1 Kunantaq, Noeq warmankunamanta ayqekuq Alma, huchankunamanta millay ruwasqanmantawan wanarqan, runakuna purapitaq pakallapi purirqan, Abinadiq rimayninkunata yachachispa.

2 Ari, imaymana hamunamanta, wañusqakunaq kawsariyninkumanta, Cristoq atiyninwan, ñak’ariyninwan, wañuyninpiwan wakichisqa kanan runakunaq qespiyninkumantawan; kawsariyninmanta, hanaqpachaman seqaripuyninmantawan.

3 Rimayninkunata tukuy uyariy munaqkunamanmi pay yachachirqan. Pakallapitaq paykunata yachachirqan inka Noe mana yachananpaq. Askha runakunataq rimayninkunapi kreyirqanku.

4 Hinataq, paypi llapan kreyiqkuna, Mormon sutiyoq hallp’aman rirqanku—inkamantataq kay sutita kay hallp’a chaskirqan—hallp’ankuq lindanpi kaspataq, maynillanpiqa utaq maynin uhukunallaqa k’ita uywakuna kaypi hunyarqan.

5 Chay Mormonpitaq ch’uya unuyoq qocha karqan, chaymantaq Alma rirqan. Chay qochaq sispayninpi huch’uy sach’akunayoq sach’a-sach’a kaqtintaq, chaypi Alma p’unchawpi pakakurqan inkaq mashkaykachaqninkunamanta.

6 Hinataq, payta llapan kreyiqkuna chayman rirqanku rimayninkuna uyariq.

7 Askha p’unchawkuna patamantaq, askha runakuna huñunakurqanku Mormon hallp’api, Almaq rimayninkuna uyarinankupaq. Ari, rimayninkunapi llapa kreyiqkunan huñunakurqanku payta uyarinankupaq. Paykunatataq pay yachachirqan yuyayman kutirimuyta, qespiyta, Wiraqochapi iñiytawan.

8 Hinataq paykunata nirqan: Qhawariychis, kaypin Mormonpa ununkuna kashan, (khaynan waqyasqa karqan) kunanqa Yayaq t’aqanman hamuytataq munankichis, Paypa llaqtantaq waqyasqa kayta munankichis chayqa; ch’usaq kananpaqtaq q’epinaykichispi yanapanakuyta munankichis;

9 Ari, waqaqkunawantaq waqayta munankichis, sonqochay nesitaqkunata sonqochaspa; llapa pacha lliw imaymanakunapi, llapa kanaykichis hallp’apiwantaq Yayaq sut’inchaqninkuna hina sayanaykichispaq, wañunakamapuni; Yayaq qespichisqan kanaykichispaq, qallariy kaq kawsariypa runankunawan yupasqa kanaykichispaq, wiñay kawsayniyoq kanaykichispaqwan—

10 Kunan nisaykichis, kaytaq sonqoykichispa munaynin chayqa, iman hark’asunkichis Wiraqochaq sutinpi unuchasqa kanaykichismanta, Paywan rimanakuypi haykusqaykichismanta sut’inchaq hina, Payta servinaykichispaq, kamachiyninkunatawan waqaychanaykichispaq, aswan askhatapuni qankuna pataman Nunanta hich’arimunanpaq? nispa.

11 Kay simikunata runakuna uyareqtinkutaq, kusikuypi makinkuta t’aqllakurqanku, hinaspataq qaparirqanku: kaymi sonqoykuq munaynin, nispa.

12 Hinataq, Helamta hap’ispa—pay ñawpaq kaq kaspa—unuman Alma rirqan sayarispataq khaynata qaparirqan: O Wiraqocha, warmayki pataman Nunaykita hich’arimuy kay ruwayta chanin sonqowan ruwananpaq, nispa.

13 Kay simikunata neqtintaq, Wiraqochaq Nunan pay patapi karqan, hinaspataq nirqan: Helam, noqa unuchayki Llapa-atiyniyoq Yayamanta atiyniyoq kaspa, kay wañuq runa-kurkupi wañunaykikama Pay servinaykipaq rimanakuypi haykusqaykimanta sut’inchayta hina; Wiraqochaq Nunanyá qan pataman hich’arisqa kachun; Paytaqyá wiñay kawsayta qanman qochun, hallp’aq qallariyninmantapacha allichasqan Cristoq kutichikapuyninwan, nispa.

14 Kay simikunata Alma neqtintaq, Alma Helampiwan unupi p’anpasqa karqanku; hinamantaq paykuna sayarimurqanku, Nunawan hunt’asqa kaspataq kusikuspa unumanta lloqsimurqanku.

15 Yapamantataq huk runata Alma aparqan, ishkay kutitataq unuman haykurqan, qallariypi hinataq payta unucharqan; ichaqa, manan kikin Almaqa unupi yapamanta p’anpakurqanku.

16 Khaynatataq Mormon k’itiman sapanka riqkunata pay unucharqan, paykunataq karqanku yaqa ishkay pachak tawayoq nunakuna; ari, paykunataq Mormonpa ununpi unuchasqa karqanku, Yayaq munayninwan hunt’ataq karqanku.

