۱ ہاں، یعنی کیا یسعیاہ نے نہیں کہا: ہمارے پیغام پر کون اِیمان لایا، اور خُداوند کا بازُو کِس پر ظاہر ہُوا؟

۲ پَس وہ اُس کے آگے کونپل کی طرح، اور خُشک زمِین سے جڑ کی مانِند، پُھوٹ نِکلے گا؛ نہ اُس کی کوئی شکل و صُورت ہے نہ خُوب صُورتی؛ اور جب ہم اُس پر نِگاہ کریں گے تو کُچھ حُسن و جمال نہیں کہ ہم اُس کے مُشتاق ہوں۔

۳ وہ آدمِیوں میں حقِیر و مردُود؛ مردِ غم ناک، اور رنج کا آشنا تھا، اور ہم اُس سے گویا رُوپوش تھے؛ اُس کی تحقیر کی گئی، اور ہم نے اُس کی کُچھ قدر نہ جانی۔

۴ یقِیناً اُس نے ہماری مشقّتیں اُٹھا لِیں، اور ہمارے غموں کو برداشت کِیا؛ پر ہم نے اُسے خُدا کا مارا، کُوٹا اور ستایا ہُوا سمجھا۔

۵ حالاں کہ وہ ہماری خطاؤں کے سبب سے گھایل کِیا گیا، اور ہماری بدکرداری کے باعِث کُچلا گیا؛ ہماری ہی سلامتی کے لِیے اُس کی تادیب ہُوئی؛ اور اُس کے مار کھانے سے ہم نے شِفا پائی ہے۔

۶ ہم سب، بھیڑوں کی مانِند، بھٹک گئے ہیں؛ ہم سے ہر ایک اپنی راہ کو پِھرا، اور خُداوند نے ہم سب کی بدکرداری اُس پر لاد دی۔

۷ وہ ستایا گیا، اور اُسے مارا گیا، تو بھی اُس نے اپنا مُنہ نہ کھولا؛ جِس طرح برّہ جِسے ذبح کرنے کو لے جاتے ہیں، اور جِس طرح بھیڑ اپنے بال کترنے والوں کے سامنے بے زُبان ہے اُسی طرح وہ خاموش رہا۔

۸ وہ ظُلم کر کے اور فتویٰ لگا کر اُسے لے گئے؛ اور کَون اُس کی نسل کا حال بیان کرے گا؟ کیوں کہ وہ زِندوں کی زمِین سے کاٹ ڈالا گیا؛ میرے لوگوں کی خطاؤں کے سبب سے اُس پر مار پڑی۔

۹ اُس کی قبر بھی شرِیروں کے درمِیان ٹھہرائی گئی، اور وہ اپنی مَوت میں دَولت مندوں کے ساتھ مُؤا؛ حالاں کہ اُس نے کِسی طرح کا ظُلم نہ کِیا، اور اُس کے مُنہ میں ہرگِز چھل نہ تھا۔

۱۰ لیکن خُداوند کو پسند آیا کہ اُسے کُچلے؛ اُس نے اُسے غمگِین کِیا؛ جب تُو اُس کی جان کو گُناہ کی قُربانی کے لِیے گُذرانے گا تو وہ اپنی نسل کو دیکھے گا، وہ اُس کی عُمر دراز کرے گا، اور خُداوند کی مرضی اُس کے ہاتھ کے وسِیلے سے پُوری ہو گی۔

۱۱ اپنی ہی جان کا دُکھ اُٹھا کر وہ دیکھے گا، اور سَیر ہو گا؛ اپنے ہی عِرفان سے میرا صادِق خادِم بُہتوں کو راست باز ٹھہرائے گا؛ کیوں کہ وہ اُن کی بدکرداری خُود اُٹھا لے گا۔

۱۲ پَس مَیں اُسے بزُرگوں کے ساتھ حِصّہ دُوں گا، اور وہ لُوٹ کا مال زور آوروں کے ساتھ بانٹ لے گا؛ کیوں کہ اُس نے اپنی جان موت کے لِیے اُنڈیل دی؛ اور وہ خطاکاروں کے ساتھ شُمار کِیا گیا؛ اور اُس نے بُہتوں کے گُناہ اُٹھا لِیے، اور خطاکاروں کی شِفاعت کی۔