1 Ug karon, nahitabo nga human si Abinadi makasulti niini nga mga pulong gituyhad niya ang iyang kamot og miingon: Moabot ang panahon nga ang tanan makakita sa pagluwas sa Ginoo; dihang ang matag nasod, kaliwatan, pinulongan, ug katawhan magkakitaay ug mokompisal sa atubangan sa Dios nga ang iyang mga paghukom makiangayon.

2 Ug unya ang mga daotan papahawaon, ug sila adunay rason nga magminatay, ug magbakho, ug magdanguyngoy, ug magpangagot sa ilang mga ngipon; ug tungod kini kay dili sila mopatalinghog sa tingog sa Ginoo; busa ang Ginoo dili motubos kanila.

3 Kay mga tawhanon sila ug mga yawan-on, ug ang yawa adunay gahom kanila; oo, gani kana nga karaang bitin nga maoy milingla sa atong unang mga ginikanan, nga maoy hinungdan sa ilang pagkapukan; nga maoy hinungdan nga ang tanan nga katawhan nahimong tawhanon, mahilayon, yawan-on, nasayod sa daotan gikan sa maayo, nagpaulipon sa ilang mga kaugalingon ngadto sa yawa.

4 Sa ingon niana ang tanan nga katawhan nahisalaag; ug tan-awa, wala untay kataposan ang ilang pagkahisalaag kon wala pa ang Dios motubos sa iyang katawhan gikan sa ilang kahimtang sa pagkahisalaag ug pagkapukan.

5 Apan hinumdomi nga siya nga magpadayon sa iyang kaugalingong tawhanon nga kinaiya, ug magpadayon sa mga naandan nilang pagpakasala ug pagsukol batok sa Dios, magpabilin sa iyang napukan nga kahimtang ug ang yawa hingpit nga adunay gahom diha kaniya. Busa kaniya sama ra nga walay gihimo nga pagtubos, kay kaaway man sa Dios; ug ang yawa usab kaaway sa Dios.

6 Ug karon kon si Kristo wala moanhi sa kalibotan, kon maghisgot sa mga butang nga moabot sama nga kini miabot na, wala unta ang katubsanan.

7 Ug kon si Kristo wala pa mobangon gikan sa mga patay, o mobugto sa mga higot sa kamatayon aron dili magmadaogon ang lubnganan, ug walay kahapdos ang kamatayon, wala unta ang pagkabanhaw.

8 Apan adunay pagkabanhaw, busa wala magmadaogon ang lubnganan, ug ang kahapdos sa kamatayon gituhop diha kang Kristo.

9 Siya ang kahayag ug ang kinabuhi sa kalibotan; oo, usa ka kahayag nga walay kataposan, nga dili gayod mongitngit; oo, ug usab usa ka kinabuhi nga walay kataposan, aron wala nay kamatayon.

10 Bisan kon kini nga mortal mahimo nga imortal, ug kini nga madunoton mahimo nga dili na madunot, ug pagadad-on aron mobarog sa atubangan sa hukmanan sa Dios, aron hukman niya sumala sa ilang mga buhat kon kini mga maayo o kon kini mga daotan—

11 Kon kini mga maayo, ngadto sa pagkabanhaw sa walay kataposang kinabuhi ug kalipay; ug kon kini mga daotan, ngadto sa pagkabanhaw sa walay kataposang panghimaraot, nga gitugyan ngadto sa yawa, kinsa nag-ulipon kanila, nga mao ang kahimaraotan—

12 Kay gisunod ang ilang kaugalingon nga tawhanong mga kabubut-on ug mga tinguha; kay wala gayod makatawag sa Ginoo samtang ang mga bukton sa kaluoy gipaabot ngadto kanila; kay ang mga bukton sa kaluoy gipaabot ngadto kanila, ug midumili sila; kay gipasidan-an sila sa ilang mga sayop nga binuhatan ug sa gihapon wala sila mobiya niini; ug gisugo sila sa paghinulsol ug sa gihapon midumili sila sa paghinulsol.

13 Ug karon, dili ba angay nga mangurog ug maghinulsol kamo sa inyong mga sala, ug mohinumdom nga diha lamang ug pinaagi ni Kristo kamo maluwas?

14 Busa, kon magtudlo kamo sa balaod ni Moises, itudlo usab nga kini usa ka paghulagway niadtong mga butang nga moabot—

15 Tudloi sila nga ang katubsanan moabot pinaagi kang Kristo ang Ginoo, kinsa mao gayod ang Amahan sa Kahangtoran. Amen.