1 Ao ngkai, ngke e a tia te uea n ongo taeka aikai, e kangai nakoia ana ibonga: uota nako te aomata aio, ao tiringnga; bwa teraa ae ti na kona ni karaoia nakoina, ngkai e baba.

2 Ao a teirake bwa a na kataia n taua; ma e kaaitaraia, ao e taku nakoia:

3 Kam na aki ringai, bwa e na katuaeingkami te Atua ngkana kam katokai baimi iaou, bwa I tuai ni karokoa te rongorongo are kanakomaiai te Uea bwa N na taekinna; ke n tuangkami bwaai ake kam bubuti bwa N na taekin; mangaia ae e aki kona ni kariaia te Atua bwa N na tiringaki n te tai aio.

4 Bwa N na riai ni kakoroi bukin taian tua ake e a tia n anganai te Atua; ao ngkai I a tia n taekina te koaua ao kam a un irou. Ao riki, ngkai I a tia n taekina ana taeka te Atua ao kam motika taekau bwa I baba.

5 Ao e koro bukina bwa ngke e tia Abinataai n taekin taeka aikai ao a aikoa katokai baia ana botanaomata te uea are Noa iaona, bwa e mena irouna Tamnein te Uea; ao e oota ubuna n te raneanea, n aron are ngkoa iroun Mote n te maunga are Tinai, ngke e taetae ma te Uea.

6 Ao e taetae ma te mwaaka ao te kariaiakaki mai iroun te Atua; ao e reita nako ana taeka ni kangai:

7 Kam nooria bwa bon akea mwaakami n tiringai, mangaia ae N na kabanea au rongorongo. Eng, ao I kaantaninga bwa a na teke iai nanomi kioina ngkai I tuangkami taian koaua n aron ami bure.

8 Eng, ao kam na onrake n te kubanako ma te mimi, ao n te un n au taeka.

9 Man tokin au rongorongo; ao e aki kakawaki bwa I nakea, ke tao ngkana I kamaiuaki.

10 Ma I kona n tuangkami aio, te bwai are kam karaoia nakoiu, i mwin aio, e na riki bwa kanikinaean bwaai aika a na roko.

11 Ao ngkai N na wareki nikiran ana tua te Atua, bwa I katautaua bwa a tuai matenano inanomi; I katautaua bwa kam a tia ni kamatenanoa ao n reiakina te buakaka ni mwaitin bongin maiumi.

12 Ao ngkai, kam na uringa are I taekinna nakoimi: Ko na tai karaoa am bwai te boua ae kaaraki, ke katotongan te bwai teuana i karawa i eta, ao ae i nanon te aonaba inano, ao are i nanon te ran i aan te aba.

13 Ao riki: Ko na tai bobaraaki imataia, ke n toro irouia; bwa ngai te Uea ae Atuam bon te Atua ae tauaninne, ao N ana aia bure taama irouia natia, ao nakon te kateniua ao te kaaua n rooro mai irouia ake a ribaai.

14 Ao N na kaota te nanoanga nakoia ngaa ma ngaa ake a tangirai ao a kaawakin au tua.

15 Ko na tai atonga aran te Uea ae Atuam ni bakanrereia; bwa e na bon aki kaakea ana bure te Uea te aomata are atonga arana ni bakanrereia.

16 Uringa te bong ae te Tabati, n tabuia.

17 Onoua am bong ni beku, ao ni karaoi am mwakuri ni kabane.

18 Man te kaitiua ni bong, ae ana Tabati te Uea ae Atuam, ko na aki karaoa iai te mwakuri, ngkoe, ke natim te mwaane, ke natim te aine, ke am toro te mwaane, ke am toro te aine, ke am kao, ke am iruwa inanom am oo;

19 Bwa i nanon onoua te bong ao te Uea e karika karawa ma aonaba, ma marawa ma bwaai ni kabane ake inanoia; mangaia ae te Uea e kakabwaia te bong ae te tabati, ao e katabua.

20 Karinea tamam ma tinam, bwa aonga ni bati am bong iaon te aba ae e anganiko te Uea ae Atuam.

21 Ko na tai kamateia aomata.

22 Ko na tai wenenibure. Ko na tai iraa.

23 Ko na tai kaota aron raom n te aro ni kewe.

24 Ko na tai mataaiakina ana auti raom, ko na tai mataaiakina buun raom, ke ana toro te mwaane, ke ana toro te aine, ke ana kao, ke ana aati, ke bwai nako aika ana bwai raom.

25 Ao e koro bukina bwa ngke e tia Abinataai n taekin bwaai aikai nakoia ao e kangai nakoia: Kam a tia n reireina te botanaomata aio bwa a na kaawakin bwaai aikai ni kabane bwa aonga n iri nanon taian tua aikai ni kabane?

26 I kangai nakoimi, Tiaki; bwa ngke kam a tia, ao e na bon aki kanakomaiai te Uea bwa N na taetae ni burabetin bwaai aika a bubuaka aika a na riki nakoia te botanaomata aio.

27 Ao ngkai, kam a tia n taekinna bwa e reke te kamaiuaki man ana tua Mote. I kangai nakoimi e riai bwa kam na teimatoa ni kaawakin ana tua Mote; ma I kangai nakoimi, bwa ae e na roko te tai are e na aki tau kaawakinan ana tua Mote.

28 Ao riki, I kangai nakoimi, e aki reke te kamaiuaki n ti te tua; ao ngke akea te mwakuri ni kamaiu, are karaoia te Atua i bon irouna ibukin aia bure ma aia buakaka ana botanaomata, ao a na bon bane ni mate, e ngae ngke iai ana tua Mote.

29 Ao ngkai I kangai nakoimi bwa e riai bwa e na iai te tua are a na anganaki tibun Iteraera, eng, te tua ae moan te matoatoa; bwa aomata ngaia aika a bonotaninga, aika a tawe ni karaoa te buakaka, ma ni waeremwe n uringa te Uea ae Atuaia.

30 Mangaia ae iai te tua are a tia n anganaki, eng, te tua ibukin te mwakuri ao te otenanti, te tua are a riai n ira nanona man te bong teuana nakon te bong teuana, are a na kauringaki iai uringan te Atua ao aia beku ibukina.

31 Ma taraia, I kangai nakoimi, bwaai aikai ni kabane bon kanikinaean bwaai aika na riki n taai aika a na roko.

32 Ao ngkai, e koaua bwa a oota n te tua? I kangai nakoimi, Tiaki, a aki bane n oota n te tua; ao aio bon ibukin matoatoan nanoia; bwa a aki oota ao akea te aomata ae kona ni kamaiuaki ma ti rinanon ana kaboaki te Atua.

33 Bwa taraia, e aki taetae ni burabeti Mote nakoia n taekina rokon te Mesia, ao bwa te Atua e na kabooia ana botanaomata? Eng, ao burabeti naba ni kabane ake a tia n tataetae ni burabeti man moan rikin te aonaba—ke a bon tuai n tataekin bwaai aika kaineti ma bwaai aikai?

34 A tuai n taekinna ae e na ruo te Atua i buakoia natia aomata, ao n rabwatanna n te rabwata n aomata, ao ni maiu iaon te aonaba ma te mwaaka ae korakora?

35 Eng, ao aki tia naba n taekinna bwa e na karaoa mangautia maate, ao ngaia naba e na bon kainnanoaki ao ni kakorakaiaki?