1 Ket ita kayat ni ari Mosiah nga aguummong a sangsangkamaysa amin dagiti tattao.

2 Ita saan unay nga adu dagiti annak ni Nephi, wenno saan unay nga adu dagiti kaputotan ni Nephi, a kas iti kaadu dagiti tattao ni Zarahemla, a kaputotan ni Mulek, ken dagiti simmurot kenkuana iti langalang.

3 Ket saan unay nga adu dagiti tattao ni Nephi ken dagiti tattao ni Zarahemla a kas iti kaadu dagiti Lamanita; wen, awan pay a kagudua ti kaaduda.

4 Ket ita nagtataripnong a sangsangkamaysa amin dagiti tattao ni Nephi, kasta met amin dagiti tattao ni Zarahemla, ket naguummongda a sangsangkamaysa iti dua a ragup.

5 Ket napasamak a binasa ni Mosiah, ken imbilinna a maibasa, dagiti kasuratan ni Zeniff kadagiti taona; wen, binasana dagiti kasuratan dagiti tattao ni Zeniff, manipud iti panawen nga ipapanawda iti daga a Zarahemla agingga iti panagsublida manen.

6 Ken binasana met dagiti pakaammo ni Alma ken dagiti kabsatna, ken ti amin a panagrigrigatda, manipud iti panawen nga ipapanawda iti daga a Zarahemla agingga iti panawen a panagsublida manen.

7 Ket ita, idi inggibus ni Mosiah ti panangbasana kadagiti kasuratan, nasdaaw ken nagsiddaaw dagiti taona a nabati iti daga.

8 Agsipud ta saanda ammo ti panunotenda; agsipud ta idi maimatanganda dagiti nawayawayaan manipud iti pannakaadipen napnoda iti napalaus a rag-o.

9 Ket manen, napnoda iti leddaang idi malagipda dagiti kabsatda a pinapatay dagiti Lamanita, ket uray pay a nagarubos dagiti lua iti panagladingitda.

10 Ket manen, idi malagipda ti madagdagus a kinamanangngaasi ti Dios, ken ti bilegna a nangwayawaya kada Alma ken dagiti kabsatna manipud kadagiti ima dagiti Lamanita ken iti pannakaadipen, impigsada ti timekda ken nagyaman iti Dios.

11 Ket manen, idi malagipda dagiti Lamanita, a kakabsatda, iti kinamanagbasol ken narugit a kasasaadda, napnoda iti saem ken ladingit gapu iti pagimbagan dagiti kararuada.

12 Ket napasamak a dagidiay annak ni Amulon ken dagiti kabsatna, a nangasawa kadagiti babbalasang dagiti Lamanita, saanda a naay-ayo iti ugali dagiti ammada, ket saandan a kayat a maawagan iti nagnagan ti ammada, ngarud inawatda iti bagbagida ti nagan ni Nephi, tapno maawaganda nga annak ni Nephi ken maibilangda kadagiti maawagan a Nephita.

13 Ket ita naibilang a Nephita ti amin a tao ti Zarahemla, ket daytoy ket gapu iti kaawan ti nakaitalkan ti pagarian malaksid dagidiay laeng an-annabo ni Nephi.

14 Ket ita napasamak nga idi malpas ni Mosiah nga agsao ken nangibasa kadagiti tattao, tinarigagayanna nga agsao met ni Alma kadagiti tattao.

15 Ket nagsao ni Alma kadakuada, idi makapaguummongda a sangsangkamaysa iti dakkel a ragup, ket napan iti tunggal ragup, ket napan nangikaskasaba kadagiti tattao iti panagbabawi ken pammati iti Apo.

16 Ket ginutugotna dagiti tattao ni Limhi ken dagiti kabsatna, amin dagidiay nawayawayaanen manipud iti pannakaadipen, a nasken a laglagipenda a ti Apo ti nangwayawaya kadakuada.

17 Ket napasamak a kalpasan ti panangisuro ni Alma kadagiti tattao ti adu a bambanag, ket inggibusnan ti pannakisaona kadakuada, a tinarigagayan ni ari Limhi ti pannakabuniagna; ken tinarigagayan amin dagiti taona ti mabuniagan met.

18 Ngarud, timmapog ni Alma iti danum ket binnuniaganna ida; wen, binunniaganna ida iti wagas nga inaramid na kadagiti kakabsatna iti danum ti Mormon; wen, ket kas kaadu kadagiti binnungiaganna ti nagbalin a kameng ti simbaan ti Dios; ket gapu daytoy iti pammatida kadagiti balikas ni Alma.

19 Ket napasamak a pinalubosan ni ari Mosiah ni Alma a mangbangon iti simbaan iti amin a daga ti Zarahemla; ken inikkanna iti bileg a mangorden kadagiti saserdote ken mannursuro iti tunggal simbaan.

20 Ita naaramid daytoy gapu iti kaadu ti tao ket saan a kabaelan a matarawidwidan ida amin iti maymaysa a mannursuro; wenno mangngegda ti amin a balikas ti Dios iti maymaysa a pagtitiponan.

21 Ngarud tiniponda a sangsangkamaysa ti bagbagida iti sabasabali a grupo, maawaganda ida a simbaan; addaan ti tunggal simbaan kadagiti saserdote ken mannursuro, ket ikasaba ti tunggal saserdote ti balikas a mayannurot iti naggapu iti inbaga iti ngiwat ni Alma.

22 Ket kasta, uray pay iti kaadu ti simbaan maymaysada laeng a simbaan, wen, uray pay iti simbaan ti Dios; agsipud ta awan ti ania man a naikasaba iti amin a simbaan malaksid iti panagbabawi ken pammati iti Dios.

23 Ket ita addaan iti pito a simbaan ti daga a Zarahemla. Ket napasamak nga asino man nga agtarigagay nga umawat iti nagan ni Cristo, wenno ti Dios, nagkamengda kadagiti simbaan ti Dios;

24 Ket naawaganda iti tattao ti Dios. Ket imbukbok ti Apo ti Espirituna kadakuada, ket nabendisionanda, ken rimmang-ayda iti daga.