Mosiahq Qelqan

1 Hinataq taytanpa kamachisqanman hina Mosiah ruwaqtin, llapan hallp’antinpi rimarimusqan patamanwantaq, tukuy hallp’antinmanta runakuna hamurqanku, Wiraqochaq Wasinman rinankupaq, paykunaman inka Benjamin rimarinan simikunata uyarinankupaq.

2 Ancha askha kaqtinkutaq mana paykunata yuparqankuchu; anchatapunitaq kay hallp’api mirasqaku kallpachakusqaku ima chayqa.

3 Uywankuq phiwi uñankutataq apamurqanku, Moisespa kamachisqa-siminman hina arpayta ruphasqa munachiytawan munachinankupaq,

4 Jerusalen hallp’amanta paykunata horqomusqanrayku, awqankunaq makinkunamanta paykunata horqosqanmanta, chanin runakunata yachacheqninkupaq churasqanmanta; Zarahemla hallp’api sumaq kawsay hatarichiq, Yayaq kamachiyninkuna waqaychanankupaq yachacheq, kusikuspanku Yayaman runakunamanwan munakuyniyoq hunt’asqa kanankupaqwan, chanin runata inkanku kananpaq churasqanmantawan Wiraqocha Yayankuta añaychanankupaq.

5 Hinataq Wiraqochaq Wasinman paykuna hamuqtinku, muyureqnintinpi karpankuta hatarichirqanku, sapanka runa ayllunman hina; paykunataq karqanku: Warminku, churinku, ususinku, paykunaq churinku ususinkupiwan, kurakmanta sullk’a kaqman; sapanka ayllukunataq hoqkunamanta t’aqasqa karqanku.

6 Karpankutataq Wiraqochaq Wasinpa muyureqninpi hatarichirqanku, sapanka runaq karpanpa punkuntaq Wiraqochaq Wasinman qhawaq karqan; chhayna kaqtin, karpallankupi kaspanku, paykunaman inka Benjamin rimarinan simikunata uyarinankupaq;

7 Runakuna askhapuni kaqtintaq inka Benjaminqa, mana llapankutachu yachachiyta atinman karqan Wiraqochaq Wasinpa perqankuna ukhupi, chayraykutaq huk torreta ruwachirqan, paypa rimarinan simikunata runankuna uyariyta atinankupaq.

8 Hinataq payqa, llaqtanta torremanta rimariyta qallarirqan; runakuna askhapuni kaqtinkutaq, mana llapankuchu rimayninkunata uyariyta atirqanku, chayraykutaq rimasqan simikunata qelqachirqan, arun mana uyariy atiqkunaman apachinanpaq, paykunapas rimayninkunata chaskinankupaq.

9 Kaykunataqmi rimasqan qelqachisqan ima simikuna kanku: Wawqeykuna, llapan huñunakuqkuna, kunan p’unchaw qankunaman rimarinay simikunata uyariy atiqkuna. Manan qankunaman rimarinay simikunawan pukllanaykichispaqchu kayman hamunaykichispaq kamachirqani, ichaqa, uyariwanaykichispaq, rinriykichista kicharispa uyarinaykichispaq, sonqoykichista hamut’anaykichispaq, umaykichistataq Yayaq pakasqa imaymanankuna qankunaman pashkarisqa kananpaq.

10 Manan manchakuwanaykichispaqchu kayman hamunaykichispaq kamachirqaykichis, nitaq noqa kikiymanta wañuq runamanta aswan kanayta yuyanaykichispaqtaqchu.

11 Ichaqa, qankuna hinan kani, runa-kurkuypi yuyaypi ima imaymana kallpawañuykunaman watasqa. Chaypiwanpas kay llaqtaq akllasqanmi karqani, taytaypa sapaqchasqan, Wiraqochaq makinpa saqesqantaq karqani, kay runakunaq kamachiqninku, inkanku ima kanaypaq; mana imawanpas tupachina atiyninwantaq waqaychasqa karqani, Wiraqochaq qowasqan tukuy kallpaywan, umaywan, atiyniypiwan qankunata sirvinaypaq.

