni yib e Kan ni Thothup, ni fare Tamochoʼ nag anʼuy nib sug ko athap nge adag nib machalbog, niʼir fare adag ni ma kʼadaenʼ u dakean e yulʼyulʼ ko meybil, nge yaeni madaʼ ko tomur, ko ngiyalʼ ni gubin e saints ma bay ra pired rokʼ Got.

27 Musap, o fakag, bay kug yol ngom bayay ni faʼanra dab kaʼaguwon ni mael ngakʼ fapi Lamanites. Musap, fare ufʼuf ko re nam ney, ara fapi gidiiʼ ko Nephites, e kar micheged ni ireram e gafgow roraed ma kemus ni faʼan yaedra kalngaenʼ.

28 Mmeybil ni fan ngoraed, o fakag, ni gomanga yib e kalngaenʼ ngoraed. Machane musap, gube rus nag ni ke chuw fare Kan ni Thothup roraed; ma lan e giney e nam e ku yaed be gay rogon ni ngar gatheayed gubin e gelingin nge matʼawon ni yib rokʼ Got; ma yaed be fek yathin fare Kan ni Thothup.

29 Ma tomuren ni kar feked yathin ba nangaenʼ nib gel, o fakag, ma arame dabki nʼuw napʼan ma kar mʼaed, ni nge muguʼul fapi prophecy ni yoeg fapi profet, ni kuboed rogon fapi thin rokʼ fare Tathapeg rodaed.

30 Ere kefelʼ, o fakag, nge yaeni madaʼ ko ngiyalʼ ni kug yol ngom, ara kug guyem bayay. Amen.