1 Hinataq, Wiraqochaq angelninpa payman qosqan rimaykunata inka Benjamin rimayta tukusqan pataman, muyureqnintinpi runakunata qhawarirqan, Wiraqochaq manchakuynin paykunaman urmasqanrayku panpaman urmasqankutataq rikurqan.

2 Aychakaq kayninkupitaq, ñut’u hallp’amanta aswan pishitaraq rikukusqaku karqan. Llapankutaq huk arullapi khaynata kallpawan qaparirqanku: Khuyapakuyniyoq kay, Cristoq ñak’ariyninpa yawarnintataq churaykuy, huchaykuq panpachayninta chaskinaykupaq, sonqoyku ch’uyanchasqa kananpaq. Hanaqpachata, kay pachata, llapa imaymanakunatawan kamaq, runakunaq wawankunaq chawpinman hamunan Yayaq Churin Jesucristopin iñiyku, nispa.

3 Hinaspataq, kay simikunata rimasqanku pataman, Wiraqochaq Nunan paykuna pataman urayamurqan, kusikuywan hunt’asqataq karqanku, huchankuq panpachayninta chaskispanku, ch’uya sonqoyoq kaspanku, paykunaman inka Benjamin rimasqan simikunaman hina hamoq Jesucristopi ancha hatunpuni iñiyninku kasqanrayku.

4 Inka Benjamintaq yapamanta siminta kicharispa khaynata paykunaman rimariyta qallarirqan: Qochuykuna, wawqeykuna, aylluykuna, llaqtay ima, yapamantan uyariwanaykichista munani, qankunaman rimarinay puchuq simikunata uyarinaykichispaq, hamut’anaykichispaqwan.

5 Yayaq sumaq kayninmanta yachay, kunan p’unchaw mana imapas kasqaykichis yachayman rikch’arichisunkichis, mana ima chaninniyoq urmasqa kaymanwan chayqa—

6 Qankunata niykichis, Yayaq sumaq kaynin, mana imawanpas tupachina atiynin, yachaysapa kaynin, sonqo ñit’iykukuynin, runakunaq wawankunapaq hatun ñak’ariynin yachaymanwan chayamurqankichis chayqa; hallp’a kamasqa kasqanmantapacha allichasqa ñak’ariytapas, Wiraqochapi kunfiyansan churaq runapaq qespiy hamunanpaq, k’uchiy-k’uchitaq kamachiyninkuna waqaychaypi kanqa, kawsaynin tukukunankamataq (kay wañuq runa-kurkuq kawsaynintan nini) iñiypi qatillanqa chayqa—

7 Noqaqa nini, kay runan qespiy chaskiq runa, pacha kamasqa kasqanmantapacha llapan runakunapaq; Adanpa urmasqanmantapacha kasqan runakunapaq, kunan kaq runakunapaq, pachaq tukukunankama llapan kaq runakunapaqwan allichasqa kasqan ñak’ariywan.

8 Khaynatan qespiy hamun. Manataqmi hukniraq qespiyqa kanchu, ichaqa kay rimasqa kaqlla. Manataqmi hukniraq ima ruwanakunapas kanchu runakuna qespichisqa kanankupaq, ichaqa, qankunaman rimarisqay ruwanakunalla.

9 Yayapi kreyiychis. Pay kasqanta, hanaqpachapi, kay pachapiwan llapan imaymanakunata Pay kamasqanta kreyiychis. Hanaqpachapi kay pachapiwan tukuy yachaysapa, tukuy atiyniyoqpiwan kasqanta kreyiychis. Wiraqochaq llapan hamut’ay atisqanta runakuna mana hamut’ay atinankuta kreyiychis.

10 Yapamanta, huchaykichiskunamanta kutirimunaykichista, chaykunata wikch’unaykichista, Yayaq ñawpaqenpitaq k’umurikunaykichista ima kreyiychis; cheqaq sonqowan Paymanta mañakuychis panpachanasuykichispaq. Kunantaq, kaykunapi kreyinkichis chayqa, chaykunata ruwanaykichispaq kallpachakuychis.

