1 Yapamantataq wawqeykuna, uyariwanaykichispaq waqyarini, astawanraqmi qankunaman rimarinay kashan. Hamunan imaymanakunamantan qankunaman rimarinay kashan.

2 Qankunaman ninaykunaqa, Yayaq angelninpa yachachiwasqanmi. Paytaq niwarqan: Rikch’ariy, nispa; rikch’ariqtiytaq ñawpaqeypi pay sayashasqa.

3 Paytaq niwarqan: Rikch’ariy, qanman ninay rimaykunatataq uyariy. Ancha hatun kusikuypa sumaq willayninkunata qanman willanaypaqmi hamuni.

4 Uyarirqanmi Wiraqocha yayaman-rimarikuyniykikunata, chanin kasqaykitataq tariparqan, Paytaq qanman kachamuwarqan kusikunaykipaq; llaqtaykiman willanaykipaq, paykunapas kusikuywan hunt’asqa kanankupaq.

5 Hamushanmi pacha, manataqmi sinchi kharupichu kashan, atiywan kamacheq Llapa-atiyniyoq Wiraqocha—Paytaq karqan, kantaq wiñaymanta wiñaykama—hanaqpachamanta urayamunqa runakunaq wawankunaq chawpinman, hallp’amanta runa-kurkupitaq tiyanqa; runakuna purapitaq purinqa hatun utina ruwaykunata ruwaspa, onqoqkunata alliyachispa, wañusqakunata hatarichispa, wist’ukunata purichispa, ñawsakunata qhawachispa, upakunata uyarichispa, imaymana onqoykunata alliyachispa.

6 Saqrakunatataq qarqonqa, utaq runakunaq wawankunaq sonqonkupi tiyaq mana allin nunakunata.

7 Hinataq wateqaykunata, runa-kurkupi nanaykunata, yarqayta, ch’akiyta, sayk’uyta, runaq ñak’arinanmanta astawanraq mana wañuspa ñak’arinqa. Hunp’inanmantan yawar lloqsimunqa; chhayna hatunmi ñak’ariynin kanqa, llaqtanpa millay ruwayninkuna millay-millanankunarayku ima.

8 Jesucristo, Yayaq Churin, hanaqpachaq kay pachaq ima Taytan, qallariymantapacha imaymanakuna Kamaq nispa waqyasqataq kanqa. Mamanpa sutintaq Maria kanqa.

9 Paypa kaqmanmi hamunqa, Paypi iñeqtinku runakunaq wawankunaman qespiy hamunanpaq; kay tukuy imaymanakuna patamantaq, runata hinalla Payta kachinqaku, saqrayoqmi nispataq Payta maqanqaku, chakatanqaku ima.

10 Wañusqakunamantataq kinsañeqen p’unchawpi hatarimunqa, runakuna taripananpaqtaq sayashan. Kaykunaqa ruwasqa kan, runakunaq wawankunaman chanin taripana hamunanpaq.

11 Adanpa kamachi-p’akisqanrayku urmaqkunaq huchankunarayku, paykunamanta Yayaq munayninta mana yachaspa wañuqkunarayku, utaq mana yachaspanku huchallikuqkunarayku ima yawarnin ñak’arinqa.

12 Ichaqa ay, ay haqay runamanta, Yaya kontra ankallikusqanta yachaq runamanta! Qespiyqa manan hamunqachu chhayna runamanqa, ichaqa, yuyayman kutirimuywan Wiraqocha Jesucristopi iñiywan imalla.

13 Runakunaq llapan wawankunaq chawpinmantaq Wiraqocha Yaya qollanan unanchaqkunata kachamurqan, llapa ayllukunaman, llaqtakunaman, simikunaman ima kay imaymanakunata willanankupaq; chaywan Cristoq hamunanpi kreyiqkuna, huchankuna panpachayta tarinankupaq; ancha hatun kusikuywantaq kusikunankupaq, paykuna puramanpas Pay hamunmanña karqan hina.

14 Chaypiwanpas k’ullu umayoq llaqtan kasqantan Wiraqocha Yaya rikurqan, paykunamantaq huk kamachisqa-simita qorqan, Moisespa kamachisqa-simintapuni.

15 Askha unanchakunata, utirayaykunata, rikch’aykunata, llanthukunatawanmi hamuyninmanta paykunaman qhawachirqan. Qollanan unanchaqkunapas rimarqankun paykunaman Wiraqocha hamunanmanta, chaypiwanpas, rumiyachirqankun sonqonkuta; manataqmi hamut’arqankuchu Moisespa kamachisqa-simin mana imapaqpas allin kasqanta, ichaqa yawarninpa ñak’ariyninllawan.

