1 Ket napasamak a kalpasan ti uneg ti dua a tawen nga immay kadakuada ni Abinadai a nakapammarang, isu a saanda nalasin, ket rinugianna ti mamadto kadakuada, a kinunana: Daytoy ti imbilin kaniak ti Apo, a kunkunana—Abinadi, Inka ken mangipadtoka kadagitoy a taok, agsipud ta pinatangkenda ti puspusoda a maisuppiat kadagiti balikasko; saanda nagbabawi kadagiti dakes nga aramidda; ngarud, sarungkarakto ida iti pungtotko, wen, sarungkarakto ida iti nakaro a pungtotko kadagiti kinadangkes ken kinarimonda.

2 Wen, ay-ayto daytoy a sangkaputotan! Ket kinuna ti Apo kaniak: Unnatem ti imam ket mangipadtoka, a kunam: Kastoy ti kinuna ti Apo, mapasamakto a daytoy a sangkaputotan, gapu iti kinadangkesda, maadipento, ket masaplitda iti pingping; wen, ken papanawen dagiti tattao, ken mapapatay; ket dagiti buitre iti tangatang, ken dagiti aso, wen, ken dagiti atap nga ayup, ti manglamutto iti lasagda.

3 Ket mapasamakto a mapatganto ti biag ni ari Noe uray pay a kas iti pagan-anay iti napudot nga urno; ta maammuannanto a siak ti Apo.

4 Ket mapasamakto a saplitakto dagitoy a taok kadagiti nakaro a rigrigat, wen, iti bisin ken iti angol; ket paganug-ogekto ida nga agmalem.

5 Wen, ket pagbalinek a maaddaandanto kadagiti awit a maigalut kadagiti likkodda; ket maabogdanto a kas iti umel nga asno.

6 Ket mapasamakto a pagtinnagekto ti uraro kadakuada, ket dagitoy ti mangsaplit kadakuda; ket masaplitandanto pay iti angin iti daya; ket alimutngento met dagiti insekto ti dagada, ken ibusendanto dagiti bukbukelda.

7 Ket masaplitto ida iti nakaro nga angol—ket aramidek amin dagitoy gapu kadagiti kinadangkes ken kinarimonda.

8 Ket mapasamakto a malaksid no agbabawida dadaelekto ida a namimpinsan iti rabaw ti daga; ngem mangibatidanto iti kasuratan nga agtalinaed kalpasan iti pannakaungawda, ket italimengkonto ida para kadagiti sabali a pagilian a mangtagikua iti daga; wen, aramidekto uray daytoy tapno maipakitak dagiti kinarimon dagitoy a tao kadagiti sabsabali a pagilian. Ket adu a banag ti impadto ni Abinadi a maibusor kadagitoy a tao.

9 Ket napasamak a kinapungtotda isuna; ket innala ken inawitda isuna a sipupungo iti sanguanan ti ari, ket kinunada iti ari: Kitaen, inyeganmi iti sanguanam ti maysa a lalaki a nagipadto iti dakes maipanggep kadagiti tattaom, ket kinunana a dadaelenda ida ti Dios.

10 Ken ipadtona pay ti dakes maipanggep iti biagmo, ket kunana a kaslanto iti pagan-anay iti urno nga adda apuyna ti biagmo.

11 Ket manen, kunana nga agbalinkanto a kas garami, uray pay a kas maysa a nagango a garami iti talon, nga inasak dagiti ayup ken nabaddebaddekan.

12 Ket manen, kunana a kaarngimto dagiti sabong ti kalunay, a, no naluomen, no agangin, maitayab iti rabaw ti daga. Ket agpammarang a naisaon daytoy ti Apo. Ket kunana a mapasamakto amin dagitoy kenka malaksid no agbabawika, ket gapu daytoy iti kinadangkesmo.

13 Ket ita, O ari, ania a dakkel a kinadakes ti naaramidmo, wenno ania a nakaro a basol ti naaramid dagiti tattaom, ta nasken a kedngannatayo ti Dios wenno ukomennatayo daytoy a tao?

14 Ket ita, O ari, kitaen, awan ti basoltayo, ket sika, O ari, saanka a nagbasol; ngarud, nagulbod daytoy a tao maipanggep kenka, ket nagipadto iti awan kaes-eskanna.

15 Ket kitaen, napigsatayo, saantayo a maadipen, wenno maibalud dagiti kabusortayo; wen, ket rimmang-ayka iti daga, ken rumang-aykanto pay.

16 Kitaen, daytoy ti lalaki, idatagmi kenka; mabalinmo nga aramidem latta ti kaykayatmo kenkuana.

17 Ket napasamak nga imbilin ni ari Noe a rumbeng a maibalud ni Abinadi; ket imbilinna a nasken nga aguummong a sangsangkamaysa dagiti saserdote tapno pagnunumoan no ania ti aramidenda kenkuana.

