1 Ug nahitabo nga si Limhi ug ang iyang katawhan mibalik sa siyudad sa Nephi, ug misugod na usab sa pagpuyong malinawon sa yuta.

2 Ug nahitabo nga human sa daghang adlaw ang mga Lamanita misugod na usab sa pagkasuko batok sa mga Nephita, ug misugod sila sa pag-adto sa palibot nga mga utlanan sa yuta.

3 Karon wala sila mangahas sa pagpatay kanila, tungod sa panumpa nga gihimo sa ilang hari ngadto kang Limhi; apan sila mihampak kanila sa ilang mga aping, ug migamit sa ilang awtoridad batok kanila; ug misugod sa pagpatong ug bug-at nga palas-onon sa ilang mga buko-buko, ug miabog kanila sama nga sila mga amang nga asno—

4 Oo, kining tanan nahimo aron ang pulong sa Ginoo matuman.

5 Ug karon ang mga kasakit sa mga Nephita hilabihan ka bug-at, ug walay paagi nga maluwas nila ang ilang mga kaugalingon gikan sa ilang mga kamot, kay giliyokan sila sa mga Lamanita sa matag bahin.

6 Ug nahitabo nga ang katawhan nagsugod sa pagbagulbol ngadto sa hari tungod sa ilang mga kasakit; ug nagsugod sila sa pagtinguha nga makigbatok kanila sa gubat. Ug gilisod-lisod nila ang hari sa hilabihan pinaagi sa ilang mga pagsupak; busa mitugot siya nga sila mobuhat sumala sa ilang mga tinguha.

7 Ug nagpundok na usab sila, ug misul-ob sa ilang taming, ug nangadto batok sa mga Lamanita aron abogon sila gikan sa ilang yuta.

8 Ug nahitabo nga ang mga Lamanita mibuntog kanila, ug miabog kanila pagbalik, ug mipatay sa daghan kanila.

9 Ug karon dihay dako nga pagbangotan ug pagminatay taliwala sa katawhan ni Limhi, ang biyuda nagbangotan alang sa iyang bana, ang anak nga lalaki ug ang anak nga babaye nagbangotan alang sa ilang amahan, ug ang mga igsoon nga lalaki alang sa ilang mga igsoong lalaki.

10 Karon dihay daghan kaayong biyuda sa yuta, ug naghilak sila og kusog sa matag adlaw, kay ang dako nga kahadlok ngadto sa mga Lamanita midangat kanila.

11 Ug nahitabo nga ang kanunay nila nga paghilak mihagit sa nahibilin nga katawhan ni Limhi ngadto sa pagkasuko batok sa mga Lamanita; ug namalik sila aron makig-away, apan naabog sila pagbalik, nag-antos sa dako nga kapildihan.

12 Oo, namalik sila gani sa ikatulo nga higayon, ug nag-antos sa sama nga paagi; ug kadtong wala mamatay namauli pag-usab ngadto sa siyudad sa Nephi.

13 Ug nagpaubos sila sa ilang mga kaugalingon gani ngadto sa abog, mitugyan sa ilang mga kaugalingon ngadto sa yugo sa pagkaulipon, mitugyan sa ilang mga kaugalingon aron hampakon, ug aron abogon ngadto ug nganhi, ug pabug-atan, sumala sa mga tinguha sa ilang mga kaaway.

14 Ug nagpaubos sila sa ilang mga kaugalingon gani ngadto sa mga kinahiladman sa pagkamapainubsanon; ug nangamuyo sila sa hilabihan ngadto sa Dios; oo, gani sa tanan nga adlaw nangamuyo sila ngadto sa ilang Dios nga siya moluwas kanila gikan sa ilang mga kasakit.

15 Ug karon ang Ginoo dugay nga mitubag sa ilang pangamuyo tungod sa ilang mga sayop nga binuhatan; bisan pa niana ang Ginoo mitubag sa ilang mga pangamuyo, ug misugod sa paglukmay sa mga kasingkasing sa mga Lamanita nga misugod sila sa pagpagaan sa ilang mga palas-anon; apan wala makita sa Ginoo nga angay silang luwason gikan sa pagkaulipon.

16 Ug nahitabo nga sa hinay-hinay nagsugod sila sa pag-uswag sa yuta, ug nagsugod sa pagpasanay og lugas nga mas labaw kadaghan, ug mga gagmayng kahayopan, ug mga dagkong kahayopan, nga sila wala na mag-antos sa kagutom.

17 Karon dihay daghan kaayong babaye, labaw pa kay sa mga lalaki; busa si hari Limhi misugo nga ang matag lalaki kinahanglang mohatag og suporta sa panginabuhi sa mga biyuda ug sa ilang mga anak, nga sila dili mamatay sa kagutom; ug kini gihimo nila tungod sa kadaghan sa gidaghanon sa napatay.

18 Karon ang katawhan ni Limhi naghiusa kutob sa mahimo, ug nagbantay sa ilang lugas ug sa ilang mga gagmayng kahayopan;

19 Ug ang hari mismo wala na mosalig sa iyang mga tawo sa gawas sa mga paril sa siyudad, gawas kon magdala siya sa iyang mga bantay uban kaniya, nahadlok basin sa unsang mga paagi siya mahulog ngadto sa mga kamot sa mga Lamanita.

