1 Ket napasamak a nakagun-od iti parabur ni Amulon iti imatang ti ari dagiti Lamanita; ngarud, impalubos ti ari dagiti Lamanita kenkuana ken dagiti kakabsatna a nasken a madutokan ida a mannursuro kadagiti taona, wen, uray pay dagiti tattao nga adda iti daga a Shemlon, ken iti daga a Shilom, ken iti daga nga Amulon.

2 Ta tinagikuan dagiti Lamanita amin dagitoy a daga; ngarud, nangdutok ti ari dagiti Lamanita iti ar-ari ti amin kadagitoy a daga.

3 Ket ita Laman ti nagan ti ari dagiti Lamanita, ta naipanagan kenkuana ti nagan ti amana; ket ngarud napanaganan nga ari Laman. Ket isu ti ari ti nakaad-adu a tao.

4 Ket nangdutok iti mannursuro kadagiti kakabsat ni Amulon iti tunggal daga a tinagikua dagiti taona; ket kasta a nangrugi a naisuro ti pagsasao ni Nephi kadagiti amin a tao dagiti Lamanita.

5 Ket taoda a mannakigayyem iti tunggal maysa; nupay kasta saanda ammo ti Dios; saan met nga insuro dagiti kabsat ni Amulon ti aniaman a banag maipanggep iti Apo a Diosda, kasta met ti linteg ni Moises; wenno insuroda man la koma kadakuada dagiti balikas ni Abinadi;

6 Ngem insuroda ida a nasken nga ituloyda ti kasuratanda, ken ta mabalinda ti agsisinnurat iti tunggal maysa.

7 Ket kasta a nangrugi nga immadu ti kinabaknang dagiti Lamanita, ken nangrugida a makimaro iti tunggal maysa ket agbalinda a nasaliwanwan, ken nangrugida a nasikap ken masirib a tattao, kas iti pagsiriban ti lubong, wen, nakasiksikap unay a tattao, maay-ayo iti amin a kita ti kinadakes ken panagagum, malaksid kadagiti kakabsatda.

8 Ket ita napasamak a rinugian ni Amulon nga aramaten ti turay ken ni Alma ken dagiti kabsatna, ken rinugianna nga indadanes, ken imbilinna nga idadanes dagiti annakna dagiti annakda.

9 Ta am-ammo ni Amulon ni Alma, a maysa idi kadagiti saserdote ti ari, ken isu ti namati kadagiti balikas ni Abinadi ken napapanaw iti sanguanan ti ari, ket ngarud kinapungtotna; ta iturayan ni ari Laman, ngem inaramatna ti bilegna kadakuada, ket nadagsen a trabaho ti impakatna kadakuada, ken nangtuding iti mangiwanwan kadakuada.

10 Ket napasamak a nakaro unay ti panagrigatda isu a rinugianda nga umararaw a sipapasnek iti Dios.

11 Ket binilin ida ni Amulon a nasken nga isardengda dagiti ararawda; ket nangikabil kadagiti guardia a mangsiput kadakuada, ta mapapatay ti asino man a matiliwan nga umar-araraw iti Dios.

12 Ket saan nga impangngeg ni Alma ken dagiti taona ti ararawda iti Apo a Diosda, ngem imbukbokda ti puspusoda kenkuana; ket ammona ti araraw ti puspusoda.

13 Ket napasamak a dimteng kadakuada ti timek ti Apo iti panagrigrigatda, a kinunana: Yangadyo dagiti uloyo ket maliwliwakayo, ta ammok ti katulagan nga inaramidyo kaniak; ket makitulagak kadagiti tattaok ken wayawayaak ida manipud iti pannakaadipen.

14 Ket palag-anekto met dagiti dagensen nga adda kadagiti abagayo, tapno saanyo marikna iti kaaddada iti likudyo, uray pay bayat iti pannakaadipenyo; ket aramidekto daytoy tapno agbalinkayo a saksi kalpasanna, ken tapno maammuanyo a pudno a siak, ti Apo a Dios, sarungkarak dagiti tattaok iti panagrigrigatda.

15 Ket ita napasamak a limmag-an dagiti dagensen a naipabaklay ken ni Alma ken dagiti kabsatna; wen, pinatibker ida ti Apo tapno maibturanda dagiti dagensenda a nalaklaka, ket pinaiturayanda a siraragsak ken addaan iti kinaanus iti amin a pagayatan ti Apo.

16 Ket napasamak a kasta unay ti pammatida ken ti panagituredda isu a dimteng manen kadakuada ti timek ti Apo, a nagkuna: Agliwliwakayo, agsipud ta wayawayaankayonto iti pannakaadipenyo inton bigat.

17 Ket kinunana ken ni Alma: Mapanka iti sanguanan dagitoy a tao, ket kuyogenkanto ket wayawayaakto dagitoy a tao iti pannakaadipen.

18 Ita napasamak nga inummong a sangsangkamaysa da Alma ken dagiti taona iti rabii dagiti arbanda, kasta met dagiti bukbukelda; wen, nagpatnagda a nangum-ummong a sangsangkamaysa kadagiti arbanda.

19 Ket iti agsapa pinaturog ti Apo dagiti Lamanita iti nargaan, wen, ken pinaturogna iti nargaan amin dagiti mangiwanwanda.

20 Ket nagturong da Alma ken dagiti taona iti langalang; ket idi nakapagdaliasatdan iti nagmalem impatakderda dagiti toldada iti tanap, ket ninagananda ti tanap iti Alma, gapu ta indauluanna ida iti langalang.

21 Wen, ket imbukbokda ti panagyamanda iti Dios iti tanap ti Alma gapu iti kinamanangngaasina kadakuada, ken pinalag-anna dagiti dagensenda, ken winayawayaanna ida iti pannakaadipen; agsipud ta naadipenda, ket awan ti asino man a makawayawaya kadakuada malaksid ti Apo a Diosda.

22 Ket nagyamanda iti Dios, wen, napigsa ti timek dagiti amin a lallakida ken amin dagiti babbaida ken amin dagiti annakda a makapagsao iti panangidaydayawda iti Diosda.

23 Ket ita kinuna ti Apo ken ni Alma: Darasem ket pumanawka ken dagitoy a tao ditoy a daga, ta nakariingen dagiti Lamanita ket kamatendakayo; ngarud pumanawkayo ditoy a daga, ket pagsardengek dagiti Lamanita ditoy a tanap tapno saanda makamatan dagitoy a tao.

24 Ket napasamak a pimmanawda iti tanap, ket nagdaliasatda iti langalang.

25 Ket kalpasan ti kaaddada iti langalang iti sangapulo ket dua nga aldaw nakadanonda iti daga a Zarahemla; ket inawat met ida ni ari Mosiah a siraragsak.