1 Karon si Alma, kay gipasidan-an sa Ginoo nga ang kasundalohan ni hari Noah mosulong kanila, ug kay mipahibalo niini ngadto sa iyang katawhan, busa ilang gipundok ang ilang gagmayng kahayopan, ug midala sa ilang mga lugas, ug mibiya ngadto sa kamingawan sa wala pa moabot ang kasundalohan ni hari Noah.

2 Ug gilig-on sila sa Ginoo, nga ang katawhan ni hari Noah wala makaapas kanila aron laglagon sila.

3 Ug walo ka adlaw sila nga milayas ngadto sa kamingawan.

4 Ug miabot sila sa usa ka yuta, oo, gani usa ka maanindot kaayo ug makapahimuot nga yuta, usa ka yuta nga adunay dalisay nga tubig.

5 Ug gipabarog nila ang ilang mga tolda, ug misugod sa pagtikad sa yuta, ug misugod sa pagtukod og mga gambalay; oo, mga kugihan sila, ug naghago sa hilabihan.

6 Ug ang katawhan nagtinguha nga si Alma mahimo nilang hari, kay gihigugma siya sa iyang katawhan.

7 Apan miingon siya ngadto kanila: Tan-awa, dili kinahanglan nga magbaton kita og hari; kay ang Ginoo miingon: Ayaw ninyo isipa nga ang usa ka tawo labaw kay sa laing tawo, o dili usab angay nga ang usa ka tawo mohunahuna sa iyang kaugalingon nga labaw sa uban; busa sultihan ko kamo nga dili kinahanglan nga kamo adunay usa ka hari.

8 Hinuon, kon posible man nga makabaton kamo kanunay og makiangayon nga mga tawo aron mahimo nga inyong hari nan maayo alang kaninyo nga adunay hari.

9 Apan hinumdomi ang pagkadaotan ni hari Noah ug sa iyang mga pari; ug ako mismo sa akong kaugalingon nabitik sa laang, ug nakahimo og daghang mga butang nga salawayon sa panan-aw sa Ginoo, nga maoy hinungdan sa akong hilabihan nga paghinulsol;

10 Bisan pa niana, human sa daghang kalisdanan, ang Ginoo naminaw sa akong mga pangamuyo, ug mitubag sa akong mga pag-ampo, ug mihimo kanako nga instrumento sa iyang mga kamot sa pagdala sa daghan kaayo kaninyo ngadto sa kahibalo sa iyang kamatuoran.

11 Bisan pa, niini dili ako mopasigarbo, kay ako mismo dili takos nga mopasigarbo sa akong kaugalingon.

12 Ug karon sultihan ko kamo, dugay na kamong gidaogdaog ni hari Noah, ug naulipon ngadto kaniya ug sa iyang mga pari, ug nadala sa pagkadaotan pinaagi kanila; busa nahigot kamo sa mga gapos sa pagkadaotan.

13 Ug karon kay naluwas na man kamo pinaagi sa gahom sa Dios gikan niini nga mga gapos; oo, gani gikan sa mga kamot ni hari Noah ug sa iyang katawhan, ug usab gikan sa mga gapos sa pagkadaotan, gani ako nagtinguha nga kamo kinahanglan mobarog nga lig-on niini nga kagawasan diin kamo nahimong gawasnon, ug nga dili kamo mosalig ni bisan kinsa nga tawo aron mahimong hari kaninyo.

14 Ug usab ayaw pagsalig ni bisan kinsa nga mahimo nga inyong magtutudlo ni inyong tig-alagad, gawas kon siya usa ka tawo sa Dios, naglakaw subay sa iyang mga paagi ug naghupot sa iyang mga sugo.

15 Sa ingon niana gitudloan ni Alma ang iyang katawhan, nga matag tawo kinahanglan mohigugma sa iyang isigkatawo sama sa iyang kaugalingon, nga kinahanglan walay panagbingkil taliwala kanila.

16 Ug karon, si Alma mao ang ilang labaw nga pari, kay siya man ang magtutukod sa ilang simbahan.

17 Ug nahitabo nga walay usa nga nakadawat og awtoridad sa pagsangyaw o sa pagtudlo gawas kon pinaagi kaniya gikan sa Dios. Busa iyang gipahinungod ang tanan nilang mga pari ug ang tanan nilang mga magtutudlo; ug walay usa nga gipahinungod gawas kon sila makiangayon nga mga tawo.

18 Busa gibantayan nila ang ilang katawhan, ug gialimahan sila sa mga butang kabahin sa pagkamatarong.

19 Ug nahitabo nga misugod sila sa pag-uswag sa hilabihan dinhi sa yuta; ug ilang ginganlan ang yuta og Helam.

20 Ug nahitabo nga midaghan sila ug miuswag sa hilabihan sa yuta sa Helam; ug nagtukod sila og usa ka siyudad, nga ginganlan nila og siyudad sa Helam.