12 Qankunatataq niykichis—kunan p’unchawkaman p’unchawniykunata qankunata sirvinaypaq kacharisqa karqani, manataqmi qorita, qolqeta ni ima qhapaqyaykunatapas qankunamanta mañakurqanichu;

13 Manataqmi kacharirqanichu ch’achana wasikunapi wishq’asqa kanaykichista, nitaq qankuna pura hark’anakunaykichistapas, nitaq runa wañuchinaykichistapas, suwanaykichistapas, nitaq map’akuykuna ruwanaykichistapas. Manataqmi kacharirqanichu, ni ima millay ruwaykunata ruwanaykichistapas; yachachirqaykichistaqmi Wiraqochaq kamachiyninkunata, lliw imaymanakunapi Paypa kamachisqasuykichista waqaychanaykichispaq—

14 Noqa kikiypas makiywanmi llank’arqani qankuna sirvinaypaq, impuestokunawan mana q’epipasqa kanaykichispaq, mana ima sasa apanakuna qankunaman hamunanpaq—kay llapan imaymanakuna rimasqaymantataq, qankuna kikiykichis kunan p’unchaw sut’inchaq kankichis.

15 Chaypiwanpas wawqeykuna, manan yupaychakunaypaqchu kaykunata ruwarqani, manataqmi qankunata tunpanaypaqchu kaykunata nini chaywan, ichaqa, kunan p’unchaw ch’uya luriwan Yayaq ñawpaqenpi kutichiy atinayta yachanaykichispaqmi kay imaymanakunata niykichis.

16 Qankunata niykichis: Manan, qankunaq sirvisioykichispi p’unchawniykunata pasarqani nisqayraykuchu yupaychakuyta munani; Yayaq sirvisionpin karqani.

17 Kaykunatataq niykichis, yachaysapa kayta yachanaykichispaq; runamasiykichis sirvisionpi kaspaykichisqa, Yayaykichispa sirvisionpi kasqaykichista yachanaykichispaq.

18 Inkanchis nispan waqyawarqankichis; noqataq, inkanchis nispa waqyasqaykichis, qankuna sirvinaypaq llank’ani; chhaynari, manachu qankuna llank’anaykichis sirvinakunaykichispaq?

19 Noqataq, inkanchis nispa waqyasqaykichis, sirvisioykichispi p’unchawninkunata pasachirqan, chaypiwanpas, Yayaq sirvisiollanpi kaspa qankunamanta añaychayta chaskini chayri, hayk’atan hanaqpachapi Inkaykichista añaychanaykichis!

20 Qankunata nisaykichis wawqeykuna, tukuy nunaykichispa kallpanwan kamasoqniykichis, waqaychasoqniykichis, allillan kachisoqniykichis, kusichisoqniykichis, qankuna pura sumaq kawsayniyoq tiyanaykichispaq qosoqniykichis Yayaman llapa añaychayta yupaychaytawan qowaqchis chayqa—

21 Qankunatataq niykichis—qallariymantapacha kamasoqniykichista, munayniykichisman hina ruwanaykichispaq kuyurinaykichispaqwan samariyta qospasuykichis, p’unchawmanta p’unchawman waqaychasoqniykichista, huk ratumanta hukkaqman yanapasoqniykichistawan sirviwaqchis chayqa—niykichis, Payta tukuy nunaykichiswan sirviwaqchis chaypas, mana sirveq warmaraqmi kawaqchis.

22 Kamachiyninkunata waqaychanallaykichistataqmi qankunamanta Pay mañakun. Paytaq prometirqasunkichis, kamachiyninkunata waqaychawaqchis chayqa, kay hallp’api t’ikarinaykichista; manataqmi Payqa kuyurinchu chay nisqanmanta; chhaynaqa, kamachiyninkunata waqaychankichis chayqa, saminchasunkichismi, t’ikarichisunkichistaqmi.