11 Yapamantataq niykichis ñawpaq nisqayta hina, Yayaq kusiqellpun yachayman chayamusqaykichisman hina, utaq sumaq kayninta reqsirqankichis, munakuyninmantataq mallirqankichis, nunaykichispi ancha hatun kusikuy ruwaq huchaykichiskuna panpachayta chaskisqaykichisman hina, chhaynallatataqmi yuyarinaykichista munayman, wiñaypaqtaq yuyayniykichispi hap’iychis Yayaq hatunpuni kayninta, mana imapas kasqaykichista, sumaq kayninta, qankunarayku hatun-muchuyninta mana llunp’aq wawakuna; ullpuykukuychis ullpuykukuypa ukhunkunapi, sapa p’unchaw Wiraqochaq sutinta waqyaspa, angelpa siminpa rimasqan hamuq imaymanakunapi iñiypi mana sayk’uy sayaspa.

12 Qankunata nisaykichis, kaykunata ruwankichis chayqa, wiñaypunin kusikunkichis, Yayaq munakuyninwan hunt’ataq kankichis, wiñaypunitaq huchaykichispa panpachayninta qhepachinkichis. Qankuna kamaqniykichispa kusiqellpun yachaypi, utaq chanin kaqta, cheqaq kaqta ima yachaypin wiñankichis.

13 Manataqmi qankuna pura k’irinakuyta munankichischu, ichaqa, sumaq kawsaypi tiyayllata, sapankaman paypa kasqanman hina qospa.

14 Manataqmi kacharinkichischu, yarqasqa, utaq q’alallapas wawaykichiskuna purinankuta. Manataqmi saqenkichischu Yayaq kamachisqa siminkunata p’akinankuta, ni paykuna pura maqanakunankutapas, churanakunankutapas; manataqmi taytanchiskunaq rimasqanku millay nuna, llapa chaninchaypa awqan, huchaq taytan saqrata servinankutapas.

15 Ichaqa, cheqaqpi, yuyaysapa kaypiwan ñanpi puriytan paykunata yachachinkichis. Paykuna pura munanakunankuta sirvinakunankutawanmi paykunaman yachachinkichis.

16 Qankuna kikiykichispas, yanapayniykichis nesitaqkunata yanapankichis. Kapusoqniykichismantataq nesitaqkunaman qonkichis, manataqmi saqenkichischu mañakuq runa yanqapaq mañakunasuykichista, hawaman wañunanpaq qarqospa.

17 Ichapaschá ninkichis: Pay kikinmi ñak’ariyninta kay runa apakamurqan; chhaynaqa, sayachisaqmi makiyta, manataq mikhunaymanta payman qosaqchu, manataqmi ima kapuwasqanmantapas payman qosaqchu mana ñak’arinanpaq, chaninmi ñak’ariynin, nispa.

18 Ichaqa, qanmanmi niyki runa, pipas kayta ruwan chayqa, chay kikin runan yuyayninman kutirimunanpaq hatun llank’ayniyoq. Chay ruwasqanmanta mana yuyayman kutirimunqachu chayqa, wiñaypaqmi chinkanqa, manataqmi Yayaq qhapaqsuyunpi kayniyoqchu kanqa.

19 Manachu llapanchis mañapakuqkuna kanchis. Manachu llapanchis kikin Kaqmanta, Yayamanta imatapas suyanchis; llapa kapuwasqanchismanta, mikhuymanta p’achamanta, qorimanta, qolqemanta, imaymana qhapaqyaykunamantawan?.

20 Kunanpachapas sutintan waqyasharqankichis, huchaykichiskuna panpachananta mañakuspaykichis. Yanqapaq mañakunaykichistachu Pay kacharirqan? Manan. Nunantan qankuna pataman hich’arimurqan, sonqoykichis kusikuywan hunt’akunantataq kacharirqan, simiykichistataq upallachirqan mana rimariy atinaykichispaq; chhayna ancha hatunmi kusikuyniykichis karqan.