18 Ket napasamak a kinunada iti ari: Idatagmo kadakami tapno masaludsodmi; ket imbilin ti ari a nasken a maidatag kadakuada.

19 Ket rinugianda a saludsoden isuna, tapno mapagbalinda a supiaten ti bagina, tapno iti kasta mabalinda nga idarum isuna; ngem situtured a sinungbatanna ida, ket nasarangetna amin a saludsodda, wen, ket nasdaawda; ta nasarangetna amin a saludsodda, ket napaulimekna ida iti amin a balikasda.

20 Ket napasamak a maysa kadakuada ti kinunana kenkuana: Ania ti kayat a sawen dagiti naisurat a balikas, ken naisuro dagiti ammatayo, a kunkunana:

21 Anian ti kinapintas kadagiti bantay dagiti saka a mangiyeg kadagiti naimbag a damag; a mangiwarwaragawag iti kappia; a mangiyeg iti naimbag a damag ti nasayaat; a mangiwarwaragawag iti pannakaisalakan; a kunana iti Zion, Agturay ti Diosmo;

22 Ipukkawto dagiti bataymo; agkantadanto a sangsangkamaysa; agsipud ta agkikitadanto inton iyeg manen ti Apo ti Zion;

23 Agrag-okayo; agkantakayo a sangsangkamaysa dakayo a nabaybay-an a luglugar ti Jerusalem; agsipud ta liniwliwan ti Apo dagiti taona, nasubbotnan ti Jerusalem;

24 Impakitan ti Apo ti nasantuan a takiagna a makita iti amin a pagilian, ket makitanto ti amin nga ungto ti daga ti panangisalakan ti Diostayo?

25 Ket ita kinuna ni Abinadi kadakuada: Dakayo kadi ket saserdote, ken agpammarang a mangisuro kadagitoy a tao, ken maawatan iti espiritu ti panagipadto, ket tarigagayanyo pay laeng a maammuan kaniak ti kaipapanan dagitoy a banag?

26 Kunak kadakayo, ay-aykayonto pay iti panangbalusingsingyo kadagiti wagas ti Apo! Ta no maawatanyo dagitoy a banag saanyo insuro ida; ngarud, binalusingsingyo dagiti wagas ti Apo.

27 Saanyo inaramat kadagiti pusoyo iti pannakaawat; ngarud, saankayo a nainsiriban. Ngarud, ania ti isuroyo kadagitoy a tao?

28 Ket kinunada: Isuromi ti linteg ni Moises.

29 Ket kinunana manen kadakuada: No isuroyo ti linteg ni Moises apay a saanyo tungpalen? Apay a tarigagayan dagiti pusoyo dagiti kinabaknang? Apay nga aramidenyo ti panagiinnabig ken ibusenyo ti pigsayo kadagiti balangkantis, wen, ken makagapu kadagitoy a tao nga agbasol, a nakaigapuan ti panangibaon kaniak ti Apo a mangipadto iti maibusor kadagitoy a tao, wen, uray pay ti nakaro a kinadakes a maibusor kadagitoy a tao?

30 Saanyo kadi ammo nga agsaoak ti kinapudno? Wen, ammoyo nga agsaoak ti kinapudno; ket nasken koma nga agpigergerkayo iti sanguanan ti Dios.

31 Ket mapasamakto a masaplitkayonto iti kinadangkesyo, ta imbagayo nga insuroyo ti linteg ni Moises. Ket ania ti ammoyo maipanggep iti linteg ni Moises? Dumteng kadi ti pannakaisalakan babaen ti linteg ni Moises? Ania ti makunayo?

32 Ket simmungbatda ket kinunada a dumteng ti panangisalakan babaen ti linteg ni Moises.

33 Ngem ita kinuna ni Abinadi kadakuada: Ammok a no tungpalenyo dagiti bilin ti Dios maisalakankayonto; wen, no tungpalenyo dagiti bilin ti Dios nga inyawatna ken ni Moises iti bantay a Sinai, a kunana:

34 Siak ti Apo a Diosyo, a nangiruar kadakayo iti Egipto, manipud iti balay ti pannakaadipen.

35 Awan ti bigbigenyo a sabali a Dios no saan lang a siak.

36 Saankayo nga agaramid iti uray ania a kinitikitan a ladawan, wenno uray ania a kapadpada ti parsua sadi langit, wenno dagiti banag nga adda iti uneg ti daga.

37 Ket ita kinuna ni Abinadi kadakuada, Naaramidyo kadin amin dagitoy? Kunak kadakayo, Saan, saanyo a naaramid. Ket insuroyo kadi dagitoy a tao a nasken nga aramidenda amin dagitoy a banag? Kunak kadakayo, Saan, saanyo a naaramid.