1 Ngkai e koro bukina bwa a mwaiti kaain te roro ae rikirake ae a aki oota n ana taeka te uea ae Beniamina, ngkai bon ngaia ataei aika uarereke n te tai are e taetae iai nakoia ana botanaomata; ao a aki kakoauai aia katei aia kaaro.

2 A aki kakoaua are e a tia n taekinaki ibukin mangautiia maate, ao a aki kakoaua naba taekan rokon Kristo.

3 Ao ngkai ibukin aia aki kakoaua ao a aki oota n ana taeka te Atua; ao a matoatoa nanoia.

4 Ao a aki kan bwabetitoaki; ke ni kan kaaina te ekaretia. Ao a riki bwa aomata aika kaokoro n aron aia onimaki, ao a teimatoa n aroia anne, n aroia ni bwain te rabwata ma ni bure; bwa a rawa n tataro nakon te Uea ae Atuaia.

5 Ao ngkai n ana tai n tautaeka Motiaea ao mwaitia e karako riki nakon iteran mwaitia ana botanaomata te Atua; ma ibukin te itabaraara imarenaia taari ao e a rikirake mwaitia.

6 Bwa e koro bukina bwa a keweia aika a mwaiti ake a mena n te ekaretia n aia taetae ni kababa, ao a kairia nakon karaoan bure; mangaia ae e riai bwa aomata ake a karaoa te bure, aika kaain te ekaretia, a na katuaeaki man te ekaretia.

7 Ao e koro bukina bwa a kairaki nako mataia ibonga, ao a kairaki nakoia ibonga irouia tia reirei; ao a kairia ibonga nakon Aramwa, ae te ibonga are e rietata.

8 Ngkai e a tia te uea ae Motiaea n angan Aramwa te kariaiakaki i aon te ekaretia.

9 Ao e koro bukina bwa e aki ataia Aramwa bwa tera ae a tia ni karaoia; ma a mwaiti taan kakoaua ni kaaitaraia; eng, a mwaiti aomata ake a teirake ni kakoauai bure aika a mwaiti.

10 Ngkai bon akea te bwai ae aiaron aio are e a tia n riki mai i mwaaina i nanon te ekaretia; mangaia ae e raraoma tamnein Aramwa, ao e tua bwa a riai ni uotaki nako matan te uea.

11 Ao e taku nakon te uea: Taraia, aikai aomata aika a mwaiti ake ti a uotia nakoim, ae a tia n tabekaki bukinaia irouia tariia; eng, ao a bon tia ni kuneaki ni karaoan taian bure. Ao a aki rairinanoia man aia bure; mangaia ae ti a kairia nakoim, bwa ko aonga ni motiki taekaia n aron aia bure ake a karaoi.

12 Ma e taku te uea ae Motiaea nakon Aramwa: Taraia, N na aki motiki taekaia; mangaia ae N na anga nako nanon baim bwa ko na motiki taekaia.

13 Ao ngkai e a manga aki rau naba tamnein Aramwa; ao e nakon te Uea bwa e na titirakinna bwa teraa ae na karaoia ibukin aio, bwa e maaku bwa rimwi e karaoa te kairua imatan te Atua.

14 Ao e koro bukina bwa ngke e a tia n tataro ma nanona ni kabane nakon te Atua, ao e a taetae nakoina bwanaan te Uea, ni kangai:

15 Ko na kakabwaiaki Aramwa, ao a na kakabwaiaki aomata ake a bwabetitoaki i nanon nein Moomon. Ko kakabwaiaki ibukina ngkai e rang ni korakora am onimaki ti man ana taeka au toro are Abinataai.

16 Ao a na kakabwaiaki akekei ibukin aia onimaki ae korakora ti man taeka ake ko a tia n taekin nakoia.

17 Ao ko na kakabwaiaki ngkai ko a tia ni katea te ekaretia irouia te botanaomata aio; ao a na kamatoaki, ao a na riki bwa au botanaomata.

18 Eng, a na kakabwaiaki te botanaomata aio ake a tauraoi ni katoka arau iaoia; bwa a na aranaki n arau; ao au bwai ngaia.

19 Ao ibukin ae ko a tia n nakoiu ibukiia taan bure, ko na kakabwaiaki.

20 Bon ngkoe au toro; ao I berita n ae tabu nakoim bwa e na reke iroum te maiu ae akea tokina; ao ko na toro irou ao ko na waaki i nanon arau, ao ko na botiia au tiibu.

