1 Ug karon gimando ni hari Mosiah nga magpundok ang tanang katawhan.

2 Karon dili kaayo ingon ka daghan ang mga anak ni Nephi, o ingon ka daghan ang mga kaliwat ni Nephi, kay sa katawhan ni Zarahemla, kinsa usa ka kaliwat ni Mulek, ug niadtong kinsa mikuyog kaniya ngadto sa kamingawan.

3 Ug dili kaayo ingon ka daghan ang katawhan ni Nephi ug ang katawhan ni Zarahemla kay sa mga Lamanita; oo, wala sa katunga ang ilang gidaghanon.

4 Ug karon ang tanang katawhan ni Nephi nagkapundok, ug usab ang tanang katawhan ni Zarahemla, ug sila nagpundok sa duha ka pundok.

5 Ug nahitabo nga si Mosiah mibasa, ug misugo nga basahon, ang mga talaan ni Zeniff ngadto sa iyang katawhan; oo, gibasa niya ang mga talaan sa katawhan ni Zeniff, gikan sa panahon nga sila mibiya sa yuta sa Zarahemla hangtod nga nakabalik na usab sila.

6 Ug gibasa usab niya ang asoy ni Alma ug sa iyang kaigsoonan, ug ang tanan nilang mga kasakit, gikan sa panahon sa ilang pagbiya sa yuta sa Zarahemla hangtod sa panahon nga nakabalik na usab sila.

7 Ug karon, sa dihang gitapos ni Mosiah ang pagbasa sa mga talaan, ang iyang katawhan nga nagpabilin sa yuta, natingala ug nahingangha.

8 Kay wala sila masayod unsa ang hunahunaon; kay sa diha nga nakakita sila niadtong giluwas gikan sa pagkaulipon napuno sila sa hilabihan ka dako nga pagmaya.

9 Ug usab, sa dihang naghunahuna sila sa ilang kaigsoonan kinsa gipamatay sa mga Lamanita napuno sila sa kasubo, ug gani mipaagas og daghang luha sa kasubo.

10 Ug usab, sa dihang naghunahuna sila sa direkta nga kaayo sa Dios, ug sa iyang gahom sa pagluwas ni Alma ug sa iyang kaigsoonan gikan sa mga kamot sa mga Lamanita ug sa pagkaulipon, gibayaw nila ang ilang mga tingog ug nagpasalamat sa Dios.

11 Ug usab, sa diha nga naghunahuna sila sa mga Lamanita, kinsa ilang kaigsoonan, sa ilang makasasala ug mahugaw nga kahimtang, napuno sila sa kasakit ug tumang kaguol alang sa kaayohan sa ilang mga kalag.

12 Ug nahitabo nga kadtong mga kaliwat ni Amulon ug sa iyang kaigsoonan, kinsa nangasawa sa mga anak nga babaye sa mga Lamanita, wala mahimuot sa pamatasan sa ilang mga amahan, ug dili na sila gustong tawagon sa mga ngalan sa ilang mga amahan, busa gidala nila sa ilang kaugalingon ang ngalan ni Nephi, nga sila unta pagatawagon nga mga kaliwat ni Nephi ug malakip niadtong kinsa gitawag nga mga Nephita.

13 Ug karon ang tanang katawhan ni Zarahemla giapil og ihap kauban sa mga Nephita, ug kini tungod kay walay laing gitugyanan sa gingharian gawas niadtong kinsa mga kaliwat ni Nephi.

14 Ug karon nahitabo nga sa dihang si Mosiah mitapos sa iyang pakigpulong ug pagbasa ngadto sa katawhan, gitinguha niya nga si Alma mamulong usab ngadto sa katawhan.

15 Ug si Alma namulong ngadto kanila, dihang nagkapundok sila sa dagkong mga pundok, ug miadto siya gikan sa usa ka pundok ngadto sa lain, nagsangyaw ngadto sa katawhan sa paghinulsol ug pagtuo sa Ginoo.

16 Ug giawhag niya ang katawhan ni Limhi ug ang iyang kaigsoonan, ang tanan nga naluwas gikan sa pagkaulipon, nga kinahanglan silang mohinumdom nga ang Ginoo ang nagluwas kanila.

17 Ug nahitabo nga sa pagkahuman ni Alma og tudlo sa katawhan sa daghan nga butang, ug gitapos ang iyang pakigpulong ngadto kanila, nga si hari Limhi nagmatinguhaon nga siya mabunyagan; ug ang tanan niyang katawhan nagmatinguhaon nga sila mabunyagan usab.

18 Busa, miadto si Alma sa tubig ug mibunyag kanila; oo, siya mibunyag kanila, oo, siya mibunyag kanila subay sa paagi nga iyang gibuhat sa iyang kaigsoonan didto sa katubigan sa Mormon; oo, ug ingon sa ka daghan sa iyang gibunyagan nahimong sakop sa simbahan sa Dios; ug kini tungod sa ilang pagtuo sa mga pulong ni Alma.

19 Ug nahitabo nga si hari Mosiah mitugot kang Alma nga motukod siya og mga simbahan sa tibuok yuta sa Zarahemla; ug mihatag kaniya og awtoridad sa pag-orden og mga pari ug mga magtutudlo sa matag simbahan.

20 Karon gihimo kini tungod kay adunay daghan nga katawhan nga silang tanan dili madumala pinaagi sa usa lamang ka magtutudlo; dili usab makadungog silang tanan sa pulong sa Dios sa usa lamang ka panagpundok;

21 Busa gipundok nila ang ilang mga kaugalingon sa nagkalainlaing mga pundok, nga gitawag og mga simbahan; matag simbahan adunay ilang mga pari ug ilang mga magtutudlo, ug ang matag pari nagsangyaw sa pulong sumala sa gisulti ngadto kaniya pinaagi sa ba-ba ni Alma.

22 Ug sa ingon niana, bisan pa sa kadaghan sa mga simbahan silang tanan usa lamang ka simbahan, oo, gani ang simbahan sa Dios; kay walay gisangyaw sa tanan nga simbahan gawas sa paghinulsol ug sa pagtuo sa Dios.

23 Ug karon dihay pito ka simbahan sa yuta sa Zarahemla. Ug nahitabo nga si bisan kinsa nga nagmatinguhaon sa pagdala diha kanila sa ngalan ni Kristo, o sa Dios, nagpasakop sila sa mga simbahan sa Dios;

24 Ug sila gitawag nga katawhan sa Dios. Ug ang Ginoo mibu-bo sa iyang Espiritu diha kanila, ug gipanalanginan sila, ug miuswag sa yuta.