1 Hinataq, kay rimaykunata Abinadi tukuqtin, kurakninkunata inka Noe kamachirqan payta apaspa wañuchimunankupaq.

2 Ichaqa, paykuna purapi huk runa karqan Alma sutiyoq, Nefiq ch’awchun. Waynallan pay karqan, Abinadiq sut’inchasqan simikunatataq kreyirqan, yacharqantaqmi paykuna kontra Abinadiq rimasqan huchakunamanta; chhaynataq, inkamanta mañakuyta qallarirqan Abinadiwan mana phiñarikunanpaq, ichaqa sumaqllata ripunanta saqenanpaq.

3 Ichaqa, astawanmi inka phiñarikurqan, paykuna chawpimanta Alma qarqosqa kananpaqtaq kamachirqan; warmankunatataq kacharqan Almaq qhepanta, payta sipimunankupaq.

4 Ichaqa paykunamanta ayqekurqan, pakakuqtintaq mana pay tariyta atirqankuchu. Ashkha p’unchawkuna pakasqa kaspataq, Abinadiq llapan rimasqan simikunata qelqarqan.

5 Hinataq, llaqtakamayoqkunata Noe kamachirqan Abinadita muyurispa hap’inankupaq; watayuspataq ch’achana wasiman payta churarqanku.

6 Kinsa p’unchaw patamantaq, kurakkunawan rimanakuspan Abinadi yapamanta ñawpaqenman apamusqa kananpaq kamachirqan.

7 Paytaq Abinadita nirqan: Abinadi, tariykun imawan qanta tunpanaykupaq, wañuytataq merisinki.

8 Runakunaq chawpinmanmi kikin Yaya urayamunqa nispan nirqanki; kunantaq kayrayku wañuchisqa kanki, noqamanta llaqtaymantawan millay rimasqaykikunata mana kutichikapunkichu chayqa, nispa.

9 Abinaditaq payta nirqan: Qanta nisayki—manan kutichikapusaqchu kay llaqtamanta qanman rimasqay simikunataqa, cheqaqmi chay rimaykuna. Cheqaq kasqanmanta yachanaykipaqtaq makiykipi urmanaypaq kacharirqani.

10 Ari, wañuykaman ñak’arisaq, manataqmi rimasqaykunata kutichikapusaqchu, qankuna kontrataq sut’inchaq hina sayanqa. Sipiwankichis chayqa, mana huchayoq yawartan sut’uchinkichis, qankuna kontrataq kaypas sut’inchaq hina qhepa p’unchawpi sayanqa, nispa.

11 Kunantaq inka Noeqa, kachariytaña munasharqan, rimayninkunata manchakusqanrayku, Yaqaq taripayninkuna payman hamunantawan manchakuspa.

12 Ichaqa, kurakkuna Abinadi kontra qaparirqanku, payta tunpayta imataq qallarirqanku: Inkatan k’amin, nispa. Hinataq inkaqa Abinadi kontra phiñarichisqa kaspa, sipisqa kananpaq payta kacharirqan.

13 Hinataq, Abinadita hap’ispanku chaqnayurqanku, ninawantaq runa-kurkunta wañunankama ñak’arichirqanku.

14 Payta nina ruphayta qallareqtintaq, khaynata paykunaman qaparirqan:

15 Noqawan ruwasqaykichista hinan ch’awchuykichis askha runakunata ninawan ñak’arichinqaku wañuypa nanayninkunata; kaytataq Wiraqocha Yayankuq qespiyninpi kreyisqankurayku.

16 Qankunataq imaymana onqoykunawan muchuchisqa kankichis, huchaykichiskunarayku.

17 Tukuy qayllamanta maqasqataqmi kankichis, qarqosqa, kaymanta haqayman ch’eqechisqa imataq kankichis, k’ita uywakuna salqa millay animalkunaq qatikachasqan kasqankuta hina.

18 Haqay p’unchawpitaq chakusqa kankichis, awqaykichispa makinmantaq urmankichis; chaymi ñak’arinkichis, wañuypa nanayninkunata ninawan noqa ñak’arisqayta hina.

19 Khaynatan Yaya aynikun llaqtan wañuchiqkunawan. O Yaya, nunayta chaskikapuy.

20 Kay simikunata Abinadi neqtintaq, ninawan wañuyta ñak’arisqanrayku urmarqan; ari, Yayaq kamachiyninkunata mana mananchay munasqanraykun wañuchisqa karqan; wañuyninwantaq rimayninkunaq cheqaq kayninta intuykurqan.