21 Ao te aomata are kan ongo n au taeka e na riki bwa au tiibu; ao ngaia are ko na butimwaia nako nanon te ekaretia, ao ngaia naba are N na butimwaia.

22 Bwa taraia, aio au ekaretia; ane bwabetitoaki ao e na bwabetitoaki nako nanon te rairannano. Ao ane ko butimwaia e na kakoaua arau; ao ngaia are N na bon kabwarai ana bure.

23 Bwa bon ngai are I uota buren te aonaba; bwa bon ngai are I a tia ni karikiia; bwa bon ngai are e kariaia are kakoaua ni karokoa te toki nnena i angataiu.

24 Bwa taraia, arau are a na aranaki iai; ao ngkana a kinaai ao a na nako mai, ao e na reke aia tabo ae akea tokina i angataiu.

25 Ao e na koro bukina bwa ngkana e tang te kauoua ni bu ao ngkanne akana tuai man kinaai a na nako mai n tei imatau.

26 Ao ngkanne a na ataia ae Ngai te Uea ae Atuaia, bwa ngai te Tia Kaboia; ma a na aki kabooaki.

27 Ao ngkanne N na taekinna nakoia bwa I aki kinaia; ao a na nako nakon te ai are aki totoki are e a tia ni katauraoaki ibukin te riaboro ma ana anera.

28 Mangaia ae I taekina aio nakoimi, bwa ane e aki kan ongo ni bwanaau, bon ngaia naba are e na aki butimwaeaki nakon au ekaretia, bwa ngaia are N na aki butimwaia n te kabanea ni bong.

29 Mangaia ae I kangai nakoim, Nako; ao ane e a tia ni bure nakoiu, ngaia are ko na motika taekana n aron ana bure are e a tia ni karaoia; ao ngkana e kaota ana bure nakoim ao nakoiu, ao e rairananona ma te nano ae koaua, ngaia ae ko na kabwara ana bure, ao N na kabwara naba ana bure.

30 Eng, ao N na kabwarai aia bure au botanaomata n aron katoa tain aia rairannano ibukin aia bure nakoiu.

31 Ao kam na kabwarai naba ami bure imarenami; bwa I kangai nakoimi, ane e aki kabwarai ana bure raona ngkana e a tia n rairananona, ao te aomata anne e na karekea te rekenikai nakoina.

32 Ngkai I kangai nakoim, Nako; ao ane e aki raira nanona man ana bure ao ngaia ae e na aki warekaki i buakoia au botanaomata; ao e na bwainaki aio ni moanaki man te tai aio.

33 Ao e koro bukina bwa ngke e ongo Aramwa taian taeka aikai ao e koroi bwa e aonga n iai irouna, bwa e aonga ni motiki taekaia kaain te ekaretia n aron ana tua te Atua.

34 Ao e koro bukina bwa e nako Aramwa ni motika taekaia aomata ake a tia ni kuneaki ni karaoa te bure, n ana taeka te Uea.

35 Ao ake a rairinanoia man aia bure ao a kaoti, ao e warekia i buakoia kaain te ekaretia.

36 Ao ake a rawa ni kaoti aia bure ao n rairinanoia man aia buakaka, ao ngaia ake a aki warekaki i buakoia kaain te ekaretia, ao a kamaunaki araia.

37 Ao e koro bukina bwa Aramwa e kairi aron ana waaki ni kabane te ekaretia; ao e a moanna ni manga reke irouia te rau ma te waaki n aron ana waaki te ekaretia, man tararua raoi aron maiuia imatan te Atua, ni butimwaia aika a mwaiti, ao ni bwabetitoia aika a mwaiti.

38 Ao ngkai bwai aikai ni kabane e karaoi Aramwa ma raona ni beku ake a tararua te ekaretia, ni kawakin raoi tua, reireia ana taeka te Atua ni bwai ni kabane, rawawata n aron karawawata aika a mwaiti, ngkai a bwainikirinaki irouia aika tiaki kaain ana ekaretia te Atua.

39 Ao a kamaunaia tariia; ao a kamaunaki naba, ngaia ni kabane n ana taeka te Atua, n aron aia bure, ke taian bure ake a tia ni karaoi, ngkai a tuangaki mai iroun te Atua bwa a na kakaonimaki n tataro, ao ni kaitau ni bwai ni kabane.