20 Ug mimando siya nga ang iyang katawhan kinahanglan mobantay libot sa yuta, nga sa ubang paagi ila untang madakpan kadtong mga pari nga milayas ngadto sa kamingawan, kinsa midagit sa mga anak nga babaye sa mga Lamanita, ug mao ang hinungdan sa ingon ka dako nga kalaglagan nga midangat kanila.

21 Kay nagtinguha sila sa pagdakop kanila aron ila silang masilotan; kay miabot sila ngadto sa yuta sa Nephi panahon sa kagabhion, ug mikuha sa ilang lugas ug daghan sa ilang bililhon nga mga butang; busa naghulat sila kanila.

22 Ug nahitabo nga wala nay kasamok tali sa mga Lamanita ug sa katawhan ni Limhi, gani hangtod sa panahon nga si Ammon ug ang iyang kaigsoonan miabot sa maong yuta.

23 Ug ang hari nga didto sa gawas sa mga ganghaan sa siyudad uban sa iyang bantay, nakakita kang Ammon ug sa iyang kaigsoonan; ug kay naghunahuna nga mga pari sila ni Noah busa misugo siya nga ipadakop sila, ug gaposon, ug ibalhog sa bilanggoan. Ug kon nahitabo pa nga mga pari sila ni Noah iya unta silang pahamtangan sa kamatayon.

24 Apan sa dihang nahibaloan niya nga dili diay kadto sila, apan nga sila iyang kaigsoonan, ug naggikan sa yuta sa Zarahemla, napuno siya sa labihan ka dako nga kamaya.

25 Karon si hari Limhi, sa wala pa moabot si Ammon, misugo og diyotay nga gidaghanon sa mga tawo aron sa pagpangita sa yuta sa Zarahemla; apan wala sila makatultol niini, ug nangasaag sila sa kamingawan.

26 Bisan pa niana, nakakaplag sila og usa ka yuta nga kanhi may nagpuyo nga katawhan; oo, usa ka yuta nga natabonan sa uga nga mga bukog; oo, usa ka yuta nga kanhi may nagpuyo nga katawhan ug nalaglag; ug sila, kay nagdahom nga mao kadto ang yuta sa Zarahemla, mibalik ngadto sa yuta sa Nephi, nga miabot didto sa mga utlanan sa yuta pipila ka adlaw sa wala pa moabot si Ammon.

27 Ug nagdala sila og talaan, gani talaan sa katawhan kansang mga bukog ilang nakaplagan; ug gikulit kini sa mga palid nga oro.

28 Ug karon si Limhi napuno na usab sa kamaya sa pagkasayod gikan sa ba-ba ni Ammon nga si hari Mosiah adunay linahi nga gasa gikan sa Dios, nga pinaagi niini makahubad siya sa ingon nga mga kinulit; oo, ug si Ammon usab nagmaya.

29 Apan si Ammon ug ang iyang kaigsoonan napuno sa kasubo tungod kay daghan kaayo sa ilang kaigsoonan ang napatay;

30 Ug usab nga si hari Noah ug ang iyang mga pari mao ang hinungdan nga ang katawhan nakabuhat og daghang sala ug mga sayop nga binuhatan batok sa Dios; ug nagbangotan usab sila tungod sa kamatayon ni Abinadi; ug usab tungod sa pagbiya ni Alma ug sa katawhan nga mikuyog uban kaniya, kinsa mitukod og usa ka simbahan sa Dios pinaagi sa kusog ug gahom sa Dios, ug sa katakos nga motuo sa mga pulong nga gipamulong ni Abinadi.

31 Oo, nagbangotan sila sa ilang pagbiya, kay wala sila masayod kon asa sila padulong. Karon malipayon unta sila nga mokuyog kanila, kay sila sa ilang kaugalingon nakasulod ngadto sa usa ka pakigsaad uban sa Dios aron sa pag-alagad kaniya ug sa pagtuman sa iyang mga sugo.

32 Ug karon sukad sa pag-abot ni Ammon, si hari Limhi nakasulod usab ngadto sa pakigsaad sa Dios, ug usab daghan sa iyang katawhan, sa pag-alagad kaniya ug sa pagtuman sa iyang mga sugo.

33 Ug nahitabo nga si hari Limhi ug daghan sa iyang katawhan matinguhaon nga magpabunyag; apan walay usa diha sa yuta nga adunay awtoridad gikan sa Dios. Ug si Ammon midumili sa pagbuhat niini nga butang, nga nag-isip sa iyang kaugalingon nga dili takos nga sulugoon.

34 Busa wala sila niadtong panahona mopundok sa ilang kaugalingon ngadto sa usa ka simbahan, apan nagpaabot sa Espiritu sa Ginoo. Karon matinguhaon sila nga mahimong sama gayod kang Alma ug sa iyang kaigsoonan, kinsa milayas ngadto sa kamingawan.

35 Matinguhaon sila nga mabunyagan isip nga saksi ug pagpamatuod nga andam sila nga moalagad sa Dios sa tibuok nilang mga kasingkasing; bisan pa niana ilang gipatas-an ang ilang panahon; ug ang asoy sa ilang bunyag ihatag sa lain nga bahin.

36 Ug karon ang tanang paningkamot ni Ammon ug sa iyang katawhan, ug ni hari Limhi ug sa iyang katawhan, mao ang pagluwas sa ilang kaugalingon gikan sa mga kamot sa mga Lamanita ug gikan sa pagkaulipon.