17 Chay pachamantapachataq Yayaq iñeqkuna-huñun, utaq Cristoq iñeqkuna-huñun nispa waqyasqa karqanku. Hinataq pipas Yayaq atiyninwan kallpanpiwan unuchasqa kaq, iñiqkuna-huñunman yapasqa karqan.

18 Hinataq Almaqa, Yayamanta atiyniyoq kaspa kurakkunata sapaqcharqan; huk kurakta paykunamanta sapanka pishqa chunkapaq sapaqcharqan, paykunata yachachinankupaq, Yayaq qhapaq suyunpa imaymanakunamanta paykunata yachachinankupaq.

19 Paykunatataq kamachirqan mana imatapas yachachinankupaq, ichaqa, paypa yachachisqanta, qollanan unanchaqkunaq rimasqankuta ima.

20 Ari, kamachillarqantaqmi mana imatapas yachachinankupaq, ichaqa, yuyayman kutirimuyta, llaqtan kutichikapuq Wiraqochapi iñiytawan.

21 Kamachillarqantaqmi, paykuna purapi mana cheqninakuykuna kananpaq, ichaqa, ch’ullalla ñawiwan ñawpaqman qhawanankupaq, ch’ullalla iñiyniyoq, ch’ullalla unuchayniyoq kaspa; huklla kaypi, paykuna pura munanakuypi sonqonku awasqa kaspa ima.

22 Khayna yachachinankupaqmi paykunata kamachirqan. Khaynatataq Yayaq wawankunaman tukurqanku.

23 Paykunatataq pay kamachirqan, samana p’unchawta waqaychanankupaq, qollananta kachinankupaq, sapa p’unchaw Wiraqocha Yayankuta añaychanankupaqwan.

24 Kamachillarqantaqmi paypa sapaqchasqan kurakkunata, paykuna kikinku kawsayninkupaq makinkuwan llank’anankupaq.

25 Sapanka semanataq huk p’unchawta sapaqcharqanku, huñunakuspa runakunaman yachachinankupaq, Wiraqocha Yayankuta yupaychanankupaq, llapa atisqankuman hina huñunakunankupaqwan.

26 Kurakkunataq mana runakunamantachu kawsayninkupaq suyananku karqan; ichaqa, Yayaq munakuynintan llank’ayninkurayku chaskinanku karqan, Nunapi kallpasapa wiñanankupaq, Yayaq yachayninwan ima kanankupaq; Yayamanta atiywan kallpapiwan yachachinankupaq.

27 Yapamantataq Alma kamachirqan, iñeqkuna-huñumanta runankuna kapuqninkumanta qonankupaq, sapankankuq kapusqanman hina; askha kapunman chayqa aswan askhatan qonanpaq, chikallan huk runaq kaqtintaq huk chikallanta paymanta mañakunnanta, mana imayoq runaman qosqa kananpaq.

28 Khaynatataq kapuqninkumanta qonkuman, paykuna kikinkuq qespi kayninkumanta munayninkumantawan hina, Yayaman, nesitaq kurakkunaman, ari, sapanka nesitaq runaman, q’alalla kaq runaman ima sumaq munakuyninkuman hina.

29 Kaytataq paykunata nirqan, Yayamanta kamachisqa kaspa. Sumaqtataq Yayaq ñawpaqenpi purirqanku paykuna pura rakinakuspanku, kay kawsaypi kaqmantapas, nunapi kaqmantapas, nesitasqankuman munasqankumanwan hina.

30 Hinataq, kay imaymanakuna Mormonpi ruwasqa karqan; ari, Mormonpa ununkunaq kasqanpi, Mormonpa ununkunaq sispanpi kaq sach’a-sach’akunapi. Ari, Mormonpa k’itin, Mormonpa ununkuna, Mormonpa sach’a-sach’anpiwanqa, ancha sumaqmi chaykuna karqan chay k’itipi Kutichikapuqninku reqsiyman chayamuqkunaq ñawinkupaq; ari, ancha saminchasqataqmi paykuna kanku, wiñaypaqtaq Payta yupaychaspa takinqaku.

31 Kaykunataq chay hallp’aq lindanpi ruwasqa karqan, inkaq yachayninman mana chayamunanpaq.

32 Hinaspataq inkaqa runakunaq hasasayninkuta rikuspa, paykunata qhawanankupaq warmankunata kacharqan. Chhaynataq, Wiraqochaq rimayninkunata uyarinankupaq huñunakushasqanku p’unchawpi, inkaman willarqanku.

33 Inkataq nirqan: Noqa kontra ankallikunankupaqmi runakunata Alma hatarichishan, nispa; hinataq awqasuyunkunata paykunata qolluchimunankupaq kacharqan.

34 Hinataq, Alma, Wiraqochaq llaqtanpiwan, inkaq awqasuyunkuna hamunankumanta yacharqanku; chhaynataq karpankuta, ayllunkutawan apayukuspanku purunman lloqsirqanku.

35 Paykunataq karqanku yaqa tawa pachak pishqa chunka nunakuna.