21 Kunantaq, kawsayniykichisrayku, lliw kapusoqniykichisrayku, kasqaykichisrayku ima dependisqaykichis Yaya, kamasoqniykichis Yaya, imataña—chaskinaykichispaq kreyispa—iñiypi mañakusqaykichista, allin kaqta qosunkichis chayri, hayk’atawanraqtaq kapusoqniykichismanta qonakunaykichis.

22 Mana wañunanpaq qankunamanta kapusoqniykichismanta mañakuq runata taripankichis kundenankichispiwan chayqa, hayk’a chaninmi kundenasionniykichis kanqa, mana qankunaq kaq, ichaqa Yayaq kaqninkunata mana qosqaykichisrayku; Yayallaqtaqmi kawsayniykichispas; chaypiwanpas manan mañakunkichischu, nitaq wanankichischu ruwasqaykichiskunamanta.

23 Qankunata niykichis, ay haqay runamanta! Kapusqanqa paywanmi wañunqa. Kay hallp’api kasqan imaymanakunawan qhapaq kaq runakunamanmi kaykunata nini.

24 Yapamantataq wakchakunaman nini, mana kapuqniyoqkunaman, ichaqa asllayoq kaspaykichis huk p’unchawmanta hukkaqman kawsaqkunaman; mana kapusqasuykichisrayku mañakuqkunata mananchaqkunamanmi nini. Sonqoykichispi kayta ninaykichistan munayman: Mana kapuwasqanraykun mana qonichu, kapuwanman chayqa qoymanmi, nispa.

25 Kayta sonqoykichispi ninkichis chayqa, mana huchayoqmi qhepankichis, mana chayqa kundenasqan kankichis; chanintaqmi kundenasioniykichis, mana chaskisqaykichista munapakusqaykichisrayku.

26 Kunantaq qankunaman rimasqaykunarayku—mana huchayoq Yayaq ñawpaqenpi purinaykichispaq, huk p’unchawmanta hukkaqman huchaykichis panpachayta qhepachinaykichisrayku—wakchakunaman kapusqasuykichismanta qonaykichista munayman, sapanka runa kapusqanman hina: yarqayniyoqta mikhuchispa, q’alalla kaqta p’achaspa, onqoqkunamanta watukuspa, alliyanankuta mashkaspa, mashkaspa, nunapipas kay kawsaypi kaqpipas nesitasqankuman hina.

27 Rikuychistaq kay tukuy imaymanakuna yachaysapa kaypi, qayllallapiwan ruwakunanta; manan runamanta mañakunchu kallpan atisqanmanta aswantaraq p’itanantaqa. Ichaqa, k’uchin pay kanan, chaywan chanin kaqta aypananpaq; chhaynaqa, qayllallan llapa imaymanakuna ruwasqa kanan.

28 Pipas qankuna puramanta runamasinmanta mañakun chayqa, chay mañakusqanta rimanakusqanman hina kutichipunanta yuyarinaykichista munayman; mana chayqa huchallikunkichismi, ichapastaqchá runamasiykichistapas huchallichinkichis.

29 Tukunaypaqtaq—manan qankunata niykichismanchu, llapan huchallikuy atinaykichiskunataqa; imaymana ruwaykuna, ñankunapiwanmi kan, sinchi askha kaqtintaq mana yupayta atinichu.

30 Ichaqa, atinin qankunaman kay niyta: Qankuna kikiykichista, yuyasqaykichista, ruwayniykichistawan mana qhawakunkichischu chayqa, manataq Yayaq kamachiyninkunata waqaychankichischu, nitaq kawsayniykichispa tukukuyninkamachu Wiraqochanchis hamunanmanta uyarisqaykichispi iñiyniyoqchu kankichis chayqa, wañunaykichismi. Kunanqa runa, yuyariy, amataq qolluychu.