1 Ja, en wel, sê Jesaja nie: Wie het ons kroniek geglo, en aan wie is die arm van die Here geopenbaar?

2 Want hy sal voor hom opgroei soos ’n tere plant, en soos ’n wortel uit droë grond; Hy het geen gestalte nóg aantreklikheid; en wanneer ons Hom sal sien, is daar geen skoonheid dat ons Hom sou begeer nie.

3 Hy word verag en verwerp deur mense, ’n man van smarte, en bekend met verdriet; en ons het ons gesigte as’t ware van Hom verberg; Hy was verag, en ons het Hom nie geag nie.

4 Waarlik, Hy het ons verdriet op Hom geneem en ons smarte gedra; tog het ons Hom as getref beskou; geslaan deur God, en geteister.

5 Maar Hy is gewond vir ons oortredinge, Hy is gekneus vir ons ongeregtighede; die strafgerig vir ons vrede was op Hom, en deur sy wonde is ons genees.

6 Ons almal, soos skape, het gedwaal; ons het elkeen gedwaal na sy eie pad; en die Here het die ongeregtighede van ons almal laat neerkom op Hom.

7 Hy was verdruk, en Hy was geteister, tog het Hy sy mond nie oopgemaak nie; Hy is gebring soos ’n lam na die slagplek, en soos ’n skaap wat stom is voor haar skeerders, so het Hy nie sy mond oopgemaak nie.

8 Hy is geneem uit die gevangenis en uit die oordeel; en wie sal sy geslag verklaar? Want Hy is afgesny uit die land van die lewendes; vir die oortredinge van my volk was Hy gestraf.

9 En Hy het sy graf by die bose gemaak, en by die ryke in sy dood; omdat Hy geen onreg gedoen het nie, nóg was daar geen bedrog in sy mond.

10 Tog het dit die Here behaag om Hom te kneus; Hy het Hom smart aangedoen; wanneer U sy siel as skuldoffer vir die sonde maak, sal Hy sy saad sien; Hy sal sy dae verleng, en die welbehae van die Here sal deur sy hand voorspoedig wees.

11 Hy sal die lyding ervaar van sy siel, en sal tevrede wees; deur sy kennis sal my regverdige dienskneg baie regverdig maak; want Hy sal hulle ongeregtighede dra.

12 Daarom sal Ek Hom ’n deel gee onder die grotes, en Hy sal die buit deel met die sterkes; omdat Hy sy siel uitgestort het tot die dood toe; en Hy is gereken onder die oortreders en Hy het die sonde van baie gedra, en het voorspraak gemaak vir die oortreders.