16 Huch’uy wawakunaña huchallikuyta atinkuman chaypas, manan qespichisqachu kankuman. Ichaqa, qanta niyki, saminchasqan paykuna kanku, nispa. Adanpichu utaq imayna kayninkuraykuchu paykuna urmanku, chhaynallatataqmi Cristoq yawarnin huchankunata ñak’arin.

17 Astawanraqtaq niyki, manan hukniraq sutiqa qosqachu kanqa, nitaq hukniraq ruwanakunapas, ni hukniraq ñanpas runakunaq wawankunaman qespiy hamunanpaq, ichaqa, Llapa-atiyniyoq Wiraqochaq Cristoq sutillanpi, sutillanwan.

18 Taripanmi Pay, chanintaqmi taripayninkuna; erqe kaspallaraq wañuq erqetaq mana chinkanchu. Ichaqa, kundenasiontan kikin nunankupaq runakunaqa ukyanku, k’umurikuspa huch’uy erqechakuna hina mana wakeqtinkuqa; Llapa-atiyniyoq Wiraqocha Cristoq yawarninpi yawarninwan ima qespiy kasqanta, kunan kasqanta, hamunantawan mana kreyinqakuchu chayqa.

19 Kumun runaqa Yayaq awqanmi, hinataqmi karqan Adanpa urmayninmantapacha, hinallataqmi wiñay-wiñaypaqpas kanqa, Qollanan Nunaq munachiyninta mana uyakunqachu chayqa, kumun runa kasqanta wishch’uspa Wiraqocha Cristoq ñak’ariyninwan qollanan mana wakinqachu chayqa, erqe hina kasukuq, llanp’u sonqoyoq, ullpuykukuq, sonqo ñit’iykukuyniyoq, munakuyniyoq hunt’a, payman qonanpaq Wiraqochaq allin rikusqan imaymanakunaman kasukuy munaq, erqechu taytanta kasukun chhayna mana wakinqachu chayqa.

20 Astawanraqtaq: Hamunqan pacha, llapa llaqtakunaman, ayllukunaman, simikunaman, runakunamanwan Qespicheqpa yachaynin ch’eqerinanpaq.

21 Chay pacha hamuqtintaq, mana pipas Yayaq ñawpaqenpi mana ima huchayoqchu tarisqa kanqa—huch’uy erqechakunalla—ichaqa, yuyayman kutirimuyllawan, Llapa atiyniyoq Wiraqocha Yayaq sutinpi iñiyllapiwan.

22 Kunan pachapas Wiraqocha Yayayki kamachisqasuyki imaymanakunata llaqtaykiman yachacheqtiykipas, manan manahuchayoqchu paykuna tarisqa kanku Yayaq ñawpaqenpi, ichaqa, qanman rimarisqay simikunaman hinallan.

23 Kunanqa, Wiraqocha Yaya kamachimuwasqan simikunatan rimarqani.

24 Khaynatan Wiraqocha nin: K’anchaq sut’inchaq hinan kaykuna sayanqa kay runakuna kontra, taripana p’unchawpi; chaywantaq taripasqa kanqaku, sapanka runa ruwasqanman hina, allinña utaq mana-allinña chay ruwaykuna kaqtinpas.

25 Ruwayninku millay kanqa chayqa, paykuna kikinkuq huchankuta, millay-millanankutawan rikunankupaqmi churasqa kanku, chaytaq Wiraqochaq ñawpaqenmanta ñak’ariyman mana tukukuyniyoq muchuymanwan hitirichisqa, manañataq astawan chaymanta kutirimuyta atinkumanchu; chhaynaqa, kondenasiontan ukyarqanku paykuna kikinkuq nunankupaq.

26 Chhaynaqa, Yayaq phiñakuyninpa qerunmanta ukyarqanku, manataq chay chaninchay paykunata mananchayta atirqanchu, hark’asqa rurumanta mikhusqanrayku Adanta urmananmanta mana mananchay atisqanta hina. Chhaynaqa, manañan hayk’aspas khuyapakuyqa paykunata kutichiyta atinmanchu.

27 Ñak’ariyninkutaq, ninayoq sallu rumiyoqpiwan qocha hina; chaypa rawraynintaq mana qolluchiy atina, q’osñiynintaq wiñay-wiñaypaq seqarin. Chhaynatan Wiraqocha kamachimuwarqan. Hinataq kachun.