23 Ñawpaqtaqa, Paymi kamarqasunkichis, kawsayniykichistataq qorqasunkichis, chaymantataq Payman manu kankichis.

24 Ishkay kaqpitaq, kamachisqasuykichisman hina ruwanaykichistan qankunamanta suyan, chay ruwasqaykichismantataq chay kikinpacha saminchasunkichis; chhaynatataq Pay chanincharqasunkichis. Manuraqtaqmi Payman kankichis, kunanpas kankichis, kallankichistaqmi wiñay-wiñaypaqpas; chhaynari iman kapusunkichis kikiykichis yupaychakunaykichispaq?

25 Kunantaq tapuykichis, atiwaqchischu qankuna kikiykichismanta imallatapas niyta? Manan nispan kutichisakichis. Manan niyta atiwaqchischu pachaq ñut’u hallp’an hinallapas kasqaykichista, chaypiwanpas ñut’u hallp’amantan kamasqa karqankichis, ichaqa, kamasoqniykichispan chaykuna.

26 Noqa kikiypas, inkanchis nispa waqyasqaykichis, manan qankuna kikiykichismanta aswan allinchu kani, noqapas hallp’amantan kani. Rikushankichistaqmi machu kasqayta, pachamamanman kay wañuq runa-kurkuyta haywanaypaq hinaña kasqayta.

27 Chhaynaqa—qankunata sirvirqaykichis, Yayaq ñawpaqenpi ch’uya luriwan purispa nispa qankunaman nisqayta hina, chhaynallatataqmi kunan p’unchaw huñunachimurqaykichis, mana ima huchayoq tarisqa kanaypaq, qankunamanta kamachiwasqan imaymanakunamanta Yayaq taripasqan kanaypaq sayareqtiy yawarniykichis noqa pataman mana hamunanpaq.

28 Qankunata niykichis: Yawarniykichismanta p’achaykunata maqchiy atinaypaqmi huñunachimurqaykichis, ayapanpayman urayunaypaqña kashaqtiy pachapi sumaqlla urayunaypaq. Mana wañuq nunaytaq hanaqpachapi takiqkunawan chanin Yayaq yupaychayninkunata takiypi huñunakunanpaq.

29 Astawanraqtaqmi qankunata nisaykichis, manaña astawan yachacheqniykichis nitaq inkaykichispas kayta atinayta qankunaman ninaypaq iman huñunachimurqaykichis.

30 Kunan pachapas anchatapunin llapan runa-kurkuy khatatatan, qankunaman rimarinaypaq kallpachakushaqtiy; ichaqa, Wiraqocha Yayan yanapawan, qankunaman rimarinaypaq ima kachariwan; Paytaq kamachiwarqan, churiy Mosiah qankunaq inkaykichis, kamachisoqniykichis ima kasqanta kunan p’unchaw qankunaman ninaypaq.

31 Kunantaq wawqeykuna, kunan pachakama ruwasqaykichista hina ruwanaykichistan munani. Kamachiyniykunata, taytaypa kamachiyninkunatawan waqaychasqaykichisman hina, chaytaq t’ikarirqankichis, awqaykichiskunaq makinkunaman urmanaykichismantataq hark’asqa karqankichis, chhaynallatataq churiypa kamachiyninkunata utaq paywan qankunaman qosqa kanan Yayaq kamachiyninkunata waqaychankichis chayqa, t’ikarinkichismi kay hallp’api, awqaykichiskunataq qankunapi mana ima atiyniyoq kanqa.

32 Ichaqa llaqtay, qhawakuychis, qankuna purapiñataq maqanakuykuna hatarinman, taytay Mosiahq rimasqan millay nuna kasuymanñataq k’irarikuwaqchis.