21 Bisan pa niana nakita sa Ginoo nga angayang pantonon ang iyang katawhan; oo, gisulayan niya ang ilang pailob ug ang ilang pagtuo.

22 Bisan pa niana—kinsa kadto nga mobutang sa iyang pagsalig diha kaniya ang mao nga tawo pagabayawon sa kataposan nga adlaw. Oo, ug busa mao kadto ang nahitabo niini nga katawhan.

23 Kay tan-awa, ipakita ko kaninyo nga gidala sila ngadto sa pagkaulipon, ug walay usa nga makaluwas kanila kondili ang Ginoo nga ilang Dios, oo, gani ang Dios ni Abraham ug ni Isaac ug ni Jacob.

24 Ug nahitabo nga siya miluwas gayod kanila, ug siya mipakita gayod sa iyang dakong gahom ngadto kanila, ug dako ang ilang mga pagmaya.

25 Kay tan-awa, nahitabo nga samtang didto sila sa yuta sa Helam, oo, sa siyudad sa Helam, samtang nagtikad libot sa yuta, tan-awa ang kasundalohan sa mga Lamanita anaa didto sa mga utlanan sa yuta.

26 Karon nahitabo nga milayas ang kaigsoonan ni Alma gikan sa ilang mga umahan, ug nagpundok sila sa ilang mga kaugalingon didto sa siyudad sa Helam; ug nangahadlok kaayo sila tungod sa pagtungha sa mga Lamanita.

27 Apan miduol si Alma ug mibarog taliwala kanila, ug miawhag kanila nga dili sila angay nga mahadlok, apan nga sila kinahanglan nga mahinumdom sa Ginoo nga ilang Dios ug siya moluwas kanila.

28 Busa gipugngan nila ang ilang mga kahadlok, ug misugod sa pagpangamuyo sa Ginoo nga lukmayon niya ang mga kasingkasing sa mga Lamanita, nga sila unta mopalingkawas kanila, ug sa ilang mga asawa, ug sa ilang mga anak.

29 Ug nahitabo nga gilukmay sa Ginoo ang mga kasingkasing sa mga Lamanita. Ug si Alma ug ang iyang kaigsoonan miduol ug mitugyan sa ilang mga kaugalingon ngadto sa ilang mga kamot; ug ang mga Lamanita mipanag-iya sa yuta sa Helam.

30 Karon ang kasundalohan sa mga Lamanita, nga misunod sa katawhan ni hari Limhi, nangasaag sa kamingawan sulod sa daghang adlaw.

31 Ug tan-awa, nakaplagan nila kadtong mga pari ni hari Noah, sa usa ka dapit nga gitawag nila og Amulon; ug misugod sila sa pagpanag-iya sa yuta sa Amulon ug misugod sa pagtikad sa yuta.

32 Karon ang ngalan sa pangulo niadto nga mga pari mao si Amulon.

33 Ug nahitabo nga si Amulon nagpakiluoy sa mga Lamanita; ug iya usab nga gipaadto ang ilang mga asawa, kinsa mga anak nga babaye sa mga Lamanita, aron magpakiluoy sa ilang kaigsoonan, nga dili nila patyon ang ilang mga bana.

34 Ug ang mga Lamanita naluoy ni Amulon ug sa iyang kaigsoonan, ug wala mopatay kanila, tungod sa ilang mga asawa.

35 Ug si Amulon ug ang iyang kaigsoonan mitipon sa mga Lamanita, ug nagpanaw sila sa kamingawan aron mangita sa yuta sa Nephi sa dihang nakaplagan nila ang yuta sa Helam, nga gipanag-iya ni Alma ug sa iyang kaigsoonan.

36 Ug nahitabo nga ang mga Lamanita misaad ngadto kang Alma ug sa iyang kaigsoonan, nga kon sila motudlo kanila sa agianan paingon sa yuta sa Nephi nga ilang itugyan ngadto kanila ang ilang kinabuhi ug ang ilang kalingkawasan.

37 Apan human si Alma makapakita kanila sa agianan paingon sa yuta sa Nephi ang mga Lamanita wala motuman sa ilang saad; apan mibutang sila og mga bantay libot sa yuta sa Helam, alang kang Alma ug sa iyang kaigsoonan.

38 Ug ang nahibilin kanila miadto sa yuta sa Nephi; ug ang uban kanila mibalik sa yuta sa Helam, ug usab gidala nila ang mga asawa ug ang mga anak sa mga bantay kinsa nahibilin didto sa yuta.

39 Ug ang hari sa mga Lamanita mitugot kang Amulon nga siya mahimong hari ug usa ka magmamando sa iyang katawhan, kinsa tua sa yuta sa Helam; bisan pa niana siya walay gahom sa pagbuhat sa bisan unsa nga supak sa kabubut-on sa hari sa mga Lamanita.