33 Chay millay nuna kasuy munaq runapaqqa huk llakin kamachisqa kan; payta uyariyta munan, huchanpi qhepaspataq wañun chayqa, kikin nunanpaq kundenasiontan ukyan. Wiñay-wiñaypaq muchuytan chaninchayninta hina chaskin, pay kikinpa yachayninman kontrata Yayaq kamachisqa siminta mana kasuspa.

34 Qankunata nisaykichis, manan pipas qankuna purapi kanchu, ichaqa huch’uy erqechaykichiskunalla, kaykunamanta mana yachachisqa kaqkuna; hanaqpachapi Tataykichisman wiñaypaqpuni manu kasqaykichista mana yachaq, llapa kapusoqniyichista kasqaykichitawan Payman qonaykichispaq; Jerusalenmanta taytanchis Lehi lloqsimusqan pachakama qollanan unanchaqkunaq rimasqan unanchaykunayoq kaq qelqakunamanta yachachisqa kasqaykichis mana yachaqpiwan;

35 Kunankama taytanchiskunaq llapan rimasqankunamantapas. Wiraqochaq kamachisqantataqmi paykuna rimarqanku, chhaynaqa, chaninmi cheqaqtaqmi kaykuna.

36 Kunantaq qankunata nisaykichis wawqeykuna, kay llapan imaymanakunamanta yachasqaykichis yachachisqapiwan kasqaykichis pataman huchallikunkichis, rimasqa kasqan kontrataq rinkichis, Wiraqochaq Nunanmantataq ayqerinkichis qankunapi mana kananpaq, yachaysapaq ñanninpi pusanasuykichispaq, saminchasqa, t’ikarichisqa, qhawasqa ima kanaykichispaq chayqa—

37 Qankunata nisaykichis, kaykuna ruwaq runaqa, sut’in ankallikuypin Yaya kontra hatarin; chhaynaqa, millay nuna kasunanpaqmi k’irarikun, llapa chaninchaypa awqantaq tukupun; chhayna kaqtintaq mana paypichu Wiraqocha tiyan. Manan Payqa tiyanchu qhelli wasikunapiqa.

38 Chhaynaqa, chay runa mana yuyayninman kutirimunmanchu chayqa, Yayaq awqan qhepaspataq wañun chayqa, hanaqpachaq chaninchayninpa mañakuyninmi mana-wañuq nunanta rikch’arichin pay kikinpa huchankuna yuyayman; chaytaq payta huch’uyyachin Wiraqochaq ñawpaqenpi, qhasqontataq huchawan, nanaywan, muchuywan ima hunt’achin, kaytaq mana wañuchiy atina nina, rawrayninkunataq wiñay-wiñaypaq seqarimun.

39 Kunantaq qankunata niykichis, khuyapakuyqa manan chay runapi derechuyoqchu; chhaynaqa, qhepa kaq imayna kayninqa, mana tukukuyniyoq muchuy awantaymi.

40 Qankuna machu runakuna, qankunapas wayna runakuna, rimayniykunata hamut’ay atiq huch’uy erqekunapas, sut’intan rimarirqaykichis hamut’ay atinaykichispaq. Huchallikuypi urmaqkunaq ancha millay kaypi kanankumanta yuyarinaykichispaq rikch’arinaykichistan Yayamanta mañakuni.

41 Astawanraqtaq—Yayaq kamachiyninkuna waqaychaqkunaq kusiy-kusi, saminchasqapiwan kayninkumanta yuyayukunaykichistan munani. Imaymanakunapin paykuna saminchasqa kanku, kay kawsaypi kaqpipas, nunapi kaqpipas; tukukuykamataq takyanqaku chaytaq, hanaqpachapi chaskisqa kanqaku, chhaynataq, mana hayk’aq tukukuq kusikuypi Yayawan tiyanankupaq. Yuyariychis, yuyariychis kaykuna cheqaq kasqanta. Wiraqocha Yayan kaykunata rimarirqan.